Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្វែងយល់​ពី​ការ​ស៊ើបសួរ​ និង​ការ​ឃុំ​ខ្លួន​ (​តចប់​)

Content image - Phnom Penh Post
លោក​មេធាវី សួន វីរៈបញ្ញា នៃ​ក្រុមហ៊ុន​មេធាវី​ខ្មែរ​អប្សរា​។ រូបថត សហការី

ស្វែងយល់​ពី​ការ​ស៊ើបសួរ​ និង​ការ​ឃុំ​ខ្លួន​ (​តចប់​)

កាលពី​ថ្ងៃ​ចន្ទ​សប្ដាហ៍​មុន​មិត្ត​អ្នក​អាន​បាន​ស្វែងយល់​ខ្លះ​​ហើយ​អំពី​ការ​ស៊ើបសួរ និង​ការ​ឃុំ​ខ្លួន​ជាពិសេស​មូលហេតុ​នៃ​​ការ​ឃុំ​ខ្លួន​បណ្ដោះអាសន្ន​ដោយ​មាន​ការ​បកស្រាយ​ពី​សំណាក់​​លោក​មេធាវី សួន វីរៈបញ្ញា នៃ​ក្រុមហ៊ុន​មេធាវី​ខ្មែរ​អប្សរា​ដល់​ត្រង់​ចំណុច​ទី​ ៦ ​នៃ​មូលហេតុ​នាំ​ទៅ​ដល់​ការ​ឃុំ​ខ្លួន​។

ប៉ុនែ្ត​ឥឡូវ​នេះ​យើង​សូម​លើក​យក​ការ​ពន្យល់​របស់​លោក​មេធាវី​លើ​ចំណុច​នេះ​បន្ត​ទៀត​ដែល​មាន​ខ្លឹមសារ​ដូច​តទៅ ៖

តាមពិត​ទៅ​ការ​ឃុំ​ខ្លួន​បណ្តោះអាសន្ន​គឺ​មិនមែន​មិន​ល្អ​ទាំង​ស្រុង​សម្រាប់​ជន​ត្រូវ​ចោទ​នោះ​ទេ វា​មាន​ផល​ល្អ​ខ្លះ​ដែរ​សម្រាប់​ជន​ត្រូវ​ចោទ​។

ខ្ញុំ​បាទ​សុំ​លើក​ឧទាហរណ៍​ដើម្បី​ឲ្យ​បងប្អូន​ងាយ​យល់ ឧទាហរណ៍​ថា​លោក ​“​ក​” បាន​ចាក់​សម្លាប់​លោក ​“​ខ​” ក្នុង​ករណី​នេះ​នៅ​ពេល​មក​ដល់​នីតិវិធី​ស៊ើបសួរ គឺ​តុលាការ​បាន​បង្គាប់​ឲ្យ​ឃុំ​ខ្លួន​លោក “​ក​” ​ភ្លាម​តែ​ម្តង ហេតុអ្វី​ត្រូវ​ឃុំ​ខ្លួន​លោក “​ក​”? ទីមួយ​ដើម្បី​រក្សា​សន្តិសុខ​ជូន​ជនល្មើស​ផ្ទាល់​តែ​ម្តង បើ​សិន​ជា​ឲ្យ​លោក “​ក​” ​មាន​សេរីភាព នោះ​ច្បាស់​ណាស់​បងប្អូន​សាច់ញាតិ​របស់​ជនរងគ្រោះ​អាច​តាម​រក​វាយ​ ឬ​សម្លាប់​លោក ​“​ក​” វិញ ដើម្បី​សងសឹក​ជូន​លោក ​“​ខ​” ដូចនេះ​ការ​ឃុំ​ខ្លួន​នេះ​វា​មាន​ផលប្រយោជន៍​ការពារ​សន្តិសុខ​ជូន​ជន​ត្រូវ​ចោទ​ឲ្យ​គាត់​បាន​នៅ​រក​មេធាវី​តតាំង​តាម​ផ្លូវ​ច្បាប់​។

ឧទាហរណ៍​ទី​ពីរ​ក្នុង​ករណី​ដែល​លោក​ “​ក​” ​ប្រើប្រាស់​អាវុធ ឬ​មាន​គ្នីគ្នា បើ​តុលាការ​មិន​ឃុំ​ខ្លួន​គាត់​បណ្តោះអាសន្ន នោះ​គាត់​អាច​មាន​ឱកាស​បំបាត់​ភ័ស្តុតាង​ដូចជា​យក​អាវុធ​​ដែល​គាត់​ប្រើ​សម្រាប់​ប្រព្រឹត្ត​ទៅ​លាក់​ជាដើម​ ឬ​គាត់​អាច​ទៅ​គំរាម​សាក្សី​នានា​ដែល​ឃើញ​ហេតុការណ៍​នោះ​ដូចនេះ​ហើយ​ទើប​តុលាការ​ត្រូវ​តែ​ឃុំ​ខ្លួន​គាត់​ដើម្បី​ធានា​កុំ​ឲ្យ​មាន​ការ​រំខាន​ដល់​នីតិវិធី​នៃ​រឿងក្តី​។

ចំពោះ​ថិរវេលា​នៃ​ការ​ឃុំ​ខ្លួន​បណ្តោះអាសន្ន​នេះ​គឺ​ច្បាប់​បាន​កំណត់​ថិរវេលា​ផ្សេងៗ​គ្នា​ទៅ​តាម​បទល្មើស និង​អាយុ​នៃ​ជន​ត្រូវ​ចោទ​។

នៅក្នុង​បទមជ្ឈិម ថិរវេលា​នៃ​ការ​ឃុំ​ខ្លួន​បណ្តោះអាសន្ន​គឺ​មិន​អាច​លើស​ពី​បួន​ខែ ប៉ុន្តែ​នៅ​ពេល​ផុត​ថិរវេលា​នេះ​តុលាការ​អាច​បន្ត​ពន្យារ​ការ​ឃុំ​ខ្លួន​បាន​តែ​ម្តង​គត់​ដោយ​មិន​ឲ្យ​លើស​ពី​ ២ ​ខែ​ (​ក្រម​​នីតិវិធី​ព្រហ្មទណ្ឌ​មាត្រា ២០៩)​។

នៅ​ក្នុង​បទមជ្ឈិម បើ​ជា​អនីតិជន​មាន​អាយុ​ក្រោម​ ១៦ ​ឆ្នាំ​ការ​ឃុំ​ខ្លួន​បណ្តោះអាសន្ន​មិន​ត្រូវ​លើស​ពី​ ២ ​ខែ ប្រសិន​បើ​ស្ថិត​ពី​អាយុ​ ១៦ ​ដល់​ក្រោម​ ១៨ ​ឆ្នាំ ការ​ឃុំ​ខ្លួន​បណ្តោះអាសន្ន​មិន​ត្រូវ​លើស​ពី​ ៤ ​ខែ​។ ថិរវេលា​នៃ​ការ​ឃុំ​ខ្លួន​បណ្តោះអាសន្ន​ខាង​លើ​នេះ​គឺ​មិន​ត្រូវ​លើស​ពី​ពាក់កណ្តាល​នៃ​អប្បបរមា​នៃ​ទោស​ដែល​ច្បាប់​បាន​កំណត់​ឡើយ​។

ចំពោះ​បទឧក្រិដ្ឋ​ថិរវេលា​នៃ​ការ​ឃុំ​ខ្លួន​បណ្តោះអាសន្ន​គឺ​ប្រាំ​មួយ​ខែ នៅពេល​ដែល​ផុត​ថិរវេលា​នេះ​តុលាការ​អាច​ពន្យារពេល​នៃ​ការ​ឃុំ​ខ្លួន​បាន​តែ​ពីរ​ដង​គត់ ដោយ​ក្នុង​មួយ​ដង​មាន​ថិរវេលា​ ៦ ​ខែ​ (​ក្រម​នីតិវិធី​ព្រហ្មទណ្ឌ​មាត្រា ២០៨)​។ នៅ​ក្នុង​បទឧក្រិដ្ឋ បើ​ជា​អនីតិជន​មាន​អាយុ​ក្រោម​ ១៦ ​ឆ្នាំ​ការ​ឃុំ​ខ្លួន​បណ្តោះអាសន្ន​មិន​ត្រូវ​លើស​ពី​ ៤ ​ខែ ប្រសិន​បើ​ចាប់ពី​អាយុ​ ១៦ ​ដល់​ក្រោម​ ១៨ ​ឆ្នាំ​ការ​ឃុំ​ខ្លួន​បណ្តោះអាសន្ន​មិន​ត្រូវ​លើស​ពី​ ៦ ​ខែ​។

សម្រាប់​អនីតិជន​ដែល​មាន​អាយុ​តិច​ជាង​ ១៤ ​ឆ្នាំ​គឺ​ច្បាប់​មិន​តម្រូវ​ឲ្យ​មាន​ការ​ឃុំ​ខ្លួន​បណ្តោះអាសន្ន​ទេ​គឺ​ចៅក្រម​ស៊ើបសួរ​អាច​សម្រេច​ប្រគល់​ក្មេង​នោះ​ទៅ​ឲ្យ​ឪពុកម្តាយ អ្នក​អាណាព្យាបាល​ ឬ​ក្នុង​ករណី​គ្មាន​អាណាព្យាបាល​ត្រូវ​ប្រគល់​ជូន​មជ្ឈមណ្ឌល​អប់រំ​ថែរក្សា​បណ្តោះអាសន្ន​។ ​(​មាត្រា​ ២១២ នៃ​ក្រមនីតិវិធី​ព្រហ្មទណ្ឌ​)​។

ប្រសិន​បើ​ជន​ម្នាក់​នោះ​ត្រូវ​ឃុំ​ខ្លួន​បណ្តោះអាសន្ន​បែប​នេះ​តើ​គេ​ហៅ​ជន​នោះ​ថា​ជា​ជនជាប់ចោទ​ឬ​? ​ហើយ​គាត់​ត្រូវ​បាន​គេ​ចាត់ទុក​ថា​ជា​អ្នក​មាន​ទោស​ដែរ​ទេ​?

នៅ​ពេល​ដែល​ជន​ម្នាក់​ត្រូវ​បាន​ឃុំ​ខ្លួន​បណ្តោះអាសន្ន​គឺ​គេ​មិន​ត្រូវ​ហៅ​គាត់​ថា​ជា​ជន​ជាប់ចោទ​ទេ តាម​ផ្លូវ​ច្បាប់​ត្រូវ​ហៅ​គាត់​ថា​ជន​ត្រូវ​ចោទ​ហើយ​ក៏​មិន​ទាន់​អាច​ចាត់ទុក​ថា​គាត់​មាន​ទោស​ដែរ​គឺ​ត្រូវ​តែ​ចាត់ទុក​ថា​គាត់​ពុំទាន់​មាន​ទោស ឬ​មាន​ពិរុទ្ធភាព​អ្វី​ទេ​ដែល​នេះ​ជា​គោលការណ៍​សំខាន់​មួយ​ក្នុង​នីតិវិធី​ព្រហ្មទណ្ឌ​គឺ​គោលការណ៍​សន្មត​ជា​មុន​ថា​គ្មាន​ទោស​ដែល​រូប​ខ្ញុំ​បាទ​តែងតែ​បាន​លើក​ឡើង​អំពី​ចំណុច​សំខាន់​មួយ​នេះ​ជា​ញឹកញាប់​នៅ​ក្នុង​កិច្ចសម្ភាស៍​មុនៗ​៕

0

Comments

Please, login or register to post a comment