.jpg)
ទិដ្ឋភាពឆ្នេរក្រាលក្រួស ពណ៌សរលោង ដែលលាតសន្ធឹងប្រវែងជាង ១ គីឡូម៉ែត្រនៅប្រទេសហ្វីលីពីន។
ក្រុងម៉ានីល: ឆ្នេរក្រួសម៉ាប៊ួ (Mabua) ពិតជាល្អឯកក្នុងចំណោមឆ្នេរនៅប្រទេសហ្វីលីពីនដោយសារតែភាពរលោងស្អាតក្រួសពណ៌សដែលក្រាលលើច្រាំងសមុទ្រ។
ឆ្នេរក្រួសម៉ាប៊ួ ជាឆ្នេរជាប់សមុទ្រលាតសន្ធឹងប្រមាណជាងមួយគីឡូម៉ែត្រ យ៉ាងរលោងជាមួយនឹងក្រួសតូចធំគ្រប់ទំហំ។
វាស្ទើរតែគ្មានខ្សាច់មួយគ្រាប់នោះទេដែលស្ថិតនៅតាមឆ្នេរនៃក្រុងស៊ូរីហ្គាវ។ ច្រាំងឆ្នេរក្រួសនេះ ក្រាលដោយថ្មរលោងសុទ្ធសាធ ដែលភាគច្រើនមានរាងមូលទ្រវែង និងសំប៉ែត។
ខណៈឆ្នេរភាគច្រើនកកើតឡើងពីគ្រាប់ខ្សាច់ដែលត្រូវបានបោកបក់ដោយខ្យល់ ទឹករលក និងចរន្ដទឹក ការកកើតនៃឆ្នេរក្រួសម៉ាប៊ួ ដោយសារតែឥទ្ធិពលនៃរលកធំៗដែលបោកបក់ក្រួសមកទើរលើច្រាំង។
ក្រួសរលោង ក្នុងចំនួនដ៏ច្រើនឥតគណនាដែលបង្កើតបានជាឆ្នេរក្រួសម៉ាប៊ួ ស្ថិតក្នុងទំហំតូចធំ និងរូបរាងខុសៗគ្នា (ជាទូទៅវាមានរាងពងក្រពើ) មានអត្ថប្រយោជន៍ចំពោះសុខភាពថែមទៀត។
ឆ្នេរក្រាលក្រួសម៉ាប៊ួ ល្បីជួយម៉ាស្សាបាតជើងរបស់ភ្ញៀវទេសចរ។
ការដើរជាន់គ្រាប់ក្រួសរលោងដោយជើងទទេ យោងតាម អ្នកជំនាញម៉ាស្សាបាតជើង បានបង្ហាញថា បានជះឥទ្ធិពលយ៉ាងខ្លាំងលើរាងកាយ ខណៈបាតជើងមានចំណុចប្លាតដែលតភ្ជាប់ទៅនឹងសរីរាង្គខាងក្នុង ដោយនាំឲ្យឆ្នេរក្រួសនេះក្លាយជាគោលដៅទេសចរណ៍លម្ហែ និងម៉ាស្សាសុខភាព។
ជាមួយការទាក់ទាញទាំងភ្ញៀវជាតិ និងអន្ដរជាតិ ភ្ញៀវទេសចរកោតស្ញប់ស្ញែងចំពោះផ្ទៃទឹកត្រជាក់ និងថ្លាឈ្វេងដែលផ្ដល់ជាទីកន្លែងហែលទឹក និងលេងកីឡាស្គីលើទឹកដ៏ស័ក្ដិសម។ បើមានសំណាងបានឃើញរលកធំៗ អ្នកនឹងលេងជិះក្ដារបន្ទះ និងទូកក្ដោងថែមទៀត។
ផ្ទាំងថ្មធំៗនៅចុងឆ្នេរងាយស្រួលឡើង និងផ្ដល់ភាពរំជួលលស់ព្រលឹង តែជាទីឋានគន់ទេសភាពដ៏ស្រស់ត្រកាល។ វាជាទួលខ្ពស់សម្រាប់សម្រាកកាយដោយមានភ្នំជាផ្ទៃក្រោយថែមទៀត។
ឆ្នេរក្រួសម៉ាប៊ួ គឺជាឋានសួគ៌សម្រាប់អ្នកនិយមថតរូបដែលផ្ដិតយករូបភាពថ្ងៃលិច។ ឆ្នេរក្រួសធម្មជាតិម៉ាប៊ួ ស្ថិតនៅចម្ងាយផ្លូវប្រមាណ ៣០ នាទីពីទីក្រុងស៊ូរីហ្គាវ។
ទេសចរអាចធ្វើដំណើរតាមជម្រាលភ្នំ ឡើងផ្ទាំងថ្ម ហើយឆ្នេរក្រួសនេះស្ថិតនៅចុងម្ខាងទៀតនៃទួលភ្នំ។ បើអ្នកមិនចង់ដើរទេ អ្នកអាចជួលទូកនេសាទតូចៗជិះទៅកាន់ឆ្នេរក្រួសនេះតែម្ដង តែសូមកុំច្រឡំរើសដុំថ្មនេះដាក់ហោប៉ៅឲ្យសោះ៕HR
_2.jpg)
ដុំថ្មពណ៌សលោងមានច្រើនទំហំ និងមានសណ្ឋានសំប៉ែតទ្រវែង។
