Search form

Login - Register | FOLLOW US ON

Logo of Phnom Penh Post newspaper Phnom Penh Post - ទឹកធ្លាក់​ក្បាល​ព្រះ​ ដំណើរ​ផ្សងព្រេង​លំៗ ​បែប​ប្លែក​អារម្មណ៍​សម្រាប់​អ្នក​ថ្មោង​ថ្មី

Content image - Phnom Penh Post
ទេសភាព​ទឹកធ្លាក់​ដែល​ស័ក្ដិសម​ក្នុងការ​ផ្ដិត​យក​រូបភាព​ដ៏ស្រស់​បំព្រង​។ ហុង មិនា

ទឹកធ្លាក់​ក្បាល​ព្រះ​ ដំណើរ​ផ្សងព្រេង​លំៗ ​បែប​ប្លែក​អារម្មណ៍​សម្រាប់​អ្នក​ថ្មោង​ថ្មី

ក្រុងសែនមនោរម្យ: បើ​ទឹកធ្លាក់ ប៊ូស្រា ចម្ងាយ​ប្រមាណ ៤០ គីឡូម៉ែត្រ ពី​ក្រុង​មណ្ឌលគិរី​ក្លាយ​ជា​ទស្សនីយភាព​ស៊ាំ​ភ្នែក​ក្រោមការ​ចូលរួម​ពី​ភ្ញៀវ​ច្រើន​កកកុញ​ពេក អ៊ីចឹង​មិន​បាច់​ទៅ​បើកបរ​ឆ្ងាយ​នោះ​ទេ ក្នុង​ក្រុង​សែនមនោរម្យ​នេះ​ឯង គឺ​ទឹកធ្លាក់​ក្បាល​ព្រះ ឬ​លែង​ប៊ឺក​ព្រះ ដោយ​គ្រាន់​តែ​ចំណាយ​ពេល​ដើរ​ថ្មើរ​ជើង​ចូល​បន្ដិច។

ជាមួយ​ដំណើរ​ថ្មើរជើង​មួយ​ម៉ោង​ពីចំណុច​ភូមិ​ពូត្រំ សង្កាត់​រម្យនា ក្រុង​សែនមនោរម្យ ចម្ងាយ​ប្រមាណ ១៣ គីឡូម៉ែត្រ ពី​រូប​សំណាក​គោព្រៃ ភ្ញៀវទេសចរ​នឹង​ទទួល​បាន​នូវ​បទពិសោធ​ដើរ​ព្រៃ និង​មាន​ឱកាស​រីករាយ​នឹង​ទឹកធ្លាក់​ដ៏ស្រស់​ស្អាត​ក្រោម​ម្លប់​ព្រៃឈើ​ត្រជាក់​ល្ហឹម​នា​រដូវវស្សា​នេះ។

ទឹកធ្លាក់​ក្បាល​ព្រះ​ ដំណើរ​ផ្សងព្រេង​លំៗ ​បែប​ប្លែក​អារម្មណ៍​សម្រាប់​អ្នក​ថ្មោង​ថ្មី

-

សម្រាប់​អ្នកមាន​បទពិសោធ​ដើរ​ព្រៃ​ថ្មោង​ថ្មី ពួកគេ​អាច​មានការ​រារែក​បន្ដិច​ពេល​ចុះពី​រថយន្ដ និង​បន្ដ​ដំណើរ​ថ្មើរ​ជើង​ចូល​កាត់​តាម​ច្រក​តូច ឬ ម៉ូតូ​ក្រោះ [ម៉ូតូ​ច្នៃ​ពិសេស​សម្រាប់​អ្នក​ដឹកជញ្ជូន​ឈើ]។ ប៉ុន្ដែ​ជាមួយ​មិត្ដភក្ដិ​អម​ដំណើរ​ជាក្រុម​ដោយ​មានការ​ណែនាំ​ពី​មគ្គុទេ្ទស​ក៍ប្រចាំ​ភូមិ លោក យាក ខេន ភ្ញៀវ​ប្រាកដ​ជាមាន​ទំនុក​ចិត្ដ។

មុនពេល​លោក យាក ខេន ជនជាតិ​ពូនង បាន​រៀបរាប់​ប្រាប់​ត្រួសៗ​ថា៖ «ខ្ញុំ​ប្រាប់​ថា មាន​ចម្ងាយ​ផ្លូវ ៣ គីឡូម៉ែត្រ។ ពេល​ដើរ​ទៅ ខាង​គាត់​ជួយ​កាន់​ឈើ​ច្រត់​កុំឲ្យ​រអិល។ កន្លែង​នោះ​អត់​មាន​ទាក យើង​ដើរ​មក​ឲ្យ​សប្បាយ។ ដល់​កន្លែង​ទឹកជ្រោះ យើង​មើល​អី ឬយើង​ថតអី​ទៅ ឲ្យ​យើង​មាន​អាយុ​យឺនយូរ បាន ២០០ ឆ្នាំ»។

ភាព​រីករាយ​អម​នឹង​សំណើច​ក្អាកក្អាយ​ស្ថិត​នៅ​លើ​ផ្ទៃមុខ បើ​ទោះបី​ជា​ភ្ញៀវ​ម្នាក់ៗ​ប្រើ​ថិរវេលា​ដើរ ១ ម៉ោង​ពេញ​ក្តី។ នោះ​ដោយសារ​តែវា​ជា​ដំណើរ​ចុះភ្នំ​ដែល​ភាគច្រើន​ប្រើតែ​កម្លាំង​ទប់​ប៉ុណ្ណោះ។

អារម្មណ៍​កាន់តែ​រំជើបរំជួល​នៅ​ពេល​ក្រសែភ្នែក​បាន​សម្លឹង​ឃើញ​ទឹកជ្រោះ​កំពុង​ហូរ​ធ្លាក់​យ៉ាង​គំហុក​ដែល​ហាក់​បែង​ចែក​ជាពីរ​ផ្នែក​ដើម្បី​បំពេញ​តួនាទី​រៀងៗ​ខ្លួន ដោយ​ម្ខាង​ហូរ​ធ្លាក់​យ៉ាង​គំហុក គ្មាន​ទើស​ផ្លូវ​របស់​វា​ឡើយ សូម្បីតែ​ដើម​ឈើ​ធំៗ និង​ម្ខាង​ទៀត ដែល​គ្រប​ដោយ​ម្លប់ឈើ​ត្រឈឹង​ត្រឈៃ ហាក់​បាន​បើក​កាយ​ស្វាគមន៍​ភ្ញៀវ​ក្រោម​តំណក់​ទឹកហូរ​ល្មម​ងូត។

Content image - Phnom Penh Post
ភ្ញៀវ​អាច​ចុះងូត​ទឹក​រាក់ៗ​​ជម្រៅ​ប្រមាណ ១ ម៉ែត្រ​​។ ហុង មិនា

អំឡុង​រដូវវស្សា​នេះ ទឹកធ្លាក់​ក្បាល​ព្រះ [ជា​ឈ្មោះ​ដែល​អ្នកភូមិ​ស្គាល់ ច្បាស់] មាន​ទំហំ​មុខកាត់​ជិត ៤០ ម៉ែត្រ កម្ពស់ ៨ ម៉ែត្រ ខណៈ​នៅ​រដូវ​ប្រាំង វា​បង្រួម​មក​ត្រឹមតែ ២០ ម៉ែត្រ និង​កម្ពស់​ជិត ១០ ម៉ែត្រ។ ទាំងពីរ​រដូវ សុទ្ធតែ​បាន​ទាក់ទាញ​ចិត្ដ​ភ្ញៀវ​ដោះ​សម្លៀក​បំពាក់​ដើរ​ព្រៃ​ចុះ​ងូតទឹក​ក្រោម​តំណក់​ទឹក​លាន់​សន្ធឹក និង​ហែល​ក្នុង​ថ្លុក​អាងទឹក​ធម្មជាតិ ជា ពិសេស​នៅ​រដូវ​បុណ្យទាន​ធំ។

មគ្គុទេ្ទសក៍​ភូមិ និង​ជា​មេកន្ទ្រាញ​កុលសម្ព័ន្ធ ពូនង បាន​បន្ដ​ថា លោក​តែងតែ​ទទួល​ភារកិច្ច​ជូន​ភ្ញៀវទេសចរ​ស្វែងរក​បទពិសោធ​រុក​ព្រៃ​រក​ទឹកធ្លាក់​ក្បាល​ព្រះ មិន​ដាច់​រយៈ។

ក្រោយពី​ងូតទឹក និង​ថតរូប​ជាមួយ​ទឹកធ្លាក់​ក្បាល​ព្រះ​ដែល​មិនសូវ​មាន ឱកាស​បាន​ទទួល​ភ្ញៀវ​ច្រើន អនុស្សាវរីយ៍​ដើរ​ដង្ហក់​ខ្យល់​នឹង​កើត​ឡើង​នៅ​ពេល​ធ្វើ​ដំណើរ​ត្រឡប់​មកវិញ។

សរុបមក​ដំណើរ​កម្សាន្ដ​ទឹកធ្លាក់​ក្បាល​ព្រះ ជាការ​ដើរព្រៃ​ទៅ​ធូរ​វិលវិញ​តឹង៕

Content image - Phnom Penh Post
ទឹក​ធ្លាក់​​ដែល​គ្រប​ដោយ​ម្លប់​ឈើ​ត្រឈឹង​ត្រឈៃ​គួរ​ឲ្យ​គយគន់។ ហុង មិនា

Content image - Phnom Penh Post
គំនរ​ឈើងាប់​ផ្ដល់​ជា​កន្លែង​អង្គុយ​ដល់ភ្ញៀវ​ទៅ​លេង​ទឹក​ធ្លាក់​។ ហុង មិនា

Content image - Phnom Penh Post
អ្នកដំណើរ​ត្រូវដើរ​ប្រមាណ​ជា ១ ម៉ោង​ទើប​ទៅ​ដល់​ទឹកធ្លាក់​។ ហុង មិនា

0

Comments

Please, login or register to post a comment

ព័ត៌មានពាក់ព័ន្ធ