ក្រចេះ: ជំនោរ​ខ្យល់​ដ៏ត្រជាក់​ត្រសៀក​បោកបក់​តិចៗ​មក​ប៉ះ​នឹងកាយ​នា​រដូវប្រាំង កាន់តែ​ធ្វើឲ្យ​ដំណើរ​លំហែកាយ​ដោយការ​ជិះទូក​តូចៗ បណ្តែត​ខ្លួន​លើផ្ទៃ​ទឹកទន្លេ​មេគង្គ ទស្សនា​គយគន់​បណ្តុំ​ទេសភាព​ធម្មជាតិ​ជុំវិញ​ដែនដីកោះ​មួយ​ដែលមាន​បណ្តោយ​ប្រហែល ៤៤ គីឡូម៉ែត្រ និង​ទទឹង​ជិត ២ គីឡូម៉ែត្រ នៅ​ប៉ែក​ឦសាននៃ​ប្រទេស​កម្ពុជា ក៏នាំ​អារម្មណ៍​ឲ្យ​ជក់ចិត្ត​ធូរស្បើយ និង​រសាយ​អស់ទុក្ខ​កង្វល់​មួយ​រំពេច​ភ្លាម សម្រាប់​ក្រុម​ទេសចរ​និយម​ការកម្សាន្ត​តាមផ្លូវ​ទឹក។