Search form

Login - Register | FOLLOW US ON

Logo of Phnom Penh Post newspaper Phnom Penh Post - តើ​ពេល​ចាប់​ខ្លួន​ពិត​អស់​សិទ្ធិ​ការពារ​ដែរ​ឬ​ទេ​?

Content image - Phnom Penh Post
លោក​មេធាវី សួន វីរៈបញ្ញា នៃ​ក្រុមហ៊ុន​មេធាវី​ខ្មែរ​អប្សរា​។ សហការី

តើ​ពេល​ចាប់​ខ្លួន​ពិត​អស់​សិទ្ធិ​ការពារ​ដែរ​ឬ​ទេ​?

នៅ​ក្នុង​ប្រព័ន្ធ​ច្បាប់​បើ​កាល​ណា​មាន​ជនណា​ម្នាក់​ត្រូវ​បាន​សមត្ថកិច្ច​ចាប់​ខ្លួន​គឺ​អ្នក​នោះ​មិនមែន​អស់​សិទ្ធិ​ដើម្បី​ការពារ​ខ្លួន​នោះ​ទេ ប៉ុន្តែ​នៅ​មាន​នីតិវិធី​មួយ​ចំនួន​ដែល​នាំ​ទៅ​ដល់​ការ​ស្វែងរក​ការពិត​ទាក់ទង​នឹង​អង្គហេតុ​ដែល​បាន​កើត​ឡើង​។

ជុំវិញ​ករណី​នេះ​ភ្នំពេញ​ប៉ុស្តិ៍​បាន​សម្ភាស​ជាមួយ​លោក មេធាវី សួន វីរៈបញ្ញា ​នៃ​ក្រុមហ៊ុន​មេធាវី​ខ្មែរ​អប្សរា​ដែល​មាន​អាសយដ្ឋាន​ផ្ទះ​លេខ ៥ អា ផ្លូវ​លេខ​២៨៥ សង្កាត់​បឹងកក់ ១ ខណ្ឌ​ទួលគោក​ដែល​មាន​ខ្លឹមសារ​ដូច​ខាង​ក្រោម ៖

១- នៅ​ពេល​ជន​ណា​ម្នាក់​បាន​ប្រព្រឹត្ត​បទល្មើស​ហើយ​ត្រូវ​នគរបាល​ចាប់​ខ្លួន តើ​គាត់​មាន​សិទ្ធិ​ការពារ​ខ្លួន​ឬ​ទេ​នៅ​ពេល​នោះ​? តើ​សិទ្ធិ​ការពារ​ខ្លួន​នេះ​តម្រូវ​ឲ្យ​មាន​មេធាវី​ឬ​ខ្លួន​គាត់​?

ជាទូទៅ​ជន​ណា​ក៏ដោយ​នៅពេល​ដែល​គាត់​បាន​ប្រព្រឹត្ត​បទល្មើស ហើយ​ត្រូវ​បាន​នគរបាល​ចាប់​ខ្លួន​គឺ​ច្បាប់​បាន​ធានា​នូវ​សិទ្ធិ​មួយ​ចំនួន​ក្នុង​ការ​ការពារ​ខ្លួន​របស់​គាត់​ក្នុង​នោះ​រួម​មាន​៖

សិទ្ធិ​ទទួល​បាន​ព័ត៌មាន​អំពី​មូលហេតុ​នៃ​ការ​ចាប់​ខ្លួន​៖ ក្នុង​ករណី​ដែល​មាន​ការ​ចាប់​ឃាត់​ខ្លួន​មន្ត្រី​នគរបាល​យុត្តិធម៌​ត្រូវ​ប្រាប់​ជា​បឋម​អំពី​បទល្មើស​ និង​​អំពើ​ល្មើស​ដែល​ជនសង្ស័យ​នោះ​​បាន​ប្រព្រឹត្ត​ដែល​នាំ​ឲ្យ​មាន​ការ​ចាប់​ខ្លួន​។

សិទ្ធិ​ក្នុង​ការ​មាន​ជំនួយ​ពី​មេធាវី​៖ ​បន្ទាប់ពី​គាត់​ត្រូវ​បាន​ចាប់​ខ្លួន​ដោយ​មន្ត្រី​នគរបាល​យុត្តិធម៌​នោះ​គឺ​ក្នុង​រយៈពេល​ ២៤ ​ម៉ោង​គិត​ពី​ពេល​ត្រូវ​បាន​ចាប់​ខ្លួន​គឺ​គាត់​មាន​សិទ្ធិ​ក្នុង​ការ​ជួប​សន្ទនា​ជាមួយ​មេធាវី​ ឬ​ជាមួយ​ជន​ណា​ម្នាក់​ដែល​ខ្លួន​ជ្រើសរើស កុំ​ឲ្យ​តែ​ជន​នោះ​មាន​ការ​ទាក់ទិន​នៅ​ក្នុង​រឿង​ជាមួយ​គ្នា​។ ​ការ​ជួប​សន្ទនា​នេះ​គឺ​ស្ថិត​ក្នុង​លក្ខខណ្ឌ​នៃ​ការ​ធានា​នូវ​ការ​សម្ងាត់​មាន​ន័យ​ថា​គ្មាន​ជន​ណា​អាច​ស្តាប់​ការ​សន្ទនា​រវាង​គាត់ និង​មេធាវី​គាត់​បាន​ទេ ទោះ​ជា​មន្ត្រី​នគរបាល​​នៅ​ទី​នោះ​ក៏ដោយ​។ ​(​មាត្រា​ ៩៨ ​នៃ​ក្រមនីតិវិធី​ព្រហ្មទណ្ឌ​)

សិទ្ធិ​ក្នុង​ការ​ទទួល​បាន​ជំនួយ​អំពី​គ្រូពេទ្យ​៖ ក្នុង​អំឡុង​ពេល​នៃ​ការ​ឃាត់​ខ្លួន ប្រសិន​បើ​គាត់​មាន​បញ្ហា​សុខភាព របួស​ ឬ​​បញ្ហា​ណា​មួយ​ដែល​ត្រូវការ​ការ​មើល​ថែទាំ​ពី​គ្រូពេទ្យ​នោះ ព្រះរាជអាជ្ញា​ ឬ​មន្ត្រី​នគរបាល​យុត្តិធម៌​​មាន​សិទ្ធិ​សុំ​ឲ្យ​គ្រូពេទ្យ​មក​ពិនិត្យ​​បុគ្គល​ដែល​ត្រូវ​បាន​ឃាត់​ខ្លួន​​បាន​គ្រប់​ពេលវេលា​។ (​មាត្រា​ ៩៩ ​នៃ​ក្រម​នីតិវិធី​ព្រហ្មទណ្ឌ​) ​សិទ្ធិ​សំខាន់ៗ​មួយ​ចំនួន​ទៀត​គឺ​ខ្ញុំ​បាទ​នឹង​លើក​ឡើង​ក្នុង​សំណួរ​បន្ត​ទៀត​ទាក់ទង​នឹង​សិទ្ធិ​របស់​ជន​ជាប់ចោទ​ក្នុង​សវនាការ​។

អ្វី​ដែល​សំខាន់​មួយ​ទៀត​នោះ​គឺ​គោលការណ៍​សន្មត​ថា​គ្មាន​ទោស គោលការណ៍​នេះ​គឺ​ធានា​ឲ្យ​ជន​គ្រប់​រូប​ទោះ​ក្នុង​ឋានៈ​ជា​ជនសង្ស័យ ជន​ត្រូវ​ចោទ ឬ​ជន​ជាប់ចោទ​ក៏​ដោយ​ប្រសិន​បើ​មិន​ទាន់​មាន​សាលក្រម សាលដីកា​​ដែល​ចូល​ជា​ស្ថាពរ​ថា​គាត់​មាន​ពិរុទ្ធភាព​ទេ​នោះ​គឺ​ជន​នោះ​នៅ​តែ​ត្រូវ​បាន​គេ​សន្មត​ថា​គាត់​ពុំ​ទាន់​បាន​ប្រព្រឹត្ត​អ្វី​ខុស​ដដែល​។

ឧទាហរណ៍​ថា​នៅ​ពេល​ចាប់​បាន​ជន​ម្នាក់​លួច​គាស់​ផ្ទះ​ដូច​នេះ​ពេល​ចាប់​បាន​នោះ​គឺ​គាត់​មាន​ឋានៈ​ត្រឹម​តែ​ជា​ជនសង្ស័យ​នៅ​ឡើយ​ទេ​គឺ​គាត់​ពុំ​ទាន់​មាន​​ទោស​នៅ​ឡើយ​ទេ លុះ​ណា​តែ​មាន​សាលក្រម​ពី​តុលាការ​ថា​គាត់​​មាន​ទោស​ទើប​គាត់​មាន​ទោស បើ​កាល​ណា​មិន​ទាន់​មាន​សាលក្រម​ស្ថាពរ​ពី​តុលាការ​ថា​គាត់​មាន​ទោស​អំពី​អំពើ​របស់​គាត់​ទេ​នោះ​គឺ​គាត់​នៅ​តែ​ត្រូវ​បាន​គេ​សន្មត​ថា​ពុំ​ទាន់​មាន​ទោស​ដដែល​។

ហេតុ​​នេះ​ហើយ​ទើប​គេ​មិន​ឲ្យ​មាន​ការ​វាយដំ ធ្វើ​ទារុណកម្ម​ធ្ងន់ធ្ងរ​លើ​ជន​សង្ស័យ​នោះ​។ ខ្ញុំ​ឃើញ​ថា​នៅ​ក្នុង​សង្គម​ខ្មែរ​សព្វ​ថ្ងៃ​នេះ​មាន​ការ​វាយដំ​ធ្វើ​ទារុណកម្ម​យ៉ាង​​សាហាវ​ណាស់​លើ​ជនសង្ស័យ​​ដែល​ចាប់​ខ្លួន​បាន​មាន​ករណី​ខ្លះ​​រហូត​ដល់​បាត់បង់​ជីវិត​ទៀត​។

(​សូម​រង់ចាំ​អាន​បន្ត​នៅ​ថ្ងៃ​អង្គារ​សប្ដាហ៍​ក្រោយ​)

0

Comments

Please, login or register to post a comment