Search form

Login - Register | FOLLOW US ON

Logo of Phnom Penh Post newspaper Phnom Penh Post - K-Film Contest ​រក​ឃើញ​ម្ចាស់​ជយ​លាភី​រដូវកាល​ទី ២​

Content image - Phnom Penh Post
ពិធី​បុណ្យ​ស្រូវ និង​ចំបើង​ នៅ​ភូមិទឹក​ជោរ ឃុំទឹកជោរ ស្រុក​ព្រះនេត្រ​ព្រះ បន្ទាយ​មានជ័យ​។ ហ្វេសប៊ុក

K-Film Contest ​រក​ឃើញ​ម្ចាស់​ជយ​លាភី​រដូវកាល​ទី ២​

ភ្នំពេញៈ កម្ម​វិធី​ប្រកួត​ប្រជែង​ភាព​យន្ដ​ខ្នាតខ្លី​ ឬ​ K-Film Contest​ ដែល​រៀប​ចំ​ដោយ​ទីភ្នាក់ងារ​ជំរុញ​ការ​វិនិយោគ​ពាណិជ្ជ​កម្ម​កូរ៉េហៅ​ថាភ្នាក់ងារ KOTRA​ នោះ​បាន​ប្រគល់​រង្វាន់​ដល់ម្ចាស់​ជយ​លាភី​​រដូវ​កាលទី ២ របស់​ខ្លួន​កាល​ចុងខែ​មករា ​ដែលមាន​ប្រធាន​បទឆ្លុះ​បញ្ចាំង​ពី​ទិដ្ឋ​ភាពនៃ​ពិធី​បុណ្យ​ស្រូវ និង​ចំបើង​នៅ​ឯក្នុង​ខេត្ដ​បន្ទាយ​មានជ័យ​កាល​ដើម​ខែ​មករា​ឆ្នាំ ២០១៦ នោះ​។

ម្ចាស់​ជយ​លាភី​បីរូប​នៃ​កម្ម​វិធី​ប្រកួត​ប្រជែង​ភាព​យន្ដ​ខ្នាត​ខ្លី​ ឬ​ K-Film Contest រដូវកាលទី ២ ត្រូវ​បាន​ប្រគល់រង្វាន់​នៅ​ឯ​សាល​ WIT Plaza នៃ​អគារ ​PGCT កាល​ថ្ងៃទី ២៩ ខែ​មករា​ ឆ្នាំ ២០១៦ កន្លងមក​។ភាពយន្ត​ខ្នាត​ខ្លី​រយៈ​ពេលបី​នាទីដែល​មាន​ចំណង​ជើង​ថា «​Bale & Paddy Art Festival in my Province» របស់​ផលិត​ករ សំ​ សុផានិច្ច​ បានទទួល​រង្វាន់លេខ ១ ជា​មួយ​នឹង​ប្រាក់​រង្វាន់​ចំនួន ​៥០០ ដុល្លារ​ ​ខណៈ​រឿង​« Bale and Paddy My country»​ របស់​ផលិតករ ឈិន ឡុង​ បាន​ចំណាត់​ថ្នាក់លេខ ២ ជា​មួយ​នឹង​ប្រាក់​រង្វាន់​ចំនួន ​៣០០ ​ដុល្លារ និង​រឿង​ «3 Heros ឬ​ មនុស្ស​រុក្ខ​ជាតិទាំង ៣» របស់​ផលិតករ ​ស្វាយ លីម៉េង​ ជាមួយប្រាក់​រង្វាន់ ២០០ ដុល្លារ។

Content image - Phnom Penh Post
​ជយ​លាភី​នៃ​កម្ម​វិធី K-Film Contest រដូវកាលទី ២។ Kotra

កម្មវិធី​ K-Film Contest ​នេះប្រារព្ធ​ឡើងនៅ​ក្នុង​គោល​បំណង​ចូល​រួមជួយ​ផ្សព្វផ្សាយ និងលើក​ស្ទួយ​វិស័យ​ឧស្សាហកម្មភាព​យន្ត​​តាមរយៈ​ស្នាដៃ​ផលិត​រឿង​ខ្លីៗរបស់​ផលិតករ​ខ្មែរ​នាសម័យ​ក្រោយ និង​ចង់​រួមចំណែក​ក្នុង​សកម្មភាព​ល្អ​ៗនៅ​សង្គម​ខ្មែរ។

លោក វ៉ែន សិទ្ធិ ប្រធាន​គ្រប់គ្រង​ទូទៅ​នៃ​កម្មវិធី​ប្រកួត​ប្រជែងភាព​យន្ដ​ខ្នាតខ្លី K-Film Contest បាន​ឲ្យ​ដឹង​ថា​៖ «​សម្រាប់​ការ​ជ្រើស​រើស​ម្ចាស់​ជយ​លាភីភាព​យន្តខ្នាត​ខ្លី​លើកទី ២ ដែល​យើង​ចង់​ឲ្យ​ផលិត​ករ​វ័យ​ក្មេង​ប្រើ​គំនិត និង​ទេព​កោសល្យ​ថត​របស់​ខ្លួន​នា​ពេលចូល​​រួម​នៅ​ក្នុង​កម្ម​វិធី​បុណ្យស្រូវ និង​ចំបើង​កាល​ពីដើម​ខែ​មករា នៅឯ​​ខេត្ត​បន្ទាយ​មាន​ជ័យនៅ​ឯ​ភូមិទឹកជោរ ឃុំទឹកជោរ សិ្ថត​នៅ​ក្នុង​ស្រុក​ព្រះ​នេត្រព្រះ។ យើង​ទទួល​បាន​បេក្ខជន​ចូលរួម​ប្រកួតតែ​ចំនួន ៧ រូប​គឺ​មាន​ប្រុស ៥ នាក់​ និង​ស្រី ២ នាក់​»។

ដោយ​ឡែក​គម្រោង​នៃ​ការ​ប្រកួត​ប្រជែង​កម្ម​វិធី ​K-Film Contest រដូវ​កាលទី ៣ នឹង​ចាប់​ផ្តើម​ផ្សាយដំណឹងទៅ​ដល់​បេក្ខជន​ចូល​រួម​ប្រកួត​ចាប់​ពី​ថ្ងៃទី ១ ខែ​កុម្ភៈនេះ​ ​រហូត​ដល់ថ្ងៃ​ទី ១៨ ខែ​កុម្ភៈ​ឆ្នាំ ២០១៦ ខណៈ​ប្រធានបទ​មាន​ចំណង​ជើង​ថា​«ពន្លឺ និង​ភូមិខ្ញុំ»។ ​

លោក វ៉ែន សិទ្ធិ បង្ហើប​ឲ្យ​ដឹង​ថា៖ «សម្រាប់​គម្រោង​ទី ៣ នៃ​កម្មវិធី ​K-Film Contest​ យើង​នឹង​ធ្វើ​នៅ​ឯ​ខេត្តព្រះ​វិហារ​វិញម្តង។ ចំពោះ​លក្ខខណ្ឌ​នៃ​ការ​ផលិតភាព​យន្ត​បេក្ខជន​ត្រូវផលិត​ឲ្យ​ស៊ី​ទៅ​នឹង​ប្រធាន​បទបាន​ដាក់​ជូន​គឺ «ពន្លឺ និង​ភូមិ​ខ្ញុំ» ហើយ​រយៈពេល​នៃការ​ផលិត​វិញ​គឺ​ត្រឹមតែ​ចំនួន ៣ នាទី​ប៉ុណ្ណោះ​។ យើង​បើក​ទូលាយ​ដល់​បេក្ខជន​ទាំង​អស់​ មិន​ថា​ចាស់ ឬក្មេងនោះ​​ឡើយ​ ហើយ​ពួកគេ​អាចនឹង​ត្រៀម​សម្រាប់ការ​ផលិត​សាច់​រឿង​របស់ខ្លួន​ជា​បណ្តើរ​ៗ​បានចាប់​ពី​ជូន​ដំណឹង​នេះត​ទៅ»៕

0

Comments

Please, login or register to post a comment

ព័ត៌មានពាក់ព័ន្ធ