Search form

Login - Register | FOLLOW US ON

Logo of Phnom Penh Post newspaper Phnom Penh Post - តើ​ដីកា​ដំណោះស្រាយ​ប្រើ​ដើម្បី​ប្រយោជន៍​អ្វី​?

Content image - Phnom Penh Post
លោក មេធាវី យុង ផានិត នៅ​សាលាឧទ្ធរណ៍​នាពេល​កន្លង​មក​។ រូបថត គឹម សារុំ

តើ​ដីកា​ដំណោះស្រាយ​ប្រើ​ដើម្បី​ប្រយោជន៍​អ្វី​?

នៅ​ពេល​ជន​ត្រូវ​ចោទ​ស្ថិត​ក្នុង​ដំណាក់កាល​ដែល​តុលាការ​កំពុង​ស៊ើបអង្កេត​ និង​នៅ​ពេល​ដំណាក់កាល​ចៅក្រម​ស៊ើប​អង្កេត​រឿង​ក្តី​ចប់ ពេល​នោះ​ចៅក្រម​ស៊ើបសួរ​នោះ​នឹង​ចេញ​ដីកា​មួយ​ហៅថា​ដីកា​ដំណោះស្រាយ​។ ​

ដើម្បី​ចង់​ជ្រាប​ថា តើ​ដីកា​ដំណោះស្រាយ​នេះ​ប្រើ​បាន​ជា​ប្រយោជន៍​ដល់​ជន​ត្រូវ​ចោទ​ ឬ​ក៏​តាម​នីតិវិធី​ច្បាប់​យ៉ាង​ម៉េច​នោះ​ភ្នំពេញ​ប៉ុស្តិ៍​បាន​សម្ភាស​ជាមួយ​លោក យុង ផានិត អនុប្រធាន​នាយកដ្ឋាន​ការពារ​ក្តី​ជនក្រីក្រ​នៃ​គណៈមេធាវី​នៃ​ព្រះរាជាណាចក្រ​កម្ពុជា​ដែល​មាន​ខ្លឹមសារ​ដូច​តទៅ ៖

ដូចម្តេច​ដែល​ហៅថា​ដីកា​ដំណោះស្រាយ តើ​ដីកា​នេះ​ប្រើ​នៅ​ដំណាក់​កាលណា​ដែរ​?

ដីកា​ដំណោះស្រាយ​ជា​ដីកា​មួយ​ប្រើ​សម្រាប់​ជន​ត្រូវ​ចោទ​ហើយ​ដីកា​នេះ​ប្រើ​នៅ​ដំណាក់កាល​ចៅក្រម​ស៊ើបសួរ​។

ដីកា​ដំណោះស្រាយ​ជា​ដីកា​បិទ​ការ​ស៊ើបសួរ​របស់​ចៅក្រម​ស៊ើបសួរ​។ ​ការ​ប្រើ​ដីកា​នេះ​ចង់​បញ្ជាក់​ថា តើ​ត្រូវ​ឲ្យ​ជន​នោះ​រួច​ពី​បទ​ចោទ​ ឬ​ត្រូវ​បញ្ជូន​ជន​ត្រូវ​ចោទ​ទៅ​ជំនុំជម្រះ​។

ហេតុអ្វី​បាន​ជា​មាន​ការ​ចេញ​ដីកា​ដំណោះស្រាយ ?

បាន​ជា​មាន​ការ​ចេញ​ដីកា​ដំណោះស្រាយ​គឺជា​ការ​បញ្ចប់​ការ​ស៊ើបសួរ​របស់​ចៅក្រម​ស៊ើបសួរ​ពោល​គឺ​ដំណាក់កាល​នេះ​ចៅក្រម​ស៊ើប​លោក​បាន​ស៊ើប​រឿង​ក្តី​ចប់​សព្វ​គ្រប់​ហើយ​។

តើ​ដីកា​ដំណោះស្រាយ​ប្រើ​បាន​សម្រាប់​បុគ្គល​ណា​ខ្លះ​ ឬ​សម្រាប់​ជន​ត្រូវ​ចោទ​បាន​ដែរ​ទេ​?

ដីកា​ដំណោះស្រាយ​នេះ​គេ​ប្រើ​នៅ​ពេល​ចៅក្រម​បិទ​ការ​ស៊ើបសួរ​ជន​ត្រូវ​ចោទ​។ ​នៅ​ក្នុង​នីតិវិធី​ប្រសិន​បើ​រឿង​នោះ​ជា​រឿង​មជ្ឈិម​តុលាការ​ស៊ើប​បាន​រយៈពេល​តែ​ ៦ ​ខែ​ទេ​ហើយ​ក៏​ចេញ​ដីកា​ដំណោះស្រាយ​បិទ​ការ​ស៊ើបសួរ​។ តែ​បើ​រឿង​ឧក្រិដ្ឋ​វិញ​នីតិវិធី​នៃ​ការ​ឃុំ​ខ្លួន​រយៈពេល​ ៦ ​ខែ​បាន​ ៣ ​ដង ហើយ​​គេ​អាច​ពន្យារពេល​បើក​ការ​ស៊ើបសួរ​រយៈពេល​ ៦ ​ខែ​ដល់​ទៅ​ ៣ ​ដង​។

បន្ទាប់ពី​បិទ​ការ​ស៊ើបសួរ​ហើយ​គឺ​ចៅក្រម​ស៊ើបសួរ​លោក​ជូន​ដំណឹង​ទៅ​ជន​ត្រូវ​ចោទ​ និង​ទៅ​ព្រះរាជអាជ្ញា​។

តើ​ពាក្យ​ថា​ដីកា​ដំណោះស្រាយ​ខុស​គ្នា​នឹង​ដីកា​ឃុំ​ខ្លួន​បែប​ណា​?

ដីកា​ដំណោះស្រាយ​គ្រាន់​តែ​ជា​ដីកា​មួយ​ជូន​ដំណឹង​ទៅ​ជន​​ត្រូវ​ចោទ​អំពី​ការ​បិទ​ការ​ស៊ើបសួរ​ដើម្បី​ប្រាប់​ជន​នោះ​ថា​រឿង​ត្រូវ​ឈប់​ស៊ើបសួរ​ហើយ​ ហើយ​ក៏​ចេញ​ដីកា​ដំណោះស្រាយ​នេះ​ទៅ​។

ការ​ប្រើ​ដីកា​ដំណោះស្រាយ​នេះ​មាន​ប្រយោជន៍​អ្វី​?

ការ​ចេញ​ដីកា​ដំណោះស្រាយ​នេះ​មាន​អត្ថប្រយោជន៍​តាម​ផ្លូវ​ច្បាប់​ក្នុង​ករណី​ជន​ត្រូវ​ចោទ​គាត់​ជាប់ទោស​មជ្ឈិម បើ​ហួស​នីតិវិធី​ឃុំ​ខ្លួន​រយៈពេល​ ៦ ​ខែ​គឺ​ជន​ត្រូវ​ចោទ​គាត់​ស្នើសុំ​នៅ​ក្រៅ​ឃុំ​ដោយ​ខ្លួនឯង​ ឬ​ប្រសិន​បើ​មាន​មេធាវី​គឺ​មេធាវី​គាត់​ស្នើសុំ​អាច​ប្តឹង​សុំ​ឲ្យ​តុលា​ការ​បិទ​ការ​ស៊ើបសួរ​តែ​ម្តង​។

ដីកា​ដំណោះស្រាយ​នេះ​ប្រើ​នៅ​ដំណាក់កាល​ចៅក្រម​ស៊ើបសួរ បើ​គាត់​អង្កេត​ទៅ​ឃើញ​ថា​មាន​ភ័ស្តុតាង​គ្រប់គ្រាន់​ថា​មាន​ពិរុទ្ធភាព​ហើយ​នោះ​ចៅក្រម​ស៊ើបសួរ​គាត់​បញ្ជូន​ទាំង​សំណុំ​រឿង​បញ្ជូន​ទាំង​ជន​ត្រូវ​ចោទ​ទៅ​ជំនុំជម្រះ​។ ​

ដីកា​ដែល​បញ្ជូន​ទៅ​នោះ​គេ​ហៅថា​ដីកា​ដំណោះស្រាយ​ហើយ​ដីកា​មួយ​ទៀត​ក្នុង​អំឡុងពេល​ចៅក្រម​ស៊ើបសួរ​លោក​ស៊ើប​រឿង​នោះ​ទៅ​គ្មាន​ភ័ស្តុតាង​ដែល​ត្រូវ​ចោទ​ប្រកាន់​គឺ​ចៅក្រម​ស៊ើបសួរ​ចេញ​ដីកា​មួយ​ទៀត​ហៅថា​ដីកា​លើក​លែង​ការ​ចោទប្រកាន់​។ ប៉ុន្តែ​ប្រសិន​បើ​ការ​ចេញ​ដីកា​លើក​លែង​ហើយ​បើ​ព្រះរាជអាជ្ញា​យល់​ថា​មិន​សម​ដោះលែង​ទេ គាត់​មាន​សិទ្ធិ​ប្តឹង​ទៅ​សាលាឧទ្ធរណ៍​។ អ៊ីចឹង​ដីកា​នោះ​​ចេញ​ដោយ​ចៅក្រម​ស៊ើបសួរ​។ ​ចៅ​​ក្រម​គាត់​ប្រើ​ឆន្ទានុសិទ្ធិ​របស់​គាត់​។

ជា​គោលការណ៍​បើ​កូនក្តី​មាន​មេធាវី​គាត់​ត្រូវ​តែ​មាន​វត្តមាន​នៅ​ពេល​ចៅក្រម​ស៊ើបសួរ​ដែរ​។ តែ​បើ​រឿង​អនីតិជន​វិញ​ចាំបាច់​ត្រូវ​តែ​មាន​មេធាវី​ជា​ដាច់​ខាត​នៅ​ដំណាក់កាល​ចៅក្រម​ស៊ើបសួរ តែ​កន្លង​មក​ជន​ជាប់ចោទ​ថា​គាត់​អាច​ឆ្លើយ​ការពារ​ខ្លួនឯង​បាន ៕

0

Comments

Please, login or register to post a comment