Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក អ៊ិន ចាន់នី៖ គន្លឹះ​ជោគជ័យ​របស់​​អេស៊ីលីដា គឺ​ស្តាប់​បុគ្គលិក អតិថិជន និង​ស្ដាប់​អាជ្ញាធរ​ដែនដី

Content image - Phnom Penh Post
លោក អ៊ិន ចាន់នី ប្រធាន​នាយក​ប្រតិបត្តិ​ធនាគារ​អេស៊ីលីដា ភីអិលស៊ី (ACLEDA Bank Plc)។ គាំ ច័ន្ទរស្មី

លោក អ៊ិន ចាន់នី៖ គន្លឹះ​ជោគជ័យ​របស់​​អេស៊ីលីដា គឺ​ស្តាប់​បុគ្គលិក អតិថិជន និង​ស្ដាប់​អាជ្ញាធរ​ដែនដី

គោលការណ៍​ចម្បង​នៃ​ភាព​ជោគជ័យ​របស់​ធនាគារ​អេស៊ីលីដា ត្រូវ​បាន​ទម្លាយ​ក្នុង​កិច្ចសម្ភាស​ជាង​ពីរ​ម៉ោង​រវាង​ភ្នំពេញ ប៉ុស្ដិ៍ និង​លោក អ៊ិន ចាន់នី ប្រធាន​នាយក​ប្រតិបត្តិ​នៃ​ធនាគារ​ អេស៊ីលីដា ភីអិលស៊ី (ACLEDA Bank Plc) ក្នុង កម្មវិធី "នរណា​ជា​នរណា?" កាលពី​ដើម​សប្ដាហ៍​នេះ។ អេស៊ីលីដា ជា​ធនាគារ​ឈាន​មុខ​គេ​នៅ​កម្ពុជា​លើ​សេវា​ផ្តល់​ប្រាក់​កម្ចី​ច្រើន និង​រហ័ស​ទាន់​ចិត្ត ចំនួន​បុគ្គលិក​ច្រើន​ជាង​គេ ចំនួន​សាខា​ច្រើន​ជាង​គេ និង​ជា​ធនាគារ​ក្នុង​ស្រុក​ដំបូង​ដែល​វិនិយោគ​នៅ​បរទេស ពិសេស​ឡាវ និង​ភូមា។

អេស៊ីលីដា បាន​ចាប់​ផ្ដើម​ពី​សមាគម​បណ្ដុះបណ្ដាល​ផែនការ​អាជីវកម្ម​ខ្នាត​តូច និង​មធ្យម​ដល់​ប្រជាពលរដ្ឋ​កម្ពុជា និង​ការ​ផ្ដល់​នូវ​ប្រាក់​កម្ចី​ខ្នាត​តូច​បំផុត​នៅ​ឆ្នាំ ១៩៩៣ ហើយ​បាន​វិវត្ត​ខ្លួន​ក្លាយ​ជា​ធនាគារ​នៅ​ឆ្នាំ ២០០០។

ធនាគារ​នេះ​ចាប់ផ្ដើម​សមាគម​តូច​មួយ​ជាមួយ​ដើម​ទុន​ជាង ៦០ ម៉ឺន​ដុល្លារ​អាមេរិក ក្រោម​គំនិច​ផ្ដួចផ្ដើម​របស់​លោក ចាន់នី និង​សហការី​របស់​លោក។

លោក អ៊ិន ចាន់នី បាន​រំឭក​ថា​ក្រោយ​ពី​ធ្វើ​មាតុភូមិ​និវត្តន៍​នៅ​ឆ្នាំ ១៩៩២ លោក​បាន​ចូល​បម្រើ​ជា​បុគ្គលិក​របស់​អង្គការ​កម្មវិធី​អភិវឌ្ឍន៍​នៃ​អង្គការ​សហប្រជាជាតិ (UNDP) និង​អង្គការ​ពលកម្ម​អន្តរជាតិ (ILO) សម្រាប់​គម្រោង​បង្កើត​ការងារ និង​បណ្តុះ​បណ្តាល​វិជ្ជាជីវៈ​សម្រាប់​សហគ្រាស​ធុន​តូច។

លោក​ត្រូវ​បាន​អង្គការ​ឲ្យ​ទទួល​ខុស​ត្រូវ​ជា​ទីភ្នាក់ងារ​អភិវឌ្ឍន៍​សេដ្ឋកិច្ច ប្រចាំ​ទីក្រុង​ភ្នំពេញ។ កម្មវិធី​របស់​អង្គការ​សហប្រជាជាតិ​មាន​អាណត្តិ​ត្រឹម​ពីរ​ឆ្នាំ​ប៉ុណ្ណោះ។

ចាប់ផ្ដើម​ពី​ចំណុច​នោះ​ហើយ​ដែល​លោក និង​សហការី​បាន​នាំ​គ្នា​គិត​ថា​ត្រូវ​តែ​បង្កើត​សមាគម​តូច​មួយ​ដោយ​យក​គម្រោង​អភិវឌ្ឍន៍​របស់​អង្គការ​សហប្រជាជាតិ និង​អង្គការ​ពលកម្ម​អន្តរជាតិ​ធ្វើ​ជា​សមាគម​ដាក់​ឈ្មោះ​ថា «សមាគម​ទីភ្នាក់ងារ​អភិវឌ្ឍន៍​សេដ្ឋកិច្ច​កម្ពុជា» Association of Cambodian Local Economic Development Agency (ACLEDA)។ លោក​បាន​មាន​ប្រសាសន៍​ថា​នា​ពេល​នោះ អេស៊ីលីដា បាន​ទទួល​ថវិកា​ជំនួយ ៦១៣ ០០០ ដុល្លារ​ពី​ធនាគារ​អភិវឌ្ឍន៍​បារាំង​តាមរយៈ UNDP។

Content image - Phnom Penh Post
លោក អ៊ិន ចាន់នី (កណ្ដាល) ដឹកនាំ​សហការី​ពិភាក្សា​ការងារ​ក្នុង​អំឡុង​ដើម​ទសវត្សរ៍ ៩០។ រូបថត សហការី

កាល​នោះ​មាន​បុគ្គលិក​បម្រើការ​ត្រឹម ២៨ នាក់។ ក្រុម​ការងារ​របស់​សមាគម​ថ្មី​នោះ​បាន​បោះឆ្នោត​ឲ្យ​លោក​ធ្វើ​ប្រធាន​ហើយ​នាំ​គ្នា​គិតគូរ​លើ​គម្រោង​បណ្តុះបណ្តាល​សហគ្រិន​រួមមាន​កម្មវិធី​ឥណទាន​ខ្នាត​តូច​បំផុត​ដល់​អាជីវករ (Micro Laon) និង​បណ្តុះ​បណ្តាល​វិជ្ជាជីវៈ​អាជីវកម្ម​ខ្នាត​តូច​បំផុត (Micro Enterprise) ផង​ដែរ។

នៅ​ពេល​នោះ​មាន​សំណួរ​មួយ​បាន​ចោទ​ឡើង​ថា​ តើ​នរណា​ជា​អ្នក​ទទួល​ខុសត្រូវ​ប្រមូល​បំណុល​មក​វិញ​ក្រោយ​ពី​ផ្ដល់​ប្រាក់​កម្ចី? លោក ចាន់នី មាន​ប្រសាសន៍​ថា​ទាំងអស់​គ្នា​រួម​ទាំង​សហការី​ដទៃ​ទៀត​បាន​ប្រមូល​ផ្តុំ​គ្នា​ស្វែងរក​ចម្លើយ​ដោយ​នាំ​គ្នា​សិក្សា​លើ​ដំណើរការ​បង្កើត​របស់​អង្គការ​ផ្សេងៗ​ ប៉ុន្តែ​នៅ​ពេល​នោះ​មិន​មាន​អង្គការ​ណា​មួយ​ផ្តល់​ឥណទាន​សុទ្ធ​ទេ មាន​តែ​កម្មវិធី​ទាក់ទង​ទៅ​នឹង​អនក្ខរកម្ម​សុខភាព។

វា​មិនមែន​ជា​ការ​ងាយស្រួល​ទេ​ក្នុង​ការ​ប្រមូល​ប្រជាពលរដ្ឋ​ទូទៅ​ឲ្យ​មក​កាន់​ស្នាក់ការ​សមាគម​ដើម្បី​ទទួល​យក​ការ​បណ្ដុះបណ្ដាល​ពី​អាជីវកម្ម​ខ្នាត​តូច និង​មធ្យម​នា​ដើម​ទសវត្សរ៍​ទី ៩០។

នៅ​ឆ្នាំ ១៩៩៣ សមាគម​បាន​ផលិត​ផ្ទាំង​ឃោសនា រៀបរាប់​ពី​អត្ថប្រយោជន៍​នៃ​ការ​បង្កើត​អាជីវកម្ម។ ជា​លទ្ធផល​មាន​អាជីវករ​មក​រៀន​ច្រើន។ ក្រោយ​ពី​បាន​ស្ដាប់​យោបល់​អាជីវករ​ដែល​មក​រៀន​ទាំង​នោះ​ទើប​ដឹង​ថា​ពួកគាត់​មក​រៀន​ក្នុង​បំណង​ខ្ចី​លុយ​ពី​សមាគម​ដើម្បី​ធ្វើ​អាជីវកម្ម​ខ្នាត​តូច​បន្ដ​មុខរបរ​ដូនតា​របស់​គាត់។

លោក ចាន់នី បាន​មាន​ប្រសាសន៍​ថា​ដំណាក់កាល​ដំបូង​សម្រាប់​មុខរបរ​ខ្នាត​តូច​បំផុត សមាគម​មិន​បាន​តម្រូវ​ឲ្យ​មាន​ប្លង់​ផ្ទះ ឬ​ប្លង់​ដី​ទេ​ក្នុង​ករណី​ពួកគាត់​ព្រម​ធានា​គ្នា​ដែល​មាន​សមាជិក​យ៉ាង​តិច​ប្រាំ​នាក់​នៅ​ភូមិ​ជាមួយ​គ្នា។ ជា​បន្តបន្ទាប់​ពួកគាត់​អាច​មាន​លទ្ធភាព​ទទួល​បាន​ប្រាក់​កម្ចី​ដោយ​ដាក់​ទ្រព្យ​ធានា។ កម្មវិធី​ដំបូង​បំផុត​មួយ​ទៀត​គឺ​ណែនាំ​ពី​ការ​សន្សំ​ប្រាក់។

ប្រធាន​នាយក​ប្រតិបត្តិ​រូប​នេះ​បាន​បញ្ជាក់​ថា «នេះ​ហើយ​គឺ​ចំណុច​ចាប់ផ្ដើម​ធ្វើ​ឲ្យ​យើង​បាន​ជោគជ័យ​នោះ​គឺ​ការ​ស្តាប់​គំនិត​យោបល់​អតិថិជន​បាន​ន័យ​ថា​ពេល​អតិថិជន​និយាយ យើង​ស្តាប់​គាត់​តាំងពី​ដើម​ដល់​ចប់»។

លោក​ថ្លែង​ថា​​ជាមួយ​នឹង​ថវិកា​ជាង ៦០ ម៉ឺន​ដុល្លារ​អាមេរិក​សមាជិក​ក្រុម​រួម​ទាំង​រូប​លោក​បារម្ភ​ខ្លាច​ក្រែង​មាន​ដូច​ពាក្យ​ចាស់​ថា «មាន់​ពង​ក្នុង​ជម្រុក​ស្រូវ វា​មិន​ដែល​មិន​ស៊ី​ស្រូវ» ក្នុង​ន័យ​បារម្ភ​ខ្លាច​គេ​ចោទ​អំពី​ការ​កិបកេង​ប្រាក់​របស់​សមាគម ដូច្នេះ​ដើម្បី​ចៀសវាង​ការ​ចោទប្រកាន់​សហការី​ក៏​ឲ្យ​យោបល់​ថា​ត្រូវ​វាយតម្លៃ​អតិថិជន​ថា​គាត់​មាន​លទ្ធភាព​សង​ត្រឡប់​ទាន់​ពេលវេលា​កំណត់។ ដើម្បី​ធ្វើ​ដូច្នេះ​បាន​បុគ្គលិក និង​ថ្នាក់​ដឹកនាំ​ អេស៊ីលីដា បាន​សម្រេច​កំណត់​បទ​ច្បាប់​ផ្ទៃ​ក្នុង​ថា «គ្រប់​ភ្នាក់ងារ​ផ្ដល់​សេវា​កម្ចី​ហិរញ្ញវត្ថុ​ទាំងអស់​មិន​ត្រូវ​ទទួល​ទាន​ផ្លែឈើ ឬ​ទឹក​របស់​អតិថិជន​ទេ»។ ធ្វើ​បែប​នេះ​ដើម្បី​បញ្ចៀស​ការ​សុំ​ពន្យារ​សំណង​ពី​អតិថិជន។

Content image - Phnom Penh Post
លោក អ៊ិន ចាន់នី (ស្ដាំ​ទី ២) ក្នុង​វគ្គ​បណ្ដុះបណ្ដាល​ឆ្នាំ ១៩៩៥។សហការី

ជា​លទ្ធផល​ឃើញ​ថា​ល្អ​ប្រសើរ។ វា​ជា​ច្បាប់​ផ្ទៃក្នុង​ដំបូង​ដែល​ចែង​ដោយ​បុគ្គលិក និង​ថ្នាក់​ដឹកនាំ​របស់​ អេស៊ីលីដា។

នរណា​ដែល​បំពាន​លើ​បទ​បញ្ជា​នេះ​ថ្នាក់ដឹកនាំ​មាន​សិទ្ធិ​បញ្ឈប់​ដោយ​គ្មាន​ការ​តវ៉ា។ នេះ​គឺជា​ចំណុច​អាថ៌កំបាំង​មួយ​ដែល​ធ្វើ​ឲ្យ​ អេស៊ីលីដា បង្កើន​បាន​នូវ​មូលនិធិ និង​បង្កើន​ការ​ទុក​ចិត្ត​ពី​អតិថិជន។ លោក អ៊ិន ចាន់នី បាន​មាន​ប្រសាសន៍​ថា «យើង​ច្បាស់លាស់​ជាមួយ​គ្នា​យើង ហើយ​យើង​ក៏​ច្បាស់លាស់​ជាមួយ​អតិថិជន​ទៀត។ ខ្ញុំ​ច្បាស់​លាស់​ជាមួយ​សហការី រីឯ​សហការី​ស្តាប់​ខ្ញុំ ហើយ​អង្គការ​ទាំង​មូល​ត្រូវ​ស្តាប់​មតិ​ភាគច្រើន​របស់​អតិថិជន។

ទាក់ទិន​នឹង​ការ​សម្រេច​ចិត្ត​ជ្រើសរើស​យក​ហង្ស​ជា​និមិត្ត​សញ្ញា​ធនាគារ​អេស៊ីលីដា​ឆ្នាំ ១៩៩៣ លោក​បាន​ពន្យល់​ថា​កាល​នោះ​លោក​បាន​ចេញ​ជា​គំនិត​បណ្តោះអាសន្ន​មួយ​ថា បើ​ឲ្យ​លោក​សម្រេច​គឺ​យក​ជ្រូក​និមិត្ត​សញ្ញា​នោះ​គឺ​លោក​ចង់​ឲ្យ​សហការី​ចូលរួម​រក​សត្វ​ណា​មួយ​ដែល​គេ​មិន​អាច​បង្អាប់​បាន ដូច្នេះ​សមាជិក​ទាំង​អស់​ក៏​បាន​នឹក​រក​ស្តេច​សត្វ​មួយ​ប្រភេទ​គឺ​យក​ «សត្វ​ហង្ស» ជា​និមិត្ត​សញ្ញា​របស់​ធនាគារ​អេស៊ីលីដា»។ លោក​ពន្យល់​ទៀត​ថា​ធម្មជាតិ​របស់​សត្វហង្ស​គឺ​ស្តេច​សត្វ​ដែល​ចូលចិត្ត​ចុះ​នៅ​ទី​ដែល​មាន​បរិស្ថាន​ល្អ​ស្អាតស្អំ​ជា​សត្វ​ដែល​ចូលចិត្ត​ទីត្រជាក់​ចាប់ផ្តើម​ដោយ​អក្សរ «ហ» ដូចគ្នា​នឹង​ពាក្យ​ថា «ហិរញ្ញវត្ថុ» ហើយ​និង​ជា​សត្វ​ចេះ​សង្គ្រោះ​ជីវិត​មនុស្ស​ដែល​ស័ក្តិសម​ជាមួយ​ចក្ខុវិស័យ និង​បេសកកម្ម​របស់​ធនាគារ​នេះ។

ក្រោយ​ពី​បាន​ប្រើប្រាស់​និមិត្ត​សញ្ញា​រូបហង្ស​រយៈពេល ២៤ ឆ្នាំ​ធនាគារ​អេស៊ីលីដា​ត្រូវ​បាន​ស្នើសុំ​ពី​ប្រមុខ​រាជរដ្ឋាភិបាល​លោក នាយក​រដ្ឋមន្ដ្រី ហ៊ុន សែន ឲ្យ​ប្ដូរ​ឡូហ្គោ​រូប​ហង្ស​ចេញ​ដោយ​ខ្លាច​ពលរដ្ឋ​ច្រឡំ​ថា​ជា​ធនាគារ​របស់​រដ្ឋ។ ឡូហ្គោ​រូប​ហង្ស​នេះ​ត្រូវ​បាន​ប្រើ​ដោយ​ក្រសួង​សេដ្ឋកិច្ច និង​ហិរញ្ញវត្ថុ​ផង​ដែរ។ ធនាគារ អេស៊ីលីដា បាន​ចំណាយ​ប្រាក់ ៣,៥ លាន​ដុល្លារ​ក្នុង​ការ​ប្ដូរ​ឡូហ្គោថ្មី​ក្នុង​រយៈពេល​ជាង ១ សប្ដាហ៍។

ចំពោះ​អាថ៌កំបាំង​ផ្សេង​ទៀត​ដែល​នាំ​ឲ្យ​ធនាគារ អេស៊ីលីដា ពង្រីក​សាខា​ពី​ថ្នាក់​ក្រុង​ខេត្ត​ស្រុក​ដល់​ថ្នាក់​ឃុំ​យ៉ាង​លឿន​ដោយ​ជោគជ័យ​គឺ​បច្ចេកវិទ្យា​ទំនើប​ក្នុង​នេះ​កម្ពុជា​មាន​បណ្ដាញ​ខ្សែកាប​អុបទិច និង​ប្រព័ន្ធ​ទូរស័ព្ទ​ទំនើប។ គំនិត​ទាំង​នេះ​បាន​មក​ដោយ​ការ​ចូលរួម​ពី​បុគ្គលិក​ធនាគារ។

Content image - Phnom Penh Post
លោក អ៊ិន ចាន់នី (ឆ្វេង​ទី ១) ជា​អតីត​គ្រូបង្រៀន​ផ្នែក​អាជីវកម្ម។ រូបថត សហការី

លោក​បាន​ពន្យល់​ថា​ថ្នាក់ដឹកនាំ​បាន​អនុញ្ញាត​ឲ្យ​បុគ្គលិក​ចំនួន ៣២០ នាក់​សរសេរ​ពី​គោលបំណង​ទៅ​អនាគត​របស់​គេ​ដោយ​សួរ​ថា​ តើ​អ្វី​ទៅ​ជា​ទស្សន​វិស័យ​សម្រាប់​ការ​ប្រមើល​មើល​វែង​ឆ្ងាយ​សម្រាប់​អេស៊ីលីដា? នៅ​ពេល​មាន​ការ​ចូលរួម​របស់​សហការី​ទីបំផុត​ទាំងអស់​គ្នា​បាន​ឯកភាព​លើ​ទស្សនវិស័យ​រួម​មួយ៖ «អេស៊ីលីដា ជា​ធនាគារ​ដែល​បម្រើ​សេវា​ល្អ​លើស​គេ​គ្រប់​សហគមន៍​ជាតិ​ និង​អន្តរជាតិ»។ ចំណុច​ទី ២ គឺ​ អេស៊ីលីដា គឺ​ការ​គោរព និង​រាប់អាន​ជាមួយ​អាជ្ញាធរ​ដែនដី​ក្នុង​នាម​គាត់​ជា​ចាស់​ទុំ​ក្នុង​ភូមិ​ស្រុក​ដឹង​ និង​យល់​ពី​របៀប​របប​រស់នៅ​របស់​ប្រជាជន​នៅ​ក្នុង​ភូមិ។

លោក​ថ្លែង​ថា «យើង​ជម្រាប​សួរ​មេឃុំ​មុន​គេ​ដើម្បី​បង្ហាញ​ខ្លួន​យើង​សូម​ឲ្យ​គាត់​ជួយ​តម្រង់​ផ្លូវ»។

ដោយសារ​កម្ពុជា​មាន​ប្រជាជន​តិច​បរិមាណ​ធនាគារ​ច្រើន​នោះ​នឹង​នាំ​មក​នូវ​ប្រយោជន៍​ដល់​អ្នក​ប្រើប្រាស់​សេវា​ហិរញ្ញវត្ថុ។ ការ​ប្រកួត​ប្រជែង​មាន​ខ្លាំង ប៉ុន្តែ​ការ​ប្រកួត​លើ​គុណភាព​សេវា​មិន​សូវ​ខ្លាំង​ទេ។

តាម​ឯកសារ​ផ្លូវការ​ប្រជាជន​កម្ពុជា​សរុប ១៥ លាន​នាក់​ធនាគារ​មាន ៥១ ទាំង​ឯកទេស និង​ធនាគារ​ពាណិជ្ជ គ្រឹះស្ថាន​មីក្រូហិរញ្ញវត្ថុ​មាន ៦៤។ ថ្មីៗ​នេះ​ធនាគារ​ជាតិ​នៃ​កម្ពុជា NBC បាន​ចុះ​បញ្ជី ១៤៧ បន្ថែម​ទៀត។ ដោយ​ឡែក​ធនាគារ​អេស៊ីលីដា​មាន​សាខា​សរុប ២៥៩, ATM ៣១៨ កន្លែង​ស្មើ​នឹង​មួយ​ភាគ​បី​នៃ​ធនាគារ​ទូទាំង​ប្រទេស​ម៉ាស៊ីន​ឆូត​កាត​មាន​ចំនួន​ជិត ៤០០០។

លោក​ប្រធាន​នាយក​ប្រតិបត្តិ​បាន​បញ្ជាក់​ថា៖ «យើង​ដាក់​ឲ្យ​ច្រើន​ដើម្បី​អតិថិជន​ងាយ​ជ្រើសរើស​ប្រើ​ហើយ​យើង​ក៏​មាន​សេវាកម្ម​អនឡាញ​តាម​ទូរស័ព្ទ​ដៃ​ពង្រីក​ហេដ្ឋា​រចនាសម្ព័ន្ធ​ចម្រុះ​ដើម្បី​បង្កើន​គុណភាព​សេវា​បំពេញ​តាម​អ្វី​ដែល​អតិថិជន​ចង់​បាន»។

លោក អ៊ិន ចាន់នី មាន​ខ្សែ​ជីវិត​ប្រហាក់​ប្រហែល​នឹង​បងប្អូន​ខ្មែរ​ទូទៅ​នៅ​កម្ពុជា​ដែរ​ ដោយ​បាន​ឆ្លងកាត់​របប​កុម្មុយនីស្ត​ខ្មែរ​ក្រហម។ លោក​កើត​នៅ​ក្រុង​ភ្នំពេញ​ឆ្នាំ ១៩៦០ ហើយ​នៅ​ពេល​ប៉ុលពត​ចូល​មក​កាន់កាប់​ទីក្រុង​ភ្នំពេញ​លោក​មាន​អាយុ ១៤ ឆ្នាំ។

ក្រុម​គ្រួសារ​របស់​លោក​ត្រូវ​បាន​គេ​ជម្លៀស​ចេញ​ពី​ភ្នំពេញ​ទៅ​ខេត្ត​ព្រៃវែង​ដែល​ជា​ភូមិ​កំណើត​របស់​ឪពុកម្តាយ​ស្ថិត​នៅ​ស្រុក​ស៊ីធរ​កណ្តាល។ ក្រុម​ខ្មែរក្រហម​មិន​ឲ្យ​ក្រុម​គ្រួសារ​នៅ​ទី​នោះ​ទេ​គេ​ក៏​ជម្លៀស​ចេញ​ម្តង​ទៀត​ទៅ​នៅ​ខេត្ត​បាត់ដំបង់​ក្បែរ​ព្រំដែន​ថៃ។

នៅ​ឆ្នាំ ១៩៧៩ ពេល​វៀតណាម​ចូល​ស្រុក​បណ្ដេញ​ខ្មែរ​ក្រហម​លោក​បន្ដ​រស់នៅ​ក្នុង​ខេត្ត​បាត់ដំបង​រហូត​ដល់​ឆ្នាំ ១៩៨១ ទើប​លោក​បាន​ចេញ​ទៅ​សិក្សា និង​រស់​ក្នុង​ជំរំ​ក្បែរ​ព្រំដែន​ថៃ។ ឆ្នាំ​ ១៩៨៩ លោក ចាន់នី បាន​ទទួល​អាហារូបករណ៍​ទៅ​សិក្សា​នៅ​មហាវិទ្យាល័យ Gwynedd Mercy University ក្នុង​រដ្ឋ Pennsylvania សហរដ្ឋ​អាមេរិក។ លោក​បាន​វិល​មក​ជំរំ​វិញ​ឆ្នាំ ១៩៩០។ លោក អ៊ិន ចាន់នី បច្ចុប្បន្ន​មាន​វ័យ ៥៦ ឆ្នាំ បាន​រៀបការ​នៅ​ឆ្នាំ ១៩៩៦ មាន​កូន ៤ នាក់ ស្រី ២ ប្រុស ២៕

សូម​រង់ចាំ​អាន​ភាគ ២ ថ្ងៃ​សុក្រ​សប្ដាហ៍​ក្រោយ/រាយការណ៍​បន្ថែម​ដោយ តាំង រីនិត្យ/សហការផលិត VIDEO ដោយ គាំ ច័ន្ទរស្មី, កែវ រតនា, មានសង្ហារ ដេវីត និង លៀប ទេវិពិទូ

0

Comments

Please, login or register to post a comment