Search form

Login - Register | FOLLOW US ON

Logo of Phnom Penh Post newspaper Phnom Penh Post - អោម សេងបូរ៉ា៖ អាជីវកម្ម​​ខ្លាំង​នាំ​ឲ្យ​​​សេដ្ឋកិច្ច​ខ្លាំង​បន្ថយ​​ចំណាកស្រុក ​និង​​​បង្កើន​​ចំណូល​រដ្ឋ

លោក អោម សេងបូរ៉ា ធ្វើ​បទបង្ហាញ​ទៅ​​កាន់​ក្រុម​និស្សិត​ពេល​កន្លង​មក​។
លោក អោម សេងបូរ៉ា ធ្វើ​បទបង្ហាញ​ទៅ​​កាន់​ក្រុម​និស្សិត​ពេល​កន្លង​មក​។ រូបថត ហ្វេសប៊ុក

អោម សេងបូរ៉ា៖ អាជីវកម្ម​​ខ្លាំង​នាំ​ឲ្យ​​​សេដ្ឋកិច្ច​ខ្លាំង​បន្ថយ​​ចំណាកស្រុក ​និង​​​បង្កើន​​ចំណូល​រដ្ឋ

កាលពី​ថ្ងៃ​​សុក្រ​សប្ដាហ៍​មុន​ប្រិយមិត្ត​អ្នក​អាន​ទាំងអស់​បាន​​​​ស្គាល់​​យ៉ាង​ច្បាស់​​ថា​លោក អោម សេងបូរ៉ា ជា​​នរណា និង​​មាន​​​ប្រវត្តិ​យ៉ាង​ដូចម្ដេច។ ក្នុង​​សប្ដាហ៍​នេះ​លោក សេងបូរ៉ា ចែក​រំលែក​ទស្សនៈ​ផ្ទាល់​ខ្លួន​ក្នុង​ការ​ជួយ​ជំរុញ​កំណើន​សេដ្ឋកិច្ច​​តាមរយៈ​ភាព​រឹងមាំ​នៃ​​សហគ្រាស​ក្នុង​​ស្រុក។​

ថ្វី​ដ្បិត​ថា​អាជីវកម្ម​ខ្នាត​តូច និង​មធ្យម​គឺជា​ឆ្អឹង​ខ្នង​នៃ​សេដ្ឋកិច្ច​តែ​បរិមាណ​នៃ​សហគ្រាស​ទាំង​នោះ​នៅ​​​មាន​ចំនួន​​តិច​នៅ​ឡើយ​ដែល​​​ជា​ហេតុ​​​មួយ​​បណ្ដាល​ឲ្យ​ពលរដ្ឋ​​ខ្វះ​ការងារ​​ធ្វើ និង​​​​​​​បង្ខំ​ចិត្ត​ធ្វើ​ចំណាក​ស្រុក​។

ក្នុង​​ពេល​សម្ភាស​ជាមួយ​ភ្នំពេញ​ប៉ុស្ដិ៍​លោក បូរ៉ា បាន​​​មាន​​ប្រសាសន៍​ថា​ការ​ជំរុញ​ និង​​រួម​គ្នា​​លើក​ស្ទួយ​គាំទ្រ​សហគ្រាស​ខ្នាត​តូច និង​មធ្យម​គឺជា​ជម្រើស​ប្រសើរ​មួយ​របស់​កម្ពុជា​​ដែល​​​អាច​​ជួយ​កំណើន​សេដ្ឋកិច្ច​ជាតិ​មួយ​ចំណែក​ធំ​។

ក្នុង​នាម​ជា​គ្រូបង្វឹក​​ភាព​ជា​សហគ្រិន​លោក​​អាច​ធ្វើ​ឲ្យ​​​​​​បុគ្គល​ដែល​​​​​​​គ្មាន​ទេពកោសល្យ​ខាង​អាជីវកម្ម​ពី​កំណើត​សោះ​ឲ្យ​ក្លាយ​ទៅ​ជា​សហគ្រិន​ជោគជ័យ​​បាន​ដោយ​​​​​​មិន​ចាំបាច់​ប្រកួត​ប្រជែង​យក​​ស្លាប់​រស់ ស៊ី​សាច់​ហុត​ឈាម​ជាមួយ​គូ​ប្រកួត​​ក្នុង​​ការ​បង្កើន​​​​ទ្រព្យធន​ឡើយ​។

លោក សេងបូរ៉ា បាន​​​ផ្ដល់​នូវ​គន្លឹះ​យ៉ាង​សាមញ្ញ​ថា​បើ​ចង់​ជោគជ័យ​ខាង​មុខ​ជំនួញ ដំបូង​​បង្អស់​ត្រូវ​បង្កើត​ចំណង់​ផ្លូវ​ចិត្ត​លើ​មុខ​​ជំនួញ​ដោយ​រាប់​​អាន​ជាមួយ​ក្រុម​អ្នក​មាន​​គំនិត​ខាង​​ជំនួញ​ដូច​គ្នា​។ ដូច​​ពាក្យ​​ចាស់​ពោល​ថា «សេពគប់​ជាមួយ​ចោរ​នឹង​​ក្លាយ​​ជា​ចោរ​សេពគប់​ជាមួយ​បណ្ឌិត​នឹង​​ក្លាយ​ជា​បណ្ឌិត»។

យ៉ាងណា​មិញ​ដូច​រូប​លោក​ផ្ទាល់​បាន​ចាប់ផ្តើម​សេពគប់​ជាមួយ​​អ្នក​មាន​គំនិត​​ធ្វើ​​អាជីវកម្ម​ដោយ​លួច​​​គំនិត​ពី​អ្នក​រក​ទទួល​ទាន​​ទាំងនោះ​ និង​សម្លឹង​​​មើល​នូវ​​ឱកាស​​ពី​​មុខរបរ​មួយ​ដែល​​សមស្រប​​នឹង​សមត្ថភាព​របស់​គាត់​​​។

លោក​​បាន​ពន្យល់​​​ថា​ដើម្បី​​ក្លាយ​​ជា​សហគ្រិន​គឺ​ត្រូវ​​ដាក់​ចិត្ត​​ស្រឡាញ់​ភាព​​ជា​​សហគ្រិន​ឲ្យ​ខ្លាំងក្លា​បំផុត​។ ​លើស​ពី​នេះ​គេ​ត្រូវ​រៀន​​ក្បួន​យុទ្ធសាស្រ្ដ និង​​វិធាន​ផ្សេងៗ​ក្នុង​​​ការ​​​ធ្វើ​ជំនួញ​រួម​ទាំង​ក្បួន​​ប្រកួត​ប្រជែង​ដើម្បី​ដណ្ដើម​អតិថិជន និង​​ចំណែក​​​ទីផ្សារ​​ផង​ដែរ​។

សហគ្រិន​ជោគជ័យ​គ្រប់​​រូប​នៅ​​លើ​ពិភពលោក​​នេះ​ចៀស​មិន​ផុត​ពី​ការ​ប្រកួត​​​​​​ប្រជែង​គ្នា​ទេ។ ប៉ុន្ដែ​ការ​ប្រកួត​ដោយ​​ស្មើភាព ឬ​​មិន​​ស្មើភាព​​គ្នា​ទើប​ជា​សំណួរ​សំខាន់។ ក្លិប​​​​បណ្ដុះបណ្ដាល​​​​​សហគ្រិនភាព​​ CEO Master Club របស់​​លោក​ដែល​​​បាន​បង្កើត​​ឡើង​នៅ​ឆ្នាំ ២០១៤ មាន​​សមាជិក​សរុប​ជាង ២៤០ នាក់​នៅ​ទូទាំង​ប្រទេស​ដែល​​​ពួកគាត់​កាលពី​មុន​ជា​​អ្នក​​រកស៊ី​ក្នុង​លក្ខណៈ​គ្រួសារ​ប្រកួតប្រជែង​ដណ្ដើម​​​យក​​ឈ្នះ​ចាញ់​គ្នា​ដោយ​មិន​គិត​​ពី​គុណប្រយោជន៍​រួម​។ ក៏​ប៉ុន្តែ​​​នៅ​ពេល​​ដែល​គាត់​ចាប់​ផ្តើម​​​ចូលរួម​​ជាមួយ​សហគមន៍​ធុរកិច្ច​នេះ​​មក​ពួកគាត់​​ចាប់​ផ្តើម​​​​យល់​​ពី​គុណ​​តម្លៃ​របស់​ខ្លួន និង​​គុណ​តម្លៃ​របស់​អ្នក​នៅ​ជុំវិញ​ខ្លួន​ដោយ​រួម​គ្នា​​កសាង​​សហគមន៍​ជំនួញ​មួយ​ដែល​​​ផ្ដល់​ឱកាស​ដល់​​ទាំងអស់​គ្នា​ឲ្យ​មាន​ការ​រីកចម្រើន​។

លោក សេងបូរ៉ា បាន​​មាន​ប្រសាសន៍​ថា «សូម្បី​តែ​នារី​ម្នាក់​ដែល​យើង​ស្រឡាញ់ ឬ​ការងារ​​ដែល​​យើង​ដាក់​ពាក្យ​ធ្វើការ​ក៏​ត្រូវ​ប្រកួត​ប្រជែង​ជាមួយ​នឹង​មនុស្ស​ជាច្រើន​យ៉ាង​ណា​មិញ​មុខរបរ​ដែល​​យើង​ធ្វើ​ត្រូវ​​ប្រកួត​ប្រជែង​ដើម្បី​ទទួល​បាន​​អតិថិជន។​ យើង​មិន​អាច​គេច​​ពី​ការ​ប្រកួត​ប្រជែង​បាន​ទេ​តែ​​យើង​ប្រកួត​ប្រជែង​ដើម្បី​ការ​រីកចម្រើន​មិន​មែន​យើង​​ឈ្នះ​ឲ្យ​គេ​ចាញ់​ទេ»។

ល្បែង​ធុរកិច្ច​វា​ចាំបាច់​ត្រូវ​មាន​ច្បាប់​ជា​វិធាន​នៃ​​ល្បែង​ហើយ​​រដ្ឋាភិបាល និង​​ស្ថាប័ន​ពាក់ព័ន្ធ​ទាំងអស់​ត្រូវ​មាន​ភារកិច្ច​ជា​​អ្នក​​ចែង​ច្បាប់​នោះ​រីឯ​សហគ្រិន​ជា​អ្នក​អនុវត្ត​។ សម្រាប់​ប្រទេស​កម្ពុជា​រដ្ឋាភិបាល​នៅ​តែ​ត្រូវការ​​ពេលវេលា​សមស្រប​មួយ​បន្ថែម​ទៀត​ក្នុង​ការ​​អនុម័ត​ច្បាប់​សម្រាប់​ការពារ​ធុរកិច្ចជន​ដោយសារ​តែ​ប្រទេស​​​នេះ​​​ជា​​ប្រទេស​កំពុង​អភិវឌ្ឍន៍។ ស្ថាប័ន​ពាក់ព័ន្ធ​ទាំង​​អស់​គួរ​ខិតចូល​​​​ឲ្យ​ជិត​ជាមួយ​នឹង​អាជីវករ សហគមន៍ សមាគម ក្លិប​អាជីវកម្ម​​ជាដើម​ដើម្បី​ពួកគាត់​បាន​​​​ស្វែងយល់​ថា តើ​គាត់​​​​ត្រូវ​ធ្វើអ្វី​​​ខ្លះ​ក្នុង​ការ​ជួយ​​អាជីវករ ធុរកិច្ច​ជនជាតិ​​ និង​អន្តរជាតិ​ក្នុង​ការ​ប្រតិបត្តិ​អាជីវកម្ម​ ​និង​​​​​​អាច​ប្រកួត​​ប្រជែង​ដោយ​សេរី និង​ស្មើភាព​។

កិច្ចការ​ចម្បង​របស់​ CEO Master Club ដែល​​ជា​សមាគម​អ្នក​ជំនួញ​មួយ​នៅ​​រាជធានី​ភ្នំពេញ​បាន​និង​កំពុង​ជំរុញ​បង្វឹក​សហគ្រិន​​កម្ពុជា​យ៉ាង​សកម្ម។

លោក អោម សេងបូរ៉ា បាន​​​មាន​ប្រសាសន៍​ថា​ក្លិប​របស់​លោក​បាន​បណ្តុះ​បណ្តាល​ម្ចាស់​សហគ្រាស​ប្រហែល​ ២៤០ រូប​ដោយ​​​​បង្វឹក​ពួកគេ​ពី​​​គម្រោង​​អាជីវកម្ម​ការ​ជ្រើសរើស​សេវាកម្ម ការ​ផលិត និង​ការ​វេចខ្ចប់​របៀប​គ្រប់គ្រង​ចំណូល​ចំណាយ​ជាដើម​។

លោក​​បន្ថែម​ថា៖ «សហគ្រិន​ល្អ​តែង​មើល​​ឃើញ​​បញ្ហា​​ទាំងឡាយ​​ជា​ឱកាស រីឯ​មនុស្ស​​​ធម្មតា​​​មើល​​ឃើញ​​​​បញ្ហា​ជា​ឧបសគ្គ​​។ ឧបសគ្គ​​ក្នុង​វិស័យ​​​ជំនួញ​គឺជា​ល្បែង​​​របស់​អ្នក​ជំនួញ​ក្នុង​​ការ​អភិវឌ្ឍ និង​ការ​រីកចម្រើន​ច្រើន​ផ្នែក​​ហិរញ្ញវត្ថុ​»។

ក្បួន​បង្វឹក​របស់​លោក អោម សេងបូរ៉ា ទៅ​ដល់​​​សមាជិក​ជា​សហគ្រិន​​នោះ​មាន​ចំនួន ១៣ កម្មវិធី​សម្រាប់​​​​ឲ្យ​ពួកគាត់​កសាង​​ខ្លួន​ និង​ស្ថាប័ន​រួម​ទាំង​ប្រព័ន្ធ​គណនេយ្យ​របាយការណ៍​ហិរញ្ញវត្ថុ​ដើម្បី​​យក​ទៅ​អនុវត្ត​កសាង​អាណាចក្រ​អាជីវកម្ម​ឲ្យ​រឹងមាំ។

លោក​ថ្លែង​ថា​ដើម្បី​ជំរុញ​​វិស័យ​សេដ្ឋកិច្ច​ឲ្យ​​ដើរ​​ក្នុង​ល្បឿន​​​​លឿន​​​ទៅ​មុខ​បាន​រាជរដ្ឋាភិបាល​កម្ពុជា​គួរ​ដើរតួ​​ជា​អ្នក​ជំរុញ​​​វិស័យ​ឯកជន​ដោយ​​​​ជួយ​​សម្រួល​​​កិច្ចការ​ចាំបាច់​មួយ​ចំនួន​។ ទី ១. រដ្ឋាភិបាល​​​​ត្រូវ​​លើក​ទឹកចិត្ត​លើ​ការ​បង្កើត​សហគ្រាស​​ខ្នាត​តូច និង​មធ្យម។ ​ទី ២. សម្រួល​ផ្នែក​ច្បាប់​ពន្ធដារ​ប័ណ្ណ​អាជីវកម្ម​​កុំ​ឲ្យ​ស៊ី​ពេល​យូរ​ពេក។ ទី ៣. ​​ការ​បណ្តុះបណ្តាល​ផ្នែក​​សហគ្រិនភាព​គួរ​ត្រូវ​បាន​ជំរុញ​​ឲ្យ​ខ្លាំង​ជាង​បច្ចុប្បន្ន​។ ទី ៤. សម្រួល​ខាង​កម្ចី​ឥណទាន​​​ការ​​ប្រាក់​ទាប​។ ទី ៥. តម្លាភាព និង​ភាព​យុត្តិធម៌​ក្នុង​ការ​ប្រកួត​ប្រជែង និង​​​ទី ៦. ទប់ស្កាត់​កុំ​ឲ្យ​​​មាន​ការ​នាំ​ចូល​ទំនិញ​គេច​ពន្ធ។

លោក អោម សេងបូរ៉ា បាន​ជំរុញ​ឲ្យ​សហគ្រិន​​ខ្មែរ​​​ទាំងអស់​មាន​ភាព​ជឿជាក់​​លើ​​​សមត្ថភាព​ខ្លួន​ក្នុង​ការ​​បង្កើន​ការ​​លូតលាស់​ដោយ​ប្រើ​​សិទ្ធិ​​​ប្រកួត​ប្រជែង​ក្នុង​​ទីលាន​​ជំនួញ​ដោយ​​ត្រូវ​​បង្វឹក​​​​សមត្ថភាព​​របស់​ខ្លួន​​ឲ្យ​ខ្លាំង​។ លោក​បាន​ថ្លែង​ថា៖ «នៅ​​ពេល​​​ដែល​អាជីវកម្ម​​ក្នុង​ស្រុក​ខ្លាំង​បាន​សេដ្ឋកិច្ច​​យើង​​ខ្លាំង​បង្កើន​​ការងារ​ក្នុង​ស្រុក​ទើប​អាច​ទប់ស្កាត់​​ការ​ធ្វើ​​​ចំណាក​ស្រុក និង​ជួយ​បង្កើន​​​ប្រាក់​​​​ចំណេញ​​​​នៅ​ក្នុង​​ស្រុក​ចូល​រដ្ឋ»​។

លោក បូរ៉ា ក៏​បាន​ស្នើ​ដល់​សហគ្រិន​កម្ពុជា​ទាំងអស់​សម្លឹង​រក​ឱកាស​ធ្វើ​អាជីវកម្ម​ឆ្លង​​ប្រទេស​ពិសេស​នៅ​ក្នុង​​តំបន់​អាស៊ាន​។​ ប៉ុន្ដែ​​​តែ​ត្រូវ​មាន​ការ​ខិតខំ​ប្រឹងប្រែង​ជ្រោមជ្រែង​ពី​គ្រប់​អ្នក​ពាក់ព័ន្ធ​ទាំងអស់​ដើម្បី​ពង្រីក​​វិសាលភាព​យ៉ាង​ហោច​​​ណាស់​ក៏​អាច​ធ្វើ​ជា​ដៃគូ​ដ៏ល្អ​​​ជាមួយ​វិនិយោគិន​​ក្នុង​តំបន់​ដែរ។

ដើម្បី​​ដណ្ដើម​ចំណែក​ទីផ្សារ​អាស៊ាន​ក្នុង​បរិបទ​សមាហរណកម្ម​សេដ្ឋកិច្ច​អាស៊ាន (AEC) លោក សេងបូរ៉ា យល់​ថា​ទី ១. ត្រូវ​ពង្រឹង​សមត្ថភាព​ខ្លួន​ឲ្យ​ក្លាយ​ជា​ដៃគូ​មួយ​ដ៏ល្អ​របស់​អន្តរជាតិ។ ទី ២. គិតគូរ​ប្រើប្រាស់​​​​បច្ចេកវិទ្យា​ល្អៗ​ទំនើបៗ​ក្នុង​អាជីវកម្ម។ ទី ៣ .បង្កើន​កេរ្ដិ៍​ឈ្មោះ និង​កម្រិត​ស្តង់ដារ​គុណភាព​ទំនិញ​ និង​សេវា​។

លោក​បាន​បញ្ជាក់​ថា៖ «រឿង​នេះ​យើង​ជជែក​ច្រើន​ណាស់​តាំង​ពី​ដើម​មក​ដល់​ឥឡូវ។ តាមពិត​រឿង​អាស៊ាន​មាន​ទាំង​គុណសម្បត្តិ និង​គុណវិបត្តិ​តែ​យើង​កុំ​គិត​រឿង​គុណវិបត្តិ​ព្រោះ​យើង​នៅ​ក្នុង​ហ្នឹង​ហើយ​យើង​​គួរ​គិត​ថា តើ​យើង​អាច​ធ្វើ​​អ្វី​បាន?»​។

វាគ្មិន​រូប​នេះ​បាន​​ពន្យល់​ថា​ដើម្បី​ក្លាយ​ជា​ដៃគូ​ដ៏ល្អ «យើង​ត្រូវ​កសាង​​សមត្ថភាព​កសាង​ស្ថាប័ន​របស់​យើង​ឲ្យ​ច្បាស់លាស់​។ បើ​គេ​មើល​មក​មិន​ច្បាស់​ធ្វើ​ម៉េច​គេ​ចូល​ជាមួយ​​យើង​បាន។ មួយ​ទៀត​យើង​អាច​ចងក្រង​ជា​សហគមន៍​សហការ​គ្នា ឬ​​ចូល​​ដើម​ទុន​គ្នា​ទៀត​ផង​។ អ៊ីចឹង​​យើង​រៀបចំ​ប្រមូល​កៀរគរ​​គ្នា​ដើម្បី​យើង​អាច​ធ្វើ​របស់​អ្វី​មួយ​ធំដុំ​បាន​ព្រោះ​យើង​​ខ្វះ​ហិរញ្ញវត្ថុ និង​​ខ្វះ​ធនធាន​មនុស្ស»។

ការ​ជំរុញ​វិនិយោគ​ក្នុង​ស្រុក​ និង​ក្រៅ​ស្រុក​ពិតជា​មាន​​​សារៈសំខាន់ និង​ចាំបាច់​​ខ្លាំង​ណាស់​ប៉ុន្ដែ​លោក​បាន​ស្នើ​​ទៅ​រដ្ឋាភិបាល​ថា​រដ្ឋាភិបាល​​​ជួយ​មើល​ស្ថាប័ន​ទាំង​ឡាយ​​ដែល​បាន​ទៅ​​សង្កត់​ក​ពាណិជ្ជករ​។

លោក​ បូរ៉ា បញ្ជាក់​ថា៖ «បើ​យើង​​ចង់​កសាង​សេដ្ឋកិច្ច​​មួយ​ឲ្យ​​រឹងមាំ​លុះត្រា​តែ​កុំ​​ឲ្យ​មាន​​ការ​គាប​សង្កត់​កុំ​ឲ្យ​មាន​​​ស្អី​​ក្រៅ​​ពី (លុយ​​) ​ច្រើន​ពេក​ហើយ​​បើ​មាន​គួរ​ធ្វើការ​ឲ្យ​ច្បាស់​ទៅ»៕

រាយការណ៍​បន្ថែម​​ដោយ តាំង រីនិត្យ/សហការណ៍​ផលិត​ VIDEO ដោយ គាំ ច័ន្ទរស្មី, កែវ រតនា និង​ ជា វណ្ណារ័ត្ន

0

Comments

Please, login or register to post a comment

ព័ត៌មានពាក់ព័ន្ធ