.jpg)
ទិដ្ឋភាពកោះសាន់តូរីនី ប្រទេសក្រិកមានដំបូលផ្ទះពណ៌ខៀវ ស៊ីទៅនឹងពណ៌សមុទ្រខៀវស្រងាត់។
អ្នកជំនាញព្យាបាលផ្លូវចិត្ដតាមរយៈពណ៌ អាលីសុន ស្ដេនឌីស បានអះអាងថា ពណ៌ខៀវជួយធ្វើឲ្យចិត្ដស្ងប់ និងបង្កើតភាពស្រស់ថ្លាទាំងផ្លូវកាយ និងផ្លូវចិត្ដ។ តើមានកន្លែងណាខ្លះក្នុងលោក ដែលសម្បូរពណ៌ខៀវដូច្នេះ?
កោះសាន់តូរីនី ប្រទេសក្រិក
អ្វីដែលល្បីល្បាញបំផុត រូបភាពដែលចាប់ចិត្ដមុនគេពេលអ្នកនឹកដល់កោះសាន់តូរីនី នោះគឺដំបូលផ្ទះសំបែងពណ៌ខៀវទឹកប៊ិកដែលចំទើតអើតគន់មហាសាគរឥតកោះត្រើយ។
ពេលអ្នកមកឃើញទេសភាពដំបូលស្រស់បំព្រងដ៏ល្បីល្បាញលើដែនកោះប្រទេសក្រិក អាហារឈ្ងុយឆ្ងាញ់ ដើរផ្សងព្រេង និងសីតុណ្ហភាព ២៦ អង្សាសេ គ្មានអ្វីស្ងប់សុខជាងបរិយាកាសរំភើយស្រួលខ្លួនបែបនេះទៀតទេ។
ប៉ុន្ដែវាក៏ល្បីចំពោះស្រមោលម្លប់ពណ៌ខៀវស្រងាត់ ដែលគ្របដណ្ដប់លើផ្ទៃមេឃ ហើយវាអាចធ្វើឲ្យអ្នកមានអារម្មណ៍ស្រស់ស្រាយ។
អាលីសុន បាននិយាយថា៖ «ពណ៌ខៀវបង្កើតអារម្មណ៍ស្ងប់សុខ និងជួយឲ្យរាងកាយរំដោះស្រេ្តស និងមានជំនឿចិត្ដ»។
ក្រុងព័រតូ នៅព័រទុយហ្គាល់
ទីក្រុងព័រតូស្រោបដោយជញ្ជាំងការ៉ូក្បាច់បារ៉ុកមានគំនូរពណ៌ខៀវ។
ទង់ជាតិព័រទុយហ្គាល់ អាចមានពណ៌ក្រហម និងបៃតង តែទីក្រុងទី ២ របស់ប្រទេសនេះរំលេចនូវពណ៌ខៀវសុទ្ធ។
ខណៈទីតាំងឆ្នេរបាំងនូវសម្រស់ពណ៌ខៀវចាំងឆ្លុះពីផ្ទៃសមុទ្រ ទីក្រុងព័រតូមួយនេះស្រោបជញ្ជាំងការ៉ូក្បាច់បារ៉ុក ដែលបង្ហាញភាពទាក់ទាញតាមដងវិថីជាមួយពណ៌ខៀវស្រងាត់។
អ្នកនឹងឃើញទិដ្ឋភាពបែបនេះទូទាំងក្រុង ឬពណ៌ខៀវក្រៅអគារ និងក្រោមខ្លោងទ្វារព្រះវិហារ។
អាលីសុន បានលើកឡើងថា៖ «ពណ៌ខៀវសម្អាតភាពស្រអាប់ និងមន្ទិលសង្ស័យ។ ពណ៌ខៀវទឹកប៊ិកនាំអារម្មណ៍ស្វាហាប់ និងបញ្ជាក់ភាពស្មោះស្ម័គ្រតាំងបុរាណកាល»។
ក្រុង Juzcar នៅ អេស្ប៉ាញ
ក្រុង Juzcar នៅអេស្ប៉ាញ ដែលជាប់រហស្សនាមថាភូមិ Smurf។
ម៉ាឡាហ្គា គឺជាគោលដៅវិស្សមកាលដ៏ពេញនិយមបំផុតបន្ថែមដោយឆ្នេរខ្សាច់ពណ៌ មាស។ តែអ្វីដ៏ទាក់ទាញគឺភូមិ Juzcar ដ៏តូច ជាប់រហស្សនាម ភូមិ Smurfs។
ផ្ទះពណ៌ផ្ទៃមេឃ ចំទើតលើជម្រាលភ្នំដ៏គួរឲ្យទាក់ចិត្ដ និងជួយបន្សាបអារម្មណ៍ច្របូលច្របល់។
អាលីសុន បានបន្ថែមថា៖ «នេះជាពណ៌ខៀវឆ្លុះបង្កប់ពណ៌បៃតង ដ៏ស្រស់បំព្រង ដែលអនុញ្ញាតឲ្យយើងសម្រាកស្រួល បង្កើតអារម្មណ៍ជឿជាក់ និងសេចក្ដីសុចរិត។
ពណ៌នេះបង្កើតនូវភាពស្ងប់សុខ តែក៏ទាក់ទងនឹងធម្មជាតិ និងការចិញ្ចឹមបីបាច់នាំឲ្យកើតចិត្ដសប្បុរសផងដែរ»៕
