Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្យូស​មាត់​ស្ទឹង​ ទំនប់​ម្កាក់ ផ្ដល់​ជំនោរ​ត្រជាក់ ក្រោម​សីតុណ្ហភាព​ហួតហែង

Content image - Phnom Penh Post
ក្យូសបណ្ដែត​ទឹក​អម​ដោយ​សម្រស់​ធម្មជាតិ​វាលស្រែ​ ស្ថិត​ក្នុង​ភូមិ​ទំនប់​ម្កាក់ ឃុំ​គោកធ្លក​លើ ស្រុក​ជីក្រែង ខេត្ដ​សៀមរាប​​។ ផា លីណា

ក្យូស​មាត់​ស្ទឹង​ ទំនប់​ម្កាក់ ផ្ដល់​ជំនោរ​ត្រជាក់ ក្រោម​សីតុណ្ហភាព​ហួតហែង

សៀមរាប: ក្យូស​រាង​ដូច​ផ្សិត​ចំបើង​តម្រៀប​ជាជួរ​លើ​ក្បូន​បណ្ដែត​ទឹកស្ទឹង​អមដោយ​សម្រស់​ធម្មជាតិ​វាលស្រែ និងផ្កា​កំប្លោក​បង្កើត​ជាទីឋាន​ត្រជាក់​ចិត្ដ​ស្វាគមន៍​ភ្ញៀវ​និយម​បន្ធូរ​ភាព​ក្ដៅ​ស្អុះស្អាប់​ជាមួយ​ការជិះ​ទាទឹក និង ស្រស់​ស្រូប​ម្ហូបអាហារ​ថ្ងៃត្រង់​ជួបជុំគ្នា​យ៉ាង​សប្បាយ​រីករាយ​ខណៈ​ទឹកស្ទឹង​ជីក្រែង​ឃ្លាត​ឆ្ងាយ​ពីខ្នង​ទំនប់ ម្កាក់​មួយរយៈ​នារដូវ​ប្រាំង។

ស្ថិតក្នុង​ភូមិ​ទំនប់​ម្កាក់ ឃុំ​គោកធ្លកលើ ស្រុក​ជីក្រែង ខេត្ត​សៀមរាប​ចម្ងាយ​ប្រមាណ ៨ គីឡូម៉ែត្រ​ពី​ផ្លូវជាតិ​លេខ ៦ ប៉ាណូ​ពីរនៅ​នឹង​គល់ស្ពាន​ទំនប់​ម្កាក់​ទាំង​សងខាង​រំលេច​ផ្ទៃ​ពណ៌​ខៀវ អក្សរ​ខ្មែរ និង​អង់គ្លេស រួម​ជាមួយ​រូប​សញ្ញា​បាន​សរសេរ​ថា «ប្រយ័ត្ន ទឹក​ជ្រៅ​ហាម​ចុះ​ទឹក» គឺជា​សារ​ព្រមាន​ប្រាប់​ប្រជាពលរដ្ឋ ជាពិសេស ភ្ញៀវទេសចរ​មកពី​តំបន់​ឆ្ងាយ​ដែល​មិន​បានដឹង​ពីស្ថានភាព​ទឹក​ក្រោម​ស្ពាន​ទំនប់​ដោយ​ខ្លាច​ក្រែង​បង្កជា​គ្រោះថ្នាក់​ដល់​អាយុជីវិត​ជាយ​ថាហេតុ។

ក្យូស​មាត់​ស្ទឹង​ ទំនប់​ម្កាក់ ផ្ដល់​ជំនោរ​ត្រជាក់ ក្រោម​សីតុណ្ហភាព​ហួតហែង

ប៉ុន្ដែ​គួរឲ្យ​សោកស្ដាយ​កំពែង​ទំនប់​ដ៏ធំ​ល្វឹងល្វើយ​ដែល​ទ្រទឹក​រាប់រយ​ម៉ែត្រគុប​ហូរហៀរ​ពីខ្នង​ទំនប់​សម្រាប់​ភ្ញៀវ​ដ៏ណែន​តាន់តាប់​ងូតទឹក​កម្សាន្ដ​ស្ទើរ​ពេញ​មួយឆ្នាំ​ដល់​វេលា​ត្រូវ​សណ្ដក​ទឹក​អស់​បន្សល់​នៅតែ​សំណង់​បេតុង​ទើប​បញ្ចប់ការ​កសាង​ថ្មីថ្មោង។

បងស្រី យ៉េង ហៅចែ យ៉េង មាន ១៦ ក្យូស​សម្រាប់​ទទួល​ភ្ញៀវទេសចរ​ជិត​ឆ្ងាយ​បានឲ្យ​ដឹងថា៖ «ទើប​ប៉ុន្មាន​ខែ​នេះ​ទេចិន [ជា​អ្នកម៉ៅការ​សាងសង់​ទំនប់] បាន​បង្ហូរទឹក​ឲ្យអស់​ដើម្បី​សង់​ជើង​ទំនប់។ ដូច្នេះ​វាអស់​ទឹក​សម្រាប់​ភ្ញៀវ​ងូត​លេង»។

កំពុង​ចម្អិន​ម្ហូប​ជូន​ភ្ញៀវ​បណ្ដើរ​និង​ផ្ដល់​បទសម្ភាស​ជាមួយ​ភ្នំពេញ ប៉ុស្ដិ៍ បណ្ដើរ អ្នកស្រី​បាន​បន្ដថា​ក្រោយពី​ទំនប់​នេះ​កសាង​រួច មាន​ភ្ញៀវ​មក​លេង​ច្រើន​សន្ធឹក មិន​ថាថ្ងៃ​ធម្មតា​ថ្ងៃ​ចុង​សប្ដាហ៍ ជាពិសេស​ថ្ងៃ​បុណ្យ​ភ្ជុំបិណ្ឌ។

យោងតាម​ទីភ្នាក់ងារ AKP ដែល​បាន​ដកស្រង់​ចេញ​ហ្វេសប៊ុក​ក្រសួង​ធនធាន​ទឹកបាន​ចុះផ្សាយ​កាល​ពី​ខែកុម្ភៈ​កន្លង​ទៅ​ថា ទំនប់​ត្រូវបាន​បើក​ការដ្ឋាន​សាងសង់​កាលពី​ឆ្នាំ ២០១៥ នឹងផ្តល់​ទឹក​ស្រោចស្រព​ដីកសិកម្ម​ជាង ២ ម៉ឺន​ហិកតា និង​ក៏ជា​រមណីយដ្ឋាន​ដ៏ពេញ​និយម​មួយ​ផងដែរ។

Content image - Phnom Penh Post
ទំនប់ម្កាក់​នារដូវ​ប្រាំង សល់​តែ​សំណង់បេតុង​។ ផា លីណា

ប្រភព​ដដែល បាន​បន្ថែម​ថា៖ «ទំនប់​ជីក្រែង ឬ​ទំនប់​ម្កាក់​ស្ថិត​ក្នុង​ខេត្ដ​សៀមរាប​នេះ​ទាក់ទាញ​ភ្ញៀវទេសចរ​ប្រមាណ ៧ ម៉ឺននាក់​ក្នុង​ឆ្នាំ ២០១៦ កន្លង​ទៅ»។

ដោយ​អះអាងថា​អ្នកស្រី​មិន​គិតថ្លៃ​ខ្ពស់​លើ​ម្ហូបអាហារ (មាន់​មួយ​សម្រាប់ធ្វើ​ម្ហូប​តម្លៃ​ពី ៣៥ ០០០ រៀល​ទៅ ៤០ ០០០ រៀល) និង ​ភេសជ្ជៈ​ទូទៅ​ ដែល​មិន​លើស​ពីការ​លក់ដូរ​លើទី​ផ្សារ ម្ចាស់​ក្យូស​លម្ហែ​ស្ថិត​លើ​ទីតាំង​ផាសុកភាព​ជាងគេ​រូបនេះ​បាន​ប្រាប់ថា​នៅថ្ងៃ​ធម្មតា​អ្នកស្រី​ជួល​ក្យូស​ឲ្យ​ភ្ញៀវ​មួយ​ក្នុង​តម្លៃ ១ ម៉ឺនរៀល ហើយ​សម្រាប់​ថ្ងៃ​បុណ្យ​តម្លៃ ២ ម៉ឺនរៀល។ ចំណែកឯ​ការជិះ​ទាទឹក​កម្សាន្ដ មួយ​ម៉ោង​តម្លៃ ៥ ពាន់រៀល​នៅ​ថ្ងៃ​ធម្មតា និង​ថ្ងៃ​ពិសេស​តម្លៃ ១ ម៉ឺនរៀល។

គួរ​បញ្ជាក់ថា នៅ​រដូវភ្លៀង​ខាងមុខ ទំនប់​ម្កាក់​ដ៏ស្កឹមស្កៃ​នឹង​រំលេច​នូវ​ទស្សនីយភាព​ដ៏ស្រស់​ត្រកាល ខណៈ​ទឹក​ផ្ដើម​ហូរកាត់​តួទំនប់​ក្រោម​ស្ពាន ដែល​ប្រាកដជា​ឱកាស​កម្សាន្ដ​សម្រាប់​ភ្ញៀវ​យ៉ាង​ភ្លូកទឹក​ភ្លូកដី៕

Content image - Phnom Penh Post
ទេសចរ​ជិះ​ទាលេង​កម្សាន្ដ ​១ ម៉ោង​តែ ៥ ពាន់​រៀល។ ផា លីណា

Content image - Phnom Penh Post
មនុស្ស​ម្នា​កកកុញ​នៅ​ទំនប់​ម្កាក់​​អំឡុង​ខែ​តុលា ឆ្នាំ​មុន​។ ហ្វេសប៊ុក​

0

Comments

Please, login or register to post a comment