.jpg)
មិនគួរឲ្យជឿថានាឡិកាដៃនេះផ្សំឡើងពីសំណល់ និងបេតុង។ រូបថត AFP
ក្រុងតៃប៉ិ: នាឡិកាដៃផលិតពីស៊ីម៉ងត៍ គ្រឿងសង្ហារិមរចនាពីបំពង់ទុយោរោងចក្រ និងបរិក្ខារផ្សេងៗបង្កើតឡើងពីស្រោមពូកម៉ូតូ អ្នកឌីហ្សាញតៃវ៉ាន់ បានឈ្នះចិត្ដអ្នកគាំទ្រយ៉ាងច្រើនទាំងនៅក្នុងស្រុក និងលើឆាកអន្ដរជាតិចំពោះម៉ាកយីហោឧស្សាហកម្មរបស់ខ្លួន។
ការឌីហ្សាញ ឆ្លុះបញ្ចាំងពីទីក្រុងបែបស៊ីវិល័យដ៏តូចចង្អៀតលើដែនកោះ និងបំណងចង់កែប្រែសម្ភារសាមញ្ញៗដែលសម្បូរទៅតាមតំបន់អគារ ឬក៏រោងជាងនានា។
អ្នកឌីហ្សាញគ្រឿងអលង្ការ និងនាឡិកា សៀន យូ បានប្រើបេតុងសម្រាប់ផលិតផលលោក ដោយចាប់ផ្ដើមផលិតចិញ្ចៀនពីវត្ថុជាតិផ្សំបេតុងនេះមុនគេបង្អស់។
ក្រោយពីធ្វើពិសោធជាមួយប្រភេទបេតុងផ្សេងៗ ពេលនេះ លោកបានប្រើល្បាយរូបមន្ដចម្រុះដែលធ្លាប់ប្រើពីសំណង់អគារ។
វត្ថុលក់ដាច់បំផុតចុងក្រោយរបស់លោក គឺជានាឡិការម៉ាស៊ីនដោយបំពាក់កញ្ចក់បេតុង ក្នុងរូបភាពជណ្ដើររង្វង់។ វាត្រូវបានដាក់លក់កាលពីឆ្នាំមុន និងបានលក់ដាច់បំផុតលើគេហទំព័ររៃអង្គាសប្រាក់ Zeczec ដោយប្រមូលមូលនិធិបានជាង ៤០ ម៉ឺនដុល្លារ ពីអតិថិជនជុំវិញពិភពលោក។
ផលិតផលរបស់លោកក៏ត្រូវបានដាក់លក់នៅចក្រភព អង់គ្លេស ជប៉ុន និងសហរដ្ឋអាមេរិក។ ពីជាងទុយោក្លាយជាអ្នកឌីហ្សាញផ្ទៃក្នុង លោក ដានីញ៉ែ ឈេង បានប្រើដែកទីបបង្កើតជាសម្ភារផ្សេងៗ ចាប់ពីអំពូលភ្លើងបំភ្លឺ រហូតដល់ធ្នើរ និងគ្រោងសាឡុងជាដើម។
ស្បែកកែបម៉ូតូត្រូវបានច្នៃទៅជាកាបូបដាក់លុយ និងលក់ក្នុងតម្លៃគួរសម។ រូបថត AFP
លោកបាននិយាយថា៖ «គ្រឿងលើកទឹកចិត្ដខ្ញុំគឺសាមញ្ញបំផុត។ ខ្ញុំធ្លាប់ជាជាងទុយោទឹក ហើយវាជាអ្វីដែលខ្ញុំធ្វើការជាមួយរៀងរាល់ថ្ងៃនេះ។ ខ្ញុំចង់ប្រើគំនិតក្ដីស្រមៃផលិតវត្ថុគួរឲ្យចាប់អារម្មណ៍ និងមានប្រយោជន៍»។
អតិថិជនក៏ពេញចិត្ដនឹងសមាសធាតុស្ទួយបរិស្ថានចំពោះផលិតផលច្នៃប្រឌិតទាំងនេះ។
បាលែន វូ បាននិយាយថា លោកមិនចង់ឲ្យកែបម៉ូតូ និងស្បែកអេប៉ុងបញ្ចប់ត្រឹមឃ្លាំងទុកដាក់អីវ៉ាន់នោះទេ។ ដូច្នេះ យកវាមកច្នៃជាកាបូបដៃ កាបូបយួរ និងសម្ភារផ្សេងៗទៀត។
សម្ភារច្នៃប្រឌិតមានមិនខ្វះ ហើយផលិតផលរបស់លោក វូ ពេលនេះត្រូវបានដាក់លក់នៅតាមបណ្ដាហាងនានាចាប់ពីតៃវ៉ាន់ដល់ញូវយ៉ក។
លោកអះអាងថា៖ «យើងកំពុងប្រែក្លាយសម្ភារជិតអស់សុពលភាពទៅជាផលិតផលថ្មីៗ ដែលអាចប្រើបានយូរអង្វែងទៀត»៕ AFP/HR
