ក្រុងឡុងដ៍ : រូបភាពប៉ុន្មានសន្លឹកដំបូង បានបង្ហាញពីរទេះភ្លើងរំអិលយីហោថ្មីរចនាប័ទ្មភាពយន្ដរន្ធត់ Wicker Man ក្រោមទំហំទឹកប្រាក់ ២២,២១ លានដុល្លារ ដែលគ្រោងនឹងបើកសម្ពោធនៅរីសត Alton Towers។
គោលដៅទេសចរណ៍រញ្ជួយព្រលឹង គឺជារទេះភ្លើងរំអិលឈើដំបូងដែលត្រូវបានសាងសង់ឡើងក្នុងចក្រភពអង់គ្លេសរយៈពេល ២១ ឆ្នាំចុងក្រោយនេះ ហើយវាក៏នឹងរំលេចនូវព្រះអគ្គីផងដែរ។
រូបភាពដ៏ព្រឺព្រួចនៃរទេះភ្លើងរំអិលប្រវែង ១៧ ម៉ែត្រ បានបង្ហាញពីឧបសគ្គដែលអ្នកជិះត្រូវជួបប្រទះជាមួយគ្រោងឈើមនុស្សនៅចុងម្ខាង និងក្បាលចៀមនៅជ្រុងម្ខាងទៀត ដែលឆេះភ្លើងសន្ធោរសន្ធៅ ខណៈរទេះភ្លើងរត់ទម្លុះទ្រូងរបស់វា។
មុនពេលឡើងជិះរទេះភ្លើងរំអិល Wicker Man អ្នកជិះនឹងចាប់ផ្ដើមដំណើរទៅកាន់ពិភពនៃសហគមន៍អាថ៌កំបាំង Beornen ដែលរស់នៅក្នុងឈើជុំវិញរីសត Alton។ បន្ទរដោយសំឡេងស្មូតលន្លង់លន្លោច និងក្រសែភ្នែកអាថ៌កំបាំងសម្លើងមើលពួកគេ ភ្ញៀវនឹងត្រូវបានជ្រើសរើសឲ្យចូលរួមវគ្គសាកល្បងមុនពេលចាប់ផ្ដើមជិះមែនទែន។
រទេះភ្លើងរំអិល Wicker Man គ្រោងបើកសម្ពោធនៅនិទាឃរដូវ ហើយដីសរុប ៤ ម៉ឺនតោនត្រូវបានកាយដើម្បីសង់ទីលានកម្សាន្ដរញ្ជួយអារម្មណ៍នេះ។
ផ្លូវរត់លាតសន្ធឹងប្រវែង ៦១០ ម៉ែត្រ ហើយវាត្រូវបានផ្លូវឡើងពីឈើធម្មជាតិដែលប្រើដៃមនុស្សឆ្លាក់យ៉ាងពិសេសសម្រាប់ទីលាននេះ។ ពេលចេញដំណើរម្ដងៗ មានរទេះភ្លើងពីរ ដែលទេះភ្លើងនីមួយៗ មាន ៦ ទូរឈើផ្ទុកមនុស្ស ១២ នាក់ និងសុរប ២៤ ម៉ោង។
រទេះភ្លើងរំអិល Wicker Man ប្រើឈ្មោះរួមជាមួយនឹងភាពយន្ដរន្ធត់ឆ្នាំ១៩៧៣ ដែលសម្ដែងដោយ អេដវើដ វូដវើដ។ វាធ្វើឲ្យផលិតកម្ម Merlin Entertainment ដែលជាម្ចាស់ឧទ្យាន្ដកម្សាន្ដនៅ Staffordshire នេះចំណាយពេល ៤ ឆ្នាំទើបសង់ទីលានចប់សព្វគ្រប់។
ក្នុងភាពយន្ដនោះ ប៉ូលិសម្នាក់បានធ្វើដំណើរទៅកាន់ប្រជុំកង់ Summerisle ប្រទេសស្កុតលែន និងរកឃើញក្មេងបាត់ខ្លួនម្នាក់ ដែលអ្នកស្រុកអះអាងថាមិនដែលមាន។ មិនយូរប៉ុន្មាន ជិវិតមន្ដ្រីប៉ូលិសរូបនេះ ប្រឈមនឹងគ្រោះថ្នាក់ ពេលបានដឹងរឿងកាន់តែច្រើន។
ហ្រ្វង់ស៊ីស ជេកសុន នាយកប្រតិបត្ដិនៅរីសត Alton Towers បាននិយាយថា៖ «Wicker Man គឺជាគម្រោងមហិមារបស់រីសត នាពេលបច្ចុប្បន្ន និងមានក្ដីរំភើបរីករាយក្នុងការបង្ហាញគោលដៅរញ្ជួយអារម្មណ៍ថ្មីរបស់យើងទៅកាន់ពិភពលោក។ យើងទ្រាំរង់ចាំក្នុងការផ្ដល់បទពិសោធថ្មីដល់ភ្ញៀវនៅ Wicker Man មិនបានឡើយ ពេលឧទ្យាននេះបើកសម្ពោធក្នុងនិទាឃរដូវខាងមុខ»៕ HR/ប្រភព Dailymail.co.uk