Search form

Login - Register | FOLLOW US ON

Logo of Phnom Penh Post newspaper Phnom Penh Post - តើ​ការ​អនុវត្ត​ច្បាប់​ការងារ​កំពុង​ដំណើរការ​ដូចម្ដេច?

Content image - Phnom Penh Post
លោក ស ម៉ូរ៉ា ប្រធាន​សហជីព​ចំណី​អាហារ​។ រូបថត ហ្វេសប៊ុក

តើ​ការ​អនុវត្ត​ច្បាប់​ការងារ​កំពុង​ដំណើរការ​ដូចម្ដេច?

សហព័ន្ធ​សហជីព​ចំណី​អាហារ​ភេសជ្ជៈ​ និង​សេវាកម្ម​កម្ពុជា​គឺ​ស្ថាប័ន​ធ្វើការ​លើ​កម្មករ​សំណង់​ស្រ្តី​បម្រើ​សេវា​កម្សាន្ត​ និង​ក្រុម​កម្មករ​ដែល​ធ្វើការ​តាម​ក្រុមហ៊ុន​ផលិត​ចំណី​អាហារ​។ ប៉ុន្តែ​ក្រុម​កម្មករ​ទាំង​នេះ​មិន​ត្រូវ​បាន​ថៅកែ​យក​ច្បាប់​ស្តីពី​ការងារ​អនុវត្ត​ទៅ​លើ​ពួកគេ​ឡើយ។

បញ្ហា​នេះ​ត្រូវ​បាន​អ្នក​ជំនាញ​ពន្យល់​ថា​បណ្ដាល​មកពី​អំពើ​ពុករលួយ ​និង​ការ​មិន​យក​ចិត្ត​ទុក​ដាក់​ពី​រដ្ឋាភិបាល​មក​លើ​កម្មករ​ខ្លួនឯង​ជា​ហេតុ​ធ្វើ​ឲ្យ​ថៅកែ ឬ​ម្ចាស់​រោងចក្រ​មិន​គោរព​ច្បាប់​កម្ពុជា ឬ​ធ្វើអ្វី​ស្រេច​តែ​នឹង​ចិត្ត។ ជុំវិញ​បញ្ហា​នេះ​លោក ស ម៉ូរ៉ា ប្រធាន​សហជីព​ចំណី​អាហារ និង​សេវាកម្ម​កម្ពុជា​បាន​សម្ភាស​​ជាមួយ​ភ្នំពេញ​ប៉ុស្តិ៍​​ដែល​​មាន​ខ្លឹមសារ​ដូច​ខាង​ក្រោម​៖​

សហព័ន្ធ​សហជីព​ចំណី​អាហារ​ភេសជ្ជៈ​ និង​សេវាកម្ម​កម្ពុជា​បង្កើត​ឡើង​ដើម្បី​អ្វី​ ?

សហព័ន្ធ​សហជីព​ចំណី​អាហារ​ភេសជ្ជៈ​ និង​សេវាកម្ម​កម្ពុជា​បង្កើត​ឡើង​ជា​ផ្លូវការ​នៅ​ថ្ងៃ​ទី​​ ២ ​ខែ​ធ្នូ​ឆ្នាំ​ ២០០៧​ ហើយ​បំណង​សំខាន់​នោះ​ដោយសារ​យើង​មើល​ឃើញ​ថា​​នៅ​កម្ពុជា​ចលនា​សហជីព​មាន​ច្រើន​​តែ​​​ក្នុង​វិស័យ​កាត់ដេរ​ដែល​​អាច​ការពារ​ផលប្រយោជន៍​តែ​ក្នុង​វិស័យ​កាត់ដេរ​ និង​​ជំរុញ​ឲ្យ​មាន​​ការ​កែប្រែ​នូវ​លក្ខខណ្ឌ​ការងារ​ឲ្យ​​មាន​ការ​គោរព​ច្បាប់​ស្តីពី​ការងារ​ប៉ុណ្ណោះ​។​ ប៉ុន្តែ​ចំពោះ​កម្មករ​និយោជិត​ផ្នែក​ផ្សេងៗ​ទៀត​ពិសេស​បង​ប្អូន​កម្មករ​ផ្នែក​ផ្សព្វផ្សាយ​ស្រាបៀរ​គឺ​ពួកគាត់​ប្រឈម​នឹង​បញ្ហា​ខ្លាំង​​មែនទែន​។​ ​

ក្រៅ​ពី​ប្រឈម​នឹង​បញ្ហា​សង្គម​ដូចជា​ការ​រើសអើង​ ការ​មាក់ងាយ​ផ្សេងៗ លក្ខខណ្ឌ​​ការងារ​របស់​ពួកគាត់​ក៏​មិន​ល្អ​ដែរ​ដោយសារ​និយោជក​មិន​ទទួល​ខុសត្រូវ​។ ​អ៊ីចឹង​ហើយ​យើង​ក៏​មាន​គំនិត​គិត​ថា​ពួកគាត់​ត្រូវ​តែ​មាន​សិទ្ធិ ​និង​ការ​ទទួល​ខុស​ត្រូវ​ពី​សំណាក់​និយោជក​​អំពី​លក្ខខណ្ឌ​​ការងារ​។ ​និយាយ​រួម​យើង​ធ្វើការ​ដើម្បី​​លើក​កម្ពស់​សិទ្ធិ​ និង​ផលប្រយោជន៍​​កម្មករ​ក្នុង​វិស័យ​ស្បៀង​អាហារ​នៃ​សេវាកម្ម​នេះ​។

តើ​ក្នុង​សហព័ន្ធ​សហជីព​ចំណី​អាហារ​ភេសជ្ជៈ​ និង​សេវាកម្ម​កម្ពុជា​​មាន​កម្មករ​ប្រភេទ​ណា​ខ្លះ​?

បច្ចុប្បន្ន​នេះ​សហព័ន្ធ​សហជីព​ចំណី​អាហារ​ភេសជ្ជៈ​​​​ និង​សេវាកម្ម​កម្ពុជា​ផ្តោត​ទៅ​លើ​កម្មករ​និយោជិត​ ៣ ​ក្រុម​ធំៗ​។ ​

ក្រុម​ទី​ ១ ​គឺ​កម្មករ​បម្រើការ​ក្នុង​ក្រុមហ៊ុន​ផលិត​ចំណី​អាហារ​​ក្រុមហ៊ុន​ផលិត​ភេសជ្ជៈ​ស្រាបៀរ​ និង​នៅ​តាម​ភោជនីយដ្ឋាន​ហៅ​ថា​ (​ក្រុម​ស្បៀង​អាហារ​ និង​ភេសជ្ជៈ​)។ ​

ក្រុម​ទី​ ២ ​គឺ​កម្មករ​ធ្វើការ​នៅ​តាម​ក្រុមហ៊ុន​ប្រេង​ឥន្ធនៈ​ តាម​ក្រុមហ៊ុន​ប្រមូល​សំរាម​ហាង​លក់​ទំនិញ​ផ្សេងៗ​ និង​ទី ៣ ​មាន​ក្រុម​សេវាកម្ម​មួយ​ទៀត​ដូចជា​ក្រុម​បម្រើ​សេវា​កម្សាន្ត​ដូចជា​តាម​បៀរហ្គាឌិន​ស្រ្តី​បម្រើ​តាម​ភោជនីយដ្ឋាន​ខារ៉ាអូខេ​ហាង​ម៉ាស្សា​ផ្សេង​ៗ​ទៀត​។​

សរុប​ទាំងអស់​មាន​សមាជិក​ជាង​ ៤ ​ពាន់​នាក់​ដែល​មាន​នៅ​រាជធានី​ភ្នំពេញ​នៅ​ក្រុង​ព្រះសីហនុ​ និង​តាម​បណ្តា​ខេត្ត​ផ្សេងៗ​ទៀត​។

(តទៅ​សប្ដាហ៍​ក្រោយ)

0

Comments

Please, login or register to post a comment