Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្វែងយល់​ពី​ការ​ស៊ើបសួរ និង​ការ​ឃុំ​ខ្លួន

Content image - Phnom Penh Post
លោក​មេធាវី សួន វីរៈបញ្ញា នៃ​ក្រុមហ៊ុន​មេធាវី​ខ្មែរ​អប្សរា​។ រូបថត សហការី

ស្វែងយល់​ពី​ការ​ស៊ើបសួរ និង​ការ​ឃុំ​ខ្លួន

ជា​នីតិវិធី​ជន​ណា​ម្នាក់​នៅ​ពេល​នគរបាល​យុត្តិធម៌​ចាប់​ខ្លួន​បាន​នោះ​នគរបាល​បាន​ធ្វើ​កំណត់​ហេតុ និង​បញ្ជូន​ជន​សង្ស័យ​ទៅ​តុលាការ បន្ទាប់មក​ជន​នោះ​ត្រូវ​ឆ្លងកាត់​ការ​ស៊ើបសួរ​បន្ត​ទៀត​។

តើ​ហេតុ​អ្វី​បាន​ជា​មាន​ការ​ស៊ើបសួរ​ទៀត ? តើ​ការ​ស៊ើបសួរ​នៅ​ដំណាក់កាល​តុលាការ និង​ការ​ឃុំ​ខ្លួន​មាន​ប្រយោជន៍​ដល់​ជន​ត្រូវ​ចោទ​ដែរ​ឬ​ទេ​?

ជុំវិញ​ករណី​នេះ​ភ្នំពេញ​ប៉ុស្តិ៍​បាន​សម្ភាស​ជាមួយ​លោក​មេធាវី សួន វីរៈបញ្ញា នៃ​ក្រុមហ៊ុន​មេធាវី​ខ្មែរ​អប្សរា​ដែល​មាន​អាសយដ្ឋាន​ផ្ទះ​លេខ​ ៥ ​អា ផ្លូវ​លេខ​ ២៨៥ សង្កាត់​បឹងកក់​ ១ ខណ្ឌ​ទួលគោក​ដែល​ជា​ភាគ​បន្ត​ដូចតទៅ​​...

ជន​ម្នាក់​ត្រូវ​នគរបាល​យុត្តិធម៌​ចាប់​ខ្លួន​ និង​បាន​បញ្ជូន​ទៅ​តុលាការ​។ នៅ​ពេល​នោះ​ជន​សង្ស័យ​ត្រូវ​ព្រះរាជអាជ្ញា​សួរ​ចម្លើយ​ហើយ​បញ្ជូន​ទៅ​ចៅក្រម​ស៊ើបសួរ​។ តើ​ការ​ធ្វើ​បែប​នេះ​ដើម្បី​អ្វី​?

ការ​ដែល​ជនសង្ស័យ​ត្រូវ​បាន​បញ្ជូន​ទៅ​ចំពោះ​មុខ​ចៅក្រម​ស៊ើបសួរ​គឺ​ក្នុង​គោល​បំណង​ធានា​ឲ្យ​បាន​នូវ​ការ​ស្វែងរក​ការពិត​នៃ​រឿងក្តី​។

ជាធម្មតា​នៅ​ក្នុង​រឿងក្តី​ព្រហ្មទណ្ឌ​ការ​ស៊ើបអង្កេត​របស់​មន្ត្រី​នគរបាល​យុត្តិធម៌ និង​ការ​សាកសួរ​នៅ​តំណាក់កាល​អយ្យការ​ពុំ​ទាន់​អាច​ប្រមូល​បាន​អង្គហេតុ និង​ភ័ស្តុតាង​គ្រប់​ជ្រុងជ្រោយ​ដែល​អាច​បញ្ជូន​ជនសង្ស័យ​នោះ​ទៅ​ជំនុំ​ជម្រះ​នៅ​ឡើយ​ទេ​។

ហេតុ​ដូចនេះ ​ហើយ​ទើប​នីតិវិធី​ច្បាប់​តម្រូវ​ឲ្យ​មាន​ការ​បើក​ការ​ស៊ើបសួរ​នៅ​ចំពោះ​មុខ​ចៅក្រម​ស៊ើបសួរ​ដើម្បី​ស្វែងរក​ធាតុ​ចាំបាច់​សម្រាប់​ធានា​ដល់​ការ​ចោទប្រកាន់​ស្វែងរក​ភ័ស្តុតាង និង​ពិរុទ្ធភាព​សម្រាប់​អង្គហេតុ​ចោទប្រកាន់ និង​ធានា​នូវ​និរន្តរភាព​សម្រាប់​ដំណើរ​កាត់​សេចក្តី​។

ប៉ុន្តែ​ការ​បើក​ការ​ស៊ើបសួរ​នេះ​មិនមែន​អនុវត្ត​គ្រប់​ទៅ​លើ​​សំណុំ​រឿង​ព្រហ្មទណ្ឌ​ទាំងអស់​នោះ​ទេ​គឺ​វា​អាស្រ័យ​ទៅ​លើ​ភាព​ស្មុគស្មាញ ឬ​ភាព​ចាំបាច់​នៃ​រឿងក្តី​។ នៅ​ក្នុង​បទមជ្ឈិម​ព្រះរាជអាជ្ញា​អាច​បើក​ការ​ស៊ើបសួរ​ក៏​បាន ឬ​មិន​បើក​ក៏​បាន ប៉ុន្តែ​ក្នុង​បទឧក្រិដ្ឋ​គឺ​ច្បាប់​បាន​កំណត់​យ៉ាង​ច្បាស់​ថា​ដាច់ខាត​ត្រូវ​តែ​បើក​ការ​ស៊ើបសួរ​។ (​មាត្រា ៤៤ និង ៤៥ នៃ​ក្រម​នីតិវិធី​ព្រហ្មទណ្ឌ​)​។

ជនសង្ស័យ​បន្ទាប់ពី​ត្រូវ​ស៊ើបសួរ​ហើយ​គាត់​ត្រូវ​បាន​តុលាការ​បង្គាប់​ឲ្យ​ឃុំ​ខ្លួន​បណ្តោះអាសន្ន​។ ហេតុអ្វី​បាន​ជា​មាន​ការ​ឃុំ​ខ្លួន​បណ្តោះ​អាសន្ន​បែប​នេះ​? ​ហើយ​ការ​ឃុំ​ខ្លួន​បណ្តោះអាសន្ន​នេះ​មាន​ប្រយោជន៍​ដល់​ជនសង្ស័យ​ដែរ​ទេ ហើយ​ការ​ឃុំ​បណ្តោះអាសន្ន​នេះ​កំណត់​រយៈពេល​ប៉ុន្មាន​ខែ​?

មូលហេតុ​ដែល​នាំ​ឲ្យ​មាន​ការ​ឃុំ​ខ្លួន​បណ្តោះអាសន្ន​គឺ​មាន​ ៦ ​ចំណុច​ជា​គោល​៖ ទី​ ១ ​គឺ​ដើម្បី​បញ្ចប់​បទល្មើស ឬ​បង្ការ​បទល្មើស​កុំ​ឲ្យ​កើត​ជា​ថ្មី​ទី​ ២ ​ដើម្បី​រារាំង​កុំ​ឲ្យ​មាន​ការ​គាបសង្កត់​លើ​សាក្សី ឬ​ជនរងគ្រោះ ឬ​ដើម្បី​រារាំង​កុំ​ឲ្យ​មាន​ការ​ត្រូវរ៉ូវ​គ្នា​រវាង​ជន​ត្រូវ​ចោទ និង​អ្នក​​សមគំនិត​ ទី​ ៣ ​ដើម្បី​រក្សា​ភ័ស្តុតាង ឬ​តម្រុយ​ជា​សម្ភារ ទី​ ៤ ដើម្បី​ធានា​ជន​ត្រូវ​ចោទ​ទុក​ជូន​តុលាការ​ចាត់ការ​តាម​នីតិវិធី ទី​ ៥ ​ដើម្បី​ការពារ​សន្តិសុខ​ឲ្យ​ជន​ត្រូវ​ចោទ និង​ទី​ ៦ ដើម្បី​ធានា​រក្សា​សណ្តាប់ធ្នាប់​សាធារណៈ​កុំ​ឲ្យ​មាន​ការ​ច្របូកច្របល់​ដែល​បណ្តាល​មកពី​បទល្មើស​។

(​សូម​រង់ចាំ​អាន​ភាគ​បន្ត​នៅ​សប្តាហ៍​ក្រោយ​)

0

Comments

Please, login or register to post a comment