កំពត: ហ៊ុមព័ទ្ធដោយព្រៃឈើ ដែលជាផ្នែកតូចមួយនៃឧទ្យានជាតិព្រះមុនីវង្ស បូកគោ ល្បាក់ទឹកហូរ ជ្រែកដុំថ្មតូចធំតាមជ្រលងដងអូរ មកដល់ត្រង់ចំណុចមួយមានលក្ខណៈជាអាង ស្ទើររាងមូល មុននឹងធ្លាក់ទៅខាងក្រោមគឺជាកន្លែងអំណោយផលដល់ទេសចរ ប្រាថ្នាហែលទឹកលេង នែបនិត្យជាមួយនឹងធម្មជាតិដ៏ស្រស់បំព្រង។
អាងទឹកធម្មជាតិ ដ៏ថ្លាយង់ ពណ៌ខៀវស្រងាត់ និងត្រជាក់ស្រេងនេះ គឺទឹកធ្លាក់ អន្លង់ខៀវ ស្ថិតនៅផ្នែកខាងលើនៃសហគមន៍ទេសចរណ៍ធម្មជាតិព្រែកត្នោត ឬអន្លង់ធំ ដែលមានទីតាំងស្ថិតនៅក្នុងភូមិព្រែកក្រែង ឃុំព្រែកត្នោត ស្រុកទឹកឈូ ខេត្តកំពត ដោយធ្វើដំណើរចេញពីទីរួមខេត្តកំពត ឆ្ពោះទៅកាន់ វាលរេញ ក្នុងចម្ងាយប្រមាណជិត ៣០ គីឡូម៉ែត្រ។
ភ្ញៀវទេសចរ ត្រូវមកដល់សហគមន៍ទេសចរណ៍ព្រែកត្នោត ឬ អន្លង់ធំ នេះសិន មុននឹងបន្តធ្វើដំណើរឡើងភ្នំ កាត់ព្រៃលើផ្លូវមានថ្មរដិបរដុបបន្តិចប្រមាណជា ១៥ នាទី ទើបបានទៅដល់ទីឋានរមនានោះ។
យ៉ាងណា ភ្នំពេញ ប៉ុស្តិ៍ ផ្តល់យោបល់ឲ្យភ្ញៀវទាំងឡាយស្វែងរកអ្នកនាំផ្លូវ ជាពិសេសកុមារាតូចៗ ប្រសិនបើពួកគេទំនេរពីការសិក្សា ព្រោះដំណើរទៅកាន់អាងទឹកធម្មជាតិនេះ មិនមានការដាក់ស្លាកសញ្ញាសម្គាល់ឡើយ ហើយវាក៏ទាមទារអ្នកប្រាថ្នាបទពិសោធដើរព្រៃដែរ។
ទៅដល់ទីនោះ ភ្ញៀវទេសចរនឹងទទួលបានអារម្មណ៍ប្លែក នៅពេលឃើញទិដ្ឋភាពនៃទឹកអន្លង់ខៀវ ដែលមានពណ៌ខៀវថ្លា ស្អាត និងដើមឈើធំតូចដុះប្របមាត់ទឹក និងមើលឃើញកូនត្រីតូចៗល្អិត ហែលប្រឡែងគ្នាលេងជាហ្វូង។
សម្រស់ទឹកធ្លាក់ហូរចេញពីជើងភ្នំបូកគោនេះ នឹងទាក់ចិត្តភ្ញៀវទេសចរគ្រប់គ្នា ចុះហែលទឹកលេងកម្សាន្ត ខ្លះអង្គុយលើផ្ទាំងថ្មជាច្រើនដុំ ក្បែរនោះសម្រាកលម្ហែកាយ ស្រូបយកខ្យល់អាកាសបរិសុទ្ធពីធម្មជាតិនៃព្រៃឈើ ខេត្តនិរតីមួយនេះ។
ភ្ញៀវទេសចរ ក៏អាចលោតទម្លាក់ខ្លួនពីផ្ទាំងដុំថ្មដ៏ធំក្បែរហ្នឹងបាន ព្រោះទឹកមានជម្រៅជ្រៅល្មម ដែលមិនបណ្តាលឲ្យមានគ្រោះថ្នាក់ ប៉ុន្តែយ៉ាងណាគួរមានការប្រុងប្រយ័ត្នខ្ពស់ មុននឹងលោតចូលទឹក គួរដឹងពីកន្លែងទឹកជ្រៅ ចៀសវាងប៉ះដុំថ្មនៅកន្លែងទឹករាក់។
សម្រាប់ទីកម្សាន្តនៅអន្លង់ខៀវនេះ មិនមានកន្លែងលក់ចំណីអាហារទេ ប៉ុន្តែភ្ញៀវទេសចរអាចទិញ ឬកុម្ម៉ង់នៅតាមតូបនានាក្បែរចំណតឡាន នៅដើមផ្លូវចូលរមណីយដ្ឋានអន្លង់ធំ ដោយឈរចាំយក ឬឲ្យអ្នកលក់យកទៅឲ្យដល់អន្លង់ខៀវ ក៏បាន។
ម្យ៉ាងទៀតប្រសិនបើភ្ញៀវទេសចរខ្លះមិនចង់ទៅលេងដល់អន្លង់ខៀវ និងក៏ចង់សម្រាកលេង ឬញ៉ាំអាហារនៅ អន្លង់ធំ សិនក៏បាន ព្រោះមានក្យូសសម្រាប់អង្គុយលេងក្បែរមាត់ទឹកដែលហូរធ្លាក់មកពីអន្លង់ខៀវ។
ទឹកធ្លាក់អន្លង់ខៀវ ជារមណីយដ្ឋានធម្មជាតិថ្មីមួយទៀតនៅខេត្តកំពត ដែលកំពុងមានការចាប់អារម្មណ៍ សម្រាប់ភ្ញៀវទេសចរជិតឆ្ងាយដែលប្រាថ្នាចង់រកកន្លែងកម្សាន្តលេងថ្មី គេចពីការអ៊ូអរ និងចង់ស្រស់ស្រាយជាមួយធម្មជាតិដ៏ស្រស់ត្រកាលនៃទឹកដីខេត្តកំពត ជាខេត្តដែលពោរពេញទៅដោយសក្តានុពលទេសចរណ៍ដ៏ធំមួយនៅក្នុងប្រទេសកម្ពុជា៕