Search form

Login - Register | FOLLOW US ON

Logo of Phnom Penh Post newspaper Phnom Penh Post - សមត្ថកិច្ច​របស់​សភា​ព្រហ្មទណ្ឌ​នៃ​សាលា​ឧទ្ធរណ៍

លោក មេធាវី សេង សឹង្ហហេង ។
លោក មេធាវី សេង សឹង្ហហេង ។ រូបថតៈ គណៈមេធាវី

សមត្ថកិច្ច​របស់​សភា​ព្រហ្មទណ្ឌ​នៃ​សាលា​ឧទ្ធរណ៍

លោក​មេធាវី សេង សឹង្ហហេង គឺជា​សមាជិក​គណៈមេធាវី​នៃ​ព្រះរាជាណាចក្រ​កម្ពុជា​បច្ចុប្បន្ន​លោក​គឺជា​មេធាវី​បម្រើការ​នៅ​ក្រុម​មេធាវី​យុត្តិធម៌​អន្តរជាតិ (International Justice law Firm) ( IJL)។ លោក​មេធាវី​បាន​ផ្តល់​កិច្ចសម្ភាសន៍​ជាមួយ​កាសែត​ភ្នំពេញ​ប៉ុស្តិ៍​ទាក់ទង​នឹង​សមត្ថកិច្ច​របស់​សភា​ព្រហ្មទណ្ឌ​នៃ​សាលាឧទ្ធរណ៍ និង ភាព​ដែល​អាច​ទទួល​បាន​នៃ​បណ្តឹង​​ឧទ្ធរណ៍​ដែល​មាន​ខ្លឹមសារ​ដូច​ខាង​ក្រោម​នេះ៖

តើ​អ្វី​ជា​សមត្ថកិច្ច​របស់​សភា​ព្រហ្មទណ្ឌ​នៃ​សាលា​ឧទ្ធរណ៍​? សមត្ថកិច្ច​នេះ​មាន​តួនាទី និង​អំណាច​ដូចម្តេច​ដែរ?

នេះ​ជា​ពាក្យ​បច្ចេកទេស​នៅក្នុង​តុលាការ។ នៅក្នុង​ចំណុច​នេះ​វា​មាន​ន័យថា​សាលាឧទ្ធរណ៍​បែង​ចែក​ទៅ​ជា​សភា​ព្រហ្មទណ្ឌ​ និង​សភា​រដ្ឋប្បវេណី ។ សភា​ព្រហ្មទណ្ឌ​នៃ​សាលា​ឧទ្ធរណ៍​មាន​សមត្ថិកិច្ច​ដើម្បី​សម្រេច​អំពី​បណ្តឹង​ឧទ្ធរណ៍​ដែល​ធ្វើ​ប្រឆាំង​នឹង​សេចក្តី​សម្រេច​របស់​តុលាការ​ជាន់​ដំបូង​ដែល​ស្ថិត​នៅក្នុង​សមត្ថកិច្ច​ខ្លួន​នៅក្នុង​រឿង​ព្រហ្មទណ្ឌ។

យោង​តាម​មាត្រា ៣៧៤ នីតិវិធី​ព្រហ្មទណ្ឌ​នៃ​ព្រះរាជាណាចក្រ​ស្តីពី​អនុប្បវាទ​នៃ​ចៅក្រម​មួយ​ចំនួន​បាន​ចែង​ថា​ចៅក្រម​ណា​ម្នាក់​ដែល​បាន​​បំពេញ​កិច្ច​ចោទប្រកាន់ ឬ​ស៊ើប​សួរ ឬ​ដែល​បាន​ចូលរួម​ជំនុំជម្រះ​សាលា​ដំបូង​រួច​ហើយ​នោះ​មិន​អាច​នឹង​ចូល​ជំនុំជម្រះ​នៅ​សាលា​ឧទ្ធរណ៍​ក្នុង​ឋានៈ​ជា​ប្រធាន ឬ​ចៅក្រម​ចំពោះ​រឿងក្តី​ដដែល​នោះ​បាន​ឡើយ។

យោង​តាម​ច្បាប់ និង​នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​តើ​នរណា​ខ្លះ​ដែល​មាន​សិទ្ធិ​ធ្វើ​បណ្តឹង​ឧទ្ធរណ៍​ប្រឆាំង​នឹង​សាលក្រម​បាន?

អ្នក​ដែល​អាច​ធ្វើ​ពាក្យ​បណ្តឹង​ឧទ្ធរណ៍​បាន​ ទី ១ គឺ​ជន​នោះ​ (ជន​រងគ្រោះ) ផ្ទាល់ ទី ២ គឺជា​សាច់ញាតិ ប្រពន្ធ​ឬ ប្តី​របស់​ជនរងគ្រោះ ទី ៣ គឺ​មេធាវី​ជា​តំណាង​ឲ្យ​ជនរងគ្រោះ​ប្រពន្ធ ឬ ប្តី​របស់​ជនរងគ្រោះ និង​ជា​ឪពុក​ម្តាយ​របស់​ជនរងគ្រោះ ទី ៤​គឺ​ព្រះរាជអាជ្ញា ឬ​ អគ្គព្រះរាជអាជ្ញា។

យោង​តាម​មាត្រា ៣៧៥ នៃ​នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​ស្តីពី​បុគ្គល​ដែល​អាច​ធ្វើ​បណ្តឹង​ឧទ្ធរណ៍​បាន​ចែង​ថា​អាច​ប្តឹង​ឧទ្ធរណ៍​បាន​ព្រះរាជអាជ្ញា​នៃ​តុលាការ​ជាន់​ដំបូង និង អគ្គព្រះរាជអាជ្ញា​អម​សាលា​ឧទ្ធរណ៍​ពិរុទ្ធជន​ដើម​បណ្តឹង​រដ្ឋប្បវេណី​ចំពោះ​ផលប្រយោជន៍​ផ្នែក​រដ្ឋប្បវេណី និង​អ្នក​ទទួល​ខុសត្រូវ​រដ្ឋប្បវេណី​ចំពោះ​ផលប្រយោជន៍​រដ្ឋប្បវេណី។

មាត្រា​ ៣៧៦ (ទម្រង់​នៃ​បណ្តឹង​ឧទ្ធរណ៍​ដោយ​ព្រះរាជអាជ្ញា​ពិរុទ្ធជន​ដើម​រដ្ឋប្បវេណី និង​អ្នក​ទទួល​​ខុសត្រូវ​រដ្ឋ​ប្បវេណី)៖ បណ្តឹង​ឧទ្ធរណ៍​របស់​ព្រះរាជអាជ្ញា​ពិរុទ្ធជន​ដើម​រដ្ឋប្បវេណី និង​អ្នក​ទទួល​ខុសត្រូវ​រដ្ឋប្បវេណី​ត្រូវ​ធ្វើ​​នៅ​ការិយាល័យ​ក្រឡា​បញ្ជី​នៃ​តុលាការ​ដែល​បាន​ប្រកាស​សាលក្រម។ ពិរុជន​អាច​ត្រូវ​បាន​តំណាង​ដោយ​មេធាវី។ មេធាវី​ត្រូវ​មាន​លិខិត​ប្រគល់​សិទ្ធិ​ឲ្យ​ធ្វើ​បណ្តឹង​ឧទ្ធរណ៍។ ក៏​ប៉ុន្តែ​ពិរុទ្ធជន​ជា​អនីតិជន​អាច​តំណាង​ដោយ​ឪពុក ម្តាយឬ អ្នក​អាណាព្យាបាល។ ក្នុង​ករណី​នេះ​អ្នក​តំណាង​មិន​ចាំបាច់​មាន​លិខិត​ប្រគល់​សិទ្ធិ​នោះ​ទេ។ ដើម​បណ្តឹង​​រដ្ឋប្បវេណី​អាច​តំណាង​ដោយ​មេធាវី សហព័ទ្ធ ឬ ញាតិ​លោហិត​ផ្ទាល់។ អ្នក​តំណាង​ត្រូវតែ​មាន​លិខិត​សិទ្ធិ​ឲ្យ​ធ្វើ​បណ្តឹង​​ឧទ្ធរណ៍​នេះ។

ក្រឡា​បញ្ជី​ចុះ​បណ្តឹង​ឧទ្ធរណ៍​នៅលើ​បញ្ជី​ពិសេស​ដែល​រក្សា​ទុក​នៅក្នុង​បញ្ជី​នៃ​តុលាការ។ លិខិត​ប្តឹង​ឧទ្ធរណ៍​ត្រូវ​ចុះ​ហត្ថលេខា​ដោយ​ក្រឡា​បញ្ជី និង អ្នក​ប្តឹង​ឧទ្ធរណ៍ ឬ​អ្នក​តំណាង។ លិខិត​ប្រគល់​សិទ្ធិ​ត្រូវ​ភ្ជាប់​នឹង​លិខិត​ប្តឹង​ឧទ្ធរណ៍​។

រាល់​ពាក្យ​បណ្តឹង​ឧទ្ធរណ៍​ចំពោះ​សាលក្រម​របស់​ពិរុទ្ធជន​តើ​តុលាការ​ទទួល​យក​ឬ​ទេ? បើ​មិន​ទទួល​យក​ហេតុ​អ្វី​ដែរ?

ភាគច្រើន​គេ​ទទួល​យក​ទាំងអស់​ឲ្យ​តែ​បណ្តឹង​ឧទ្ធរណ៍​នោះ​ត្រូវ​បាន​ធ្វើ​ឡើង​ទៅ​តាម​ទម្រង់​នៃ​ច្បាប់ និង​ស្ថិត​នៅក្នុង​នីតិវិធី​ច្បាប់។

មាត្រា ៣៧៧ ការ​ប្រកាស​ប្តឹង​ឧទ្ធរណ៍​ដោយ​ពិរុទ្ធជន​ដែល​ជាប់​ឃុំ ពិរុទ្ធជន​ដែល​ជាប់​ឃុំ​​អាច​សម្តែង​ឆន្ទៈ​របស់​ខ្លួន​ក្នុង​ការ​ប្តឹង​ឧទ្ធរណ៍​នៅ​ចំពោះ​មុខ​​ប្រធាន​ពន្ធនាគារ​ ឬ​មណ្ឌល​ឃុំ​ខ្លួន។ ពិរុទ្ធជន​នេះ​បំពេញ​ពាក្យ​​ប្តឹង​ឧទ្ធរណ៍​ដែល​ត្រូវ​ចុះ​កាលបរិច្ឆេទ និង ចុះ​ហត្ថលេខា។ ពាក្យ​ប្តឹង​ឧទ្ធរណ៍​ត្រូវ​ចុះ​បញ្ជី​ដោយ​ប្រធាន​ពន្ធនាគារ ឬ​មណ្ឌល​ឃុំ​ខ្លួន​នៅលើ​បញ្ជី​ពិសេស។ ពិរុទ្ធជន​ត្រូវ​ចុះ​ហត្ថលេខា​នៅ​រឹម​នៃ​បញ្ជី​នោះ។ ប្រធាន​ពន្ធនាគារ ឬ មណ្ឌល​ឃុំ​ខ្លួន​ត្រូវ​បញ្ជូន​ពាក្យ​ប្តឹង​ឧទ្ធរណ៍​ក្នុង​រយៈពេល​ដ៏ខ្លី​បំផុត​ទៅ​ក្រឡា​បញ្ជី​នៃ​តុលាការ​ដែល​ត្រូវ​ចុះ​និទ្ទេស​អំពី​ពាក្យ​ប្តឹង​ឧទ្ធរណ៍​នេះ​នៅលើ​ពាក្យ​បណ្តឹង​ឧទ្ធរណ៍​នៃ​តុលាការ​។

មាត្រា​ ៣៧៨ អ្នក​ប្តឹង​ឧទ្ធរណ៍​ជា​អនក្ខរជនៈ កាលណា​អ្នក​ប្តឹង​ឧទ្ធរណ៍​មិន​ចេះ​ចុះ​ហត្ថលេខា​អ្នក​ប្តឹង​ឧទ្ទរណ៍​នោះ​ត្រូវ​ផ្តិត​ម្រាម​ដៃ​។

មាត្រា ៣៨០ ការ​បើក​ពិនិត្យ​មើល​បញ្ជី​បណ្តឹង​ឧទ្ធរណ៍ៈ​បណ្តឹង​ឧទ្ធរណ៍​នៃ​តុលាការ​ជាន់​ដំបូង និង សាលាឧទ្ធរណ៍​អាច​ត្រូវ​បាន​ភាគី និង​មេធាវី​ពិនិត្យ​មើល​ដោយ​សេរី។

មាត្រា ៣៨១ រយៈពេល​ប្តឹង​ឧទ្ធរណ៍​របស់​ព្រះរាជអាជ្ញា និង​អគ្គព្រះរាជអាជ្ញា​ការ​ប្តឹង​ឧទ្ធរណ៍​របស់​ព្រះរាជអាជ្ញា​ត្រូវ​ធ្វើ​ក្នុង​រយៈពេល ១ (មួយ) ខែ។ ការ​ប្តឹង​ឧទ្ធរណ៍​របស់​អគ្គព្រះរាជអាជ្ញា​ត្រូវ​ធ្វើ​ក្នុង​រយៈពេល​ ៣ ខែ។ រយៈពេល​ប្តឹង​ឧទ្ធរណ៍​ផ្តើម​គិត​ពី​ពេល​ប្រកាស​សាលក្រម។

មាត្រា ៣៨២ ​រយៈពេល​ប្តឹង​ឧទ្ធរណ៍​របស់​ពិរុទ្ធជន​ដើម​បណ្តឹង​រដ្ឋ​ប្បវេណី​អ្នក​ទទួល​ខុសត្រូវ​រដ្ឋប្បវេណី​ត្រូវ​ធ្វើ​ក្នុង​រយៈពេល ១ ខែ។ កាលណា​សាលក្រម​នោះ​ជា​សាលក្រម​ចំពោះ​មុខ​រយៈពេល​ប្តឹង​ឧទ្ធរណ៍​ត្រូវ​ផ្តើម​គិត​ពី​ពេល​ប្រកាស​សាលក្រម។ កាលណា​សាលក្រម​នោះ​ចាត់ទុក​ថា​ចំពោះ​មុខ​រយៈពេល​ប្តឹង​ឧទ្ធរណ៍​ត្រូវ​ផ្តើម​គិត​ពី​ពេល​ទទួល​ដំណឹង​សាលក្រម​ទោះបី​ការ​ឲ្យ​ដឹង​នេះ​តាម​វិធី​ណា​ក៏​ដោយ។

មាត្រា ៣៨៣ ​រយៈពេល​បន្ថែម​សម្រាប់​ធ្វើ​បណ្តឹង​ឧទ្ធរណ៍ៈ​បណ្តឹង​ឧទ្ធរណ៍​ឧប្បត្តិហេតុ​ក្នុង​ករណី​​ដែល​ភាគី​ណា​មួយ​បាន​ប្តឹង​ឧទ្ធរណ៏​នៅក្នុង​រយៈពេល ១ ​ខែ ភាគី​ដទៃ​ទៀត​មាន​រយៈពេល​បន្ថែម ៧ ថ្ងៃ​ដើម្បី​ធ្វើ​បណ្តឹង​ឧប្បត្តិហេតុ។ រយៈពេល​បន្ថែម​នេះ​ផ្តើម​គិត​ពី​ការ​ផុត​រយៈពេល​ធម្មតា។

មាត្រា​ ៣៨៥ បណ្តឹង​ឧទ្ធរណ៍​ចំពោះ​សាលក្រម​ចាត់​របៀបៈ​កាលណា​តុលាការ​ចេញ​សាលក្រម​ចាត់​របៀប​បណ្តឹង​ឧទ្ធរណ៍​អាច​ត្រូវ​ទទួល​បាន​ភ្លាម​ប្រសិន​បើ​សាលក្រម​នេះ​បញ្ចប់​នីតិវិធី។ ក្នុង​ករណី​ផ្ទុយ​ពី​នេះ​សាលក្រម​ចាត់​របៀប​នឹង​ត្រូវ​ដាក់​ជូន​សាលា​ឧទ្ធរណ៍​ពិនិត្យ​បាន​លុះត្រា​តែ​ធ្វើ​ព្រមព្រៀង​គ្នា​ជាមួយ​នឹង​សាលក្រម​លើ​អង្គ​សេចក្តី​៕

0

Comments

Please, login or register to post a comment