Search form

Login - Register | FOLLOW US ON

Logo of Phnom Penh Post newspaper Phnom Penh Post - បណ្ឌិត​ហេង វ៉ាន់ដា​៖ ​វិស័យ​អប់រំ​កម្ពុជា ​ចាំបាច់​ត្រូវ​ចាក់​បញ្ចូល​ទឹក​ប្រាក់​បន្ថែម​

Content image - Phnom Penh Post
ស្ថាបនិក និង​នាយក​វិទ្យា​ស្ថាន​វ៉ាន់ដា​គណនេយ្យ​ពេល​ផ្ដល់​បទ​សម្ភាស​នៅ​ការិយាល័យ​។ រូបថត កែវ រតនា​

បណ្ឌិត​ហេង វ៉ាន់ដា​៖ ​វិស័យ​អប់រំ​កម្ពុជា ​ចាំបាច់​ត្រូវ​ចាក់​បញ្ចូល​ទឹក​ប្រាក់​បន្ថែម​

​អ្នក​ជំនាញ​វិស័យ​អប់រំ​កម្រិត​ឧត្តម​សិក្សា​បាន​ជំរុញ​ឲ្យ​រាជរដ្ឋាភិបាល​ចាក់​ទឹក​ប្រាក់​បញ្ចូល​បន្ថែ​ម​ទៀត​ក្នុង​វិស័យ​អប់រំ ទាំង​ថ្នាក់ បឋម មធ្យម​និង​ឧត្ដម ដើម្បី​ពង្រឹង​គុណភាព​ធនធាន​មនុស្ស​របស់​ប្រទេស​ក្នុង​ដំណាក់​កាល​សកល​ភារូបនីយកម្ម​។ នេះ​បើ​តាម បណ្ឌិត ហេង វ៉ាន់ដា ប្រធាន​សមាគម​គ្រឹះស្ថាន​ឧត្តម​សិក្សា​កម្ពុជា​និង​ជា​ស្ថាបនិក​វិទ្យាស្ថាន​វ៉ាន់ដា​គណនេយ្យ​បាន​ថ្លែង​ប្រាប់​ភ្នំពេញ​ប៉ុស្ដិ៍​ក្នុង​ពេល​ផ្ដល់​សម្ភាសន៍​ក្នុង​កម្មវិធី​នរណា​ជា​នរណា​(Who is Who) នា​ពេល​ថ្មីៗ​កន្លង​ទៅ​។​

​លោក​បាន​ថ្លែង​ថា ការ​ធ្វើ​កំណែ​ទម្រង់​ថ្នាក់ បឋម មធ្យម និង​ឧត្តម​សិក្សា​ក្នុង​ពេល​តែ​មួយ គឺជា​កិច្ចការ​ដែល​មិន​អាច​ចៀស​រួច​សម្រាប់​អនាគត​ធនធាន​មនុស្ស​កម្ពុជា​។​

លោក​ថ្លែង​ថា ដើម្បី​សម្រួល​ឲ្យ​ងាយ​ស្រួល​ក្នុង​ការ​ធ្វើ​កំណែ​ទម្រង់​នៅ​ឧត្តម​សិក្សា គេ​តោង​តម្រង់​ទិស​សិស្ស​ពី​បឋម​សិក្សា​និង​មធ្យម​សិក្សា ជា​មុន​សិន ពីព្រោះ​នៅ​មហា​វិទ្យាល័យ ក្រសួង​តម្រូវ​ឲ្យ​វាយ​តម្លៃ​លើ​កត្តា​បីយ៉ាង គឺ​ទី​១ ការ​ជ្រើស​សិស្ស​ឲ្យ​ចូល​រៀន​។ ទី​២ វាយ​តម្លៃ​ពេល​កំពុង​តែ​បង្រៀន និង​ទី​៣ វាស់​ស្ទង់​សមត្ថភាព​សិស្ស​នៅ​ពេល​ពួក​គេ​ប្រឡង​ចេញ​បញ្ចប់​ការ​សិក្សា​។​ការ​ពង្រឹង​វិស័យ​អប់រំ​នៅ​ថ្នាក់​មូលដ្ឋាន​(​បឋម​)​នឹង​ជួយ​សម្រួល​ការ​សិក្សា​នៅ​ថ្នាក់​ឧត្តម​ពី​៥០ ទៅ ៦០​ភាគរយ​។

លោក​បាន​ពន្យល់​ថា សិស្ស​នៅ​ឧត្តម​សិក្សា​នៅ​ឯ​បរទេស​ជា​សិស្ស​ដែល​ចេះ​ស្រាវជ្រាវ​ដោយ​ខ្លួន​ឯង ច្រើន​ជាង​ការ​បង្រៀន​ពី​សាស្ដ្រាចារ្យ ដែល​ខុស​ពី​បរិយាកាស​ឧត្តម​សិក្សា​នៅ​កម្ពុជា​ដែល​សិស្ស​ចូល​ឧត្តម​សិក្សា​ត្រូវ​បង្ខំ​ចិត្ត​ជ្រើស​យក​តាំង​ពី​និទ្ទេស​E​ឲ្យ​ចូលរៀន​។

លោក​ថ្លែងថា​៖«​ចុះបើ​ខ្ញុំ​មិន​រើស​ចូល​ពី​Grade E មក​រៀន​ទេតើ​ខ្ញុំ​បាន​សិស្ស​ពី​ណា​? បើ​អ្នកឯង​ចង់​បាន​នំពោត អ្នក​ឯង​មិន​អាច​យក​ដំឡូង​មក​ច្នៃ​ឲ្យ​ទៅជា​នំពោត​បាន​ទេ ត្រូវ​យក​ពោត​ដូចគ្នា​»​។​

​សាស្ដ្រាចារ្យ​ដែល​មាន​ជំនាញ​គណនេយ្យ ធនាគារ សវនកម្ម និង​ពន្ធដារ រូប​នេះ បាន​មាន​ប្រសាសន៍​ថា ការ​សិក្សា​របស់ សិស្ស​នៅ​ថ្នាក់​បឋម​និង​មធ្យម​សិក្សា មាន​ទំនាក់​ទំនង​យ៉ាង​ខ្លាំង​ជាមួយ​ការ​សិក្សា​នៅ​ឧត្តម​សិក្សា​។ នៅ​កម្ពុជា កុមារ​រៀន​នៅ​សាលា​រដ្ឋ​ត្រូវ​បាន​គេ​រិះគន់​ជា​ញឹកញាប់​ថា ការ​សិក្សា​ខ្សោយ​ជាង​សាលា​ឯកជន​ទាំង​បរិក្ខារ​សាលារៀន សមត្ថភាព​បង្រៀន​និង​ការ​រៀន​របស់​សិស្ស​។ ដូច្នេះ​ការ​អប់រំ​ថ្នាក់​បឋម និង​មធ្យម​សិក្សា​របស់​កម្ពុជា ចាំបាច់​ត្រូវ​ចាក់​សាច់​ប្រាក់​ចូល ក៏ប៉ុន្តែ​ការ​ចាក់​សាច់​ប្រាក់​ចូល វា​ទាក់ទង​ទៅនឹង​ថវិកាជាតិ ព្រោះ​ថវិកា​ជាតិ​ត្រូវ​ថ្លឹង​ពី​អ្វីដែល​រដ្ឋាភិបាល​លោក​បាន​គិតគូរ​។​«​បើសិនជា​យើង​មើល​ថវិកាជាតិ​រាល់ថ្ងៃ ឃើញ​ថា រដ្ឋ​បាន​ចាក់​សាច់ប្រាក់​ចូល​ច្រើនណាស់ ប៉ុន្តែ​ប្រសិទ្ធភាព​ដែល​យើង​ចាក់​ចូលទៅ​មិន​ទាន់​ចូលទៅ​ដល់​ចំណុច​ដែល​យើង​ចង់បាន​»​។

​បណ្ឌិត ហេង វ៉ាន់ដា បាន​ចូល​ប្រឡូក ក្នុង​វិស័យ​អប់រំ​កម្រិត​ឧត្តម​សិក្សា​ក្នុង​ឆ្នាំ​២០០០ ជាមួយ​នឹង​វិទ្យាស្ថាន​វ៉ាន់ដា គណនេយ្យ ដែល​មាន​ទីតាំង​ស្ថិត​នៅ​តាម​មហាវិថី​ម៉ៅ​សេទុង រាជធានី​ភ្នំពេញ​។​ចាប់ពី​ឆ្នាំ​២០០៣-២០០៤​មក​លោក​ចាប់​ផ្ដើម​ផលិត​បាន​ធនធាន​មនុស្ស​ដែល​មាន​ជំនាញ​ខាង​គណនេយ្យ​រាប់ពាន់​នាក់ ហើយ​បច្ចុប្បន្ន​គណនេយ្យករ​ដែល​បម្រើ​ការ​នៅ​ក្នុង​ស្ថាប័នរដ្ឋ​និង​ឯកជន យ៉ាង​ហោច ៨០ ភាគរយ​ជា​អតីត​សិស្ស​របស់​លោក ខណៈ​ដែល​វិស័យ​អប់រំ​ទាំងមូល​ត្រូវ​បាន​គេ​រិះគន់​ជាទូទៅ​ថា ពុក​រលួយ សាលារៀន​របស់​រដ្ឋ​មិន​មាន​ប្រសិទ្ធភាព​ក្នុង​ការ​បណ្ដុះ​បណ្ដាល​ធន​ធាន មនុស្ស​។

​ប៉ុន្តែ ចាប់ពី​ឆ្នាំ ២០១៣-២០១៦ ក្នុង​ក្រប​ខ័ណ្ឌ​កំណែទម្រង់​វិស័យ​អប់រំ ក្រោម​ការ​ដឹកនាំ​របស់​រដ្ឋ​មន្ដ្រី​ក្រសួង​អប់រំ យុវជន​និង​កីឡា បណ្ឌិត ហង់ ជួនណារ៉ុន វិស័យ​នេះ ហាក់​បាន​ផ្លាស់​ប្ដូរ​មុខ​មាត់​ថ្មី និង​ទទួល​បាន​នូវ​ការ​កោត​សរសើរ​ពី​សាធារណជន និង​ប្រមុខ​រាជរដ្ឋាភិបាល​ផង​ដែរ​។

លោក សាស្ដ្រាចារ្យ ហេង វ៉ាន់ដា បាន​មាន​ប្រសាសន៍​ថា​៖«​តាំង​ពី​ឯកឧត្តម​រដ្ឋ​មន្ត្រី ហង់ ជួនណារ៉ុន ឡើង​មក គាត់​កែ​ដល់​១៨០[​ដឺ​ក្រេ​]​តែម្តង ហើយ​យើង​ក៏​ចាប់​ផ្តើម​មើល​ដែរ​រឿង​ហ្នឹង ក៏ប៉ុន្តែ ភ័យ​បំផុត​គឺ​យើង​អត់​បាន​ដឹង​រឿង​មុន តើ​គាត់​ទៅ​ផ្លូវ​ណា មក​ផ្លូវ​ណា​?»​។​

​ស្ថាបនិក​វិទ្យាស្ថាន​វ៉ាន់ដា គណនេយ្យ​រូប​នេះ បាន​ទទួល​ស្គាល់​ថា វិស័យ​អប់រំ​នៅ​កម្ពុ​ជា​មុន​កំណែ​ទម្រង់ ឆ្នាំ​២០១៣ ហាក់​បាន​ជួប​ព្យុះ​នៃ​ការ​រិះគន់​យ៉ាង​ខ្លាំង​ពី​សំណាក់​មាតា បិតា​សិស្ស ប្រព័ន្ធ​ផ្សព្វផ្សាយ និង​អង្គការ​នានា ទាក់ទង​នឹង​គុណភាព​សាលារៀន ការ​រៀន​របស់​សិស្ស និង​ការ​បង្រៀន​របស់​គ្រូ​។ មតិ​សាធារណជន​ចោទ​ថា ទី​១. គ្រូ​បង្រៀន​និស្សិត​មិន​ចំ​នូវ​អ្វី​ដែល​ទីផ្សារ​តម្រូវ​។ ទី​២. អតិផរណា​និស្សិត និង​ទី​៣.​និស្សិត​អត់​គុណភាព​។

លោក​បាន​ពន្យល់​ថា និស្សិត​កម្ពុជា​មិន​អាច​ប្រៀបធៀប​ជាមួយ​និស្សិត​ថៃ​ឬ​និស្សិត​សិង្ហ​បុរី​បាន​ទេ ពីព្រោះ​តម្លៃ​សិក្សា​នៅ​មហាវិទ្យាល័យ​នៅ​កម្ពុជា​ទាប​ជាង ១០​ដង ធៀប​នឹង​ថៃ ហើយ​តម្លៃ​សិក្សា​នៅ​មហាវិទ្យាល័យ​កម្ពុជា​ថោក​ជាង​សិង្ហ​បុរី​២៥ ដង​។

លោក​បាន​ចោទ​សួរថា​៖«​តម្លៃ​សិក្សា​សិស្ស​នៅ​កម្ពុជា​បង់​ត្រឹម​៤០០​ដុល្លារ​ក្នុង​មួយ​ឆ្នាំ តើ​គេ​ចង់បាន​គុណភាព ដូច​ថៃ​ឬ​សិង្ហ​បុរី​យ៉ាង​ដូច​ម្ដេច បើ​តម្លៃ​សិក្សា​នៅ​ថៃ​៤០០០ ដុល្លារ និង សិង្ហ​បុរី ១០ ០០០ ដុល្លារ​ក្នុង​មួយ​ឆ្នាំ​»​។​

​ទោះជា​យ៉ាង​ណា លោក​ហេង វ៉ាន់ដា បាន​សរសើរ​ដល់​យុទ្ធសាស្ដ្រ​កំណែ​ទម្រង់​របស់ លោក​រដ្ឋមន្ដ្រី​អប់រំ​ថា ​«​មាន​ផ្លែផ្កា​គួរ​ជាទី​មោទនៈ​»​។ ​ក្រសួង​អប់រំ​យុវជន និង​កីឡា​បាន​កំណត់​ស្ដង់ដារ​អប់រំ​ជាតិ​មួយ​ដែល​មាន​ជំនួយ​ពី​ធនាគារ​ពិភពលោក​(World Bank),​ធនាគារ​អភិវឌ្ឍន៍​អាស៊ី​(ADB)​។ ស្ដង់ដារ​នេះ គឺជា​ខ្នាត​មួយ​សម្រាប់​វាស់​គុណភាព​ចំណេះ​ដឹង​របស់​និស្សិត​។ ខ្នាត​ស្ដង់ដារ​នោះ​មាន​៩ ផ្នែក និង​មាន​សូចនាករ ចំនួន​៧២​ចំណុច​។

លោក​បាន​មានប្រសាសន៍ថា​៖«​យើង​ធ្វើ​បណ្តើរ យើង​វាស់​បណ្តើរ វាស់​ចុះ​វាស់​ឡើង យើង​វ៉ៃ​ពិន្ទុ​ខ្លួន​ឯង​ទៀត សម្រាប់​កម្រិត​ឧត្តម​សិក្សា​។ បាន​ពិន្ទុ​ប៉ុន្មាន យើង​សាក​ខ្លួន​ឯង​ទៅ គឺ​មាន​ន័យ​ថា យើង​មាន​ខ្នាត យើង​ដាក់​ពិន្ទុ​ខ្លួន​ឯង រួច​ទើប​គណៈកម្មាធិការ​វាយ​តម្លៃ​ស្ដង់ដារ​ជាតិ (ACC) ចុះ​មក​វាយ​តម្លៃ​ផ្លូវ​ការ​»​។

​ឥទ្ធិពល​ជា​វិជ្ជមាន​ពី​កំណែ​ទម្រង់​វិស័យ​អប់រំ​កម្រិត​ឧត្តម​សិក្សា​នៅ​ក្នុង​រយៈពេល​៣​ឆ្នាំ ​(២០១៣-២០១៦)​ ក្រោម​ការដឹកនាំ​ដោយ​រដ្ឋ​មន្ដ្រី​ក្រសួង​អប់រំ បណ្ឌិត ហង់ ជួនណា​រ៉ុ​ន បា​នស​ឲ្យ​ឃើញ​ថា និស្សិត​ដែល​ប្រឡង​ជាប់​និទ្ទេស​“A”​មាន​ចំនួន​ពី​១១​នាក់​នៅ​ឆ្នាំ​២០១៣ ឡើង​ដល់​៤០៥​នាក់​នៅ​២០១៦​។

​លើស​ពី​នេះ​គេ​បាន​មើល​ឃើញ​ថា សិស្ស​នៅ​មធ្យម​សិក្សា​និង​បឋម​សិក្សា​ក៏​ខិតខំ​ប្រឹង​រៀន​ខ្លាំង​ណាស់ដែរ ដោយ​ព្រួយ​បារម្ភ​ខ្លាច​ប្រឡង​បាក់​ឌុប​មិន​ជាប់​។

លោក ហេង វ៉ាន់ដា បាន​ហៅ​លោក​រដ្ឋមន្ដ្រី​ថា «​មេ​ដឹក​នាំ​មិន​ពុក​រលួយ​»​ដែលជា​ហេតុ​ចម្បង​ធ្វើ​ឲ្យ​កិច្ចការ​កំណែទម្រង់​វិស័យ​អប់រំ​មាន​ប្រសិទ្ធភាព​។ លោក​រដ្ឋ​មន្ដ្រី​នេះ​ធ្វើ​ឲ្យ​ការងារ​មាន​ប្រសិទ្ធភាព​ខ្ពស់ ប្រកប​ដោយ​វិជ្ជាជីវៈ​។ លោក​មាន​ទឹកមុខ​ញញឹម​ស្រស់​ថ្លា ដែល​ធ្វើ​ឲ្យ​យើង​គិតថា កំណែទម្រង់​គាត់​ពី​ឆ្នាំ​២០១៣ មកទល់​ឥឡូវ​បាន​ផល​វិជ្ជមាន ពិសេស​ការប្រឡង​បាក់​ឌុប​។ ការ​បានធ្វើ​ឲ្យ​ប្រែប្រួល​ទាំងអស់ ទាំង​ឥរិយាបថ​សិស្ស និង​ឪពុក​ម្តាយ​សិស្ស ដោយ​បញ្ឈប់​រាល់​ការ​សូក និង​ទទួល​សំណូក​។

លោក​ថា​៖«​ខ្ញុំ​ពិនិត្យ​ឃើញ​ថា កាលណា​គោល​នយោបាយ​មេ​ដឹក​នាំ​ម្នាក់ មិន​ពុក​រលួយ ខាង​ក្រោម​ក៏​មិន​ពុករលួយ​ដូច​គ្នា​។ ខ្ញុំ​គ្រាន់តែ​ដឹងថា រដ្ឋមន្ត្រី ហង់ ជួនណារ៉ុន គឺជា​រដ្ឋ​មន្ត្រី​មួយ​រូប​មិន​ចេះ​ពុករលួយ​ទេ ហើយ​ខ្ញុំ​មិន​និយាយ​អ្វី​ផ្សេង​ទៀត​ទេ​។ រីឯ​រដ្ឋ​មន្ត្រី​មុនៗ ក៏​ល្អ​ដែរ ធ្វើ​តាម​ទស្សនៈ​ជាតិ​ដូច​គ្នា ប៉ុន្តែ​រដ្ឋ​មន្ត្រី ហង់ ជួនណា​រ៉ុ​ន មាន​លក្ខណ​ពិសេស​មួយ​គឺ​មិនចេះ​ពុករលួយ​។ ខ្ញុំ​និយាយ​នេះ មិនមែន​មាន​ន័យ​ថា ខ្ញុំ​កាន់​ជើង​គាត់​ទេ តែ​ខ្ញុំ​ចង់​ឲ្យ​លោក​គិត តើ​មាន​ឮ​ថា នរណា​យក​លុយ​ទៅ​សូក ឯកឧត្តម ហង់ ជួនណារ៉ុន​ទេ​? បើ​សូក​គាត់​បាន ខ្ញុំ​សុំ​ចាញ់​»​។​

​នាយក​វិទ្យាស្ថាន​ដែល​មាន​បទពិសោធ​ក្នុង​វិស័យ​អប់រំ​ជាង​២០​ឆ្នាំ​រូប​នេះ​មាន​ប្រសាសន៍​ថា សាលា​ឯកជន​ខ្លះ​បាន​ទៅ​ជួល​គ្រូ​ពីសា​លា​រដ្ឋ​មក​បង្រៀន​វិញ នោះ​មាន​ន័យ​ថា សាលា​រដ្ឋ​ត្រូវ​បាន​ពង្រឹង ទាំង​វិន័យ និង​ក្រម​សីលធម៌​បាន​ល្អ​ជាង​មុន​ហើយ​លោក​ជឿ​ជាក់​ថា ប្រសិន​ជា​៥ ឆ្នាំ​ទៅ​មុខ​ទៀត រដ្ឋាភិបាល​ចាក់​សាច់​ប្រាក់​ចូល​ទៅ​ថែមទៀត​កាន់​តែ​ច្រើន ពេល​នោះ​មិន​បាច់​ចាក់​សាច់​ប្រាក់​ចូល​ក្នុង​ឧត្តម​សិក្សា​ទេ​។

​លោក​ថ្លែងថា​៖«​ការ​ចាក់​សាច់​ប្រាក់​ចូល​មិនមែន​ត្រឹមតែ​ដំឡើង​ប្រាក់ខែ​គ្រូបង្រៀន​ទេ​ប៉ុន្ដែ​ត្រូវ​ចំណាយ​លើ​ការ​បំពាក់​បរិក្ខារ​សាលារៀន​និង​ពង្រឹង​គុណភាព​សិស្ស ព្រោះ​គុណភាព​អប់រំ ជា​អ្វី​ដែល​ហៅ​ថា «​ទស្សនវិជ្ជា​នៃ​ការ​អប់រំ​» ​ត្រូវតែ​ធ្វើ​យ៉ាង​ម៉េច​ឲ្យ​គ្រូ សិស្ស និង សម្ភារ​សិក្សា​មាន​លក្ខណៈ​សមស្រប ប្រកប​ដោយ​បរិយាកាស​ល្អ​។ បរិស្ថាន​ជុំវិញ ធ្វើ​ម៉េច​ឲ្យ​គ្រូ​និង​សិស្ស​មាន​អារម្មណ៍​ចង់​រៀន​និង​ចង់​បង្រៀន​តែម្តង​។ ​«​បើ​កូន​សិស្ស​ខ្លាច​សាលា វា​មិន​ចូល​ទេ ហើយ​បើ​មានតែ​គ្រូ​និង​សិស្ស ហើយ​សាលា​ទ្រុឌទ្រោម ក៏​វា​មិន​ចូល​ដែរ​»​។ ការ​គិត​គូរ​ចាក់​សាច់ប្រាក់​បញ្ចូល​ក្នុង​វិស័យ​អប់រំ គួរ​ធ្វើ​ឡើង​ឲ្យ​ស្រប​តាម​ទស្សន​វិជ្ជា​អប់រំ​របស់​រាជរដ្ឋាភិបាល​«​អប់រំ​ដើម្បី​ទាំង​អស់​គ្នា ទាំង​អស់​គ្នា​ដើម្បី​អប់រំ​» ហើយ​ត្រូវធ្វើ​ម៉េច​ដើម្បី​ពលរដ្ឋ​ខ្មែរ​ទាំង​អស់​រៀន​អស់​មួយ​ជីវិត អប់រំ​អស់​មួយជីវិត​។

លោក ​វ៉ាន់ដា មាន​ប្រសាសន៍​ថា​៖«​ផលិតផល​របស់​សាលា​គឺជា​ផលិតផល​ដែល​ត្រូវ​ជួយ​សង្គម ជួយ​សេដ្ឋកិច្ច ហើយ​បើ​គេ​ជួយ​មិន​បាន អាហ្នឹង​គឺជា​បញ្ហា​មួយ​ធំ​ហើយ​។ អ្នក​ទាំង​អស់​គ្នា ត្រូវ​កុំ​បន្ទោស តែ​ត្រូវ​នាំ​គ្នា​ចូល​រួម​វិញ​»​។

​ថ្វី​ដ្បិតថា វិស័យ​ឯក​ជន បាន​និង​កំពុង​ចូលរួម​ចំណែក​យ៉ាង​សកម្ម​ក្នុង​ការ​បណ្ដុះ​បណ្ដាល​ធន​ធាន​មនុស្ស ប៉ុន្ដែ​លទ្ធភាព​ក្នុងការ​ពង្រីក​សាលារៀន​ឬ​ការជួល​សាស្ដ្រាចារ្យ​ល្អ​មក​បង្រៀន​នៅ​មាន​កម្រិត​នៅឡើយ​។

លោក​ថ្លែងថា វិធី​ដ៏​ល្អ​មួយ​ដែល​ប្រទេស​ថៃ បាន​អនុវត្ត គឺ​ការមិន​យក​ពន្ធ​ដារ​នានា​ពី​សាលា​បង្រៀន​ឯកជន​ហើយ​ទុក​លទ្ធភាព​ឲ្យ​សាលា​ប្រើប្រាស់​ប្រាក់​ឈ្នួល​ពី​សិស្ស​ចំណាយ​លើ​ប្រាក់​ខែ​គ្រូ​ដែល​មាន​សមត្ថភាព​និង​បរិក្ខារ​សិក្សា​របស់​សាលា​ឲ្យ​ត្រូវ​តាម​ស្ដង់ដារ​នៃ​ការ​អប់រំ​។

បណ្ឌិត ហេង វ៉ាន់ដា ថ្លែងថា ការយកពន្ធ​ច្រើន​ប្រភេទ​ពី​អាជីវកម្ម​សាលា​បង្រៀន​គឺជា​បន្ទុក​មួយ​ដែល​ធ្វើ​ឲ្យ​សាលា វិទ្យាស្ថាន​ឬ​សាកល​វិទ្យាល័យ​មិន​អាច​រីក​ធំធាត់​បាន​។ រដ្ឋាភិបាល​ជាទូទៅ​ដក​ពន្ធ​ពី​សាលារៀន​រួម​មាន​ពន្ធ​លើ​តម្លៃ​បន្ថែម​(VAT) ពន្ធ​ភាស៊ី កង់ ម៉ូតូ ពន្ធ​ប្រាក់​ចំណេញ ពន្ធ​កាត់​ទុកជា​ដើម​។​ល​។

​ដូច្នេះ​សាលា​ត្រូវ​បង្ខំ​ចិត្ត​ដំឡើង​ថ្លៃ​សិក្សា​ពី​សិស្ស​ដែល​ភាគ​ច្រើន​អ្នក​មាន​ជីវភាព​ក្រីក្រ​មកពី​បណ្ដា​ខេត្ត​នានា​។​«​ខ្ញុំ​ទៅ​ថៃ សាលា​ផ្សេងៗ​ដែល​ខ្ញុំ​ស្រាវជ្រាវ មិន​ដែល​មាន​ពន្ធ​ជូន​រដ្ឋ​ទេ​។ គេ​មិន​ត្រឹមតែ​មិន​យក​ទេ គេ​ឧបត្ថម្ភ​ធន​ឲ្យ​ទៀត​។ គេ​មិន​គិតថា​អ្នក​ឯង​សង់សាលា​២-៣​ខ្នង​ឬ​ពង្រីក​ធំ​ប៉ុនណា​ទេ គេ​មិន​គិត​ពន្ធ​តែ​ម្ដង​។​អ្នក​ឯង​ពង្រីក​កាន់​តែ​ច្រើន​កាន់តែ​ល្អ វិស័យ​អប់រំ​គេ​កាន់តែខ្លាំង​សិស្ស​និស្សិត​ក៏​កាន់តែខ្លាំង​»​។ លោក​បាន​បន្ថែមថា​៖«​បើ​យកពន្ធ​ពី​ខ្ញុំ​[​សាលាបង្រៀន​]​ទោះ​តាម​វិធី​ណាក៏ដោយ​ឲ្យ​តែ​ដក​ចេញពី​តម្លៃ​សិក្សា​៤០០​ដុល្លារ​ក្នុង​មួយ​ឆ្នាំ​នោះ គុណ​ភាព​សិស្ស​នឹង​ថយ​ហើយ សូម​កុំ​បន្ទោស​»​។​

​ប្រវត្ដិ​សង្ខេប​របស់ បណ្ឌិត ហេង វ៉ាន់ដា លោក ហេង វ៉ាន់ដា កើត​ក្នុង​គ្រួសារ​អ្នកក្រ​មួយ​នៅ​ស្រុក​កោះធំ ខេត្តកណ្ដាល ក្នុងស្ថានភាព​ជីវភាព​គ្រួសារ​យ៉ាប់​យ៉ឺន​ខ្លាំង​។ លោក​មាន​បងប្អូន​៨​នាក់ ស្រី​៧​និង​ប្រុស​ម្នាក់​។ ជា​ក្មេង​កំព្រា​ឪពុក តាំង​ពី​អាយុ​ ៦-៧ ឆ្នាំ​។ កាល​នៅ​ពី​ក្មេង​ម្តាយ​លោក​បាន​ធ្វើ​នំ​ឲ្យ​ទូល​លក់​ដើម្បី​បាន​កម្រៃ​បន្ដិច​បន្ដួច​សម្រាប់​ជីវភាព​ប្រចាំថ្ងៃ​។ ដោយ​ជីវភាព​ពិបាក​ខ្លាំង​ពេក​លោក​បាន​សម្រេច​ចិត្ត​ចេញ​ពី​ផ្ទះ​មក​ក្រុង​ភ្នំពេញ​ស្វែងរក​ការ​សិក្សា ដោយ​យក​វត្ត​មហា​មន្ដ្រី​ជា​ជម្រក​នៅ​ឆ្នាំ​១៩៦៨ នា​សម័យ​សង្គម​រាស្ដ្រនិយម ក្រោម​ការ​ដឹក​នាំ​របស់ សម្ដេច​ព្រះ​នរោត្តម សីហនុ​។ ការ​សិក្សា​និង​រស់នៅ​អាស្រ័យ​ដោយ​បាយ​បាត្រ​ព្រះសង្ឃ បាន​បន្ដ​រហូត​ដល់ ខ្មែរ​ក្រហម​ដណ្ដើម​អំណាច ពី​សេនា​ប្រមុខ លន់ នល់ មេដឹកនាំ​របប​សាធារណរដ្ឋ​ខ្មែរ នា​ថ្ងៃទី​១៧ មេសា​ឆ្នាំ​១៩៧៥​។​

​ជីវភាព​នៅក្នុង​វត្ត​ពិតជា​មិន​គ្រប់គ្រាន់​ឡើយ តែ​គាត់​បានដាក់​ចិត្ត​រួចស្រេច​ហើយ​ថា ត្រូវតែ​យកចំណេះ​វិជ្ជា​មក​កសាង​ជីវិត បំបាត់​ភាពក្រីក្រ ទោះបី​គ្រួសារ​មាន​ជីវភាព​លំបាក​យ៉ាងណា​ក៏ដោយ ក៏ត្រូវ​យកដៃ​បិទ​ភ្នែក ត្រចៀក ធ្វើ​មិន​ឃើញ មិនឮ​សិន ព្រោះ​បើ​នៅតែ​មិន​ដាច់​អាល័យ​គឺ​មិនអាច​រំដោះ​ភាព​ក្រីក្រ​បាន​ឡើយ​»​។

លោក​បាន​រំឭកថា ខណៈ​កំពុង​សិក្សា អាហារ​ប្រចាំថ្ងៃ​របស់លោក គឺ​ត្រកួន​បឹងទំពុន បរិភោគ​ជាមួយ​បាយបាត្រ​ដែល​នៅ​សេសសល់​ពី​ព្រះសង្ឃ​។

ទោះជា​យ៉ាង​ណា សិស្ស​នៅ​វត្តមាន​សំណាង​បាន​បរិភោគ​អាហារ​ឆ្ងាញ់​ម្ដងម្កាល លុះត្រា​មានបុណ្យ​ខ្មោច​ទាហាន​លន់ នល់ ដែល​ស្លាប់​ក្នុង​សមរភូមិ ហើយ​តម្រូវ​ឲ្យ​គេ​យក​មក​ធ្វើ បុណ្យ និង​បូជា​ក្នុង​វត្ត​មហាមន្ដ្រី​។​«​ថ្ងៃ​ដែល​ឆ្ងាញ់​មាត់​បំផុត គឺ​ថ្ងៃ​ដែលមាន​ខ្មោច​ងាប់ ថ្ងៃ​ដែល​គេ​យក​សព​មក​តម្កល់​នៅ​វត្ត​លោក​បើ​មាន​គេ​សែន​មាន់ស្ងោរ​យប់​ឡើង​ដឹង​តែ​បាត់​ហើ​យ‍​»​។

នៅ ឆ្នាំ ១៩៧៤-៧៥ លោក​បាន​សិក្សា​នៅ​មហាវិទ្យាល័យ​ពាណិជ្ជ​សាស្ត្រ នៅ​រាជធានី​ភ្នំពេញ​។ លោក វ៉ាន់ដា មាន​គោល​បំណង​ដ៏​ច្បាស់​លាស់ គឺ​ចូលរៀន​យក​ជំនាញ​គណនេយ្យ​ហ្នឹង​តែម្តង​។​

​សារ​ចុង​ក្រោយ​គឺ​ចង់​ចែក​រំលែក​ដល់​និស្សិត​ទាំងឡាយ​កុំ​ចុះចាញ់​ភាពក្រីក្រ​។ បើ​ឪពុកម្តាយ​គ្មាន​ទ្រព្យ​ចែក​ឲ្យ​ទេ មានតែ​ការសិក្សា​តែ​មួយ​គត់ ទើប​បាន​មកដល់​គោលដៅ​។ ត្រូវ​ជម្នះ​ឧបសគ្គ​ឲ្យ​បាន គ្មាន​ឧបសគ្គ​ណា​មួយ អាច​ធ្វើ​ឲ្យ​យើង​លុតជង្គង់​បានទេ​។ «​បើសិនជា​អ្នក​ចង់​បំបាត់់​ភាពក្រីក្រ​ត្រឹម​អ្នក អ្នក​ត្រូវ​រៀន​ឲ្យ​ចប់​ចុង​ចប់​ដើម កំណត់​ឲ្យ​ច្បាស់ កុំ​លុតជង្គង់​នឹង​បញ្ហា​ណា​ឲ្យ​សោះ​។ មុខវិជ្ជា​អី​ក៏​សង្គម​ត្រូវការ​ដែរ តែ​សំខាន់​ត្រូវមាន​គោល​ដៅ​ដោយ​ខ្លួន​ឯង​៕

រាយការណ៍​បន្ថែម​ដោយ តាំង រីនិត្យ​/​សហការ​ផលិត VIDEO ដោយ គាំ ច័ន្ទ​រស្មី,កែវ រតនា​,​ជា វណ្ណារ័ត្ន,​ហម ស្រីនិច និង មាន សង្ហា​ដេវីត

0

Comments

Please, login or register to post a comment

ព័ត៌មានពាក់ព័ន្ធ