ព្រះវិហារៈ ដោយ​មាន​គោលដៅ​ដ៏​ចម្បង​ជំរុញ​ការ​អភិរក្ស អប់រំ និង​លើក​ទឹកចិត្ត​ដល់​ប្រជាពលរដ្ឋ​ឲ្យចេះ​ស្រឡាញ់ ថែរក្សា​ការពារ​សត្វព្រៃ និង​តម្លៃ​ធម្មជាតិ​នោះ ទើប​អង្គការ​សមាគម​អភិរក្ស​សត្វ​ព្រៃ (WCS) បង្កើត​ឲ្យមាន​ជាតំបន់​សហគមន៍​ការពារ​ធម្មជាតិ និង​អភិវឌ្ឍ​ព្រៃវែង ប្រចាំ​ភូមិភាគ​ឧត្តរ​នៅក្នុង​ដែន​ជម្រក​សត្វព្រៃ​គូលែន​ព្រហ្មទេព ស្ថិត​ក្នុង​ភូមិ​ព្រៃវែង ឃុំ​ស្រយង់ ស្រុក​គូលែន ក្នុង​ខេត្ត​ព្រះវិហារ នៃ​ប្រទេស​កម្ពុជា មាន​ចម្ងាយ​ប្រមាណ​ជិត ២០ គីឡូម៉ែត្រ​ពីទី​រួម​ស្រុក ឬ​ចម្ងាយ​ជាង ៥០ គីឡូម៉ែត្រ​ចេញពី​ទីរួម​ខេត្ត​ព្រះវិហារ។