Search form

Login - Register | FOLLOW US ON

Logo of Phnom Penh Post newspaper Phnom Penh Post - សួស យ៉ារ៉ា៖ ​បង្កើត​បក្ស​នយោបាយ​ចង់​បាន​អំណាច

Content image - Phnom Penh Post
លោក សួស យ៉ារ៉ា ពេល​ផ្តល់​បទសម្ភាស​ដល់​ភ្នំពេញ​ប៉ុស្តិ៍​នៅ​ភោជនីយដ្ឋាន​មួយ​ក្នុង​ក្រុង​ភ្នំពេញ​កាលពី​សប្តាហ៍​មុន​។ ហេង ជីវ័ន

សួស យ៉ារ៉ា៖ ​បង្កើត​បក្ស​នយោបាយ​ចង់​បាន​អំណាច

ឆ្លើយតប​ទៅ​នឹង​ការ​លើក​ឡើង​ថា​ស្ថានភាព​នយោបាយ​នៅ​កម្ពុជា​បច្ចុប្បន្ន​កំពុង​ស្ថិត​ក្នុង​ស្ថានភាព​ក្តៅ​ដោយសារ​ការ​គាបសង្កត់​ទៅ​លើ​គូប្រជែង​នយោបាយ​ និង​អង្គការ​សង្គម​ស៊ីវិល​ពី​សំណាក់​បក្ស​កាន់​អំណាច​នោះ​លោក​ សួស យ៉ារ៉ា តំណាងរាស្ត្រ និង​ជា​អ្នក​នាំពាក្យ​វ័យក្មេង​នៃ​គណបក្ស​ប្រជាជន​កម្ពុជា​ដែល​គ្រប់គ្រង​អំណាច​ជិត​ ៤០ ​ឆ្នាំ​មក​ហើយ​នោះ​ចាត់ទុក​កម្ដៅ​នយោបាយ​ដែល​គេ​លើក​ឡើង​នេះ​ថា​ជា​កម្តៅ​បែប​សិប្បនិម្មិត​ដែល​បង្កើត​ឡើង​ដោយ​បុគ្គល​មួយ​ចំនួន​ធ្វើការ​ឲ្យ​បរទេស​ទទួល​លុយ​ពី​បរទេស​ ឬ​ក៏​បរទេស​តែ​ម្តង​ដែល​ចោទ​ថា​នយោបាយ​កម្ពុជា​កំពុង​មាន​កម្ដៅ​។

ដោយ​សំដៅ​លើ​គណបក្ស​សង្គ្រោះ​ជាតិ​តែ​មិន​បញ្ចេញ​ឈ្មោះ​លោក​ សួស យ៉ារ៉ា ថ្លែង​ហាក់​ទទួល​ស្គាល់​ថា​គណបក្ស​សង្គ្រោះ​ជាតិ​ដែល​ជា​បក្ស​ប្រឆាំង​បាន​ឈ្នះ​កៅអី​រដ្ឋសភា​ច្រើន​ក្នុង​រយៈពេល​ខ្លី​គឺ​ ៥៥ ​កៅអី​នោះ​ធ្វើឲ្យ​បក្ស​នេះ​មិន​អាច​បំពេញ​តាម​ការ​សន្យា​របស់​ខ្លួន​ជាមួយ​ម្ចាស់​ឆ្នោត​ទាន់​ពេលវេលា អ៊ីចឹង​ពួកគេ​ស្រែក​ថា​ស្ថានការណ៍​នយោបាយ​កំពុង​ឡើង​កម្ដៅ​ដើម្បី​បង្វែរ​សភាពការណ៍​ឲ្យ​ចាក​ផុត​ពី​កាតព្វកិច្ច​នៃ​ការ​បំពេញ​ការ​សន្យា​ជាមួយ​ម្ចាស់​ឆ្នោត​។ ម្យ៉ាង​ទៀត​ពួកគេ​ធ្វើការ​ឲ្យ​បរទេស​ទទួល​លុយ​ពី​បរទេស​ហើយ​មិន​អាច​ឈ្នះ​ការ​បោះឆ្នោត​ដូច្នេះ​ហើយ​ពួកគេ​ត្រូវ​តែ​ប្រាប់​បរទេស​ថា​ស្ថានភាព​នយោបាយ​នៅ​កម្ពុជា​កំពុង​ឡើង​កម្ដៅ​។

អ្នក​នាំពាក្យ​រូប​នេះ​បញ្ជាក់​ថា​៖ «​បង្កើត​គណបក្ស​នយោបាយ​គឺ​ចង់​បាន​អំណាច​ហើយ​។ អ៊ីចឹង​បើ​ចង់​បាន​អំណាច តើ​យើង​គួរ​ប្រកួត​ដោយ​ហិង្សា ឬ​យើង​ប្រកួត​ប្រជែង​ដោយ​គោលនយោបាយ​ដោយ​គំនិត​ ឬ​មួយ​ក៏​អ្វីៗ​ដែល​យើង​មាន​គឺ​ត្រូវ​ប្រើ​ធនធាន​របស់​ខ្លួនឯង​ ឬ​ប្រើ​ធនធាន​របស់​បរទេស​។ អ៊ីចឹង​ចំណុច​នេះ​ហើយ​ដែល​ធ្វើឲ្យ​មនុស្ស​ទាំងអស់​ជួនកាល​ខ្លះ​បាត់​លំនឹង​ខ្លួន​ឯង​»​។

ទាក់ទង​នឹង​ស្ថានភាព​នយោបាយ​ដែល​ថា​កំពុង​មាន​កម្ដៅ​លោក​ សួស យ៉ារ៉ា បាន​ទម្លាក់​ការ​ចោទប្រកាន់​ទៅ​លើ​គណបក្ស​ប្រឆាំង​ថា​ដោយសារ​មិន​អាច​អនុវត្ត​បាន​តាម​ការ​សន្យា​ ខណៈ​ខ្លួន​បាន​និង​កំពុង​ទទួល​ការ​គាំទ្រ​ច្រើន រហូត​ដល់​ពាក់កណ្តាល​ប្រទេស​ដូច្នេះ​ពួកគេ​ចេះ​តែ​បង្កើត​រឿង​ផ្សេងៗ​។

លោក​ សួស យ៉ារ៉ា ថ្លែង​ថា​៖ «​អ៊ីចឹង​អា​ពាក្យ​ក្តៅ​ហ្នឹង​វា​ចេញ​មក​តាម​របៀប​គំនិត​ហ្នឹង​ដែរ​ជា​ចំណែក​មួយ​ទៀត​ក្រៅ​ពី​អ្វី​ដែល​គាត់​បាន​ទទួល​ជំនួយ​បរទេស​គាត់​ត្រូវ​តែ​ប្រាប់​ [​បរទេស​ថា​ក្តៅ​] ​ហើយ​។ ​អ៊ីចឹង​អាក្តៅ​ហ្នឹង​មិន​មែន​ក្តៅ​ពិតប្រាកដ​ទេ​ក្តៅ​ហ្នឹង​គេ​ហៅថា​ក្តៅ​សិប្បនិម្មិត​អ៊ីចឹង​បើ​ក្តៅ​សិប្បនិម្មិត​ប្រជាជន​យើង​អត់​ចង់​បាន​ទេ​»​។

លោក សួស យ៉ារ៉ា៖ ​ឲ្យ​តែ​បង្កើត​គណបក្ស​នយោបាយ​គឺ​ចង់​បាន​អំណាច

-

ដោយ​ថ្លែង​ការពារ​គណបក្ស​ប្រជាជន​កម្ពុជា​ថា​មិន​ពាក់ព័ន្ធ​នឹង​ការ​រំលាយ​បក្ស​សង្គ្រោះ​ជាតិ​ដែល​ជា​គណបក្ស​ប្រឆាំង​ និង​ជា​គូប្រកួត​ប្រជែង​ក្នុង​ការ​បោះឆ្នោត​ឆ្នាំ​ ២០១៨ ​អ្នក​នាំពាក្យ​រូប​នេះ​អះអាង​ថា​គណបក្ស​ប្រជាជន​កម្ពុជា​មិន​ឈ្លោះ​ជាមួយ​គណបក្ស​សង្គ្រោះ​ជាតិ​ទេ ហើយ​ថា​គណបក្ស​នេះ​ត្រូវ​រំលាយ ឬ​យ៉ាង​ណា​នោះ​គឺ​វា​អាស្រ័យ​លើ​តុលាការ និង​អង្គនីតិប្រតិបតិ្ត​ដែល​រកឃើញ​កំហុស​របស់​គណបក្ស​ប្រឆាំង​។

ទោះបី​គណបក្ស​ប្រឆាំង​ជា​គូប្រកួត​ទម្ងន់​ធ្ងន់​ស័ក្តិសម​នឹង​គណបក្ស​កាន់​អំណាច​ក្តី ប៉ុន្តែ​លោក​ សួស យ៉ារ៉ា បាន​ប្រៀបធៀប​បក្ស​គូប្រជែង​របស់​បក្ស​កាន់​អំណាច​នេះ​ទៅ​នឹង​គណបក្ស​រាជានិយម​ហ៊្វុនស៊ិនប៉ិច​ដែល​ក៏​ជា​គូប្រកួត​ដ៏ធំ​របស់​បក្ស​កាន់​អំណាច​ក្នុង​ឆ្នាំ​ ១៩៩៣ ដែរ​នោះ​ដោយ​ថា​បក្ស​ប្រឆាំង​បាន​ឡើង​សំឡេង​គាំទ្រ​មក​ដល់​ពេល​នេះ​ក្រោយពី​ហ៊្វុនស៊ិនប៉ិច​បាន​ថយ​កម្លាំង​គាំទ្រ​។ ​អ៊ីចឹង​មិន​អាច​ថា​បក្ស​ប្រឆាំង​អាច​នៅ​មាន​សំឡេង​គាំទ្រ​ច្រើន​ដដែល​ទេ វា​អាច​សំឡេង​នេះ​បែរ​ទៅ​រក​ហ៊្វុនស៊ិនប៉ិច​វិញ​ ឬ​គណបក្ស​ផ្សេង​ក៏​ថា​បាន​បើ​បក្ស​ប្រឆាំង​លែង​មាន​អ្វី​សំខាន់​ដែល​ជា​ទំនុក​ចិត្ត​សម្រាប់​ប្រជាពលរដ្ឋ​។ ដូច្នេះ​បើ​ទោះ​ជា​បក្សប្រឆាំង​ធំ​មែន​ក៏​វា​មិន​ប្រាកដ​ថា​គណបក្ស​ប្រឆាំង​ខ្លាំង​នោះ​ទេ​គឺ​វា​អាស្រ័យ​លើ​ទំនុក​ចិត្ត​ពី​ប្រជាពលរដ្ឋ​ទៅ​លើ​គណបក្ស​នោះ ហើយ​ថា​បើ​បក្ស​ប្រឆាំង​ថមថយ​កម្លាំង​គាំទ្រ​គឺ​នឹង​មាន​គណបក្ស​ផ្សេង​ចូល​មក​ជំនួស​បក្សប្រឆាំង ដូច្នេះ​គណបក្ស​ប្រជាជន​កម្ពុជា​មិន​ខ្វះ​គូ​ប្រកួត​ក្នុង​ការ​បោះឆ្នោត​ឆ្នាំ​ក្រោយ​នេះ​ទេ​មាន​ន័យ​ថា​ការ​បោះឆ្នោត​ឆ្នាំ​ ២០១៨ ​នៅ​តែ​ជា​ពហុបក្ស​ទោះបី​មិន​មាន​វត្តមាន​បក្ស​ប្រឆាំង​ក៏ដោយ​។

លោក​និយាយ​ថា​៖ «​បញ្ហា​ដែល​និយាយ​ថា​គណបក្ស​ [​កាន់​អំណាច​] អត់​មាន​ដៃគូ​ឡើង​ប្រកួត​នៅ​ឆ្នាំ​ ២០១៨ ខ្ញុំ​យល់​ថា​ទស្សនៈ​ហ្នឹង​មិន​ត្រឹមត្រូវ​ទេ​ព្រោះ​ដៃគូ​ប្រកួត​មាន​ច្រើន​ណាស់​។ ​គ្រាន់​តែ​អ្នកឯង​ថយ​មាន​អ្នក​ផ្សេង​ឡើង​។ បរទេស​ខ្លះ​គេ​ចង់​ឲ្យ​យើង​និយាយ​តែ​ ២ ​គណបក្ស​ទេ​ ប៉ុន្តែ​តាមពិត​វា​មិនមែន​រឿង​ ២ រឿង​ ៣...​ទេ​ព្រោះ​រដ្ឋធម្មនុញ្ញ​យើង​ថា​ពហុបក្ស អ៊ីចឹង​បក្ស​ណា​ខ្លាំង​គេ​ឡើង ហ្នឹង​ធម្មតា​»​។

ជា​កូនទោល​ក្នុង​ត្រកូល​ដែល​មាន​ឪពុក​ជា​អ្នក​ជំនួញ​ និង​ម្តាយ​ជា​អ្នក​រាជការ យុវជន​សួស​យ៉ារ៉ា​បាន​ស្រមៃ​ចង់​ចូល​បម្រើ​ការងារ​ថ្នាក់​ជាតិ​ក្នុង​ផ្នែក​ជា​អ្នក​ការទូត​។

Content image - Phnom Penh Post
លោក សួស យ៉ារ៉ា អ្នក​តំណាងរាស្ត្រ និង​ជា​អ្នក​នាំពាក្យ​គណបក្ស​ប្រជាជន​កម្ពុជា​។ រូបថត ហ្វេសប៊ុក

បើ​ទោះបី​បំណង​ពី​កុមារភាព​ក្នុង​តំណែង​ជា​អ្នក​ការទូត​ស្ថិត​នៅ​ឆ្ងាយ​ពី​ជីវិត​លោក​នៅ​ឡើយ​ក៏ដោយ ប៉ុន្តែ​លោក​ សួស យ៉ារ៉ា បាន​ថ្លែង​​ថា​លោក​ក៏​កំពុង​ធ្វើ​ការងារ​ការទូត​រាល់​ថ្ងៃ​ដែរ មិន​តែ​ប៉ុណ្ណោះ​លោក​បាន​អភិវឌ្ឍ​​ខ្លួន​ពី​មន្ត្រីរាជការ​សាមញ្ញ​ក្លាយ​ជា​មន្ត្រី​ជាន់​ខ្ពស់​របស់​រាជរដ្ឋាភិបាល​រហូត​បាន​ក្លាយ​​ជា​មន្ត្រី​ផុត​លេខ​នៅ​ក្នុង​ស្ថាប័ន​កំពូល​របស់​ជាតិ​គឺជា​​សមាជិក​រដ្ឋសភា ឬ​ហៅ​ថា​តំណាងរាស្ត្រ​ក្នុង​ឆ្នាំ​ ២០១៣ បន្ទាប់ពី​កាន់​ការងារ​ជា​អនុរដ្ឋលេខាធិការ​នៃ​ទីស្តីការ​គណៈរដ្ឋមន្ត្រី​។ ​

ស្ថិត​ក្នុង​វ័យ​ ៤៥ ​ឆ្នាំ​លោក​ សួស យ៉ារ៉ា បាន​បម្រើការ​ជា​មន្ត្រីរាជការ​អស់​រយៈពេល​ ២១ ​ឆ្នាំ​ហើយ​មុន​ជាប់​ឆ្នោត​ជា​តំណាងរាស្ត្រ​នៅ​ខេត្ត​ព្រះវិហារ​ក្នុង​កូតា​គណបក្ស​ប្រជាជន​កម្ពុជា​ដែល​មាន​លោក​នាយក​រដ្ឋមន្ត្រី​ ហ៊ុន សែន ជា​ប្រធាន​បក្ស​។

អ្វី​ដែល​ធ្វើឲ្យ​លោក​ យ៉ារ៉ា ​លេចធ្លោ​បន្ថែម​ទៀត​នោះ​គឺ​​តំណាងរាស្ត្រ​រូប​នេះ​ត្រូវ​បាន​គណបក្ស​កាន់​អំណាច​ផ្តល់​សេចក្តី​ទុក​ចិត្ត​ជឿជាក់​លើ​សមត្ថភាព និង​ចំណេះដឹង​ដោយ​បាន​តែងតាំង​ជា​អ្នក​នាំពាក្យ​របស់​បក្ស​ក្នុង​ឆ្នាំ​ ២០១៥ ដែល​ជា​តួនាទី​មួយ​ប្រឈម​នឹង​បញ្ហា​ស្មុគស្មាញ​ច្រើន​។ ​

ទោះបី​ដឹង​ថា​ការងារ​អ្នក​នាំ​ពាក្យ​មាន​ភាព​មមាញឹក​ប្រចាំ​ថ្ងៃ​ និង​ស្មុគស្មាញ​ ឬ​វិភាគ​ច្រើន​ក្តី ប៉ុន្តែ​លោក​ សួស យ៉ារ៉ា មិន​ចាត់​ទុក​ជា​ការងារ​ដែល​ធ្វើឲ្យ​លោក​រួញរា​ឡើយ​ជា​ការ​ឆ្លើយតប​នឹង​ការ​បំពេញ​តួនាទី​នេះ​ឲ្យ​បាន​ប្រសើរ​លោក​ពង្រឹង​នូវ​ការ​ប្រុងប្រយ័ត្ន​ខ្ពស់​ក្នុង​ការ​ធ្វើ​អត្ថាធិប្បាយ​ទៅ​លើ​ព័ត៌មាន ឬ​ព្រឹត្តិការណ៍​ដែល​កើតឡើង​ឲ្យ​សមស្រប​ទៅ​នឹង​ការងារ​ជា​អ្នក​នាំពាក្យ​ដែល​និយាយ​ចេញ​ជា​សាធារណៈ​អាច​ទទួល​យក​បាន​ពី​សាធារណជន​។

លោក​ សួស យ៉ារ៉ា បាន​ថ្លែង​ថា​៖ «​ចំពោះ​ការ​ធ្វើ​ជា​អ្នក​នាំពាក្យ​ខ្ញុំ​អត់​ដែល​បាន​គិត​ទាល់​តែ​សោះ​តែ​ម្តង​។ ធម្មតា​យើង​ធ្វើការ​នៅក្នុង​រចនាសម្ព័ន្ធ​យើង​ត្រូវ​ទទួល​គោរព​ការ​ចាត់តាំង​។ ​ខ្ញុំ​ទទួល​បាន​ដំណឹង​នៅ​ពេល​ឃើញ​មាន​សេចក្តី​សម្រេច​ហើយ​មិន​បាន​ដឹង​មុន​ទេ​»​។

លោក​បន្ថែម​ថា​៖ «​នៅ​ពេល​ដែល​មាន​ការ​ប្រគល់​ភារកិច្ច​មិនមែន​ជា​ការ​សប្បាយ​អរ​ទេ​គឺជា​ការ​ដែល​ត្រូវ​គិត​ថា​ត្រូវ​ធ្វើ​យ៉ាង​ម៉េច​ឲ្យ​មាន​ការ​ឆ្លើយតប​ទៅ​នឹង​មតិសាធារណៈ​ឲ្យ​បាន​ត្រឹមត្រូវ​តាម​តថភាព​ជាក់ស្តែង ហើយ​សំខាន់​បំផុត​សារ​ដែល​យើង​បញ្ជូន​ទៅ​ទីកន្លែង​សាធារណៈ​ត្រូវ​តែ​ជា​សារ​ពិត​។ ​កុំ​ឲ្យ​សារ​ហ្នឹង​ក្លែងក្លាយ​យូរៗ​ទៅ​សារ​ហ្នឹង​អត់​មាន​តម្លៃ​ទេ​»​។

មាន​ដើម​កំណើត​នៅ​ទឹកដី​ខេត្ត​ព្រះវិហារ​លោក​បាន​បញ្ចប់​ថ្នាក់​បឋម​នៅឯ​ស្រុក​កំណើត​ហើយ​បាន​មក​បញ្ចប់​ការ​សិក្សា​ថ្នាក់​មធ្យមសិក្សា​នៅ​រាជធានី​​ភ្នំពេញ​ក្នុង​ឆ្នាំ​ ១៩៩០ ​ហើយ​បាន​បញ្ចាប់​ឧត្តមសិក្សា​ផ្នែក​ច្បាប់​ និង​បាន​ចាប់​យក​ជំនាញ​ការទូត​ដោយ​សិក្សា​នៅ​សាលា​ភូមិន្ទ​រដ្ឋបាល​ក្រោយ​មក​ទៀត​លោក​បាន​បញ្ចប់​ថ្នាក់​បណ្ឌិត​ផ្នែក​គ្រប់គ្រង​នៅ​ឆ្នាំ​ ២០០៤​ ​និង​បាន​សិក្សា​បន្ថែម​នៅ​ប្រទេស​បារាំង និង​សហរដ្ឋ​អាមេរិក ផ្នែក​ច្បាប់ និង​ការទូត​។ ​ដោយ​មាន​ឪពុក​ជា​អ្នក​ជំនួញ​ខាង​ធនាគារ​ហិរញ្ញវត្ថុ​ឯ​ម្តាយ​ជា​អ្នករាជការ លោក​ សួស យ៉ារ៉ា បាន​បញ្ជាក់​ថា​នៅក្នុង​​ដំណើរ​នៃ​នយោបាយ​ការងារ​របស់​លោក​ក្នុង​សង្គម​លោក​អាច​ចាប់​យក​បាន​ទាំង​ពីរ​គឺ​ទាំង​ការងារ​រាជការ និង​ផ្នែក​ជំនួញ​ដោយ​មិន​មាន​បញ្ហា​លំបាក​អ្វី​ឡើយ​សម្រាប់​លោក​។

លោក​មាន​ប្រសាសន៍​ថា​៖ «​ធ្វើ​មន្ត្រី​រាជការ​មិន​អាច​ទៅ​ប៉ង​ធ្វើ​អ្នក​មាន​បាន​ទេ តែ​ធ្វើ​មន្ត្រី​រាជការ​គឺថា​ប៉ង​អាច​បម្រើ​ប្រជាជន​ឲ្យ​បាន​ច្រើន​។ អ៊ីចឹង​ដើម្បី​បម្រើ​ប្រជាជន​ឲ្យ​បាន​ច្រើន​យើង​បម្រើ​ផ្នែក​ណា​ដែល​យើង​មាន​ជំនាញ​អ៊ីចឹង​ខ្ញុំ​ចូលចិត្ត​ជាង​គេ​គឺ​វិស័យ​ការទូត​។ ​ខ្ញុំ​តែងតែ​ទាក់ទង​នៅ​ក្នុង​វិស័យ​ជំនួញ​ខ្ញុំ​ជាមួយ​បរទេស​អ៊ីចឹង​ដូរ​ពី​ជំនួញ​ជាមួយ​បរទេស​ខ្ញុំ​ចូល​រាជការ​ក៏​ខ្ញុំ​ប្រើប្រាស់​ជំនាញ​ហ្នឹង​នៅ​ក្នុង​វិស័យ​ការទូត វិស័យ​ការបរទេស​»៕

0

Comments

Please, login or register to post a comment