Search form

Login - Register | FOLLOW US ON

Logo of Phnom Penh Post newspaper Phnom Penh Post - តើ​អ្វី​ជា ​ដីកា​ដំណោះស្រាយ ​ហើយ​ត្រូវ​ប្រើ​ពេល​ណា?

Content image - Phnom Penh Post
លោក​មេធាវី ឡោ គីមហ្គេច នៃ​ក្រុម​មេធាវី​អាស៊ាន។ រូបថត សហការី

តើ​អ្វី​ជា ​ដីកា​ដំណោះស្រាយ ​ហើយ​ត្រូវ​ប្រើ​ពេល​ណា?

នៅក្នុង​ប្រព័ន្ធ​តុលាការ​មាន​ពាក្យ​ថា​ដីកា​មាន​ការ​ហៅ​ឈ្មោះ​ផ្សេងៗ​គ្នា​ជាច្រើន​ដែល​ក្នុង​នោះ​ក៏​មាន​ប្រើ​ពាក្យ​មួយ​ហៅ​ថា «ដីកា​ដំណោះស្រាយ» ផង​ដែរ។ តើ​ពាក្យ​ថា​ដីកា​ដំណោះ​ស្រាយ​នេះ​គេ​ប្រើ​បាន​នៅ​ពេល​ណា​ក្នុង​ប្រព័ន្ធ​តុលាការ​ហើយ​ប្រើ​បាន​សម្រាប់​ជន​ណា​ខ្លះ?

ដើម្បី​បាន​ជ្រាប​ពី​បញ្ហា​នេះ​ ភ្នំពេញ​ ប៉ុស្តិ៍​ បាន​សម្ភាស​ជាមួយ​លោក​មេធាវី ឡោ គីមហ្គេច នៃ​ក្រុម​មេធាវី​អាស៊ាន​អន្តរជាតិ​ ដែល​មាន​អាសយដ្ឋាន​ផ្ទះ​លេខ ១៦R ផ្លូវ ២៥២ សង្កាត់​ចតុមុខ ខណ្ឌ​ដូនពេញ រាជធានី​ភ្នំពេញ​ដែល​មាន​ខ្លឹមសារ​ដូច​ខាងក្រោម ៖

ដូចម្តេច​ហៅ​ថា​ដីកា​ដំណោះស្រាយ​ហើយ​ដីកា​នេះ​ប្រើ​បាន​នៅ​ពេល​ណា?

«ដីកា​ដំណោះស្រាយ» គឺជា​ដីកា​មួយ​ដែល​ប្រើ​នៅ​ពេល​មាន​ការ​បញ្ចប់ ឬ​បិទ​ការ​ស៊ើបសួរ​ហើយ​ចៅក្រម​ស៊ើបសួរ​ជា​អ្នក​ចេញ​ដីកា​ដំណោះស្រាយ​នេះ​ទៅ​ឲ្យ​ព្រះរាជអាជ្ញា។

មាន​ន័យ​ថា​នៅ​សាលា​ដំបូង​នៅ​ពេល​បិទ​ការ​ស៊ើបសួរ​រឿង​ក្តី​ណា​មួយ​គេ​ត្រូវ​ជូន​ដំណឹង​ដោយ​ចេញ​ដីកា​ដំណោះស្រាយ​ទៅ​អយ្យការ​ថា​តើ​ត្រូវ​ឲ្យ​ជន​នោះ​រួច​ផុត​ពី​បទ​ចោទ​ឬ​មួយ​យ៉ាង​ណា?

តើ​ហេតុអ្វី​បាន​ជា​តុលាការ​ចេញ​ដីកា​ដំណោះស្រាយ ?

ហេតុ​ដែល​ចៅក្រម​ស៊ើបសួរ​ចេញ​ដីកា​ដំណោះស្រាយ​នេះ​មូលហេតុ​ដោយសារ​ការ​ស៊ើប​អង្កេត​សំណុំ​រឿង​ណា​មួយ​នោះ​ចប់​សព្វ​គ្រប់​អស់​ហើយ។

តើ​ដីកា​ដំណោះស្រាយ​នេះ​ប្រើ​បាន​សម្រាប់​បុគ្គល​ណា​ខ្លះ​ឬ​សម្រាប់​ជន​ត្រូវ​ចោទ​បាន​ទេ?

នៅ​ពេល​បិទ​ការ​ស៊ើបសួរ​ក្នុង​រឿង​ក្តី​ណា​មួយ​តុលាការ​ត្រូវ​ចេញ «ដីកា​ដំណោះស្រាយ» នេះ​ដើម្បី​ជូន​ដំណឹង​ទៅ​ជន​ជាប់ចោទ​ដើម្បី​ឲ្យ​ជន​នោះ​បាន​ដឹង​ថា​រឿង​របស់​គាត់​ត្រូវ​បាន​បិទ​ការ​ស៊ើបសួរ​រួច​ហើយ។ នៅ​ក្នុង​នីតិវិធី ប្រសិន​បើ​រឿង​មជ្ឈិម​គឺ​តុលាការ​ស៊ើប​បាន​រយៈពេល​តែ ៦​ ខែ​ទេ អ៊ីចឹង​ត្រូវ​ចេញ «ដីកា​ដំណោះស្រាយ» បិទ​ការ​ស៊ើបសួរ។ តែ​បើ​រឿង​ឧក្រិដ្ឋ​វិញ​នីតិវិធី​មាន​រយៈពេល ៦ ខែ ៣ ដង​ពោល​គឺ​គេ​អាច​ពន្យារពេល​ដើម្បី​បើក​ការ​ស៊ើបសួរ​បាន។

អ៊ីចឹង «ដីកា​ដំណោះស្រាយ» នេះ​គឺវា​មាន​ន័យ​ថា គេ​ស៊ើប​មិន​ឲ្យ​ហួស​រយៈពេល ៦ ខែ​នោះ​ទេ។

តើ​ពាក្យ​ថា​ដីកា​ដំណោះ​ស្រាយ​មាន​លក្ខណៈ​ខុស​គ្នា​នឹង​ដីកា​ឃុំ​ខ្លួន​ឬ​ដីកា​ផ្សេង​ទៀត​បែប​ណា?

«ដីកា​ដំណោះស្រាយ» ជា​ដីកា​ជូន​ដំណឹង​អំពី​ការ​បិទ​ការ​ស៊ើបសួរ​រឿង​ក្តី​ណា​មួយ ក៏​ប៉ុន្តែ​សម្រាប់​ដីកា​ឃុំ​ខ្លួន​វិញ​គឺ​តុលាការ​ចេញ​ឲ្យ​ឃុំ​ខ្លួន​ជនសង្ស័យ​តែ​ម្តង។

ការ​ចេញ​ដីកា​ដំណោះស្រាយ​នេះ​មាន​អត្ថប្រយោជន៍​អ្វី?

ការ​ចេញ​ដីកា​ដំណោះស្រាយ​នេះ​គឺ​មាន​អត្ថប្រយោជន៍​ទៅ​តាម​ផ្លូវ​ច្បាប់​ក្នុង​ករណី​ជន​ត្រូវ​ចោទ​គាត់​ជាប់​ទោស​មជ្ឈិម ហើយ​បើ​ការ​ឃុំ​ខ្លួន​គាត់​ហួស​នីតិវិធី​គឺ​គាត់​អាច​សុំ​នៅ​ក្រៅ​ឃុំ​ដោយ​ខ្លួនឯង ឬ​ឲ្យ​មេធាវី​ស្នើ​សុំ​ឲ្យ៕

0

Comments

Please, login or register to post a comment