Search form

Login - Register | FOLLOW US ON

Logo of Phnom Penh Post newspaper Phnom Penh Post - បទពិសោធ​រស់​នៅ ភ្លក្ស​អាហារ និង​រាំរបាំ​ជនជាតិ​ភាគតិច ​ក្នុង​ខេត្ត​មណ្ឌលគិរី

Content image - Phnom Penh Post
ក្នុង​សួន​មាន​រុក្ខជាតិ​លាស់​បៃតង ភ្ញៀវ​អាច​អង្គុយ​ញ៉ាំ​តែ​ជជែកគ្នា​លេង និង​គយគន់​ទេសភាព​។ ហុង មិនា

បទពិសោធ​រស់​នៅ ភ្លក្ស​អាហារ និង​រាំរបាំ​ជនជាតិ​ភាគតិច ​ក្នុង​ខេត្ត​មណ្ឌលគិរី

ក្រុងសែនរមនោរម្យ: ផ្ទះកូន​ក្រមុំ​គ្រឹង​ដ៏តូច​ច្រឡឹង កូន​កំលោះ​គ្រឹង​តូច​ខ្ពស់ ផ្ទះ​គ្រួសារ​គ្រឹង និង​ផ្ទះ​ពូនង ដែល​សង់​ប្រដេញ​គ្នា​ក្បែរ​ជម្រាល​ភ្នំ​អម​ដោយ​សួន​ស្មៅ សួន​ដំណាំ ផ្កា​ចម្រុះ​ពណ៌ និង​រុក្ខជាតិ​តូចធំ ត្រូវបាន​ប្រែក្លាយ​ជា​បន្ទប់​ស្នាក់ ស្វាគមន៍​ភ្ញៀវទេសចរ​ដែល​ប្រាថ្នា​បទពិសោធ​រស់នៅ​បែប​ជនជាតិ​ភាគតិច នៅ​ក្រុង​សែន​មនោរម្យ ទឹកដី​ខេត្ត​មណ្ឌលគិរី។

ភ្ញៀវ​មកកាន់​ផ្ទះ​សំណាក់​ជនជាតិ​ដើម​ភាគតិច​មិន​ត្រឹមតែ​អាច​ស្នាក់​អាស្រ័យ​ក្នុង​បន្ទប់​ធម្មតា​ប៉ុណ្ណោះ​ទេ ប៉ុន្ដែ​ថែម​ទាំង​អាច​ភ្លក្ស​រសជាតិ​អាហារ និងការ​កម្សាន្ដ​បែប​ជនជាតិ​ដើម​ភាគតិច​ផងដែរ។

ផ្ទះ​ស្នាក់ ១៧ ប្រភេទ មាន​ដូចជា​ផ្ទះ​គ្រឹង​របស់​ជនជាតិ​ភាគតិច​រតនគិរី ផ្ទះ​ទំពូន និង​ផ្ទះ​ពូនង (ផ្ទះ​ប្រពៃណី​ម៉ូដ​អណ្ដើក) តម្លៃ​ចាប់ពី ៧ ដុល្លារ (បន្ទប់​ទឹក​នៅ​ក្រៅ) រហូតដល់​តម្លៃ ២៥ ដុល្លារ (អាច​គេង​បាន​គ្នា ៤ នាក់)។ អ្វីដែល​គួរឲ្យ​កត់សម្គាល់​នោះ គឺ​បន្ទប់ទឹក​មាន​ទឹកក្ដៅ និង​ត្រជាក់ ហើយ​មាន​ទំហំ​ធំ​ស្ទើរតែ​ប៉ុនផ្ទះ​ទៅ​ហើយ។

ជាមួយ​នឹង​សម្រស់​ធម្មជាតិ​បៃតងខ្ចី​នា​រដូវវស្សា​ដែល​ដុះ​ស្រោប​ជុំវិញ​ផ្ទះ​ស្នាក់​បែប​ជនជាតិ​ដើម ភ្ញៀវ​តែងតែ​លាន់​មាត់​កោត​សរសើរ​ពីការ​រៀបចំ និង​រចនា​ផ្ទះ​ស្នាក់​អមដោយ​បរិស្ថាន​ដ៏ស្រស់​បំព្រង​លើសពី​តថភាព​ផ្ទះសំណាក់។

បទពិសោធ​រស់​នៅ ភ្លក្ស​អាហារ និង​រាំរបាំ​ជនជាតិ​ភាគតិច ​ក្នុង​ខេត្ត​មណ្ឌលគិរី

ជាភ្ញៀវ​ម្នាក់​មក​ស្នាក់​លេង​នៅ «ផ្ទះសំណាក់​ជនជាតិ​ដើម​ភាគតិច» កញ្ញា ស្រី អូន បាន​បរិយាយ​ថា៖ «ផ្ទះសំណាក់​ជនជាតិ​ដើម​នេះ​ពិតជា​លើស​ពីផ្ទះ​ស្នាក់​ធម្មតា​មែន។ ខ្ញុំមាន​អារម្មណ៍​ប្លែក​ទាំងការ​រស់នៅ​ក្នុងផ្ទះ​បែប​ជនជាតិ បរិស្ថាន​ជុំវិញ​មាន​សួនផ្កា​ក្រអូបៗ ដំណាំ​ហូប​ផ្លែ ដូចជា ក្រូច​វល្លិ ទុរេន និងប៊័រ»។

ទេសចរ​វ័យ​ជាង​ម្ភៃឆ្នាំ​រូបនេះ​បាន​រៀបរាប់​ទៀត​ថា៖ «នៅ​ពេល​រាត្រី ខ្ញុំអាច​មាន​ឱកាស​បាន​ចូលរួម​រាំរបាំ​ជនជាតិ​កម្សាន្ដ​ផងដែរ។ និយាយ​រួម​ទីនេះ យើង​មិនបាច់​ដើរ​ទៅ​ណា ក៏អាច​ទទួល​បាន​ការកម្សាន្ដ​ដែរ»។

Content image - Phnom Penh Post
ផ្ទះពូនង​មាន​សួន​ផ្កា​ចម្រុះពណ៌​លម្អ​ពីមុខ​។ ហុង មិនា

លោក យុន ម៉ាណែល ជា​អ្នកគ្រប់គ្រង​ទូទៅ​នៅផ្ទះ​សំណាក់​ជនជាតិ​ដើម​ភាគតិច មណ្ឌលគិរី ដែល​បើក​សម្ពោធ ៣ ឆ្នាំ បាន​ឲ្យដឹង​ថា កន្លែង​លោក​មាន​រចនាប័ទ្ម​ធម្មជាតិ ស្ងប់ស្ងាត់ ម្ហូបម្ហា​រសជាតិ​ជនជាតិដើម​ភាគតិច គួប​នឹង​របាំ​កម្សាន្ដ។

ក្រៅ​ពីមាន​សេវាកម្ម​ជូន​ភ្ញៀវ​ពី​បេនឡាន​មក​ផ្ទះសំណាក់ និង​ត្រឡប់​វិញ​ដោយ​ឥតគិត​ថ្លៃ ផ្ទះ​សំណាក់​ក៏មាន​ភោជនីយដ្ឋាន​បម្រើ​ម្ហូបម្ហា​ចម្រុះ ដូចជា​អាហារ​ជនជាតិ​ដើម ម្ហូប​ខ្មែរ និង​អឺរ៉ុប ដោយ​មុខម្ហូប​ពូនង ជាអាហារ​មូលដ្ឋាន​ប្រចាំ​ហាង។ អាហារ​ពេល​ព្រឹក មាន​តម្លៃ​ចាប់ពី ១,៥ ទៅ ៣,៥ ដុល្លារ។ អាហារ​ថ្ងៃត្រង់ និង​ល្ងាច​មាន​តម្លៃ​ចាប់ពី ៨០០០ រៀល​ទៅ​ដល់ ១៥ ដុល្លារ។

លោក យុន ម៉ាណែល បាន​អះអាង​ថា៖ «ជាទូទៅ ភ្ញៀវ​មក​ទីនេះ ទាំង​ខ្មែរ និង​បរទេស​តែងតែ​ចង់​ភ្លក្ស​រសជាតិ​ម្ហូប​មូលដ្ឋាន​ជនជាតិ​ដើម​ភាគតិច ហើយ​កាលណា​គាត់​ញ៉ាំ​លើក​ទីមួយ​ហើយ គាត់​នឹង​កុម្ម៉ង់​ញ៉ាំ​ជា​លើក​ទីពីរ​ទៀត។ វាជា​ចំណូលចិត្ដ​របស់​ភ្ញៀវ​បរទេស​ពីព្រោះ​ពួកគាត់​អត់​ញ៉ាំ​សាច់។ អ៊ីចឹង​ត្រូវ​ចិត្ដ​គាត់​តែម្ដង»។

ម្ហូប​ជនជាតិដើម​ដែល​ភ្ញៀវ​កុម្ម៉ង់​ច្រើន ដូចជា សម្ល​បុក​ត្រប់ សម្លវ៉ែ សម្បូរ​បន្លែ និង​ម្ហូប​សាច់ រួមមាន ឡាប និង​សម្ល​បុក​សាច់ វ៉ិ​គ្រឿង​ក្នុង​គោ សម្ល​អង្ករលីង។

ផ្ទះសំណាក់​ជនជាតិ​ដើម​ភាគតិច ស្ថិត​ក្នុងភូមិ​ចម្ការ​តែ ក្រុង​សែនមនោរម្យ។ នៅ​ពេល​ធ្វើដំណើរ​ដល់​រូបចម្លាក់​រង្វង់​មូល​គោព្រៃ​ដែល​ជា​បេះដូង​នៃ​ខេត្ត​មណ្ឌលគិរី ភ្ញៀវ​ត្រូវ​បត់​ស្ដាំ​ផ្ទះ​ផ្លូវភ្លោះ​រហូតដល់​ចុង​ផ្លូវបត់​ស្ដាំ​តាម​ស្ថានីយ​សាំងតេឡា ហើយ​បត់​ឆ្វេង​ដល់​ផ្លូវ​អក្សរ «T» ចម្ងាយ​ប្រមាណ ១០០ ម៉ែត្រ៕

Content image - Phnom Penh Post
បន្ទប់​ស្នាក់​មាន​តម្លៃ​ពី ៧ រហូត​ដល់ ២៥ ដុល្លារ​។ ហុង មិនា

Content image - Phnom Penh Post
នៅពេល​រាត្រី ភ្ញៀវ​អាច​មាន​ឱកាស​ចូលរួម​រាំរបាំ​ជនជាតិ​កម្សាន្ដ​ផងដែរ។ ហុង មិនា

Content image - Phnom Penh Post
ភ្ញៀវ​ទេសចរ​តុបតែង​កាយ​ និង​របស់របរ​ប្រើប្រាស់​របស់​ជនជាតិ​ភាគតិច។ ហុង មិនា

0

Comments

Please, login or register to post a comment