Search form

Login - Register | FOLLOW US ON

Logo of Phnom Penh Post newspaper Phnom Penh Post - តើ​អ្វី​ទៅ​ជា​ទោស​ព្រហ្មទណ្ឌ​?

Content image - Phnom Penh Post
លោក មេធាវី យុង ផានិត​។ រូបថត សហការី

តើ​អ្វី​ទៅ​ជា​ទោស​ព្រហ្មទណ្ឌ​?

ទោសព្រហ្មទណ្ឌ​គឺជា​ការ​កំណត់​ក្នុង​ប្រព័ន្ធ​តុលាការ​ដែល​សំដៅ​លើ​ការ​ប្រព្រឹត្ត​បទល្មើស​ធ្ងន់ធ្ងរ​ណា​មួយ​។ ដូច្នេះ​ចង់​ដឹង​ថា​ទោស​ព្រហ្មទណ្ឌ​ជា​អ្វី និង​មាន​ខ្លឹមសារ​យ៉ាង​ណា​នោះ ភ្នំពេញ ប៉ុស្តិ៍​បាន​សម្ភាស​លោក​មេធាវី យុង ផានិត ប្រធាន​នាយកដ្ឋាន​ការពារ​ក្តី​ជន​ក្រីក្រ​នៃ​គណៈមេធាវី​នៃ​ព្រះរាជាណាចក្រ កម្ពុជា​ដែល​មាន​ខ្លឹមសារ​ដូច​ខាង​ក្រោម​៖

អ្វី​ទៅ​ហៅ​ថា​បទល្មើស​ព្រហ្មទណ្ឌ​?

បទល្មើស​ព្រហ្មទណ្ឌ​គឺជា​អំពើ​ទាំង​ឡាយ​ណា​ដែល​ប្រព្រឹត្ដ​ដោយ​ចេតនា ឬ​អចេតនា​ដោយ​ផ្ទាល់​ ឬ​ដោយ​ប្រយោល​ក្ដី​ដែល​អំពើ​ទាំង​នោះ​បណ្ដាល​ឲ្យ​ប៉ះពាល់​សណ្ដាប់​ធ្នាប់​របៀប​រៀបរយ​សាធារណៈ​ ឬ​សន្ដិសុខ​សង្គម​ហើយ​ដែល​ត្រូវ​បាន​កំណត់​ទុក​ជា​មុន​នៅ​ក្នុង​ច្បាប់ ព្រហ្មទណ្ឌ ។ បទល្មើស​ព្រហ្មទណ្ឌ​ភាគច្រើន​កើត​ឡើង​ដោយ​អំពើ​ហិង្សា​ធ្វើ​ឲ្យ​ប៉ះពាល់​ដល់​ផ្លូវ​កាយ ផ្លូវ​ចិត្ដ និង​កិត្ដិយស​របស់​ជនរងគ្រោះ​។

តើ​ទោស​ព្រហ្មទណ្ឌ​មាន​ចែក​ជា​ប៉ុន្មាន​ប្រភេទ​?

ទោស​ព្រហ្មទណ្ឌ​ត្រូវ​បាន​បែងចែក​ជា​ ២ ​ប្រភេទ​ហៅ​ថា​មូលទោស និង​ទោស​ពិន័យ​ជា​ប្រាក់​។ ​ចំពោះ​ពាក្យ​ថា​មូលទោស​គឺជា​ទោស​ចម្បង​ដែល​ត្រូវ​តែ​ដាក់​ពន្ធនាគារ និង​ពិន័យ​ជា​ប្រាក់​ហើយ​ក៏​មាន​ទោស​បន្ទាប់​ដែរ​ដែល​គេ​ហៅ​ថា អនុទោស​។ ​អនុទោស​នេះ​ប្រើ​សម្រាប់​ជា​ការ​ពិន័យ​ទៅ​លើ​បុគ្គល​ណា​ម្នាក់​។

ឧទាហរណ៍​ថា​អ្នក​បើកបរ​រថយន្ត​នៅ​ពេល​ដែល​បុគ្គល​នោះ​បើកបរ​ហើយ​បុក​មនុស្ស​បណ្តាល​ឲ្យ​ស្លាប់​។ ក្នុង​ករណី​នេះ​អនុទោស​ត្រូវ​បាន​អនុវត្ត​ទៅ​លើ​បុគ្គល​នោះ​ដោយ​តុលាការ​ដក​សិទ្ធិ​គាត់​មិន​ឲ្យ​បើកបរ​រយៈពេល​ ៥ ​ឆ្នាំ​។

បើ​សិន​ជា​ប្រធាន​ក្រុមហ៊ុន​ណា​មួយ​ហើយ​គាត់​មាន​ទោស​ទាក់ទិន​នឹង​មុខរបរ​របស់​ខ្លួន​គឺ​ត្រូវ​ដក​សិទ្ធិ​ក្នុង​ការ​ធ្វើ​អាជីវកម្ម​ក្នុង​រយៈពេល​យ៉ាង​យូរ​ ៥ ​ឆ្នាំ ឬ​ដក​សិទ្ធិ​គាត់​មិន​ឲ្យ​ចូលរួម​បោះឆ្នោត​រយៈពេល​ ៥ ​ឆ្នាំ​។ ពោល​អនុទោស​គឺជា​ទោស​បន្ទាប់បន្សំ ឯ​មូលទោស​គឺជា​ទោស​ដើម​ ឬ​ទោស​ចម្បង​។ មាន​ន័យ​ថា​ទោស​បទឧក្រិដ្ឋ បទមជ្ឈិម​ ឬ​បទ​លហុ​អី​ក៏​ដោយ​ដាច់​ខាត​ត្រូវ​តែ​មាន​មូលទោស​។

មូលទោស​ គឺជា​ទោស​ដើម​ដែល​ត្រូវ​តែ​ផ្ដន្ទាទោស​សិន​មិន​អាច​ផ្តន្ទាទោស​អនុទោស​ដោយ​គ្មាន​មូលទោស​បាន​ទេ​។

អនុទោស​ គឺជា​ទោស​បន្ទាប់បន្សំ​ដែល​ចៅក្រម​ដាក់​ទោស​សំដៅ​លើ​ការ​ដក​សិទ្ធិ​បុគ្គល​។ បើ​អត់​មាន​មូលទោស​យើង​មិន​អាច​មាន​អនុទោស​បាន​ទេ ប៉ុន្តែ​មិន​អាច​មាន​អនុទោស​ដោយ​ឥត​មាន​មូលទោស​បាន​ទេ​។

ជា​គោលការណ៍​បទឧក្រិដ្ឋ​តែងតែ​មាន​អនុទោស​ ប៉ុន្តែ​អនុទោស​នេះ​អត់​មាន​ច្បាប់​ចែង​ទេ​វា​អាស្រ័យ​លើ​ចៅក្រម​បើ​គាត់​យល់​ឃើញ​ថា​ត្រូវ​តែ​ផ្តន្ទាទោស​អនុទោស​មួយ​ទៀត​ដើម្បី​ឲ្យ​បុគ្គល​នោះ​រាង​ចាល​ឈប់​ប្រព្រឹត្ត​ដែល​ភាគច្រើន​សំដៅ​លើ​មុខរបរ​អាជីព​។

តើ​ទោស​ពិន័យ​ជា​ប្រាក់​ និង​ទោស​សំណង​ជំងឺ​ចិត្ត​ខុស​គ្នា​បែប​ណា​?

ទោស​ពិន័យ​ជា​ប្រាក់​គឺជា​ការ​ដាក់​ទណ្ឌកម្ម​របស់​តុលាការ​ដែល​ប្រាក់​ពិន័យ​នោះ​ដាក់​ចូល​ជា​ថវិការដ្ឋ​។ ចំណែក​ប្រាក់​សំណង​ជំងឺ​ចិត្ត​ ឬ​សំណង​ការ​ខូចខាត​គឺ​សម្រាប់​សង​ការ​ខូចខាត​ ឬ​ជំងឺ​ចិត្ត​ដល់​ជនរងគ្រោះ​ ឬ​សង​ទៅ​ដើម​បណ្តឹង​រដ្ឋប្បវេណី​៕

0

Comments

Please, login or register to post a comment