ភ្នំពេញៈ ទើបតែត្រឡប់ពីដែនដីអឺរ៉ុបក្នុងដំណើរកម្សាន្តជាមួយម្ចាស់ស្នេហ៍ថ្មី តារាចម្រៀងមេម៉ាយមួយភ្លើងដែលទើបល្បីព័ត៌មានជួបគ្រោះថ្នាក់សន្លប់បាត់ស្មារតីនៅទឹកដីភ្នំទឹកកក នៃប្រទេសអាល្លឺម៉ង់ អ្នកនាង អេដា ថ្មីៗនេះបានរំលេចរូបភាពហោះហើរទៅទឹកដីមហាអំណាចអាមេរិកជួបចាស់ទុំខាងប្រុស ជាការស្ដែងនូវចំណងស្នេហាមួយនេះកាន់តែរឹងមាំ។
ក្រោយពីជ្រើសរើសយកថ្ងៃកំណើត ១១ ខែវិច្ឆិកា ឆ្នាំ ២០១៧ ដើម្បីប្រកាសវត្តមានម្ចាស់បេះដូងថ្មី បុរសរូបសង្ហាកូនកាត់ ៣ សាសន៍ ខ្មែរ ចិន និងអាមេរិក មានលោក អេលែន តាន់ នោះតារាចម្រៀងបទអូរីជីណល អ្នកនាង គ្រួច សចរិយា ហៅ អេដា ត្រូវបានមហាជនមើលឃើញថា តែងតែបង្ហោះរូបថត និងសារផ្អែមល្ហែមជាមួយសង្សារបណ្ដូលចិត្ត។
បន្ទាប់ពីរួមដំណើរជាមួយលោក អេលែន យ៉ាងផ្អែមល្ហែមទៅទឹកដីអឺរ៉ុបកាលពីចុងឆ្នាំ អ្នកនាង អេដា នៅស្រុកខ្មែរមិនបានប៉ុន្មាន ក៏បំពេញគម្រោងហោះហើរទៅសហរដ្ឋអាមេរិក។
ដំណើរទៅទឹកដីមហាអំណាចលើកនេះ ក្រៅពីជួបអ្នកគាំទ្រនាងនៅរដ្ឋកាលីហ្វ័រនីញ៉ា ស្រីស្រស់មេម៉ាយមួយភ្លើង អ្នកនាង អេដា ក៏បានបង្ហាញវត្តមានរួមតុអាហារជាមួយបុរសចំណាស់ម្នាក់ដែលនាងហៅថា «ប៉ាប៉ា » ក្នុងអាហារដ្ឋានចិនឈ្មោះ Phnom Penh Noodle Shack។
តាំងពីបានបង្ហាញមុខមាត់ពិតគូស្នេហ៍ថ្មី ជាបុរសរូបសង្ហាកូនកាត់ ៣ សាសន៍ ឈ្មោះ អេលែន តាន់ ដែលជាស្ថាបនិករបស់អង្គការឈ្មោះស្ទែម (STEAM) កម្ពុជា ផ្តោតលើកម្មវិធីសិក្សាផ្នែកវិទ្យាសាស្ត្រ បច្ចេកវិទ្យា និងវិស្វកម្មនោះ កាលពីថ្ងៃទី ១១ ខែវិច្ឆិកា ឆ្នាំ ២០១៧ ចំថ្ងៃធ្វើខួបកំណើត វ័យ ២៨ ឆ្នាំមកនោះ តារាចម្រៀងស្រីអូរីជីណល់អ្នកនាង អេដា បានបំពេញគម្រោងការហោះហើរក្រៅប្រទេសជុំវិញពិភពលោក ដើម្បីបង្កើនសម្ព័ន្ធភាពដ៏ផ្អែមល្ហែមនឹងគូស្នេហ៍ថ្មី៕