Search form

Login - Register | FOLLOW US ON

Logo of Phnom Penh Post newspaper Phnom Penh Post - គ្មាន​ស្ថិរភាព​នយោបាយ​ គ្មាន​កំណើន​សេដ្ឋកិច្ច

Content image - Phnom Penh Post
លោក ម៉ី វ៉ាន់ អគ្គនាយក​នៃ​អគ្គនាយកដ្ឋាន​ឧស្សាហកម្មណ៍​ហិរញ្ញវត្ថុ ផ្ដល់​បទម្ភាស​ដល់​កាសែត​ភ្នំពេញ​ប៉ុស្ដិ៍។ គាំ ច័ន្ទរស្មី

គ្មាន​ស្ថិរភាព​នយោបាយ​ គ្មាន​កំណើន​សេដ្ឋកិច្ច

ជា​អ្នក​ស្រុក​កំពង់ថ្ម ខេត្ត​កំពង់ធំ​លោក ម៉ី វ៉ាន់ កើត​នៅ​ឆ្នាំ ១៩៦៩ នៃ​គ្រួសារ​មន្ដ្រី​រាជការ​មាន​ជីវភាព​បង្គួរ​ដែល​មាន​ឪពុក​ជា​មន្ដ្រី​រាជការ​នៅ​នាយកដ្ឋាន​ជលផល​នៃ​ក្រសួង​កសិកម្ម រុក្ខាប្រមាញ់ និង​នេសាទ ក្នុង​រាជធានី​ភ្នំពេញ។

មិន​ខុស​ពី​កុមារ​ដទៃ​ទេ​កាលពី​អាយុ ៩ ឆ្នាំ​លោក​បាន​ឆ្លង​កាត់​ជំនាន់​ ប៉ុល ពត ដោយ​ត្រូវ​បាន​គេ​បំបែក​ទៅ​ឆ្ងាយ​ពី​ឪពុកម្តាយ​ទៅ​ធ្វើការ​នៅ​កងកុមារ​នៅ​ស្រុក​ចំការលើ ព្រំ​ប្រទល់​កំពង់ធំ និង​កំពង់ចាម។

នៅ​ពេល​នោះ​គ្មាន​ការ​រៀនសូត្រ​អ្វី​ទាំងអស់​មាន​តែ​ការ​បង្ខំ​ឲ្យ​កុមារ​ធ្វើការ​ទាំង​ឈឺ ទាំង​ជា និង​គ្មាន​អាហារ​បរិភោគ​គ្រប់គ្រាន់ ជង្គង់​ធំ​ជាង​ខ្លួន ធ្វើការ​ហួស​កម្លាំង ឈឺ​គ្មាន​ថ្នាំ​ព្យាបាល និង​បាក់​កម្លាំង​យ៉ាង​ខ្លាំង។

ក្រោយ​ពី​របប ប៉ុល ពត បាន​ដួលរលំ​នា​ថ្ងៃ​ទី ៧ មករា ឆ្នាំ ១៩៧៩ កុមារ ម៉ី វ៉ាន់ បាន​មក​រស់នៅ​ជាមួយ​ឪពុកម្ដាយ​នៅ​ស្រុក​កំណើត​វិញ​ហើយ​បាន​ចូល​រៀន​នៅ​សាលា​បឋមសិក្សា​កំពង់ថ្ម ខេត្ត​កំពង់ធំ រហូត​ដល់​ចប់​ថ្នាក់​បឋម។

នៅ​ឆ្នាំ ១៩៨២ នៅ​ពេល​ដែល​ឪពុក​របស់​គាត់​មក​ធ្វើការ​នៅ​នាយកដ្ឋាន​ជលផល ទើប​កុមារា​រូប​នេះ​មក​រៀន​បន្ដ​នៅ​ក្រុង​ភ្នំពេញ​ក្នុង​ឆ្នាំ ១៩៨៣ នៅ​សាលា​ទួលស្លែង ហើយ​បាន​ជាប់​វិញ្ញាបនបត្រ​បឋម​ហើយ​បន្ត​រៀន​នៅ​សាលា​ទួលស្វាយព្រៃ​ដល់​មធ្យមសិក្សា​ហើយ​ចូល​រៀន​បន្ដ​នៅ​វិទ្យាល័យ​បឹងត្របែក។

សេដ្ឋកិច្ច គឺជា​វិជ្ជាជីវៈ​មួយ​ដែល​លោក​មិន​សូវ​ជា​ចាប់​អារម្មណ៍​ទេ​តាំង​ពី​លោក​នៅ​រៀន។

ក្រោយ​ពី​ប្រឡង​ជាប់​បាក់ឌុប​លោក​បាន​ប្រឡង​ចូល​មហាវិទ្យាល័យ​វេជ្ជសាស្រ្ត​ព្រោះ​លោក​ពូកែ​គណិត រូប និង​គីមីវិទ្យា ប៉ុន្តែ​លោក​មិន​បាន​សម្រេច​បំណង​ឡើយ។

ក្រោយ​មក​លោក​ក៏​បាន​ទៅ​ប្រឡង​ចូល​រៀន​នៅ​វិទ្យាស្ថាន​បច្ចេកវិទ្យា​តិចណូ​ដោយ​រៀន​ជា​ភាសា​រុស្ស៊ី ហើយ​ទន្ទឹម​នឹង​នោះ​ក៏​មាន​ជម្រើស​ប្រឡង​សេដ្ឋកិច្ច រៀន​ជា​ភាសា​វៀតណាម​ហើយ​ទី​បំផុត​លោក​សម្រេច​ប្រឡង​ជាប់​ចូល​រៀន​សាលា​សេដ្ឋកិច្ច​តាម​បំណង​របស់​ឪពុកម្ដាយ។

នៅ​ឆ្នាំ ១៩៩៣ ជា​ឆ្នាំ​ដែល​កម្ពុជា​បោះឆ្នោត​ជាតិ​លើក​ទី ១ រៀបចំ​ដោយ​អង្គការ​សហប្រជាជាតិ (UNTAC) ហើយ​ក៏​ជា​ឆ្នាំ​ដែល​លោក ម៉ី វ៉ាន់ បាន​ចូល​បម្រើការ​នៅ​ក្រសួង​សេដ្ឋកិច្ច និង​ហិរញ្ញវត្ថុ​ បន្ទាប់ពី​បញ្ចប់​ការ​សិក្សា​នៅ​វិទ្យាស្ថាន​សេដ្ឋកិច្ច (បច្ចុប្បន្ន​ជា​សាកល​វិទ្យាល័យ​ជាតិ​គ្រប់គ្រង)។ «ខ្ញុំ​ចាប់​ផ្តើម​ធ្វើការ​នៅ​នាយកដ្ឋាន​ហិរញ្ញកិច្ច យើង​គ្រប់គ្រង​ថវិកា​សម្រាប់​ក្រសួង​អប់រំ យុវជន និង​កីឡា។ ដោយ​មាន​សំណាង​ខ្ញុំ​បាន​ធ្វើការ​ជាមួយ​នឹង​ថ្នាក់​ដឹកនាំ​ដោយសារ​តែ​ខ្ញុំ​រៀន​ចេះ​ភាសា​បារាំង»។

ឆ្នាំ ១៩៩៧ លោក​បាន​ទទួល​អាហារូបករណ៍​របស់​ធនាគារ​ពិភពលោក​ទៅ​សិក្សា​នៅ​ប្រទេស​បារាំង​រយៈពេល​ពីរ​ឆ្នាំ​កន្លះ​ផ្នែក​អភិវឌ្ឍន៍​សេដ្ឋកិច្ច។ នៅ​ទី​នោះ​លោក​បាន​រាប់អាន​ញាតិ​មិត្ត​ជា​ប្រជាពលរដ្ឋ​ខ្មែរ​នៅ​បារាំង​ក្នុង​បំណង​ស្វែងយល់​ពី​របៀប​របប​រស់​បែប​ស៊ី​វិល័យ។

Content image - Phnom Penh Post
លោក ម៉ី វ៉ាន់ និង​ភរិយា​នៅ​ក្នុង​ពិធី​សង្គម​មួយ​នាពេល​កន្លង​មក។ រូបថត ហ្វេសប៊ុក

លោក ម៉ី វ៉ាន់ បច្ចុប្បន្ន វ័យ ៤៨ ឆ្នាំ​ជា​អគ្គនាយក​នៃ​អគ្គនាយកដ្ឋាន​ឧស្សាហកម្ម​ហិរញ្ញវត្ថុ​របស់​ក្រសួង​សេដ្ឋកិច្ច និង​ហិរញ្ញវត្ថុ។ ដោយ​មាន​បទពិសោធជិត ៣ ទសវត្សរ៍​លោក ម៉ី វ៉ាន់ បាន​មើល​ឃើញ​ការ​វិវឌ្ឍ​ប្រែប្រួល​យ៉ាង​ខ្លាំង​ក្នុង​វិស័យ​នេះ ពិសេស​សម្រាប់​រយៈពេល ២ ទសវត្សរ៍​ចុង​ក្រោយ។

កម្ពុជា​បាន​ប្រែ​ក្លាយ​ពី​សេដ្ឋកិច្ច​ផែនការ​ក្នុង​របប​សង្គមនិយម​ទៅ​ជា​សេដ្ឋកិច្ច​ទីផ្សារ​សេរី (Free Market Economy) ក្នុង​របប​ប្រជាធិបតេយ្យ​សេរី​ពហុបក្ស​ចាប់​តាំង​ពី​ឆ្នាំ ១៩៩៣។

រាជរដ្ឋាភិបាល​ដែល​កើត​ក្រោយ​ការ​បោះឆ្នោត​ជាតិ ១៩៩៣ នោះ​បាន​ប្រឹងប្រែង​គិត និង​ត្រៀម​ខ្លួន​ចូល​ជា​សមាជិក​អាស៊ាន​ដោយ​ត្រៀម​លក្ខណ​សម្បត្តិ និង​យុត្តិសាស្រ្ដ​ជាច្រើន​ក្នុង​ការ​ទាក់ទាញ​វិនិយោគ​ផ្ទាល់​ពី​បរទេស (FDI)។

ទីបំផុត​សហគមន៍​មួយ​សេដ្ឋកិច្ច​មួយ​ត្រូវ​បាន​ចាប់​ធ្វើ​សមាហរណកម្ម​នៅ​ចុង​ឆ្នាំ ២០១៥ ដែល​កម្ពុជា​អាច​ទាញ​យក​អត្ថប្រយោជន៍​ពី​គោលនយោបាយ​អាស៊ាន។

ក្នុង​បរិបទ​នេះ​គោលការណ៍​សំខាន់​របស់​រដ្ឋាភិបាល​គឺ​ធ្វើ​ឲ្យ​អ្នក​វិនិយោគទុក​ចិត្ត​រដ្ឋាភិបាល តាមរយៈ​រក្សា​បាន​នូវ​ស្ថិរភាព​នយោបាយ​ សុវត្ថិភាព​សង្គម និង​ភាព​ទាក់ទាញ​ក្នុង​ផ្នែក​វិនិយោគ​ទាំង​ច្បាប់​ទម្លាប់​ ពន្ធដារ ហេដ្ឋារចនាសម្ព័ន្ត​រូបវ័ន្ត និង​ទាំង​ធនធាន​មនុស្ស។

លោក​បាន​រំឭក​ថា​ «កាល​ពេល​នោះ​កម្ពុជា​អត់​មាន​ធនធាន​មនុស្ស​ឲ្យ​គេ​ប្រើ​ទេ អ្នក​វិនិយោគ​ជួប​ការ​ពិបាក​មែនទែន។ អ៊ីចឹង​យើង​មាន​តែ​ធ្វើការ​តាម​លទ្ធភាព​ដែល​អ្នក​វិនិយោគ​ចង់​បាន​តាមរយៈ​ការ​ឲ្យ​សិទ្ធិ​គេ​ធ្វើ​ជា​ម្ចាស់ ១០០ ភាគរយ»។

រដ្ឋាភិបាល​ចាប់​ផ្តើម​ធ្វើ​កំណែទម្រង់​ចេញ​ពី​សេដ្ឋកិច្ច​ផែនការ​ទៅ​ជា​សេដ្ឋកិច្ច​ផ្សារ​សេរី​ដោយ​ចាត់​ទុក​វិស័យ​ឯកជន​ជា​ក្បាល​ម៉ាស៊ីន​សេដ្ឋកិច្ច ខណៈ​ដែល​ប្រទេស​នេះ​នៅ​មាន​ការ​ខ្វះខាត​ច្បាប់​ទម្លាប់​ជាច្រើន​នា​ពេល​នោះ។

មិនមែន​ជា​ការ​ងាយស្រួល​ឡើយ​សម្រាប់​ប្រទេស​មួយ​ដែល​ខ្វះខាត​ច្បាប់​ទម្លាប់ លិខិត​បទដ្ឋាន​ក្នុង​ការ​ជំរុញ​ការ​វិនិយោគ​គឺ​កម្ពុជា​បាន​ប្រើប្រាស់​យុទ្ធសាស្រ្ដ​ទន់ភ្លន់​ដោយ​កំណត់​ថា​ការ​ចេញ​ជា​សេចក្ដី​ណែនាំ (Guideline) របស់​រដ្ឋមន្រ្តី ក្រសួង​សេដ្ឋកិច្ច និង​ហិរញ្ញវត្ថុ និង​សេចក្ដី​ណែនាំ​របស់​រដ្ឋមន្រ្តី​មួយ​ចំនួន​ទៀត​គឺជា​ការ​ដែល​អាច​អនុវត្ត​ទៅ​បាន​ជំនួស។ ទន្ទឹម​នឹង​ការ​ទទួល​បាន​បទពិសោធន៍​ធ្វើ​សៀវភៅ​ណែនាំ ក្រសួង​ក៏​ចាប់ផ្ដើម​អនុម័ត​ច្បាប់​ជា​បន្ដបន្ទាប់។

លោក​បញ្ជាក់​ថា ៖ «ច្បាប់​នេះ​ធ្វើ​សាមញ្ញ​ទេ​តែ​យើង​អាច​ធ្វើ​ឲ្យ​ប្រកាស​របស់​រដ្ឋមន្រ្តី ឬ​ក្រសួង​ហិរញ្ញវត្ថុ​របស់​រដ្ឋាភិបាល​អាច​បន្ត​តម្រង់​ទិស​តាម​វិស័យ​នីមួយៗ​បាន»។

ដោយសារ​ស្ថិរភាព​នយោបាយ និង​សន្ដិសុខ​កាន់​តែ​ល្អ​ព្រម​ទាំង​ធ្វើ​សេរីភាវូបនីយកម្ម អង្គការ​សហប្រជាជាតិ (UN) តែងតែ​ជួយ​ជ្រោមជ្រែង​ដល់​កម្ពុជា​ដែល​ជា​សមាជិក​របស់​អង្គការ​សហប្រជាជាតិ។ នោះ​ហើយ​ជា​មូលហេតុ​ដែល​នាំ​ឲ្យ​កម្ពុជា​អាច​ស្រូប​យក​វិនិយោគិន​ខាង​វិស័យ​កាត់ដេរ​សម្លៀកបំពាក់​ដែល​បាន​ផ្ដល់​ការងារ​ដល់​ស្ដ្រី​ជា​កម្មការិនី​ជាង​កន្លះ​លាន​នាក់។

លោក​មាន​ប្រសាសន៍​ថា «នារីៗ​កម្ពុជា​មាន​ទេពកោសល្យ​ណាស់​នរណា​ក៏​ចេះ​ដេរ​ដែរ»។ ក្រុម​វិនិយោគិន​បរទេស​បាន​មើល​ឃើញ​ពី​វិស័យ​នេះ​ថា​អាច​ស្រូប​យក​នូវ​កម្លាំង​ពលកម្ម​ខ្លាំង​មនុស្ស​វ័យ​ក្មេង​របស់​កម្ពុជា។

ជាទូទៅ​សេដ្ឋកិច្ច​កម្ពុជា​បាន​កំណត់​អាស្រ័យ​អាទិភាព​ធំ​ទាំង ៤ រួមមាន៖ វិស័យ កសិកម្ម វិស័យ​នាំ​ចេញ​សម្លៀក​បំពាក់​កាត់ដេរ ទេសចរណ៍ និង​សំណង់​ដែល​បាន​បន្ដ​ភាព​រឹងមាំ​របស់​ខ្លួន​ក្នុង​ការ​ទ្រទ្រង់​កំណើន​ផលិតផល​សរុប (ផសស) ៧ ភាគរយ​ក្នុង ១ ឆ្នាំ។ វិស័យ​ទេសចរណ៍​បន្ដ​មាន​សក្ដានុពល​យ៉ាង​ខ្លាំង​តាមរយៈ​ការ​អនុវត្ត​គោលនយោបាយ​បើក​ចំហ​ជើង​មេឃ​ដោយ​អនុញ្ញាត​ឲ្យ​យន្តហោះ​ទាំង​ឡាយ​ហោះ​ត្រង់​មក​កាន់​រាជធានី​ភ្នំពេញ និង​តំបន់​អង្គរ​នៃ​ខេត្ត​សៀមរាប។

លោក​ថ្លែង​ថា​ «ដើម្បី​ឲ្យ​ទេសចរ​ទុក​ចិត្ត ទី ១ កម្ពុជា​ខិតខំ​រក្សា​នូវ​ស្ថិរភាព​នយោបាយ​ប្រទេស​ដោយ​ទប់ស្កាត់​កុំ​ឲ្យ​មាន​ចោរកម្ម ឃាតកម្ម និង​ឲ្យ​ទេសចរ​មាន​សេចក្តី​សុខ​ក្នុង​ចិត្ត​នៅ​រាល់​ដំណើរ​កម្សាន្ដ​គ្រប់​ទីកន្លែង។ ចំពោះ​វិស័យ​សំណង់ អចលនទ្រព្យ​វិញ​បើ​ពិនិត្យ​លើ​ស្ថិតិ​បង្ហាញ​ថា​ពលរដ្ឋ​នៅ​រាជធានី​ត្រូវ​ការ​ផ្ទះ​សម្រាប់​ស្នាក់​នៅ​ប្រមាណ ២០ ០០០ Units (ទីតាំង​ស្នាក់នៅ) ក្នុង​ ១ ឆ្នាំៗ។

Content image - Phnom Penh Post
លោក ម៉ី វ៉ាន់ (ឆ្វេង) ចូលរួម​ប្រជុំ​ពិភាក្សា​ទាក់ទិន​នឹង​វិស័យ​ធនាគារ និង​ហិរញ្ញវត្ថុ​ជាមួយ​សមភាគី​កូរ៉េ។ រូបថត ហ្វេសប៊ុក

ធនាគារ​អភិវឌ្ឍន៍​អាស៊ី (ADB) កាលពី​ឆ្នាំ ២០១៦ វាយតម្លៃ​ថា «កម្ពុជា​ជា​កូន​ខ្លា​សេដ្ឋកិច្ច​ហើយ​វាយតម្លៃ​ពី​មួយ​ឆ្នាំ​ទៅ​មួយ​ឆ្នាំ​កើន​រហូត។ កាលពី​មុន​កម្ពុជា​លេខ​មួយ​នៅ​តំបន់​អាស៊ាន​លេខ​ប្រាំ​លើ​ពិភពលោក។ ឥឡូវ​ធនាគារ​វាយតម្លៃ​ថា​យើង​អាច​ជាប់​លេខ​បី​ទៀត​នៅ​ក្នុង​កំណើន​ពិភពលោក។ កំណើន​សេដ្ឋកិច្ច​ថេរ​រង្វង់ ៧ ភាគរយ​នេះ​បាន​ធ្វើ​ឲ្យ​កម្ពុជា​អាច​កាត់​បន្ថយ​ភាព​ក្រីក្រ​របស់​ពលរដ្ឋ ១ ភាគរយ​ជា​រៀងរាល់​ឆ្នាំ»។

លោក ម៉ី វ៉ាន់ មាន​ប្រសាសន៍​ថា​ក្រៅ​ពី​ចក្ខុវិស័យ​ធំៗ​កម្ពុជា​នៅ​មាន​អនុវិស័យ​គួរ​ឲ្យ​ចាប់​អារម្មណ៍​ផ្សេង​ទៀត​ដូចជា​វិស័យ​ធនាគារ គ្រឹះស្ថាន​មីក្រូហិរញ្ញវត្ថុ ធានា​រ៉ាប់រង វិស័យ​អចលនទ្រព្យ និង​ល្បែង​ភ្នាល់ (កាស៊ីណូ និង​ឆ្នោត) ជាដើម។ អនុវិស័យ​ទាំង ៤ នេះ​បាន​និង​កំពុង​រីកចម្រើន​គួរ​ឲ្យ​កត់សម្គាល់។ លោក​មាន​ប្រសាសន៍​ថា​ការ​ផ្ដល់​សេវា​ធានារ៉ាប់រង​នឹង​នាំ​មក​នូវ​អត្ថប្រយោជន៍​ដល់​ពលរដ្ឋ​កម្ពុជា។ «បើ​យើង​បាន​លុយ យើង​ចាយ​ខ្ជះខ្ជាយ​មាន​ន័យ​ថា​យើង​មិន​បាន​គិត​ពី​អនាគត​កូនចៅ​របស់​ខ្លួនឯង​ទេ»។

កាស៊ីណូ​ក៏​ជា​អនុវិស័យ​សំខាន់​មួយ​ផង​ដែរ ដែល​ត្រូវ​បាន​អនុញ្ញាត​ឲ្យ​ធ្វើ​អាជីវកម្ម​តាម​ព្រំដែន កម្ពុជា-វៀតណាម និង​ព្រំដែន​កម្ពុជា-ថៃ។ «យើង​អនុញ្ញាត​ដើម្បី​មាន​ការងារ​នៅ​តាម​ព្រំដែន។ ទី ២ គឺ​កាស៊ីណូ​ដែល​ជា​យុទ្ធសាស្រ្ត​មួយ​ល្អ​ណាស់​ធ្វើ​ឲ្យ​តំបន់​ព្រំដែន​ក្លាយ​ជា​តំបន់​មាន​សុខ​សន្តិភាព និង​មាន​ការ​អភិវឌ្ឍ​ហើយ​កម្ពុជា​មិន​អនុញ្ញាត​ឲ្យ​ខ្មែរ​ចូល​លេង​ទេ​ខ្មែរ​មិន​មាន​លទ្ធភាព​ចូល​លេង​ដល់​ព្រំដែន​ទេ។ ម្យ៉ាង​ទៀត​កម្ពុជា​បាន​សំណង់​រឹង​ដើម្បី​ការពារ​ព្រំដែន​របស់​ខ្លួន​ទៀត​ផង។

ទស្សន​វិស័យ​សម្រាប់​សេដ្ឋកិច្ច​កម្ពុជា​នៅ ១០ ឆ្នាំ ខាង​មុខ​ទៀត​វា​អាស្រ័យ​ទាំង​ស្រុង​ទៅ​លើ​ស្ថិរភាព​នយោបាយ។

លោក ម៉ី វ៉ាន់ បាន​បញ្ជាក់​ថា «រដ្ឋាភិបាល​មាន​តែ​ត្រូវ​ពន្យល់​ប្រជាពលរដ្ឋ​ឲ្យ​យល់​ច្បាស់​អំពី​សារៈសំខាន់​នៃ​ស្ថិរភាព​នយោបាយ​ជាតិ​កុំ​ឲ្យ​មាន​សង្គ្រាម​ត្រូវ​អនុវត្ត​លទ្ធិប្រជាធិបតេយ្យ បើ​បោះឆ្នោត​ឲ្យ​គេ​ហើយ​ឲ្យ​រដ្ឋាភិបាល​ធ្វើការ​ឲ្យ​ពេញ​ដៃ​កុំ​ឲ្យ​បោះឆ្នោត​ឲ្យ​គ្នា​ហើយ ក៏​ចង់​បាតុកម្ម​ទម្លាក់​គ្នា​ដូច ត្រាំ គ្រាន់​តែ​ឡើង​បាតុកម្ម​អស់​ប៉ុន្មាន​អាទិត្យ​ដោយ​អត់​ពេញ​ចិត្ត​លទ្ធផល​ឆ្នោត»។

លោក​បាន​បន្ថែម​ថា​ទន្ទឹម​គ្នា​នេះ​ក្រសួង​អប់រំ យុវជន និង​កីឡា លោក គួរ​តែ​ធ្វើ​សេចក្តី​ណែនាំ​មួយ​សម្រាប់​សាកល​វិទ្យាល័យ ហើយ​ក្នុង​ហ្នឹង​គឺ​ក្រសួង​នេះ​គួរ​ឲ្យ​សាកលវិទ្យាធិការ​ធ្វើការ​ជាមួយ​នឹង​រដ្ឋាភិបាល​ដើម្បី​ឲ្យ​មើល​ឃើញ​ពី​វិស័យ​កំពុង​អភិវឌ្ឍន៍។ «ក្មេងៗ​យើង​ឥឡូវ​នេះ​ស្រួល​រៀន​ជាង​ជំនាន់​ពួកយើង​ឆ្ងាយ​ណាស់ បើ​គេ​ចង់​ដឹង​ពី​អី គេ Google បាន​ទាំង​អស់​ហ្នឹង។ សួរ​អី​ក៏​ចេញ​ដែរ។ អាហ្នឹង​ដែល​ត្រូវ​បើក​ភ្នែក​គាត់​ថា​ឲ្យ​ត្រូវ​ធ្វើ​អី មិន​មែន​ចាំ​ឲ្យ​រដ្ឋាភិបាល​លើក​ជើង​ពាន​បង្ហាញ​គាត់​ទេ។ ការ​លើក​ទឹកចិត្ត​គឺជា​ផ្នែក​នៅ​ការ​ចង្អុល​ទិស​របស់​រដ្ឋាភិបាល និង​បង្កើន​នូវ​ហេដ្ឋារចនាសម្ព័ន្ធ»។

ជា​ចុងក្រោយ​សេដ្ឋវិទូ​រូប​នេះ​បាន​ផ្ដល់​ឱវាទ​ដល់​យុវជន​ទាំង​ឡាយ​ថា​ឲ្យ​ចេះ​ចាប់​យក​ឱកាស​សិក្សា​មុខវិជ្ជា​ទាំង​ឡាយ​ណា​ដែល​ខ្លួន​ចូលចិត្ត​ហើយ​ខិតខំ​ធ្វើការ​លើ​ជំនាញ​នោះ​មុន​នឹង​ចាប់​ផ្ដើម​បង្កើត​មុខរបរ​ខ្លួនឯង។

សេដ្ឋវិទូ​រូប​នេះ​បាន​ផ្ដល់​សារ​ជូន​ដល់​យុវជន​កម្ពុជា​ថា «ប្អូនៗ​ [យុវជន​កម្ពុជា] ត្រូវ​ទៅ​ធ្វើការ​ឲ្យ​គេ​យក​បទពិសោធ​សិន​ចាំ​ធ្វើ​ការងារ​ឲ្យ​ខ្លួនឯង​ហើយ​បើ​យើង​មាន​បទពិសោធ​តាំងពី​កើត​មក​ហើយ​ អ្នក​ឯង​ទៅ​ធ្វើ​ភ្លាម​ទៅ...នេះ​គឺជា​កត្តា​ជោគជ័យ​ក្នុង​ឆាក​ជីវិត»៕

រាយការណ៍​បន្ថែម​ដោយ តាំង រីនិត្យ/សហការ​ផលិត VIDEO ដោយ គាំ ច័ន្ទរស្មី, កែវ រតនា, មានសង្ហារ ដេវីត និង លៀប ទេវិពិទូ

0

Comments

Please, login or register to post a comment