.jpg)
ផ្ទះសំបែងជាច្រើនត្រូវបានលេបត្របាក់ដោយភក់ហូរធ្លាក់ពីភ្នំភ្លើងនៅភូមិស៊ីដាវចូ។ AFP
ក្រុងហ្សាការតា: ភ្នំភ្លើងភក់ធំបំផុតក្នុងលោក កំពុងភាយក្លិនឆួលអសោច និងនៅតែបន្ដផ្ទុះ រហូតប្រែក្លាយជាគោលដៅទេសចរណ៍ពេញនិយមគួរឲ្យភ្ញាក់ផ្អើល។
នៅពេលនេះ វាលាតសន្ធឹងលើផ្ទៃដី ១០ គីឡូម៉ែត្រនៃអង្កត់ផ្ចិត។ វាលស្រែគ្របដណ្ដប់ដោយភក់ ឧស្សាហកម្មកសិកម្មត្រូវបានជំនួសជាតំបន់ទេសចរណ៍ងងឹត ឬទេសចរណ៍គ្រោះមហន្ដរាយ ដោយអ្នកភូមិស៊ីដាវចូ បានណែនាំភ្ញៀវមកពីជុំវិញពិភពលោកដែលចង់ដឹងចង់ឃើញ។
អ្នកស្រី ហារវ៉ាទី បង្ខំចិត្ដត្រូវបញ្ចេញស្នាមញញឹម ខណៈនាំភ្ញៀវទស្សនាជុំវិញភ្នំភ្លើងភក់នៅប្រទេសឥណ្ឌូនេស៊ី ដោយពួកគេថតរូបសែលហ្វ៊ីលើវាលសោះកក្រោះ ជាទីតាំងដែលនាងបានហៅថា ផ្ទះនោះ។
តំបន់ទេសចរណ៍ងងឹតនេះជាទីរំពឹងរបស់អ្នកម្ដាយអត់ប្ដីដែលបានបាត់បង់អ្វីៗគ្រប់យ៉ាងពេលផែនដីក្រោមវាលស្រែក្បែរភូមិរបស់អ្នកស្រី ត្រូវបានច្រៀកពុះហែកដោយគ្មានសញ្ញាព្រមានកាលពី ១០ ឆ្នាំមុន ដែលនាំឲ្យផុសចេញនូវភក់យ៉ាងច្រើនសន្ធឹក។
លំហូរភក់ភ្លើងបានកប់ភូមិឋាន រោងចក្រ ហាង និងសូម្បីតែផ្លូវហាយវ៉េធំក្នុងស្រុកស៊ីដាវចូ កោះជ្វា។ មនុស្ស ១៣ នាក់បានស្លាប់ពេលបំពង់ហ្គាសក្រោមដីបានផ្ទុះ និងមនុស្សរាប់ពាន់នាក់អស់ជម្រក។
ផ្សែងហុយចេញពីតំបន់ភ្នំភ្លើងភក់នៅទឹកដីឥណ្ឌូនេស៊ី។ AFP
បច្ចុប្បន្ន អ្នកស្រី ហាវ៉ាទី និងមនុស្សជាច្រើនទៀតប្រើបទពិសោធជីវិតផ្ទាល់ខ្លួនណែនាំភ្ញៀវចង់ដឹងចង់ឃើញដែលនាំគ្នាមកមើលដំបូលផ្ទះ និងកាកសំណល់ក្រាំងជាប់បឹងភក់។
អ្នកស្រី ហាវ៉ាទី មិនខុសពីពលរដ្ឋឥណ្ឌូនេស៊ីដទៃដែលប្រើឈ្មោះតែមួយ បាននិយាយថា៖ «នេះជាវិធីតែមួយគត់ដើម្បីជីវិតរស់ និងបង់ថ្លៃសិក្សាឲ្យកូន។ ក្រោយពីភូមិឋានខ្ញុំត្រូវបានលិចលង់ដោយភក់ គ្មានការងារអីធ្វើនោះទេ»។
ភ្នំភ្លើងភក់មិនជះកម្អែលភ្លើង ឬផេះក្ដៅទេតែ វាព្រួសទឹកភក់ និងដីឥដ្ឋទៅវិញ។ ភ្នំភ្លើងភក់ដ៏ធំបំផុតក្នុងលោក គឺនៅទឹកដីឥណ្ឌូនេស៊ី តែក្រុមអ្នកវិទ្យាសាស្ដ្រថា វាអាចនឹងបញ្ចប់ការផ្ទុះចុងទសវត្សរ៍នេះ។
ដោយមិនទាន់អស់ចិត្ដ ភ្ញៀវទេសចរនៅតែបន្ដមកទស្សនា ជាពិសេសនៅចុងសប្ដាហ៍ ហើយឌីវីឌីវីដេអូស្ដីពីមហន្ដរាយនេះជាវត្ថុអនុស្សាវរីយ៍ពេញនិយមខ្លាំង។
លោក អានទ្រី ជាភ្ញៀវទេសចរមកពីស៊ូរ៉ាបាយ៉ា បានប្រាប់ AFP ថា៖ «ខ្ញុំមានអារម្មណ៍ ចង់ឃើញថា ភក់មានទំហំធំប៉ុនណា? ពីព្រោះខ្ញុំបានឮថា មានផ្ទះជាច្រើនត្រូវបានកប់ក្រោមភក់នេះ»៕
ចម្លាក់កប់ក្នុងភក់តំណាងឲ្យជនរងគ្រោះដែលបានស្លាប់។ AFP
