Search form

Login - Register | FOLLOW US ON

Logo of Phnom Penh Post newspaper Phnom Penh Post - ប្រាសាទ​បាកាន​ ខ្សត់​ភ្ញៀវ​ជាតិ​ទស្សនា និង​កម្រ​គេស្គាល់

Content image - Phnom Penh Post
ទេសចរ​អាច​ឈរ​ថត​រូប​ទេសភាព​ដ៏ស្រស់​ស្អាត​នៅ​មុខ​កំពែងទី ១ នៃ​ប្រាសាទ​​បាកាន​​។ ហេង ជីវ័ន

ប្រាសាទ​បាកាន​ ខ្សត់​ភ្ញៀវ​ជាតិ​ទស្សនា និង​កម្រ​គេស្គាល់

ព្រះវិហារៈ បើទោះ​បី​នាពេល​បច្ចុប្បន្ន​នេះ​ផ្លូវ​ឆ្ពោះ​ទៅ​តំបន់​រមណីយដ្ឋាន​ប្រាសាទ​បុរាណ ដែល​មាន​សភាព​ស្រួល​បួល​គ្រាន់​បើ អាច​ឲ្យ​រថយន្ត​គ្រប់​ប្រភេទ​បើក​ចូល​ទៅ​ដល់​បានក្តី ក៏គេ​កម្រ​ឃើញ​មាន​ក្រុម​ទេសចរ​ក្នុង​ស្រុក​ពីចម្ងាយ​បានមក​ទស្សនា ឬ​ស្គាល់​ទី​ប្រាសាទ ដែល​មាន​ទំហំ​ធំធេង​កណ្តាល​ព្រៃ​ស្ទើរ​ដួល​រលំ​អស់នេះ​ទេ។

ប្រាសាទ​បាកាន ឬ ប្រាសាទ​ព្រះខ័ន​កំពង់​ស្វាយ មាន​ទីតាំង​នៅ​ក្នុងភូមិ​បាកាន ឃុំ​រណសិរ្ស ស្រុក​សង្គម​ថ្មី ខេត្ត​ព្រះវិហារ​មាន​ចម្ងាយ​ប្រហែល​ជា ១០៥ គីឡូម៉ែត្រ​ពីក្រុង​ព្រះវិហារ ឬក៏​អាច​ចូល​តាម​ផ្លូវ​ក្រួស​ក្រហម​ចំ​ពីមុខ​សាលា​ស្រុក​ប្រាសាទ​បល្ល័ង្ក ខេត្ត​កំពង់ធំ បែក​ចេញពី​ផ្លូវជាតិ​លេខ ៦ ចម្ងាយ ៧៥ គីឡូម៉ែត្រ ខណៈ​ប្រាសាទ​នេះ ស្ថិត​នៅ​ខាង​កើត​តំបន់​អង្គរ​គឺ មាន​ចម្ងាយ ១០០ គីឡូម៉ែត្រ។

ប្រាសាទ​បាកាន​ ខ្សត់​ភ្ញៀវ​ជាតិ​ទស្សនា និង​កម្រ​គេស្គាល់

លោកតា ពិន ប៉ាត ជាឆ្មាំ​ប្រាសាទ​បាកាន តាំងពី​ឆ្នាំ ២០០៨ មក បាន​រៀបរាប់​ពី​ស្ថានភាព​ខ្សត់​ភ្ញៀវទេសចរ​ពីចម្ងាយ​មក​ទស្សនា ខណៈ​លោកតា​សង្កេត​ឃើញ​ថា មានតែ​ក្រុម​ភ្ញៀវទេសចរ​បរទេស​តែប៉ុណ្ណោះ​ចូលចិត្ត​មក​កម្សាន្ត​នៅទី​ប្រាសាទ​ព្រះខ័ន​កំពង់ស្វាយ​នេះ។

ឆ្មាំ​ប្រាសាទ​បាកាន វ័យ ៦០ ឆ្នាំ បាន​ឲ្យដឹង​ពេល​ជួប​នៅមុខ​ប្រាសាទ​ ព្រះដំរី ដែល​អ្នកស្រុក​តែង​ឆៀង​ចូល​ទៅ​អុជ​ធូប​ដើម្បី​បន់ស្រន់​សុំ​សេចក្តីសុខ​មុនពេល​ចូល​ទៅ​ប្រាសាទ​បាកាន ចម្ងាយ​ប្រមាណ​ជាង ១ គីឡូម៉ែត្រ​នោះ​ប្រាប់​ថា៖ «ភ្ញៀវ​ខ្មែរ​នៅ​ឆ្ងាយៗ​មិនសូវ​ស្គាល់ ទើប​មិនសូវ​មក​លេង! ហើយ​មានតែ​អ្នកភូមិ​ក្បែរៗ​ប៉ុណ្ណោះ​មក​លេង​នៅ​រដូវបុណ្យ​ទាន​ធំៗ​ដូច​ចូលឆ្នាំ​ខ្មែរ និង​ភ្ជុំបិណ្ឌ។ តែ​រៀងរាល់​ថ្ងៃ មាន​តែភ្ញៀវ​បារាំង​គឺ​មក​មើល​តិចតួច​ជា​ហូរហែ​មិនសូវ​ខាន​នោះទេ»។

Content image - Phnom Penh Post
ផ្លូវ​ចូល​ទៅ​កំពែងទី ២ នៃ​ប្រាសាទ​ព្រះខ័ន​កំពង់ស្វាយ រងការ​បាក់បែក​គ្មាន​ការរៀបចំ​​។ ហេង ជីវ័ន

លោក ប៉ាត់ សំណាង មន្ត្រីប៉ូលិស​បេតិកភណ្ឌ ប្រចាំការ​នៅឯ​ប្រាសាទ​ព្រះខ័ន​កំពង់ស្វាយ ក៏ឲ្យ​ដឹង​ស្រដៀង​គ្នា​ដែរពី​ចំនួន​ភ្ញៀវទេសចរ​មក​កម្សាន្ត​ទីនេះ​ថា៖ «ដោយសារ​មិនសូវ​មាន​អ្នក​គេ​ស្គាល់ ហើយ​ពីមុន​ផ្លូវក៏​មិនសូវ​ស្រួល​ធ្វើដំណើរ​ទៀត​នោះ ទើប​តំបន់​នេះ​រាង​ខ្សត់​ភ្ញៀវទេសចរ​ខ្មែរ​ពីចម្ងាយ។ រាល់ថ្ងៃ​មាន​ទេសចរ​បរទេស​មក​មិនសូវ​ដាច់​គឺមាន​ម្នាក់ ឬពីរ​នាក់ ឬ​លក្ខណៈ​ជាក្រុម​មក​ទស្សនា។ ខណៈ​ផ្លូវ​ចូលមក​ក៏ស្រួល​ច្រើន​ហើយ​ក្តី តែ​ភ្ញៀវ​ខ្មែរ​នៅតែ​ខ្សត់​មកលេង​ដដែល»។

មន្រ្ដី​ប៉ូលិស​បេតិកភណ្ឌ​រូបនេះ​បន្ត​ទៀត​ថា៖ «ការជូន​ភ្ញៀវ​ទៅ​កម្សាន្ត​តំបន់​នានា​នៃ​ទីវាល​ប្រាសាទ​ព្រះខ័ន ប្រសិន​បើជា​ភ្ញៀវ​ខ្មែរ យើង​មិន​យក​សេវាកម្ម​ប្រាក់​ឈ្នួល​នោះទេ​គឺ​ស្រេចតែ​ទឹកចិត្ត​ភ្ញៀវ​ឲ្យ​ប៉ុណ្ណោះ ខណៈ​ភ្ញៀវទេសចរ​បរទេស​វិញ​យើង​យក​ពីគាត់​ម្នាក់ ៥ ដុល្លារ»។

តាម​ឯកសារ​ក្រសួង​វប្បធម៌ និង​វិចិត្រសិល្បៈ បាន​ឲ្យដឹង​ថា ប្រាសាទ​ព្រះខ័ន​កំពង់ស្វាយ កសាង​ឡើង​នៅ​សម័យអង្គរ នា​ពាក់កណ្តាល​សតវត្សរ៍​ទី ១១ និង​ដើម​សតវត្សរ៍​ទី ១២ ក្នុង​រាជ​ព្រះបាទ​សូរ្យ​វរ្ម័នទី ១-(គ.ស ១០០២-១០៥០)។

ប្រាសាទ​នេះ​មាន​កំពែង​ពីរជាន់ បើ​យោង​តាម​ប្រវត្តិវិទូ​ឲ្យដឹង​ថា ប្រាសាទ​បាកាន​ក៏ជាទី​កន្លែង​លាក់​ខ្លួន​របស់​ព្រះបាទ​ជ័យ​វរ្ម័នទី ៧ មុនពេល​ព្រះអង្គ​ឡើង​គ្រងរាជ្យ​នៅ​ឆ្នាំ ១១៨១ នេះ​បើតាម​រចនាប័ទ្ម​នៃ​សំណង់​ស្ថាបត្យកម្ម​ខ្លះ​ស្រដៀង​គ្នា​ទៅនឹង​រចនាប័ទ្ម​ប្រាសាទ​បាយ័ន និង​ប្រាសាទ​តាព្រហ្ម​នោះ៕

Content image - Phnom Penh Post
ច្រកចូល​កំពែងទី ១ នៃ​ប្រាសាទ​ព្រះខ័ន​កំពង់ស្វាយ ​ដែល​នៅ​ល្អ​។ ហេង ជីវ័ន

Content image - Phnom Penh Post
ទិដ្ឋភាព​កំពូលបី​នៃ​ច្រកចូល​កំពែង​ទី ១ នៃ​ប្រាសាទបាកាន​។ ហេង ជីវ័ន

Content image - Phnom Penh Post
តួប្រាសាទ​ដែល​នៅ​ល្អ​ផ្នែក​ខ្លះៗ​ខាង​ក្នុង​បរិវេណ​ប្រាសាទ​បាកាន​​។ ហេង ជីវ័ន

0

Comments

Please, login or register to post a comment