Search form

Login - Register | FOLLOW US ON

Logo of Phnom Penh Post newspaper Phnom Penh Post - ទឹកជ្រោះ​ស្អិត ទេសចរ​នាំគ្នា​តោង​ឡើង​ចុះ​ជម្រាល​ថ្ម​កំបោរ

Content image - Phnom Penh Post
ផ្ទាំង​ថ្ម​សក្បុស មាន​រុក្ខជាតិ​បៃតង​ដុះ ជាទី​តាំង​ថតរូប​ដ៏​អស្ចារ្យ។

ទឹកជ្រោះ​ស្អិត ទេសចរ​នាំគ្នា​តោង​ឡើង​ចុះ​ជម្រាល​ថ្ម​កំបោរ

ក្រុងឈៀងម៉ៃ: ទឹកធ្លាក់​ប៊ួតុង លាក់​ខ្លួន​ក្នុ​ងព្រៃ​គឺ​ជាទី​កម្សាន្ដ​សម្រាប់​អ្នក​និយម​ធម្មជាតិ និង​ជា​ទឹកធ្លាក់​ដ៏​ស្រស់​ស្អាត​បំផុត​មួយ​នៅ​ប្រទេស​ថៃ​ដែល​ត្រូវ​បាន​ដាក់​ឈ្មោះ​ថា ប៊ួតុង ឬ​ទឹកធ្លាក់​ស្អិត។ ទឹកធ្លាក់​ស្អិត​ស្ថិត​នៅ​ចម្ងាយ​ប្រមាណ ៦០ គីឡូម៉ែត្រ​ភាគ​ខាងជើង​ក្រុង​ឈៀង​ម៉ៃ ក្នុង​ឧទ្យាន​ជាតិ​ស្រ៊ី ឡាន់ណា។

មនុស្សម្នា​មិន​ច្រើន​ទេ​ដែល​បាន​ស្គាល់​ទឹកធ្លាក់ ប៊ួតុង នេះ​ហើយ​ក៏មិន​សម្បូរ​ភ្ញៀវទេសចរ​ប៉ុន្មាន​ដែរ។

នៅ​ផ្លូវ​ចូល ភ្ញៀវ​នឹង​បាន​ឃើញ​ឧទ្យាន​ស្អាត​មួយ ដែល​មាន​វាល​ស្មៅ បន្ទប់​ទឹក​សាធារណៈ ខ្ទមតូច​មួយ​សម្រាប់​ផ្ដល់​សេវាកម្ម​ភេសជ្ជៈ និង​ការ៉េម។ នេះ​ជាទី​លម្ហែ​ដែល​អ្នកអាច​រីករាយ​ជាមួយ​ភ្ញៀវទេសចរ​មក​ទទួល​ទាន​អាហារ​លើ​ស្មៅ និង​ងូតទឹក​ធ្លាក់។

មាន​ស្លាក​សញ្ញា​ចង្អុល​ផ្លូវ​ដើរ​តូចៗ​នាំ​ឆ្ពោះ​ទៅ​កាន់​ទឹកធ្លាក់ ហើយ​ភ្ញៀវ​នឹង​បាន​ដឹង​ភ្លាម​ថា ហេតុអ្វី​គេ​បាន​ហៅ​វាថា ទឹកធ្លាក់​ស្អិត? អាហារ​មិន​ត្រូវ​បាន​អនុញ្ញាត​ឲ្យ​យក​ចូល​បរិវេណ​ទឹក​ធ្លាក់ តែ​មាន​តុ​ពិកនិក​ជាច្រើន​ត្រូវ​បាន​រៀបចំ​ដាក់​ដង្ហែ​សម្រាប់​ទទួល​ទាន​នៅឯ​ផ្លូវ​ចូល​ឧទ្យាន។

ស្មៅ​កន្ទុយ​សេះ​ជា​ទស្សនីយភាព​ដ៏ស្រស់​ស្អាត តែអ្វី​ដែល​មាន​រំលេច​ទីតាំង​នេះ​ល្អ​ឯក​នោះ គឺ​ទឹកធ្លាក់​ហូរ​លើ​ជម្រាល​ថ្មកំបោរ។ផ្ទៃ​ថ្មកំបោរ​ប៉ប្រ៉ះ​ទឹក​បង្កើត​បាន​ជា​សភាព​ស្អិត ពេល​ប៉ះ​ត្រូវ​នឹង​ស្បែក​មនុស្ស។

ដូច្នេះ ភ្ញៀវទេសចរ​មិន​ខកខាន​ក្នុងការ​លេង​តោង​ចុះ​តាម​ជម្រាល​ទឹកធ្លាក់ ដែល​មាន​ថ្មកំបោរ​ពណ៌​សក្បុស​នេះ​ទេ។

Content image - Phnom Penh Post
ថ្លុក​ទឹក​រាក់ៗ​ដែល​មាន​សភាព​ថ្លា និង​មានពណ៌​ឆ្លុះ​ដល់បាត​។

ទឹកធ្លាក់​នេះ​ហូរ​ច្រៀក​ជា ៣ បំណែក ពុះ​ជ្រែក​រុក្ខជាតិ​ដុះ​ត្រសង។ រីករាយ​នឹង​ការ​តោង​ឡើង និង​ចុះ​ជម្រាល​ទឹកធ្លាក់ ភ្ញៀវ​ហាក់​មិន​ភ័យ​បារម្ភ​ចំពោះ​ការ​រអិល​ធ្លាក់​ដោយសារ​តែ​ថ្មកំបោរ​នេះ មាន​សភាព​ស្អិត​ជាប់​នឹង​ដៃជើង។

ងូតទឹក​ធ្លាក់ ជម្រាល​ជើង​ភ្នំ ហែល​ទឹក ឬ​ទទួល​ទាន​អាហារ​បែប​ពិកនិក និង​ថតរូប​សែលហ្វី​ពីទី​កម្សាន្ដ​ធម្មជាតិ​ដ៏ល្អ​ឯក​នេះ គឺជា​សកម្មភាព​កម្សាន្ដ​ពេញ​និយម ហើយ​នៅ​ថ្ងៃ​វិស្សមកាល ប្រជាជន​ថៃ​នាំគ្នា​មក​បោះ​ជំរំ​ស្នាក់​នៅ​យ៉ាង​ច្រើន​សន្ធឹក។

នៅ​រៀងរាល់​ថ្ងៃ​ចុង​សប្ដាហ៍ ភ្ញៀវ​ត្រូវ​រូតរះ​មក​ឲ្យ​ទាន់​មុន​ថ្ងៃត្រង់ ដោយសារ​តែ​មាន​មនុស្ស​ច្រើន​ណែន​ណាន់​តាន់តាប់​ពេក។ ដោយសារ​តែ​ថ្មកំបោរ​ដែល​ទឹកធ្លាក់​ហូរកាត់ មិន​បង្ក​ជា​បញ្ហា​រអិល​ដល់​ភ្ញៀវទេសចរ និង​អំណោយផល​ដល់ការ​តោង​ឡើង​ចុះ​លេង​ដោយ​មិន​ចាំបាច់​ប្រើ​ឧបករណ៍​ជំនួយ សូម្បី​តែ​ស្បែកជើង​កីឡា។

ប៉ុន្ដែ​នៅ​តំបន់​កណ្ដាល​នៃ​ទឹកធ្លាក់ ផ្ទាំង​ថ្ម​មាន​ស្ថានភាព​គ្រោះថ្នាក់ និង​រអិល​បន្ដិច ដែល​ទាមទារ​ឲ្យ​មាន ការ​ប្រុង​ប្រយ័ត្ន​ខ្ពស់៕HR

Content image - Phnom Penh Post
ភ្ញៀវទេសចរ​តោង​ខ្សែ​ឡើង​ទឹកធ្លាក់​​ពីលើ​ជម្រាល​ផ្ទាំង​ថ្ម​កំបោរ។

0

Comments

Please, login or register to post a comment