Search form

Login - Register | FOLLOW US ON

Logo of Phnom Penh Post newspaper Phnom Penh Post - បើ​ចង់​បំបាត់​ហិង្សា​ ត្រូវ​បំបាត់​ជំងឺ​ផ្លូវចិត្ត​ជា​មុន​សិន

Content image - Phnom Penh Post
អ្នក​ភូមិ​នាំ​គ្នា​​រោម​​មើល​​អ្នក​ជំងឺ​ផ្លូវចិត្ត​ម្នាក់​ដែល​គ្រូពេទ្យ​ណែនាំ​​ឲ្យ​​ទៅ​រស់នៅ​ជាមួយ​ក្រុម​គ្រួសារ​វិញ​នា​ឆ្នាំ ១៩៩៦ ។ រូបថត​សហការី

បើ​ចង់​បំបាត់​ហិង្សា​ ត្រូវ​បំបាត់​ជំងឺ​ផ្លូវចិត្ត​ជា​មុន​សិន

អំពើ​ហិង្សា​គ្រប់​ប្រភេទ​ទាំង​ក្នុង​សង្គ្រាម​ក្ដី​ ក្នុង​សង្គម​ក្ដី និង​នៅ​ក្នុង​គ្រួសារ​ក្ដី​វា​នឹង​នាំ​មនុស្ស​ក្នុង​ប្រទេស​នោះ​​ សង្គម​នោះ កើត​​នូវ​ជំងឺ​ផ្លូវ​ចិត្ត​ដ៏ធ្ងន់ធ្ងរ​ពិសេស​ប៉ះពាល់​យ៉ាង​ខ្លាំង​ដល់​ស្ដ្រី និង​កុមារ​ហើយ​​​មេដឹកនាំ​​​​​នៃ​ប្រទេស​នោះ​គួរ​​ចាត់​​​​ជា​​​អាទិភាព​ចម្បង​ក្នុង​ការ​​រក​​វិធី​បង្ការ​ និង​​ព្យាបាល​​​អ្នក​ជំងឺ​ផ្លូវចិត្ត​វិកល​​ចរិត​​ និង​​ថប់​អារម្មណ៍​​​​​។ នេះ​បើ​តាម​លោក វេជ្ជបណ្ឌិត សាស្ដ្រាចារ្យ ការ ស៊ុនបូណាត ​គ្រូពេទ្យ​ឯកទេស​ផ្នែក​វិកលវិទ្យា​ និង​​ជា​​ប្រធាន​កម្មវិធី​ជាតិ​​សុខភាព​ផ្លូវចិត្ត​។

សកម្មភាព​​​​ហិង្សា​អំពី​ការ​រំលោភ​បំពាន​ និង​ការ​គំរាម​កំហែង បំភិតបំភ័យ សម្លាប់ ការ​សេព​គ្រឿងញៀន និង​​គ្រឿង​ស្រវឹង​គ្រប់​ប្រភេទ​ដែល​បាន​​និង​កំពុង​ផ្សព្វផ្សាយ​​យ៉ាង​ទូលំ​ទូលាយ​ក្នុង​បណ្ដាញ​ផ្សព្វផ្សាយ​អាច​ជា​មូលហេតុ​មួយ​ក្នុង​ចំណោម​មូលហេតុ​ជាច្រើន​បណ្ដាល​ឲ្យ​ពលរដ្ឋ​មាន​ជំងឺ​ផ្លូវចិត្ត​​។ ​«យើង​​​សង្កេត​ឃើញ​ពេល​ឥឡូវ​ក្មេងៗ​ប្រើ​គ្រឿង​ញៀន​ និង​ផឹក​​ស្រា​​ទៀត​ខ្លះ​ទៀត​លេង​ល្បែង។ ជា​លទ្ធផល​នៅ​ពេល​ស្រវឹង​ស្រា និង​ប្រើ​គ្រឿង​ញៀន​គេ​ប្រព្រឹត្ត​បទ​ឧក្រិដ្ឋកម្ម»។

អំពើ​ហិង្សា​​​​​លើ​ស្ដ្រី​មាន​គភ៌​គឺជា​ប្រការ​​មួយ​គួរ​ឲ្យ​ចៀសវាង​ព្រោះ​​វា​ប៉ះពាល់​ដល់​សុខភាព​ទាំង​​ម្ដាយ និង​កូន​ដែល​នៅ​ក្នុង​ផ្ទៃ​។

លោក​វេជ្ជបណ្ឌិត ការ ស៊ុនបូណាត បាន​​ពន្យល់​​ថា​ស្ដ្រី​មាន​គភ៌​ដែល​​​​រង​អំពើ​ហិង្សា​ពី​សំណាក់​​​ប្ដី​​ ​និង​សង្គម​ក្រៅតែ​ពី​រងគ្រោះ​ផ្លូវកាយ​គេ​ក៏​នឹង​​​មាន​ជំងឺ​​ភ័យ​​ខ្លាច ​​ស្លុត​អារម្មណ៍ បាក់​ស្បាត ធ្លាក់​ទឹកចិត្ត​ដែល​​​​សម្តែង​ជា​​អាការ​មិន​បាន​យក​ចិត្ត​ទុក​ដាក់​​ខ្លួន​ឯង​ដូចជា​មិន​ហូបបាយ​​សម្រាន្ត​មិន​លក់​​ដែល​នឹង​នាំ​ឲ្យ​​​សុខភាព​​ផ្លូវកាយ​របស់​ស្ដ្រី​មាន​គភ៌​នោះ​​​​​​​​ទ្រុឌទ្រោម។ ​នេះ​ហើយ​ជា​ការ​​ប៉ះពាល់​ទៅ​​ដល់​​អនាគត​នៃ​ទារក​ក្នុង​​ពោះ។ ​គ្រួសារ​ដែល​ប្រព្រឹត្ត​​អំពើ​ហិង្សា​តែងតែ​​បាត់​ភាព​កក់ក្តៅ​ដល់​កូនៗ​ខ្វះ​ការ​​ថ្នាក់ថ្នម និង​​អាហារូបត្ថម្ភ​​គ្រប់គ្រាន់​វា​ធ្វើ​​​ឲ្យ​ទារក​នោះ​​រង​ទុក្ខវេទនា​ដូចជា​​ថប់​អារម្មណ៍ ធ្លាក់​ទឹកចិត្ត បាក់ស្បាត ដូច​ម្តាយ​របស់​គេ​ដែរ។ សូម​បញ្ជាក់​ថា​ជំងឺ​ផ្លូវចិត្ត​មិនមែន​ជា​ជំងឺ​បន្ដ​ពូជ​ទេ។

មនុស្ស​ទាំង​ឡាយ​អាច​បញ្ចៀស​ការ​កើត​ជំងឺ​ផ្លូវ​ចិត្ត​បាន​ដោយ​រក្សា​បាន​នូវ​សតិ​ល្អ​ប្រសើរ​អាច​ម្ចាស់​​ការ​លើ​ខ្លួនឯង​បាន​អាច​​ទប់​ចិត្ត​ទប់​កំហឹង​បាន។ រីឯ​ក្រុម​មនុស្ស​ដែល​​មិន​មាន​​យន្ដការ​គ្រប់គ្រង​ហិង្សា​​មិន​អាច​ទប់​កំហឹង និង​ទប់​អារម្មណ៍​បាន​នោះ​គេ​នឹង​ចៀស​មិន​ផុត​ពី​ការ​កើត​ជំងឺ​ផ្លូវ​ចិត្ត​ឡើយ។

លោក​ថ្លែង​ថា «ជាទូទៅ​បើ​ចង់​​​បំបាត់​ហិង្សា​គេ​ត្រូវ​លុប​បំបាត់​ជំងឺ​​ផ្លូវ​ចិត្ត​សិន​ដែល​​​កន្លង​មក​ខ្ញុំ​បាន​រកឃើញ​ជាច្រើន​​ករណី​ដែល​​ផ្សារភ្ជាប់​អំពើ​ហិង្សា​របស់​ប្តី​ និង​ប្រពន្ធ​ និង​ឆ្លង​ដល់​​​កូនៗ​ទៀត​​»។

វេជ្ជបណ្ឌិត ការ ស៊ុនបូណាត​ បាន​ថ្លែង​ក្នុង​ខណៈ​ដែល​កម្ពុជា​មាន​អ្នក​ជំងឺ​ផ្លូវចិត្ត​​​ច្រើន​មិន​ធម្មតា​ចំណែក​ឯ​ចំនួន​គ្រូពេទ្យ និង​​វេជ្ជបណ្ឌិត​វិញ​មាន​​ចំនួន​តិចតួច​បំផុត​មិន​​​សមាមាត្រ​នឹង​​​បរិមាណ​នៃ​អ្នក​ជំងឺ​ដែល​​ត្រូវការ​សេវា​ព្យាបាល​ដែល​មាន​ពី ៣០ ទៅ​ ៤០ ភាគរយ​នៃ​ចំនួន​​​​ពលរដ្ឋ​​សរុប​ជាង ១៥ លាន​នាក់។

«ខ្ញុំ​ចង់​ជម្រាប​ជូន​​ថា​មក​ទល់​នឹង​ថ្ងៃ​នេះ​យើង​បាន​បណ្តុះបណ្តាល​ក្រុម​​វេជ្ជបណ្ឌិត​បច្ចេកទេស​​​​ជំងឺ​ផ្លូវចិត្ត​ចំនួន ៦០ នាក់​ចាប់​តាំងពី​ឆ្នាំ ១៩៧៩ មក​ហើយ​យើង​ក៏​បាន​​​បណ្តុះ​បណ្តាល​វេជ្ជបណ្ឌិត​ទូទៅ​ក្នុង​កម្រិត​មូលដ្ឋាន​​សម្រាប់​​​ការ​​​ថែទាំ​សុខភាព​​ផ្លូវចិត្ត​ចំនួន​ ១៧៥ នាក់ និង​គិលានុ​បដ្ឋាយិកា​ឯកទេស​ជំងឺ​​ផ្លូវ​ចិត្ត​បាន​ចំនួន ៤០ នាក់។ ការ​បណ្តុះបណ្តាល​សេវា​​សុខភាព​​ផ្លូវ​ចិត្ត​មូលដ្ឋាន​ដើម្បី​ឲ្យ​ក្លាយ​ជា​គិលានុបដ្ឋាយិកា​ សុខភាព​ផ្លូវ​ចិត្ត​​មូលដ្ឋាន​មាន​ចំនួន ១៣៥ នាក់​ដែរ​ក្នុង​ក្របខ័ណ្ឌ​ទូទាំង​ប្រទេស​‍»។

សាស្ដ្រាចារ្យ​ចិត្តវិទ្យា​រូប​នេះ​បាន​បញ្ជាក់​ថា​ធនធាន​មនុស្ស​ផ្នែក​ចិត្តវិទ្យា​ពិសេស​​គ្រូពេទ្យ​ឯកទេស​ជំងឺ​ផ្លូវ​ចិត្ត​គួរ​​ត្រូវ​បាន​​យក​ចិត្ត​ទុក​ដាក់​ជា​អាទិភាព​សម្រាប់​សេវា​​សុខាភិបាល​នៅ​កម្ពុជា​។​ ធនធាន​មនុស្ស​បែប​នេះ​គួរ​តែ​ស្ថិត​នៅ​ក្នុង​ការ​គិតគូរ​របស់​រដ្ឋាភិបាល​​​​ក្នុង​កម្រិត​ជាតិ​តែ​ម្តង។​ ការ​ពិបាក​​​មួយ​ទៀត​គឺ​​​ខ្វះ​ជំនួយ និង​ខ្វះ​និស្សិត​​ដែល​មាន​ចំណង់​ចំណូល​ចិត្ត​សិក្សា​ក្នុង​វិជ្ជាជីវៈ​ដ៏​មាន​សារៈសំខាន់​នេះ។​ ឯកសារ​​​មួយ​បាន​ឲ្យ​ដឹង​ថា​ទំហំ​ទឹកប្រាក់​ដែល​​ចាក់​ចូល​ទៅ​ក្នុង​ជំងឺ​ផ្លូវ​ចិត្ត​នេះ​មាន​តែ ០.០២ ភាគរយ​នៃ​ថវិកា​ទាំងអស់​របស់​ក្រសួង​សុខាភិបាល​​ដែល​ត្រូ​វ​បាន​​សភា​អនុម័ត​​​​​ប្រចាំ​​​ឆ្នាំ​​។​

ប៉ុន្ដែ​លោក​​បាន​ការពារ​ការ​សម្រេច​​ចិត្ត​របស់​ក្រសួង​សុខាភិបាល​​ក្នុង​ការ​ចំណាយ​ថវិកា​ជាតិ​ដើម្បី​បង្ការ និង​ព្យាបាល​ជំងឺ​អាទិភាព​​​ផ្សេង​ទៀត​ដូចជា​​ជំងឺ​អេដស៍ និង​ហ្ស៊ីកា​ដែល​​ចាំបាច់​ត្រូវ​ទប់ទល់។​ «ខ្ញុំ​ចង់​​ជម្រាប​ដែរ​ថា​នៅ​កម្ពុជា​មាន​អ្នក​ឈឺ​ច្រើន​ទាំង​ផ្លូវ​កាយ និង​ចិត្ត។ មក​ដល់​​ពេល​នេះ​យើង​មិន​ត្រូវ​គិត​ថា​រដ្ឋាភិបាល​មិន​គិតគូរ​ទេ​យើង​​ត្រូវ​គិត​ថា​​លទ្ធភាព​មាន​​កម្រិត​»​។

វិធី​ព្យាបាល

សាស្ដ្រាចារ្យ​ឯកទេស​ជំងឺ​ផ្លូវចិត្ត​រូប​នេះ​បាន​ថ្លែង​ថា​ការ​ព្យាបាល​ជំងឺ​ផ្លូវកាយ​ខុស​ដាច់​ពី​​ការ​ព្យាបាល​អ្នក​ជំងឺ​​ផ្លូវចិត្ត​ព្រោះ​ថា​​ជំងឺ​ផ្លូវកាយ​ត្រូវ​សាកសួរ​គ្រប់​យ៉ាង​ទាំងអស់​យើង​ធ្វើការ​សន្និដ្ឋាន​ថា​ជំងឺ​ណា​មួយ​​ដែល​ត្រូវ​ព្យាបាល​តែ​ជំងឺ​ផ្លូវចិត្ត​អត់​អ៊ីចឹង​ទេ។ ជំងឺ​​ផ្លូវ​ចិត្ត​នៅ​ពេល​សួរ​គឺជា​ការ​ចាប់​ផ្តើម​ព្យាបាល។ ទី ១. ការ​ព្យាបាល​គឺ​ផ្ដល់​ក្តីសង្ឃឹម និង​ភាព​កក់ក្តៅ​ដោយ​ផ្ដល់​​នូវ​កម្លាំង​ចិត្ត ភាព​យល់​ចិត្ត​អ្នក​ជំងឺ​ធ្វើ​​យ៉ាង​ណា​ឲ្យ​អារម្មណ៍​អ្នក​ជំងឺ​បាន​​ស្ងប់។ ចិត្តសាស្ដ្រ​មួយ​ដែល​​មាន​ប្រសិទ្ធភាព​ចំពោះ​អ្នក​ជំងឺ​គឺ​ការ​សម្តែង​​នូវ​ទឹកមុខ​ស្រស់ស្រាយ កាយវិការ និង​ប្រើ​សំឡេង​ទន់ភ្លន់​ស្រប​ទៅ​នឹង​​តម្រូវការ​​របស់​អ្នក​ជំងឺ។

លោក​បាន​ថ្លែង​ថា «​គ្រូពេទ្យ​ត្រូវ​និយាយ​ថា‌យើង​​​បាន​យល់​អស់​ហើយ​យើង​​មាន​ការ​​អាណិត​អាសូរ​ដល់​អ្នក​យ៉ាង​ខ្លាំង​យើង​យក​ចិត្ត​ទុក​ដាក់​ចំពោះ​អ្នក​ជានិច្ច។ គ្រាន់តែ​ប្រព្រឹត្ត​បាន​ប៉ុណ្ណឹង​ជួន​កាល​ធ្វើ​ឲ្យ​អ្នក​ជំងឺ​ធូរ​ស្រាល​ដល់​ទៅ​ ៧០ ភាគរយ»។

មិន​មាន​​ឧបករណ៍​អ្វី​ពិសេស​សម្រាប់​​ពិនិត្យ​ និង​ព្យាបាល​​អ្នក​ជំងឺ​ផ្លូវចិត្ត​ទេ​ក្រៅពី​ការ​ផ្ដល់​កម្លាំង​ចិត្ត និង​ក្តី​សង្ឃឹម​ជូន​​ពួកគាត់។​

លោក​មាន​ប្រសាសន៍​ថា «យើង​ដឹង​ថា​មនុស្ស​មាន​​បញ្ហា​ផ្លូវ​ចិត្ត​តាមរយៈ​ការ​អង្កេត​លើ​ទឹក​មុខ​ព្រោះ​ថា​អ្នក​ជំងឺ​មក​ជួប​​យើង​មិន​ដែល​មាន​ជំងឺ​​​តែ​មួយ​ទេ​អាច​មាន​ជំងឺ​ផ្លូវចិត្ត​ផង​ជំងឺ​​ផ្លូវ​កាយ​​ផង។ ជួនកាល​ជំងឺ​ផ្លូវចិត្ត​ជា​មូលហេតុ​នៃ​ជំងឺ​​ផ្លូវកាយ ជួន​កាល​ជំងឺ​​ផ្លូវកាយ​ជា​មូលហេតុ​នៃ​ជំងឺ​​ផ្លូវ​ចិត្ត​ហើយ​​ជួនកាល​វា​កើត​ឡើង​ព្រម​គ្នា​តែ​ម្តង»។

លោក​បន្ដ​ថា «ពេល​ដែល​​យើង​​មាន​សមត្ថភាព​ស្វែង​យល់​ពី​អារម្មណ៍ ទឹក​មុខ​ កាយវិការ​ពាក្យ​សម្ដី​របៀប​ស្លៀកពាក់​តុបតែង​​ខ្លួន​របស់​អ្នក​ជំងឺ​ធ្វើឲ្យ​យើង​យល់​ថា​អ្នក​នោះ​មាន​ជំងឺ​ផ្លូវ​ចិត្ត​ឬ​យ៉ាង​ណា? ពេទ្យ​ក្រៅពី​ឯកទេស​នេះ​មើល​អត់​ដឹង​ពី​អាការ​រោគ​បែប​នោះ​ទេ​ទោះ​ជា​ស្កេន​ម៉ាស៊ីន​អី​ក៏​រក​​អត់​ឃើញ​ដែរ។ តែ​ភ្នែក​គ្រូពេទ្យ​ជំងឺ​ផ្លូវចិត្ត​អាច​​មើល​ឃើញ»។

វិធី​ព្យាបាល​គឺ​ត្រូវ​ស្វែងយល់​ពី​​ទុក្ខលំបាក​របស់​អ្នក​ជំងឺ​ដោយ​ភ្ជាប់​ជាមួយ​ទឹក​ចិត្ត​ប្រកប​ដោយ​ក្ដី​មេត្តា ករុណា មុទិតា ឧបេក្ខា ​ជា​មន្ដ​របស់​ព្រះពុទ្ធ។ ព្រះអង្គ​សម្ដែង​ថា «ពុទ្ធិ​នាំ​មក​នូវ​សុខ អវិជ្ជា​នាំ​មក​នូវ​ទុក្ខ»។ ការ​យល់​ខុស​នាំ​​ឲ្យ​កើត​ទុក្ខ​ដល់​ខ្លួនឯង។

ព្យាបាល​​ជំងឺ​ផ្លូវចិត្ត​តាមរយៈ​ពុទ្ធមន្ត

ជំងឺ​ផ្លូវចិត្ត​បើ​វិភាគ​​តាម​ព្រះធម៌​របស់​​ព្រះពុទ្ធ​អង្គ​គឺ​​​មកពី​ការ​យល់​ខុស។​ ការ​យល់​ខុស​នឹង​ធ្វើ​ឲ្យ​​មនុស្ស​កើត​ជំងឺ​ផ្លូវ​ចិត្ត។ ការ​ស្វែងរក​ហេតុ​ដែល​​ធ្វើ​ឲ្យ​ចិត្ត​ខ្វល់​គិត​​ពោរពេញ​ដោយ​ក្តីហ្មងសៅ​បើ​ព្រះសង្ឃ​អាច​ធ្វើ​ឲ្យ​​​អ្នក​ជំងឺ​ឈប់​ខ្វល់ខ្វាយ​ហើយ​ដូរ​មក​វិញ​ដោយ​ក្ដីរីករាយ​នោះ​ជំងឺ​ពិតជា​ធូរស្រាល​ទៅ​តាម​អារម្មណ៍​នោះ​ដែរ។ ព្រះសង្ឃ​​ត្រូវ​ធ្វើ​ឲ្យ​អ្នក​ជំងឺ​ដឹង​ថា​ហេតុអ្វី​បាន​ជា​គាត់​មាន​ការ​ថប់​អារម្មណ៍​ហើយ​ធ្វើ​យ៉ាង​ម៉េច​ត្រឹមត្រូវ​ដើម្បី​កាត់​បន្ថយ​អាការ​រោគ​ដែល​អង់គ្លេស​ហៅ​ថា Cognitive Behavioral Therapy (CBT)។ លោក​វេជ្ជបណ្ឌិត​បាន​កោត​សរសើរ​ចំពោះ​ព្រះសង្ឃ​ដែល​​បាន​ធ្វើការ​​​​សម្ដែង​​ធម៌​ទេសនា​​អប់រំ​ចិត្ត​ដល់​ប្រជាពលរដ្ឋ។ ​«ព្រះសង្ឃ​បាន​​ធ្វើ​ការងារ​ច្រើន​ណាស់។ លោក​យក​ធម៌​អហិង្សា ដូចជា លោក ប៊ុត សាវង្ស អប់រំ​មនុស្ស​​ឲ្យ​តែ​ចិត្តធម៌​ទេ​កុំ​តបត​​ដោយ​​ហិង្សា។ ​ព្រះពុទ្ធ​សាសនា និង​ព្រះសង្ឃ​បាន​ដើរតួ​សំខាន់​ណាស់​ក្នុង​​ការ​ជួយ​​រំលែក​​វិបត្តិ​ផ្លូវចិត្ត​ដល់​ពលរដ្ឋ​។ «ព្រះពុទ្ធ​បាន​អប់រំ​ថា​ការ​យល់​ច្រឡំ ឬ​​យល់​ខុស និង​មិន​យល់​វា​នាំ​មក​នូវ​ក្ដី​ទុក្ខ​រីឯ​យល់​ត្រូវ គិតត្រូវ និង​ប្រព្រឹត្ត​ត្រឹមត្រូវ​​នឹង​នាំ​មក​នូវ​ក្តី​សុខ​​»។ ​ដូច្នេះ​គួរ​ដឹង​ផង​ថា​បើ​ខ្លួន​មាន​អារម្មណ៍​​ឆាប់​ច្រឡោត​គួរ​តែ​ទៅ​រក​គ្រូពេទ្យ​ឲ្យ​ជួយ​បាន​មាន​ការ​ស្ងប់​ចិត្ត​យល់​ការពិត​អាច​យោគយល់​គ្នា​ហើយ​​​ខ្មែរ​ក៏​បាន​​សុខ​ដែរ។ ធនធាន​​ក្នុង​ព្រះពុទ្ធ​សាសនា​មាន​ច្រើន​ណាស់​ដែល​​មនុស្ស​ជាច្រើន​​មិន​បាន​យល់​ហើយ​មាន​លក្ខណៈ​សាមញ្ញ​ធ្វើឲ្យ​អ្នក​ឈឺ​នៅ​​ក្នុង​ប្រទេស​នេះ​ងាយ​​យល់។

លោក​​​បាន​​​​​​សាកល្បង​​ព្យាបាល​ដល់​អ្នក​ជំងឺ​​ជនជាតិ​​បារាំង និង​បរទេស​ជាច្រើន​ទៀត​ដែល​​ស្ថានទូត​​ឲ្យ​មក​ព្យាបាល​ឃើញ​ថា​គេ​ក៏​ទទួល​​យក​បាន​ដែរ​នូវ​ការ​​ព្យាបាល​​បែប​​ព្រះពុទ្ធ។

លោក​ពន្យល់​ថា «ក្នុង​ករណី​ណា​ដែល​គេ​បាត់​ម្ចាស់ការ​យើង​ត្រូវ​ប្រើ​ថ្នាំ។ នៅ​​ពេល​​គេ​ម្ចាស់​ការ​មក​វិញ​ខ្លះ​បាន​យើង​ចាប់ផ្តើម​ព្យាបាល​ដោយ​ចិត្តសាស្រ្ត​ដែល​មាន​​ច្រើន​ទម្រង់​ជាពិសេស​គឺ CBT នេះ​ឯង​ដែល​ងាយ​ឲ្យ​អ្នក​ជំងឺ​ទទួល​យក​ក្នុង​ការ​ដោះស្រាយ​បញ្ហា និង​​ផ្សេងៗ​ទៀត​តាម​ស្ថានភាព​នានា​ដូចជា​ស្ថានភាព​អ្នក​ជំងឺ​គ្រួសារ សង្គម ដើម្បី​​ឲ្យ​អ្នក​ជំងឺ​ និង​អ្នក​ដទៃ​សម្រប​ខ្លួន​បាន​បង្កើត​នូវ​បរិយាកាស​ត្រជាក់​ត្រជុំ​»។

នៅ​លើ​ទំព័រ​សារព័ត៌មាន​នា​បច្ចុប្បន្ន​នេះ​គេ​សង្កេត​ឃើញ​ថា​យុវជន-យុវតី​វ័យក្មេង​ដែល​​មាន​វិបត្តិស្នេហា​បាន​សម្រេច​ចិត្ត​​ធ្វើ​អត្តឃាត​ជាច្រើន​ករណី។ បើ​​តាម​​លោក ស៊ុនបូណាត វិបត្តិស្នេហា​សម្រាប់​​យុវវ័យ​​​​មាន​ឆន្ទៈ​ជ្រាលជ្រៅ និង​​ហ៊ាន​​ធ្វើអ្វីៗ​ដែល​ខ្លួន​ចង់​ប្រសិន​បើ​កាល​ណា​គេ​​ខូចចិត្ត ឬ​​បរាជ័យ​ចំពោះ​អ្វី​​​មួយ​។

ជាទូទៅ​ គេ​គិត​​ថា​ខ្លួនឯង​អស់​តម្លៃ ខ្លួន​ឯង​មិនមែន​ជា​មនុស្ស​​ទៀត​ទេ​ស្លាប់​ជា​​ការ​​ប្រសើរ​ដើម្បី​ចៀសវាង​ភាព​អាម៉ាស់​ជាពិសេស​ចំពោះ​ក្មេងស្រី​ដែល​បាត់បង់​ភាព​បរិសុទ្ធ។ លោក​​បាន​ប្រាប់​ពី​​វិធី​សង្គ្រោះ​យុវវ័យ​ដែល​មាន​វិបត្តិ​ស្នេហា​ដោយ​​ធ្វើការ​សង្កេត​មើល​ទឹក​មុខ​។

បើ​​បុគ្គល​នោះ​​ស្រងូត​ស្រងាត់​ហើយ​​​បង្ហើរ​ពាក្យ​ដូចជា «គ្នា​ដូច​ជា​ចង់​លា​ឯង​ហើយ» ឬ​ក៏ ​«គ្នា​នៅ​មិន​បាន​យូរ​ទេ» ឬ​​ឲ្យ​របស់​អ្វី​មួយ​ថា «គ្នា​ឲ្យ​ឯង​ទុក​ជា​កេរ»។ល។​ អ្នក​ជិតស្និទ្ធ​​ត្រូវ​ស្វែងយល់​​ថា​ពាក្យ​ទាំង​នេះ​គឺជា​​ចេតនា​​​​ចង់​ធ្វើ​អត្តឃាត​។ ក្នុង​ករណី​នេះ​បងប្អូន ឬ​ឪពុក​ម្ដាយ​​ត្រូវ​លួងលោម​ឲ្យ​គេ​ប្រាប់​ពី​ការពិត​ផ្ដល់​​​កម្លាំង​ចិត្ត​ ​និង​ផ្ដល់​នូវ​ដំណោះស្រាយ​ធ្វើឲ្យ​គេ​មាន​សង្ឃឹម​ និង​​រីករាយ​ក្នុង​ចិត្ត​បន្ទាប់​មក​ក្រុម​គ្រួសារ​គួរ​បញ្ជូន​ទៅ​រក​វេជ្ជបណ្ឌិត​ឯកទេស​ជំងឺ​ផ្លូវចិត្ត។

ក្នុង​ករណី​ប្រទេស​កម្ពុជា​ធ្លាប់​ឆ្លងកាត់​​របប​ខ្មែរ​ក្រហម។ អ្នក​សម្លាប់ និង​មនុស្ស​​ដែល​រង​ការ​គំរាម​សម្លាប់​សុទ្ធ​តែ​មាន​វិបត្តិ​ផ្លូវ​ចិត្ត​ដូច​គ្នា​ដែល​ទាមទារ​ឲ្យ​សមាជិក​សង្គម​ទាំងអស់​យោគយល់​គ្នា​ដោយ​ប្រើ​ធម៌​អភ័យ​ទោស​​​ដល់​ជន​ដៃដល់​ផង​ដែរ។

លោក​មាន​ប្រសាសន៍​ថា ​«ការ​អនុគ្រោះ​​ដល់​គ្នា​នេះ​​​ហើយ​គឺជា​ថ្នាំ​ពិសិដ្ឋ​ដែល​នាំ​​ឲ្យ​មាន​ការ​​រស់នៅ​សុខស្រួល​ទាំង​​ក្រុម​​អ្នក​រងគ្រោះ​ដោយសារ​សង្គ្រាម​ទាំង​អ្នក​​បង្ក​សង្គ្រាម​ហើយ​​រវាង​អ្នក​បង្ក​សង្គ្រាម​ចាប់ផ្តើម​រសាយ​​ទៅ​​បន្តិច​ម្តង និង​យោគយល់​គ្នា​បន្ដិច​ម្ដងៗ​។

វេជ្ជបណ្ឌិត ការ ស៊ុនបូណាត ជំរុញ​អតីត​កម្មាភិបាល​ខ្មែរ​ក្រហម​ និង​ជន​ដែល​រងគ្រោះ​ដោយសារ​សង្គ្រាម​ចូល​មក​ព្យាបាល​ជំងឺ​ផ្លូវចិត្ត និង​​ជំងឺ​ថប់​អារម្មណ៍​ដើម្បី​​បាន​​រស់នៅ​ក្នុង​សង្គម​ដោយ​សុខសាន្ត​​ដូច​​​​ពលរដ្ឋ​ទូទៅ​ដែរ។​ «យើង​ត្រូវ​យល់​ថា​យើង​កុំ​ស្អប់​អតីត​ខ្មែរក្រហម​បើ​មិន​ធ្វើ [សម្លាប់​] គេ​​ត្រូវ​សម្លាប់​​គាត់។ ខ្ញុំ​មិន​កាន់​ជើង​ទេ​តែ​រឿង​ពិត​ដែល​យើង​ថ្លឹងថ្លែង​បាន​ហើយ​​ខ្ញុំ​ក៏​បាន​​ជួប​អតីត​អ្នក​ដឹកនាំ​ខ្មែរ​ក្រហម​ច្រើន​​ដែរ​ហើយ​ក្នុង​ការ​ឆ្លើយ​​របស់​គាត់​មួយ​ចំនួន​ក៏​មាន​ន័យ​ប្រហាក់ប្រហែល​ហ្នឹង​ដែរ»​។

ដោយ​​មាន​ការ​ជ្រោមជ្រែង​ពី​ប្រទេស​ន័រវែស និង​​អង្គសុខភាព​ពិភពលោក (WHO)​ ព្រម​ទាំង​​មាន​ការ​គាំទ្រ​ពី​ក្រសួង​សុខាភិបាល សេវា​ព្យាបាល​ផ្លូវចិត្ត​ត្រូវ​បាន​ពង្រីក​នៅ​តាម​គ្រប់​មន្ទីរពេទ្យ​​ខេត្ត​ហើយ​យ៉ាង​ហោច​មាន​គ្រូពេទ្យ​​ចិត្តសាស្ដ្រ​​ម្នាក់​នៃ​មន្ទីរពេទ្យ​បង្អែក​ខេត្ត​នីមួយៗ​។

ចាប់ពី​ឆ្នាំ​សិក្សា ១៩៩៥ មក​ក្រសួង​សុខាភិបាល​បាន​បញ្ចូល​នូវ​​​​កម្មវិធី​សិក្សា​នូវ​មុខវិជ្ជា​ជំងឺ​ផ្លូវចិត្ត​សម្រាប់​​និស្សិត​​ពី​​ឆ្នាំ​ទី​ ៤ ដល់​ទី​ ៦។ ក្នុង​ការ​​លើក​ទឹកចិត្ត​ បង្ការ​ក្តី ព្យាបាល​ក្តី​ មិន​សុទ្ធ​តែ​ត្រូវការ​លុយ​ទេ​តែ​​ត្រូវការ​ការ​ខិតខំ​ប្រឹងប្រែង​​ និង​ព្យាយាម​គ្រប់គ្រង​​ចិត្ត និង​អារម្មណ៍​ឲ្យ​បាន​ល្អ។

សូម​ផ្ញើសារ​ចុង​ក្រោយ​ឲ្យ​យុវជន​មើល​ខ្លួនឯង​ថា​ខ្លួន​នៅ​​ត្រង់​ណា​ខ្លួន​​ត្រូវ​​ធ្វើ​អី​ខ្លះ​ដើម្បី​​អនាគត​ខ្លួន​ឯង បើ​ស្រឡាញ់​ប្រទេស​ខ្លួន​ត្រូវ​ធ្វើ​អី កុំ​ភ្លើតភ្លើន​​ទៅ​តាម​តម្រូវការ​របស់​ខ្លួន និង​ចំណង់​ខ្លួន​ត្រូវ​មើល​ផ្លូវ​ដើរ​​ទៅ​អនាគត។ លើស​​​​ពី​នេះ​កុំ​​ឲ្យ​បង្ក​ហិង្សា​ឡើង​វិញ​​ជា​ការ​​​បង្ការ​នូវ​​​​ការ​​​កើត​​មាន​​ជំងឺ​​ផ្លូវចិត្ត​នៅ​កម្ពុជា​៕

រាយការណ៍​បន្ថែម​ដោយ តាំង រីនិត្យ/សហការ​ផលិត ​VIDEO ដោយ គាំ ច័ន្ទរស្មី,​ កែវ រតនា, ជា វណ្ណារ័ត្ន, ហម ស្រីនិច, មាន សំណាងដេវីត និង​​ លៀប ទេពិទូ

0

Comments

Please, login or register to post a comment

ព័ត៌មានពាក់ព័ន្ធ