Search form

Login - Register | FOLLOW US ON

Logo of Phnom Penh Post newspaper Phnom Penh Post - តើ​កិច្ចសន្យា​តម្រូវ​ឲ្យ​សរសេរ ​ដោយ​ដៃ​ឬ​យ៉ាង​ណា​?

Content image - Phnom Penh Post
លោក មេធាវី ផូ សុធាផល ពេល​ផ្ដល់​បទសម្ភាស​ជាមួយ​ភ្នំពេញ​ប៉ុស្ដិ៍​កន្លង​មក​។ ផា លីណា

តើ​កិច្ចសន្យា​តម្រូវ​ឲ្យ​សរសេរ ​ដោយ​ដៃ​ឬ​យ៉ាង​ណា​?

នៅ​ក្នុង​ជីវភាព​រស់នៅ​ប្រចាំ​ថ្ងៃ​ ឬ​ធ្វើ​អាជីវកម្ម​អ្វី​មួយ បើ​កាលណា​ភាគី​ពីរ​ ឬ​ច្រើន​បាន​ស្រុះស្រួល​ ឬ​ឯកភាព​លើ​រឿង​អ្វី​មួយ​ដូចជា​ការ​ផ្ទេរ​ទ្រព្យ​រវាង​គ្នា​ និង​គ្នា​ ឬ​បង្កើត​កែប្រែ​ ឬ​រំលត់​កាតព្វកិច្ច​វិញ​។ ​

តើ​ការ​ធ្វើ​កិច្ចសន្យា​នេះ​តាម​ច្បាប់​តម្រូវ​សរសេរ​ដោយ​ដៃ​ ឬ​វាយ​កុំព្យូទ័រ​ដែល​កិច្ចសន្យា​មួយ​ណា​ចាត់​ទុក​ជា​ផ្លូវការ​។

ជុំវិញ​បញ្ហា​នេះ​ភ្នំពេញ​ប៉ុស្តិ៍​បាន​ជួប​សម្ភាស​ជាមួយ​លោក ផូ សុធាផល ជា​មេធាវី និង​ជា​សមាជិក​ក្រុម​ការងារ​ស្រាវជ្រាវ​អប់រំ​ផ្សព្វផ្សាយ​ច្បាប់​នៃ​គណៈមេធាវី​ (​អនុ​ក្រុម​ការងារ​វិស័យ​ពាណិជ្ជកម្ម​) និង​ជា​សារការី​នៃ​មន្ទីរសារការី​នីតិនិរន្តរ៍​​នៃ​ព្រះរាជាណាចក្រ​កម្ពុជា​មាន​ខ្លឹមសារ​ដូច​ខាង​ក្រោម ៖

តើ​អ្វី​ជា​កិច្ចសន្យា​?

កិច្ចសន្យា​គឺជា​កិរិយា​ដែល​បុគ្គល​​ពីរ​នាក់​ ឬ​ច្រើន​នាក់​មាន​ឆន្ទៈ​ត្រូវ​គ្នា​ព្រម​បង្កើត​កែប្រែ​ ឬ​រំលត់​កាតព្វកិច្ច​។ ​ក្នុង​ន័យ​សាមញ្ញ​កិច្ចសន្យា​គឺជា​ការ​ព្រមព្រៀង​គ្នា​ដើម្បី​អនុវត្ត​កិច្ចការ​អ្វី​មួយ​ ឬ​ដោះដូរ​អ្វី​មួយ​ទៅវិញ​ទៅមក​។

ឧទាហរណ៍​កិច្ចសន្យា​ជួល​ផ្ទះ​គឺ​ម្ចាស់​ផ្ទះ​ព្រមព្រៀង​ប្រគល់​ផ្ទះ​របស់​ខ្លួន​ឲ្យ​អ្នក​ជួល​ស្នាក់នៅ​ ឬ​ប្រើប្រាស់​ធ្វើ​អាជីវកម្ម​ហើយ​អ្នក​ជួល​ព្រមព្រៀង​បង់​ប្រាក់​ថ្លៃ​ឈ្នួល​ឲ្យ​ទៅ​ម្ចាស់​ផ្ទះ​។

កិច្ចសន្យា​មាន​អានុភាព​ដោយសារ​សំណើ​ និង​ស្វីការ​ត្រូវ​គ្នា​។ ​ស្វីការ​មាន​ន័យ​ថា​ការ​សម្តែង​ឆន្ទៈ​ដែល​បុគ្គល​ម្នាក់​បាន​បញ្ចេញ​ការ​យល់​ព្រម​របស់​ខ្លួន​ចំពោះ​សំណើ​ដែល​បុគ្គល​ដទៃ​បាន​ស្នើ​មក​ខ្លួន​ដើម្បី​បង្កើត​កិច្ចសន្យា​។

ឧទាហរណ៍​បុគ្គល​ “​ក​” ​ដាក់​លក់​រថយន្ត​មួយ​គ្រឿង​ឲ្យ​បុគ្គល​ “​ខ​” ​ក្នុង​តម្លៃ​​ ១០០ ​លាន​រៀល​ (​នេះ​ជា​សំណើ​) ​ឯ​បុគ្គល​ “​ខ​” ​យល់​ព្រម​ទិញ​រថយន្ត​នេះ​ពី​បុគ្គល​ “​ក​” ​តាម​តម្លៃ​ខាង​លើ​ (​នេះ​​ជា​ស្វីការ​) ​ដូចនេះ​បុគ្គល ​“​ក​” ​និង​បុគ្គល ​“​ខ​” បង្កើត​នូវ​កិច្ចសន្យា​ទិញ​លក់​រថយន្ត​មួយ​គ្រឿង​។

តើ​គេ​ធ្វើ​កិច្ចសន្យា​ដើម្បី​អ្វី​?

កិច្ចសន្យា​ត្រូវ​បាន​បង្កើតឡើង​នៅ​ក្នុង​ជីវភាព​រស់នៅ​ប្រចាំ​ថ្ងៃ​ និង​ក្នុង​កិច្ចការ​ទំនាក់ទំនង​ ឬ​អាជីវកម្ម​នានា​រវាង​បុគ្គល​ពីរ​នាក់​ ឬ​ច្រើន​នាក់​។ ឧទាហរណ៍​ស្ត្រី​មេផ្ទះ​ទៅ​ផ្សារ​ទិញ​ត្រី​មក​ធ្វើ​ម្ហូប​គាត់​បង្កើត​កិច្ចសន្យា​ជាមួយ​អ្នក​លក់​ត្រី​ដោយ​គាត់​ត្រូវ​បង់ប្រាក់​ហើយ​អ្នក​លក់​ត្រូវ​ឲ្យ​ត្រី​នោះ​មក​គាត់​។ ​រោងចក្រ​ជួល​បុគ្គលិក​ឲ្យ​ធ្វើការ​គឺ​រោងចក្រ​នោះ​បង្កើត​កិច្ចសន្យា​ការងារ​ជាមួយ​បុគ្គលិក​។

ក្រុមហ៊ុន​ទិញ​ដី​ពី​បុគ្គល​ម្នាក់​យក​ទៅ​សាងសង់​សណ្ឋាគារ​សម្រាប់​ធ្វើ​អាជីវកម្ម​ទេសចរណ៍​គឺ​ក្រុមហ៊ុន​នោះ​បង្កើត​កិច្ចសន្យា​លក់​ទិញ​ដី​ជាមួយ​បុគ្គល​ជា​ម្ចាស់​ដី​នោះ​។

តើ​កិច្ចសន្យា​អាច​ធ្វើ​ផ្ទាល់មាត់​ ឬ​ជា​លាយលក្ខណ៍​អក្សរ​? ​បើ​ធ្វើ​ជា​លាយលក្ខណ៍​អក្សរ​តើ​ត្រូវ​វាយ​កុំព្យូទ័រ​ ឬ​អាច​សរសេរ​ដោយ​ដៃ​?

កិច្ចសន្យា​អាច​ត្រូវ​បាន​បង្កើតឡើង​ដោយ​ផ្ទាល់​មាត់​ដោយ​ទំនាក់​ទំនង​តាម​ទម្លាប់​របស់​ប្រជាជន​ ឬ​ដោយ​លាយលក្ខណ៍​អក្សរ​។

ជាទូទៅ​កិច្ចសន្យា​នៅ​ក្នុង​ជីវភាព​រស់នៅ​ប្រចាំ​ថ្ងៃ​ពុំ​មាន​ធ្វើ​ជា​លាយលក្ខណ៍​អក្សរ​ទេ​។ ​

ឧទាហរណ៍​យុវជន​ម្នាក់​ទៅ​តូប​លក់​សៀវភៅ​ដើម្បី​ទិញ​សៀវភៅ​ និង​ប៊ិក​យក​ទៅ​ប្រើប្រាស់​ក្នុង​ការ​សិក្សា​គឺ​ម្ចាស់​តូប​​លក់​សៀវភៅ និង​យុវជន​នោះ​មិន​ធ្វើ​កិច្ចសន្យា​លាយលក្ខណ៍​អក្សរ​អ្វី​ទេ​គ្រាន់តែ​ប្រគល់​យក​សម្ភារ​ដែល​ខ្លួន​ទិញ​ហើយ​ប្រគល់​ប្រាក់​តាម​តម្លៃ​ព្រមព្រៀង​គ្នា​ជា​ការ​ស្រេច​។ ​

កិច្ចសន្យា​ការងារ​ជួល​បុគ្គលិក​ឲ្យ​ធ្វើការ​ក្នុង​ថិរវេលា​មិន​កំណត់​ក៏​មិន​ចាំបាច់​ធ្វើ​ឡើង​ជា​លាយលក្ខណ៍​អក្សរ​ដែរ​។

កិច្ចសន្យា​ដែល​មាន​លក្ខណៈ​ផ្លូវការ​ និង​ដែល​គូភាគី​ត្រូវការ​ទុក​ជា​ភ័ស្តុតាង​ច្បាស់លាស់​គឺ​គូភាគី​ធ្វើ​កិច្ចសន្យា​ជា​លាយលក្ខណ៍​អក្សរ​កត់​ត្រា​នូវ​ចំណុច​ និង​លក្ខខណ្ឌ​នៃ​ការ​ព្រមព្រៀង​គ្នា​ដើម្បី​ចៀសវាង​ការ​ជជែក​ ឬ​មិន​ចុះ​សម្រុង​គ្នា​ទៅ​ថ្ងៃ​ក្រោយ​។ ​

កិច្ចសន្យា​ប្រភេទ​ខ្លះ​ច្បាប់​តម្រូវ​ឲ្យ​ត្រូវ​តែ​ធ្វើ​ជា​លាយលក្ខណ៍​អក្សរ​តែ​ម្តង​ហើយ​ប្រភេទ​ខ្លះ​ទៀត​ច្បាប់​តម្រូវ​ឲ្យ​ធ្វើ​ឡើង​ក្នុង​ទម្រង់​ជា​លិខិត​យថាភូត​ថែម​ទៀត​ផង​។

ចំពោះ​កិច្ចសន្យា​ជា​លាយលក្ខណ៍​អក្សរ​ជាទូទៅ​ច្បាប់​មិន​មាន​កំណត់​ថា​ត្រូវ​តែ​វាយ​កុំព្យូទ័រ​ ឬ​វាយ​អង្គុលី​​លេខ​នោះ​ទេ​។ ​គូភាគី​អាច​សរសេរ​ដោយ​ដៃ​បាន​សំខាន់​ឲ្យ​តែ​មាន​ការ​ចុះហត្ថលេខា​ ឬ​ផ្តិត​ស្នាម​មេដៃ​ទុក​ជា​សក្ខីភាព​បញ្ជាក់​អំពី​ការ​ព្រមព្រៀង​របស់​ខ្លួន​សម្រាប់​ប្រើ​ជា​ភ័ស្តុតាង​ទៅ​ថ្ងៃ​ក្រោយ​តាម​ដែល​ចាំបាច់​។

​កិច្ចសន្យា​ ឬ​លិខិត​ផ្លូវ​ច្បាប់​ប្រភេទ​ខ្លះ​ច្បាប់​តម្រូវ​ឲ្យ​សាមី​ខ្លួន​សរសេរ​ដោយ​ផ្ទាល់ដៃ​តែ​ម្តង ៕

0

Comments

Please, login or register to post a comment

ព័ត៌មានពាក់ព័ន្ធ