Search form

Login - Register | FOLLOW US ON

Logo of Phnom Penh Post newspaper Phnom Penh Post - បណ្តឹង​ទាស់​ចំពោះ​សាលក្រម​កំបាំង​មុខ

លោកមេធាវី សេង សឹង្ហហេង ក្នុង​ពេល​ការពារ​ក្តី​កន្លង​មក​។
លោកមេធាវី សេង សឹង្ហហេង ក្នុង​ពេល​ការពារ​ក្តី​កន្លង​មក​។ រូបថត សហការី

បណ្តឹង​ទាស់​ចំពោះ​សាលក្រម​កំបាំង​មុខ

លោក​មេធាវី សេង សឹង្ហហេង គឺជា​សមាជិក​គណៈ​មេធាវី​នៃ​ព្រះរាជាណាចក្រ​កម្ពុជា​បច្ចុប្បន្ន​លោក គឺជា​មេធាវី​បម្រើការ​នៅ​ក្រុម​មេធាវី​យុត្តិធម៌​អន្តរជាតិ (International Justice law Firm) ( IJL)។ លោក​មេធាវី​បាន​ផ្តល់​កិច្ចសម្ភាសន៍​ជាមួយ​កាសែត​ភ្នំពេញ ប៉ុស្តិ៍ ទាក់ទង​នឹង​បណ្តឹង​ទាស់​ចំពោះ​សាលក្រម​កំបាំង​មុខ​ដែល​មាន​ខ្លឹមសារ​ដូច​ខាង​ក្រម​នេះ៖

យោង​តាម​នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​ដើម្បី​ប្តឹងទាស់​នឹង​សាលក្រម​កំបាំង​មុខ​របស់​តុលាការ​តើ​គេ​ត្រូវ​ធ្វើ​ដូចម្តេច​ដែរ?

ចំពោះ​សាលក្រម​កំបាំងមុខ​នេះ​គេ​អាច​ប្តឹង​តាម​វិធី ២ យ៉ាង​គឺ ទី ១-ប្តឹង​ឧទ្ធរណ៍ និង ទី ២-ប្តឹង​ទាស់។ ប្តឹង​ទាស់​នេះ​គឺ​មាន​ន័យ​ថា​តាម​នីតិវិធី​ប្តឹង​ទាស់​នោះ​នៅពេល​ដែល​តុលាការ​ថ្នាក់​ក្រុង ឬ ខេត្ត​មួយ​ណា ឬ ចៅក្រម​មួយ​ណា​ដែល​បាន​ប្រកាស​សាលក្រម​កំបាំង​មុខ​ហើយ​នោះ​ពិរុទ្ធជន​អាច​ធ្វើ​បណ្តឹង​ទាស់​នឹង​សាល​ក្រម​កំបាំងមុខ​នោះ​បាន និង​ស្នើសុំ​ឲ្យ​តុលាការ ឬ ចៅក្រម​នោះ​ធ្វើការ​កាត់ក្តី​លើ​សំណុំ​រឿង​របស់​គាត់​ឡើង​វិញ​ដោយសារ​តែ​គាត់​អវត្តមាន​នៅពេល​ជំនុំ​ជម្រះ និង​នៅពេល​សាកសួរ​ដេញដោល។ នេះ​គឺជា​នីតិវិធី​ប្តឹង​ទាស់។ ចំណែកឯ​ការ​ប្តឹង​ឧទ្ធរណ៍​នោះ​គឺ​ពិរុទ្ធជន​មិន​ចាំបាច់​ប្តឹង​ទាស់​ក៏​បាន​ដែរ​គឺ​គាត់​អាច​ប្តឹង​ឧទ្ធរណ៍​ប្រឆាំង​នឹង​សាលក្រម​​កំបាំង​មុខ​នោះ​ទៅកាន់​សាលាឧទ្ធរណ៍​តែ​ម្តង ឬ​ទៅ​តុលាការ​ថ្នាក់​លើ​ផ្សេង​ទៀត​ដើម្បី​សុំ​ឲ្យ​ធ្វើការ​សើរើ ឬ​ជំនុំជម្រះ​រឿង​ក្តី​របស់​គាត់​ឡើង​វិញ។ ដូច្នេះ​ជន​ជាប់​ចោទ​គឺ​មាន​សិទ្ធិ ២ ហ្នឹង​គាត់​អាច​​ប្រើ​សិទ្ធិ​មួយ​ណា​ក៏​បាន​ដែរ​។ តែ​បើ​គាត់​មិន​ទាន់​ត្រូវ​បាន​ចាប់​ខ្លួន​បាន​នោះ​ទេ​គឺ​គាត់​អាច​ប្តឹង​ទៅ​ឧទ្ធរណ៍​បាន។

តើ​ថិរវេលា​នៃ​ការ​ធ្វើ​បណ្តឹង​ទាស់​ចំពោះ​សាលក្រម​កំបាំង​មុខ​នោះ​មាន​រយៈពេល​​​ប៉ុន្មាន​ថ្ងៃ​ ឬ​ខែ​ដែរ? និង​ត្រូវ​ធ្វើ​នៅ​ពេល​ណា​ដែរ?

ថិរពេល​វេលា​នៃ​ការ​ប្តឹង​ទាស់​នោះ​គឺ​មាន​រយៈពេល​មួយ​ខែ​ក្រោយពី​ការ​បង្ហាញ​ខ្លួន ឬ​បន្ទាប់ពី​គាត់​បាន​ទទួល​ដំណឹង និង​បាន​ផ្តិត​មេដៃ ឬ​នៅពេល​ដែល​គាត់​ត្រូវ​បាន​ចាប់​ខ្លួន (តាម​​អំណាច​សាលក្រម​កំបាំង​មុខ) ហើយ​គាត់​បាន​ផ្តិត​មេដៃ​ប្តឹង​ទាស់​ក្នុង​រយៈពេល​មួយ​ខែ​។

យោងតាម​មាត្រា ៣៦៥ នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​បាន​ចែង​ថា​ពិរុទ្ធជន​អាច​ធ្វើ​​បណ្តឹង​ទាស់​នឹង​សាលក្រម​កំបាំងមុខ​ខ្លួន​បាន។

មាត្រា ៣៦៦ (ទម្រង់ និង​ភាព​ដែល​អាច​ទទួល​បាន​នៃ​បណ្តឹង​ទាស់​) បណ្តឹង​ទាស់​ត្រូវ​ធ្វើ​ដោយ​ពាក្យ​ប្តឹង​ជា​លាយ​លក្ខណ៍​អក្សរ​នៅ​ការិយាល័យ​ក្រឡា​បញ្ជី​នៃ​តុលាការ​ដែល​បាន​ប្រកាស​សាលក្រម។ នៅ​ចំពោះ​មុខ​ព្រះរាជអាជ្ញា​អង្គភាព​នគរបាល ឬ​កងរាជ​អាវុធហត្ថ ឬ​នៅ​ចំពោះ​មុខ​ប្រធាន​ពន្ធនាគារ​ ឬ​មណ្ឌល​ឃុំ​ខ្លួន។

ពិរុទ្ធជន​អាច​ត្រូវ​បាន​តំណាង​ដោយ​មេធាវី។ មេធាវី​ត្រូវ​តែ​មាន​លិខិត​អនុញ្ញាត​ឲ្យ​ធ្វើ​បណ្តឹង​ទាស់។ ប៉ុន្តែ​ពិរុទ្ធជន​ជា​​អនីតិជន​អាច​ត្រូវ​តំណាង​ដោយ​ឪពុក ម្តាយ ឬ អ្នក​អាណាព្យាបាល​។ ក្នុង​ករណី​នេះ​អ្នក​តំណាង​មិន​ចាំបាច់​មាន​លិខិត​ប្រគល់​សិទ្ធិ​នោះ​ទេ។ កាលណា​បាន​ទទួល​ពាក្យ​បណ្តឹង​ទាស់​ព្រះរាជអាជ្ញា អង្គភាព​នគរបាល និង​កងរាជ​អាវុធហត្ថ ព្រម​ទាំង​ប្រធាន​ពន្ធនាគារ ឬ មណ្ឌល​ឃុំ​ខ្លួន​បញ្ជូន​បណ្តឹង​ទាស់​នោះ​ភ្លាម​ទៅ​ក្រឡា​បញ្ជី​នៃ​តុលាការ​ដែល​បាន​ប្រកាស​សាលក្រម។ កាលណា​អ្នក​ប្តឹង​ទាស់​មិន​ចេះ​ចុះ​ហត្ថលេខា​ទេ​អ្នក​ប្តឹង​ទាស់​នេះ​ត្រូវ​ផ្តិត​ម្រាមដៃ។

មាត្រា ៣៦៧ (បណ្តឹង​ទាស់) ក្រឡា​បញ្ជី​នៃ​តុលាការ​កាន់​បញ្ជី​បណ្តឹង​ទាស់។

គូ​ភាគី និង​មេធាវី​អាច​​ពិនិត្យ​មើល​បញ្ជី​នោះ​បាន​​ដោយ​សេរី។ មាត្រា ៣៦៨ ​(រយៈពេល​សម្រាប់​ធ្វើ​បណ្តឹង​ទាស់) បណ្តឹង​ទាស់​ត្រូវតែ​ធ្វើ​នៅក្នុង​រយៈពេល ១៥ ថ្ងៃ​ផ្តើម​គិត​ពី​ថ្ងៃ​ជូន​ដំណឹង​អំពី​សាលក្រម​កំបាំង​មុខ​កាលណា​សាលក្រម​ត្រូវ​បាន​ប្រគល់​ឲ្យ​ពិរុទ្ធជន​ដោយ​ផ្ទាល់​ដៃ ឬ​ពី​ថ្ងៃ​ដែល​ពិរុទ្ធជន​នោះ​បាន​ដឹង​យ៉ាង​ពិតប្រាកដ​អំពី​សាលក្រម​នេះ​មិន​បាន​ប្រគល់​ឲ្យ​ដល់​ពិរុទ្ធជន​ដោយ​ផ្ទាល់​ដៃ​ទេ។ មាត្រា ៣៦៩ (បណ្តឹង​ទាស់​កម្រិត​ចំពោះ​សេចក្តី​ផ្នែក​រដ្ឋប្បវេណី) បណ្តឹង​ទាស់​អាច​កម្រិត​ធ្វើ​ទៅលើ​សេចក្តី​សម្រេច​ផ្នែក​រដ្ឋប្បវេណី នៃ​សាលក្រម​ក៏​បាន។

មាត្រា ៣៧០ (អនុភាព​នៃ​បណ្តឹង​ទាស់) កាល​ណា​បណ្តឹង​ទាស់​ធ្វើ​ប្រឆាំង​ទៅលើ​សាលក្រម​ទាំង​មូល​សាលក្រម​នេះ​ត្រូវ​ទុក​ជា​អសារបង់។ ការ​អនុវត្ត​សាលក្រម​ត្រូវ​ព្យួរ។ ប៉ុន្តែ​ដីកា​បង្គាប់​ឲ្យ​ចាប់​ខ្លួន​នៅ​តែ​មាន​អានុភាព​។ តុលាការ​នៅតែ​មាន​សមត្ថកិច្ច​ដើម្បី​សម្រេច​អំពី​ការ​ដោះលែង​ជន​ជាប់ចោទ​ឲ្យ​មាន​សេរីភាព​វិញ។ កាលណា​បណ្តឹង​ទាស់​ធ្វើ​ប្រឆាំង​ទៅ​លើ​សេចក្តី​សម្រេច​ផ្នែក​រដ្ឋប្បវេណី​មាន​តែ​សេចក្តី​សម្រេច​ផ្នែក​នេះ​តែ​ប៉ុណ្ណោះ​ដែល​ត្រូវ​ទុក​ជា​អសារបង់​។ ការ​អនុវត្ត​សេចក្តី​សម្រេច​ផ្នែក​រដ្ឋប្បវេណី​នេះ​ត្រូវ​ព្យួរ។

មាត្រា ៣៧២ (បណ្តឹង​ទាស់​ដែល​ធ្វើ​ឡើង​ដោយ​ដើម​បណ្តឹង​រដ្ឋប្បវេណី ឬ​អ្នក​ទទួល​ខុសត្រូវ​រដ្ឋប្បវេណី) ដើម​បណ្តឹង​រដ្ឋប្បវេណី​ក៏​អាច​ប្តឹង​ទាស់​នឹង​សាលក្រម​ដែល​សម្រេច​ដោយ​កំបាំង​ខ្លួន​បាន​ដែរ។ បណ្តឹង​ទាស់​នេះ​ត្រូវ​កំណត់​ទៅលើ​សេចក្តី​សម្រេច​ផ្នែក​រដ្ឋប្បវេណី​នៃ​សាលក្រម​តែ​ប៉ុណ្ណោះ។ បណ្តឹង​ទាស់​ត្រូវតែ​ធ្វើ​នៅក្នុង​រយៈពេល ១៥ ថ្ងៃ ផ្តើម​គិត​ពី​ថ្ងៃ​ជូន​ដំណឹង​អំពី​សាលក្រម​កំបាំង​មុខ​កាលណា​សាលក្រម​ត្រូវ​បាន​​ប្រគល់​ឲ្យ​ពិរុទ្ធជន​ដោយ​ផ្ទាល់​ដៃ ឬ​ពី​ថ្ងៃ​ដែល​ពិរុទ្ធជន​នោះ​បាន​ដឹង​យ៉ាង​ពិតប្រាកដ​អំពី​សាលក្រម​នេះ​មិន​បាន​ប្រគល់​ឲ្យ​ដល់​ពិរុទ្ធជន​ដោយ​ផ្ទាល់​ដៃ​ទេ​។

បណ្តឹង​ទាស់​ត្រូវ​ធ្វើ​ជា​លាយលក្ខណ៍​អក្សរ​ទៅ​កាន់​ការិយាល័យ​ក្រឡា​បញ្ជី​នៃ​តុលាការ​ដែល​បាន​ប្រកាស​សាលក្រម។ ដើម​បណ្តឹង​រដ្ឋប្បវេណី​អាច​ត្រូវ​តំណាង​ដោយ​មេធាវី សហព័ន្ធ ឬ ញាតិ​លោហិត​ផ្ទាល់។ អ្នក​តំណាង​ត្រូវ​មាន​លិខិត​ប្រគល់​សិទ្ធិ​ឲ្យ​ប្តឹង​ទាស់៕

0

Comments

Please, login or register to post a comment