Search form

Login - Register | FOLLOW US ON

Logo of Phnom Penh Post newspaper Phnom Penh Post - ទី​លម្ហែកាយ​ថ្មី ម្ហូប​ជិត ១០០ មុខ អម​ខ្យល់​អាកាស​បរិសុទ្ធ​ក្រោម​ម្លប់​ស្បូវ​នៅ​ម្ដុំ​ព្រែកឯង

Content image - Phnom Penh Post
ទិដ្ឋភាព​ដ៏ត្រជាក់​ភ្នែក​នៅ​ភោជនីយដ្ឋាន​ ចូលចិត្ដ មាន​ម្លប់ឈើ ផលានុផល ​វាលស្មៅ និង​ស្ពាន​ឆ្លង​កាត់​ស្រះទឹក​។ ហេង ជីវ័ន

ទី​លម្ហែកាយ​ថ្មី ម្ហូប​ជិត ១០០ មុខ អម​ខ្យល់​អាកាស​បរិសុទ្ធ​ក្រោម​ម្លប់​ស្បូវ​នៅ​ម្ដុំ​ព្រែកឯង

ភ្នំពេញៈ ស្ថិត​នៅ​លើ​វិសាលភាព​ដីឡូត៍​ទទឹង ៦០ ម៉ែត្រ និង​បណ្តោយ ២០០ ម៉ែត្រ ទី​លម្ហែកាយ​មួយ​ដែល​ទើប​បើក​ដំណើរការ​សាកល្បង​ថ្មីថ្មោង មាន​ម្លប់​ក្យូស​ប្រក់​ស្បូវ​សង់​លើ​វាលស្មៅ​បៃតង​ខ្ចី ដើម​ស្វាយ​ត្រជាក់​ត្រឈឹង​ត្រឈៃ និង​ខ្យល់​អាកាស​ល្អ​បរិសុទ្ធ កំពុង​តែស្រូប​ចំណាប់​អារម្មណ៍​ភ្ញៀវ​និយម​ទទួល​ទាន​អាហារ​នៅ​ក្បែរៗ​ទីក្រុង​ជាមួយ​ជម្រើស​មុខម្ហូប​ឈ្ងុយ​ឆ្ងាញ់​ច្រើន ហើយ​តម្លៃ​ក៏​សមរម្យ​ទៀត​ផង។

ភោជនីយដ្ឋាន ចូលចិត្ត មាន​ទីតាំង​ស្ថិត​នៅ​ក្នុង​តំបន់​នៃ​សង្កាត់​ព្រែក​ឯង ខណ្ឌ​ច្បារអំពៅ រាជធានី​ភ្នំពេញ ដោយ​លោក​អ្នក​គ្រាន់តែ​ធ្វើ​ដំណើរ​ចូលតាម​ផ្លូវ​រោងចក្រ​ស្រាបៀរ​ថៃហ្គឺរ ហួស​រមណីយដ្ឋាន សួនសុបិន បន្តិច​នឹង​ប្រទះ​ឃើញ ភោជនីយដ្ឋាន ចូលចិត្ត នៅ​ខាងឆ្វេង​ដៃ​តែម្ដង។

ទី​លម្ហែកាយ​ថ្មី ម្ហូប​ជិត ១០០ មុខ អម​ខ្យល់​អាកាស​បរិសុទ្ធ​ក្រោម​ម្លប់​ស្បូវ​នៅ​ម្ដុំ​ព្រែកឯង

ថៅកែ​កំលោះ​រូបសង្ហា​មានវ័យ​សាម​ប្លាយ ជា​អ្នកមាន​ស្រុក​កំណើត​នៅ​ខេត្ត​ពោធិ៍សាត់ លោក អ៊ឹង សុវណ្ណ ក៏បាន​រៀបរាប់​ពីដំណើរ​ការបើក​អាជីវកម្ម​ញ៉ាំ​អាហារ​លម្ហែកាយ​នេះថា៖ «ដោយសារ​ខ្លួន​ខ្ញុំធ្លាប់​ប្រកប​របរ​លក់​ម្ហូបអាហារ​នេះ នៅឯ​ក្នុង​ទីក្រុង​មួយរយៈ​ដែរ ហើយ​ខ្លួន​ខ្ញុំជា​អ្នក​ចូលចិត្ត​រកស៊ី​ជាជាង​ប្រក​បរបរ​ធ្វើការងារ​ក្របខ័ណ្ឌ​រដ្ឋ ឬឯកជន​នោះ ទើប​បាន​សម្រេចចិត្ត​សាកល្បង​ពង្រីក​អាជីវកម្ម​នេះ នៅលើ​ដីឡូត៍​ដែល​ខ្លួនឯង បាន​ទិញ​កាលពី​ជាង ១០ ឆ្នាំមុន​តែម្តង»។

យ៉ាងណាមិញ ភោជនីយដ្ឋាន​របស់​លោក​ស្ថិតក្នុង​ដំណាក់កាល​សាកល្បង​នៅ​ឡើយ ហើយ​លោក សុវណ្ណ ក៏ទទួល​ស្គាល់​ពីភាព​ខ្វះខាត​មួយ​ចំនួន​ដូចជា​បុគ្គលិក​បម្រើ​ការងារ និង​ការរៀបចំ​លម្អ​ពុំទាន់​បានល្អ​គ្រប់គ្រាន់។

លោក​បាន​លើក​ឡើង​ថា៖ «ពេលនេះ​យើង​មាន​បុគ្គលិក​សរុប​ទាំង​អ្នក​បម្រើ​ភ្ញៀវ ចុងភៅ និង​អ្នកមើលការ​ខុសត្រូវ តែ ១៥ នាក់ ប៉ុណ្ណោះ ហើយ​យើង​មាន​ក្យូស​ចំនួន ៣០ ក្នុងការ​បម្រើ។ តែក៏​សប្បាយចិត្ត​ដែរ ដោយ​មាន​ភ្ញៀវ​ស្គាល់​កន្លែង​យើង​ជាបណ្តើរៗ និង​បាន​អញ្ជើញ​ណែនាំ​មិត្តភក្តិ​ផ្សេងៗ មក​ពិសា​អាហារ​នៅ​ទីកន្លែង​យើង​ជាហូរហែ មិនដាច់​ឡើយ​គឺមាន​រៀងរាល់​ថ្ងៃ​តែម្តង»។

Content image - Phnom Penh Post
ត្រី​បឹងកញ្ឆែត ជាម្ហូប​មួយ​ក្នុង​ចំណោម​ម្ហូប​ជិត ១០០ មុខ​នៅ​ភោជនីយដ្ឋាន ចូលចិត្ដ​។ ហេង ជីវ័ន

ភោជនីយដ្ឋាន​ដែល​ដំណើរការ​បាន​ជាង ១ សប្តាហ៍ ជាមួយ​មុខម្ហូប​សរុប​មិន​ក្រោម ១០០ មុខ​នោះ មាន​ដូចជា មឹក​អាំង មឹកឆា​ពងទាប្រៃ បង្គា​បំពង​ម្សៅ ក្តាម​អាំង ក្តាម​ចំហុយ​មីសួ ភ្លាក្តាមសេះ ក្តាមប្រៃ ភ្លាបង្គា​ក្ទម្ពទេស បង្គា​ចំហុយ​មីសួ គ្រឿង​សមុទ្រ​អប់ ត្រី​សាបាក់​បំពង​ម្សៅ​នំប៉័ង មាន់​លីងគល់​ស្លឹកគ្រៃ មាន់​ឆាក្តៅ ជើ​ងមាន់​បំពង​ខ្ទឹមស កាឈីវ គោអប់​ម្រះព្រៅ សាច់គោ​បំពង​ល្ង ភ្លា​សាច់គោ ត្រី​ក្រហម​ចំហុយ​ក្រូចឆ្មារ ត្រី​បឹងកញ្ឆែត ប្រហិត​ត្រីស្លាត​បំពង និង​មុខម្ហូប​ជាច្រើន​ទៀត​ទៅ​តាមការ​កុម្ម៉ង់​របស់​ភ្ញៀវ​បាន។

ក្នុងចំណោម​អាហារ​ទាំង​នោះ លោក អ៊ឹង សុវណ្ណ បាន​ប្រាប់​ពីអាហារ​ដែល​ភ្ញៀវ​មានការ​ពេញនិយម​ថា៖ «តាមការ​សង្កេត​ឃើញ​ថា ភ្ញៀវ​គាត់​និយម​ហៅ​មាន់ដុត​អម្ពិល​ទុំ ឬមាន់​ដុត​ទឹកឃ្មុំ ត្រីដុត និង​ខ្យង។ ចំពោះ​មាន់ដុត​មួយ​យើង​លក់​តែ​តម្លៃ ៤ ម៉ឺន រៀល តែ​ប៉ុណ្ណោះ ដែល​មាន​ទម្ងន់​ជាង ១ គីឡូ គឺជា​មាន់​ស្រែ​ពិតៗ​តែម្តង ដោយ​មាន់​នេះ​បើ​ភ្ញៀវចង់​កុម្ម៉ង់​ស្ល​វិញ យើង​សម្រួល​ជូន​គឺអាច​ច្នៃ​ជាសម្ល​ពីរមុខ​បាន លើក​លែង​តែ​មាន់ដុត យើង​មិនអាច​ញែក​ជា​ពីរ​បាន»។

ជុំវិញ​តម្លៃ​នេះ ថៅកែ​កំលោះ​រូបនេះ​បញ្ជាក់​ថា៖ «រាល់​តម្លៃ​មុខម្ហូប​នៅ​ចូលចិត្ត​ធានា​ថា មាន​តម្លៃ​ធូរ​ថ្លៃ​ជាង​គេ។ ចំពោះ​ទៅ​ថ្ងៃមុខ ជាពិសេស នា​រដូវកាល​ថ្ងៃបុណ្យ​នានា សម្រាប់​តម្លៃ​មុខម្ហូប យើង​នឹង​មិនមាន​គម្រោង​ឡើង​ថ្លៃ​ខ្លាំង​នោះទេ គឺគ្រាន់​តែ​លៃលក​តម្លៃ​តាម​ទីផ្សារ​នៃ​មុខ​ទំនិញ​តែប៉ុណ្ណោះ»៕

Content image - Phnom Penh Post
ដើមឈើ​ដុះ​ត្រឈឹង​ត្រឈៃ​ផ្ដល់ភាព​ត្រជាក់​ដល់​ភ្ញៀវ​ដែល​អង្គុយ​ក្នុង​ក្យូស​ប្រក់​ស្បូវ។ ហេង ជីវ័ន

Content image - Phnom Penh Post
ក្យូស​លម្ហែកាយ​ស័ក្ដិសម​ជា​ទីកន្លែង​ទទួល​ទាន​អាហារ​វេលា​ចុង​សប្ដាហ៍។ ហេង ជីវ័ន

0

Comments

Please, login or register to post a comment

ព័ត៌មានពាក់ព័ន្ធ