ក្រុងប៊ែរឡាំង: ហាក់បីដូចជាទេសភាពក្នុងរឿងព្រេងនិទាន។ ស្ពានថ្មកោងចាំងស្រមោលលើផ្ទៃទឹក បង្កើតជារាងរង្វង់មូលឥតខ្ចោះ បានទាក់ទាញភ្ញៀវទេសចរគ្រប់ទិសទីមកទស្សនា។
ជាប់ឈ្មោះជាស្ពានបិសាច ស្ពាន រ៉ាកុត (Rakotz) បានក្លាយជាគោលដៅទេសចរណ៍ស្រស់ស្អាតដ៏ពេញនិយម នៅពេលទឹកខាងក្រោមស្ពានមានសភាពស្ងប់ ហើយពន្លឺចាំងឆ្លុះផ្ទៃទឹក រំលេចជារង្វង់ស្ពានល្អឥតខ្ចោះតែម្ដង។
ស្ពានថ្មបុរាណមួយនេះបានទាក់ទាញភ្ញៀវទេសចរអស់រយៈពេលជាច្រើនទសវត្សរ៍ និងកាន់តែល្បីល្បាញដោយមានការប្រៀបធៀបទៅនឹងឈុតឆាកភាពយន្ដភាគ Lord of the Rings។
ប៉ុន្ដែភ្ញៀវទេសចរត្រូវបានហាមដើរឆ្លងស្ពានដែលត្រូវបានកសាងតាំងពី ១៦០ ឆ្នាំមុន ដើម្បីអភិរក្សទុកក្មេងជំនាន់ក្រោយបានឃើញបន្ដទៀត។ ដោយមានរហស្សនាម ស្ពានបិសាច តួស្ពានកោងនេះស្ថិតនៅក្នុងឧទ្យានក្រូមលូ ក្រុងហ្គាប្លេន ប្រទេសអាល្លឺម៉ង់ ក្បែរព្រំដែនភាគខាងកើតប្រទេសប៉ូឡូញ។
លោក រ៉ូម៉ាំង រ៉ូប្រែក អាយុ ៣០ ឆ្នាំ បានផ្ដិតយករូបភាពដ៏ស្រស់ត្រកាលទាំងនេះដែលរំលេចនូវរង្វង់ស្ពានពីការចាំងឆ្លុះផ្ទៃទឹកបឹងដ៏ស្ងប់សុខ។
អ្នកថតរូបនេះបាននិយាយថា៖ «ខ្ញុំពេញចិត្ដនាពេលថ្ងៃរះ ម៉ោង ៥ ព្រឹកព្រលឹម ពេលខ្ញុំនៅទីនោះ មានអ័ព្ទលើផ្ទៃទឹក ដែលបង្កើតជាទិដ្ឋភាពកាន់តែអស្ចារ្យ»។
ថ្វីដ្បិតតែស្ពាននេះស្ថិតក្នុងទីតាំងឯកាបន្ដិច តែលោក រ៉ូម៉ាំង បានអះអាងថា វាងាយស្រួលទៅដល់ណាស់។
លោកបានបន្ដថា៖ «ដំណើរទៅកាន់ស្ពានបុរាណបិសាចមិនមានបញ្ហាចោទនោះទេ។ ស្ពាននេះស្ថិតនៅក្នុងឧទ្យានសាធារណៈមួយដែលមានចំណតរថយន្ដធំនៅក្បែរ ហើយវាជាគោលដៅទេសចរណ៍ដ៏ពេញនិយមបំផុតសម្រាប់អ្នកឡើងភ្នំ ឬទេសចរទូទៅ»។
ជាទូទៅ ស្ពានថ្មបុរាណរាងកោងជាច្រើន ត្រូវបានហៅថាស្ពានបិសាច និងត្រូវបានកសាងឡើងអំឡុងសម័យយុគកណ្ដាល។
និទានកថាត្រូវបាននិយាយតៗគ្នាថា បិសាចជួយកសាងស្ពានជាថ្នូរនឹងដួងព្រលឹងមនុស្សដំបូងដែលឆ្លងស្ពាននោះ។ តែស្ពាននីមួយៗ មានរឿងព្រេងនិទានខុសៗគ្នាបន្តិចបន្តួច។ ប៉ុន្ដែស្ពាន រ៉ាកុតដែលត្រូវបានកសាងក្នុងឆ្នាំ ១៨៦០ នោះគឺជាស្នាដៃមនុស្សសុទ្ធសាធ រួមទាំង កំពូលចុងស្រួចនៃគល់ស្ពាន ដែលលយលើបឹង៕HR