.jpg)
ទិដ្ឋភាពនៅតំបន់កោះនៃឧទ្យានជាតិកូម៉ូដូ របស់ឥណ្ឌូនេស៊ី ដែលជាជម្រកល្មូនយក្ស។ AFP
ក្រុងហ្សាការតា: រៀងរាល់ឆ្នាំភ្ញៀវរាប់សែននាក់ បានធ្វើដំណើរមកកាន់ឧទ្យានជាតិកូម៉ូដូ ដើម្បីទស្សនាសត្វកម្រៗ ដូចជានាគកូម៉ូដូធំបំផុតក្នុងលោក។
ប៉ុន្ដែ ភ្ញៀវទេសចរដែលមានគម្រោងមកកម្សាន្ដនៅឧទ្យានជាតិកូម៉ូដូ នៅកោះ West Flores ខេត្ដ East Nusa Tenggara ប្រទេសឥណ្ឌូនេស៊ី ពេលនេះ ទេសចរគួរតែតាមដានពីលទ្ធភាពនៃវិធានការរបស់រដ្ឋាភិបាលក្នុងបំណងគ្រប់គ្រងពីលំហូរភ្ញៀវមកកាន់គោលដៅទេសចរណ៍កំពូលមួយនេះ។
ចំនួនភ្ញៀវដ៏ច្រើនសន្ធឹកមកកាន់ឧទ្យានជាតិបានបង្កការរំខានដល់ការរស់នៅរបស់នាគកូម៉ូដូ អាជ្ញាធរឧទ្យានជាតិកូម៉ូដូបានឲ្យដឹងថា ការចេញគោលនយោបាយកាលពីថ្ងៃទី២០ ខែមករា បំណងកំណត់ចំនួនភ្ញៀវទស្សនានាគកូម៉ូដូក្នុងឆ្នាំនេះ។
នាយកឧទ្យានជាតិ បាននិយាយថា ចំនួនភ្ញៀវទេសចរទាំងជាតិ និងអន្ដរជាតិកើនឡើងយ៉ាងគំហុកនេះអាចគំរាមកំហែងដល់ជម្រកសត្វ។
ស្របពេលនេះមន្ដ្រីពាក់ព័ន្ធផ្សេងៗធ្លាប់បានព្រមានថា ភ្ញៀវទេសចរច្រើនពេកអាចធ្វើឲ្យនាគកូម៉ូដូកើតរោគស្ដ្រេសហើយបញ្ហាខ្វះចំណី វាអាចបង្វែរគោលដៅរកមនុស្សវិញ។ លើសពីនេះ ពួកគេបានបន្ដថា ចំនួនច្រើនរហូតដល់គ្រប់គ្រងមិនបាន បង្កការលំបាកដល់កម្មករថែរក្សាបរិស្ថានទីនោះ។
សត្វល្មូនកូម៉ូដូអាចធំធាត់ដល់ទម្ងន់ជាង ១០០ គីឡូក្រាម។ AFP
ការបង្កើនតម្លៃសំបុត្រចូលទស្សនាឧទ្យានទំនងជាវិធានការចាំបាច់មួយដើម្បីគ្រប់គ្រងចំនួនភ្ញៀវ។ ភ្ញៀវទាំងជាតិនិងអន្ដរជាតិជិត ១២ ម៉ឺននាក់បានមកទស្សនាឧទ្យានក្នុងឆ្នាំ២០១៧ ប្រមាណ ១១ ភាគរយខ្ពស់ជាងតួលេខឆ្នាំចាស់។
រដ្ឋាភិបាលឥណ្ឌូនេស៊ីជោគជ័យក្នុងការអភិវឌ្ឍឧទ្យានកូម៉ូដូជាគោលដៅទេសចរណ៍ដ៏ទាក់ទាញបំផុតមួយរបស់ប្រទេស។ ចំនួននាគកូម៉ូដូបានកើនដល់ ៣០១២ ក្បាលរស់នៅក្នុងឧទ្យានជាតិកូម៉ូដូ។ បង្កើតឡើងនៅឆ្នាំ១៩៨០ ឧទ្យានជាតិកូម៉ូដូគឺជាជម្រករបស់នាគកូម៉ូដូ ដែលជាអម្បូរសន្តានបង្គួយយក្សបុរេប្រវត្ដិដ៏កម្របំផុតក្នុងលោក។
ក្នុងឆ្នាំ១៩៩១ UNESCO បានចុះបញ្ជីដែនកោះនេះមានសត្វនាគកូម៉ូដូប្រមាណ ៣ ពាន់ក្បាលចូលក្នុងសម្បត្ដិបេតិកភណ្ឌពិភពលោក។ ពួកវាត្រូវការពេលពី ៨ ទៅ ៩ ឆ្នាំដើម្បីរីកធំធាត់ និងមានអាយុកាលប្រមាណ ៣០ ឆ្នាំ។
នៅក្នុងព្រៃនាគពេញវ័យមានទម្ងន់ ៧០ គីឡូក្រាម តែពូជសត្វព្រៃនេះធំបំផុតមានប្រវែង ៣,១៣ ម៉ែត្រ និងទម្ងន់ ១៦៦ គីឡូក្រាមឯណោះ៕
ចំនួនភ្ញៀវនឹងត្រូវបានកំណត់ដើម្បីការពារបរិស្ថាន។ AFP
