Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្ទឹង​តាសាល​នៅ​កំពង់ស្ពឺ ទេសភាព​ស្អាត​ប្លែក បីដូច​សមុទ្រ​ព័ទ្ធ​ដោយ​ភ្នំ

Content image - Phnom Penh Post
ទូកអាច​ផ្ទុក​អ្នក​ដំណើរ​បាន​ ៥-៦ នាក់ ក្នុង​ដំណើរ​គយគន់​ទេសភាព​ស្ទឹង​ដ៏ស្រស់​ត្រកាល​។ ផា លីណា

ស្ទឹង​តាសាល​នៅ​កំពង់ស្ពឺ ទេសភាព​ស្អាត​ប្លែក បីដូច​សមុទ្រ​ព័ទ្ធ​ដោយ​ភ្នំ

កំពង់ស្ពឺៈ តំបន់​កម្សាន្ត​ទំនប់​ទឹក​ស្ទឹង​តាសាល​ដែល​កកើត​ថ្មី​អ្នកភូមិ​និយម​ហៅថា «ទំនប់​ឥណ្ឌា» មាន​បណ្តុំ​ទេសភាព​ស្អាត​ប្លែក​ភ្នែក ភ្នំ​ហ៊ុមព័ទ្ធ​ជុំវិញ និង​មាន​ស្លែ​សារាយ ដុះ​នៅ​អែប​ច្រាំង​ស្ទឹង​ធំ​ល្វឹង​ល្វើយ លាយឡំ​ដោយ​ឈើ​ងាប់​តូចធំ​ឈរ​អើតក ពីផ្ទៃ​ទឹក​យ៉ាង​ត្រសង​ពេញ​ផ្ទៃ​ស្ទឹង ហាក់​ដូចជា​កំពុង​តែ​រង់ចាំ​ទទួល​ស្វាគមន៍​ក្រុម​ទេសចរ​មកពី​ទីជិត និង​ឆ្ងាយ បាន​មក​ដល់។

ទំនប់​ស្ទឹង​តាសាល​នេះ​ក៏មាន​តំបន់​កោះ​មួយ​ឈ្មោះ​ថា «កោះ​ស្នេហ៍» ជាទី​លម្ហែកាយ​ដ៏​មនោរម្យ​មួយ មាន​សម្រស់​ទេសភាព​ធម្មជាតិ ព្រៃភ្នំ និង​ទឹក គួរ​ជាទី​ពេញ​និយម​នៃការ​កម្សាន្ត​បែប​លក្ខណៈ​ស្ងប់ស្ងាត់ ខណៈ​នា​រដូវ​វស្សា ផ្ទៃ​ទឹក​ស្ទឹង​មើល​ទៅ​មាន​សភាព​ដូចជា​កូន​សមុទ្រ​មួយ​អ៊ីចឹង។

ស្ទឹង​តាសាល​នៅ​កំពង់ស្ពឺ ទេសភាព​ស្អាត​ប្លែក បីដូច​សមុទ្រ​ព័ទ្ធ​ដោយ​ភ្នំ

នា​រដូវកាល​នេះ​មាន​អំណោយ​ផល​ល្អ​សម្រាប់​ការ​ជិះទូក​លេង​កម្សាន្ត​គយគន់​ទេសភាព​ជើងភ្នំ នៅ​ហ៊ុមព័ទ្ធ​ស្ទឹង និង​ថែម​ទាំង​អាច​ស្ទូចត្រី​កម្សាន្ត​បាន​ផង​ដែរ ទោះបី​ជា​សកម្មភាព​លម្ហែ​ទើប​តែ​ដំណើរការ​បាន​ប្រមាណ ២ ឬ ៣ ឆ្នាំ​ចុង​ក្រោយ​នេះ​ក្តី។

លោក ប៉ាង សុខខេង ជា​ប្រជា​ការពារ​នៃ​ទំនប់​ទឹក​ស្ទឹង​តាសាល បាន​ឲ្យ​ដឹង​ពី​មូលហេតុ​ដែល​ហៅ​ឈ្មោះ​ថា «ទំនប់​ឥណ្ឌា» និង​ឈ្មោះ «កោះ​ស្នេហ៍» នៅ​ទីនោះ​ថា៖ «តាម​ពិត​ដើម​ឡើយ​ទីនេះ​មាន​ឈ្មោះ​ស្ទឹង​តាសាល តែ​តាំង​ពី​ពេល​មាន​ខាង​ប្រទេស​ឥណ្ឌា​មក​ជួយ​សាង​ទំនប់​ទឹក​មក អ្នកភូមិ​ក៏ហៅ​កាត់​ថា ទំនប់​ឥណ្ឌា​ប្រមាណ​ពីរបី​ឆ្នាំ​នេះ និង​ហៅ​តាម​គ្នាតៗ​មក។

ចំណែកឯ​កោះ​ស្នេហ៍​វិញ​នោះ​គឺជា​ការ​ដាក់​ឈ្មោះ​ដោយ​ក្រុម​អ្នកទេសចរ នៅ​ពេល​ដែល​ពួក​គាត់​បាន​មក​អង្គុយ​លេង​គយគន់​មើល​ទេសភាព​គួរ​ជាទី​ស្រឡាញ់ និង​ជក់ចិត្ត​នោះ​ក៏​នាំគ្នា​ហៅ​ថា កោះ​ស្នេហ៍​តាម​គ្នា​ទៅ»។

ស្ទឹង​តាសាល ស្ថិត​នៅ​ភូមិ​អូរអញ្ចារ ឃុំ​តាសាល ស្រុក​ឱរ៉ាល់ ខេត្ត​កំពង់ស្ពឺ ភ្ញៀវទេសចរ​គ្រាន់តែ​ធ្វើ​ដំណើរ​ចេញ​ហួសពី​តំបន់ រមណីយដ្ឋាន ទេ​ទឹកពុះ ប្រមាណ​ជិត ២០ គីឡូម៉ែត្រ នឹង​ឃើញ​ទេសភាព​ដ៏អស្ចារ្យ​ដែល​មាន​ភ្នំ​ព័ទ្ធជុំវិញ​មិន​ខាន។

Content image - Phnom Penh Post
ផ្ទៃទឹក​ធំ​ល្វឹង​ល្វើយ មាន​ចុង​ឈើ​ផុស​ឡើង​រាយប៉ាយ និង​ហ៊ុមព័ទ្ធ​ទៅ​ដោយ​ជួរភ្នំ​។ ផា លីណា

ប្រសិន​បើ​ចង់​ទៅ​កាន់​តំបន់ «កោះ​ស្នេហ៍» ដែល​មាន​ក្យូ​ស​មួយ​យ៉ាង​ធំ​ប្រក់​ស័ង្កសី សម្រាប់​ឲ្យ​ភ្ញៀវ​អង្គុយ​ញ៉ាំ​បាយ បណ្តែត​អារម្មណ៍​តាម​ខ្យល់​អាកាស​ល្អ​បរិសុទ្ធ អម​ទៅ​ដោយ​ទេសភាព​ព្រៃភ្នំ​ហ៊ុមព័ទ្ធ​ជុំវិញ​ស្ទឹង​មាន​ផ្ទៃ​ទឹកធំ​ល្វឹង​ល្វើយ​នោះ ក្រុម​ទេសចរ​ត្រូវ​ជិះទូក​ពីច្រាំង​នៃ​ចំណត​យានយន្ត​ប្រមាណ​កន្លះ​ម៉ោង​ទើប​អាច​ទៅ​ដល់ ខណៈ​ទូក​ស្មាច់​តូចៗ អាច​ផ្ទុក​អ្នកដំណើរ​បាន ៥-៦ នាក់។

លោក ប៉ាង សុខខេង ប្រាប់​ពី​តម្លៃ​ជិះ​ទូក​ទៅ​កាន់​កោះ​ស្នេហ៍​នោះ​ថា៖ «តម្លៃ​ទូក​យើង​គិត​មនុស្ស​ម្នាក់​បង់​ប្រាក់​ចំនួន ៥០០០ រៀល ដោយ​គិត​ទាំង​ដឹក​ទៅ និង​មកវិញ។ ភ្ញៀវ​ក៏អាច​មាន​ជម្រើស​ដែរ បើ​គាត់​នៅ​ទស្សនា​រយៈពេល​ខ្លី ហើយ​ចង់​ឲ្យ​យើង​ចាំ​ជូន​វិល​មក​វិញ​ក៏បាន ឬ​កំណត់​ម៉ោង​ដែល​ត្រូវ​ឲ្យ​ខាង​យើង​ទៅ​យក​មកវិញ​ក៏បាន ក្នុង​ករណី​ភ្ញៀវ​ចង់​សម្រាក​នៅឯ​កោះ​ស្នេហ៍​យូរ»។

ទោះជា​យ៉ាង​ណា សម្ទុះ​ភ្ញៀវ​ទៅ​កម្សាន្ត​នៅ​ទំនប់​ទឹកស្ទឹង​តាសាល ហាក់​ដូចជា​ពុំសូវ​សម្បូរ​នោះ​ឡើយ សម្បូរ​តែ​ភ្ញៀវ​ក្នុង​តំបន់​តិចតួច​តាម​រដូវកាល​បុណ្យទាន សូម្បីតែ​ស្លាក​ឈ្មោះ​តំបន់​ក៏​ពុំទាន់​មាន​នៅ​ឡើយ។

បងស្រី ណា​ង អ្នកលក់​បាយ​ម្ហូប​តាម​ការ​កុម្ម៉ង់​ភ្ញៀវ​នៅ​តំបន់​ទំនប់​ទឹក​ស្ទឹង​តាសាល​ជាង ២ ឆ្នាំ​មក​ហើយ​នោះ​រអ៊ូ​ថា៖ «ភ្ញៀវ​មក​លេង​មាន​ច្រើន​តែ​ថ្ងៃបុណ្យ​ទាន​ធំៗ​ប៉ុណ្ណោះ ហើយ​នៅ​ថ្ងៃ​ធម្មតា​មាន​តក់ៗ​តាម​ថ្ងៃ។ ថ្ងៃ​ខ្លះ​មាន​បីបួន​ឡាន​មក​លេង ហើយ​ថ្ងៃ​ខ្លះ​ក៏បួន​ដប់ឡាន​ទៅ»៕

Content image - Phnom Penh Post
នៅ​តំបន់​ទំនប់​ទឹក​ស្ទឹង​តាសាល មាន​កោះស្នេហ៍​ និង​មាន​ក្យូស​ធំមួយ ​សម្រាប់​ភ្ញៀវ​ទេសចរ​អង្គុយ​លេង​កម្សាន្ត​។ ផា លីណា

Content image - Phnom Penh Post
អ្នកទេសចរ​ផ្ដិត​យក​ទេសភាព​ដ៏ប្លែក​ភ្នែក​នៃ​តំបន់​ស្ទឹង​តាសាល​។ ផា លីណា

0

Comments

Please, login or register to post a comment