Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្វែង​យល់​ពី​សិទ្ធ​ការពារ​ខ្លួន​របស់​ជន​ជាប់ចោទ

Content image - Phnom Penh Post
លោក​មេធាវី សួន វីរៈបញ្ញា ​នៃ​ក្រុមហ៊ុន​មេធាវី​ខ្មែរ​អប្សរា​។ រូបថត​សហការី

ស្វែង​យល់​ពី​សិទ្ធ​ការពារ​ខ្លួន​របស់​ជន​ជាប់ចោទ

កាលពី​សប្តាហ៍​មុន ភ្នំពេញ-ប៉ុស្តិ៍ បាន​ចុះ​ផ្សាយ​ភាគ​ទី​ ២ ទាក់ទង​នឹង​សិទ្ធិ​ដើម្បី​ការពារ​ខ្លួន​នៅ​ពេល​ដែល​ត្រូវ​បាន​ចាប់​ខ្លួន​ជន​ណា​ម្នាក់​ដែល​ទាមទារ​ត្រូវ​ឲ្យ​មាន​មេធាវី​ការពារ​ក្តី​។

ជុំវិញ​ករណី​នេះ​ភ្នំពេញ​ប៉ុស្តិ៍​បាន​សម្ភាស​ជាមួយ​លោក មេធាវី សួន វីរៈបញ្ញា ​នៃ​ក្រុមហ៊ុន​មេធាវី​ខ្មែរ​អប្សរា​ដែល​មាន​អាសយដ្ឋាន​ផ្ទះ​លេខ ៥ អា ផ្លូវ​លេខ ២៨៥ សង្កាត់​បឹងកក់​ ១ ខណ្ឌ​ទួលគោក ដែល​ជា​ភាគ​បញ្ចប់​ដូច​តទៅ​៖

...​សិទ្ធិ​ក្នុង​ការ​ទទួល​ជំនួយ​ពី​អ្នក​បកប្រែ​៖ ​ក្នុង​ករណី​ដែល​ជន​ជាប់ចោទ​មិន​ចេះ​ភាសា​ខ្មែរ​ ឬ​ជន​នោះ​ជា​ជន​គថ្លង់​នោះ​តុលាការ​ត្រូវ​តែ​រក​អ្នក​បកប្រែ​ជូន​ជនជាប់ចោទ​ដែល​អាច​ឲ្យ​ជន​ជាប់ចោទ​យល់​ភាសា​នឹង​ចូលរួម​ក្នុង​ដំណើរការ​នៃ​សវនាការ​បាន​។ ​(​មាត្រា ៣៣០ ​និង​មាត្រា ៣៣១ នៃ​ក្រម​នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​)​។ សិទ្ធិ​ក្នុង​ការ​ការពារ​ខ្លួន​៖ ​ជន​ជាប់ចោទ​គាត់​មាន​សិទ្ធិ​គ្រប់គ្រាន់​ក្នុង​ការ​ការពារ​ខ្លួន​គាត់​ដូចជា​រក​ភ័ស្តុតាង​ដោះ​បន្ទុក​ ឬ​ឆ្លើយ​ដោះសារ​ជាដើម​។

សិទ្ធិ​ក្នុង​ការ​បដិសេធ​សមាសភាព​ចៅ​ក្រម​៖ ​ជន​ជាប់ចោទ​ ឬ​មេធាវី​ជន​ជាប់ចោទ​មាន​សិទ្ធិ​ក្នុង​ការ​បដិសេធ​មិន​ទទួល​សមាសភាព​ចៅក្រម​ដែល​គាត់​យល់​ឃើញ​ថា​ចៅក្រម​នោះ​មិន​អាច​រក​យុត្តិធម៌​ជូន​រូប​គាត់​បាន​។

ឧទាហរណ៍​៖ ​ចៅក្រម​ជំនុំ​ជម្រះ​គឺ​ត្រូវ​ជា​ពូ​របស់​ជនរងគ្រោះ​ដូចនេះ​ជន​ជាប់ចោទ​យល់​ឃើញ​ថា​កាល​បើ​ពូ​របស់​ជនរងគ្រោះ​មក​កាត់ក្តី​រូប​គាត់​គឺ​គាត់​ពិត​ច្បាស់​ណាស់​ត្រូវ​ផ្តន្ទាទោស​បាត់​ទៅ​ហើយ ដូចនេះ​ក្នុង​ករណី​ដែល​គាត់​យល់​ឃើញ​ថា​ចៅក្រម​អាច​មាន​ភាព​លម្អៀង​មិន​អាច​រក​យុត្តិធម៌​ឲ្យ​គាត់​គឺ​គាត់​មាន​សិទ្ធិ ក្នុង​ការ​ប្តឹង​ដិត​ចិត្ត​បដិសេធ​សមាសភាព​ចៅក្រម​រូប​នោះ​បាន​។ ការ​ប្តឹង​ដិត​ចិត្ត​ចៅក្រម​នេះ​ត្រូវ​ធ្វើ​ឡើង​តាម​មាត្រា ៥៥៦ និង​ ៥៥៧ ​នៃ​ក្រមនីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​។

សិទ្ធិ​នៅ​ស្ងៀម​មិន​ឆ្លើយតប​៖ ​ជន​ជាប់ចោទ​មាន​សិទ្ធិ​ក្នុង​ការ​នៅ​ស្ងៀម​មិន​ឆ្លើយ​នឹង​សំណួរ​ដែល​តុលាការ​នឹង​គូ​ភាគី​សួរ​ពាក់ព័ន្ធ​នៅ​ក្នុង​ដំណើរការ​សវនាការ​។ សិទ្ធិ​មិន​ឆ្លើយ​ដាក់​បន្ទុក​លើ​ខ្លួន​ឯង​៖ ​ជន​ជាប់ចោទ​មាន​សិទ្ធិ​មិន​ឆ្លើយ​នូវ​សំណួរ​ណា​ដែល​ឆ្លើយ​ទម្លាក់​កំហុស​ ឬ​ដាក់​បន្ទុក​លើ​ខ្លួន​គាត់​។

សិទ្ធិ​ក្នុង​ការ​ប្តឹង​ទៅ​លើ​សេចក្តី​សម្រេច​របស់​តុលាការ​៖ ​នៅ​ពេល​ដែល​សវនាការ​ត្រូវ​បាន​បញ្ជប់​ហើយ​តុលាការ​ចេញ​សាលក្រម​សម្រេច​ផ្តន្ទាទោស​ជន​ណា​ម្នាក់ ជន​នោះ​មាន​សិទ្ធិ​ក្នុង​ការ​ប្តឹង​ជំទាស់​ទៅ​លើ​សេចក្តី​សម្រេច​របស់​តុលាការ​ទៅ​សាលា​ជម្រះ​ក្តី​ថ្នាក់​លើ​ទៀត​ទៅ​តាម​កំណត់​របស់​ច្បាប់​។

ឧទាហរណ៍​ថា​ពេល​ជម្រះ​ក្តី​គាត់​គ្មាន​មេធាវី​ហើយ​គាត់​ត្រូវ​តុលាការ​ចាត់​តាំង​មេធាវី​ឲ្យ​។

តើ​ជន​ជាប់ចោទ​អាច​បដិសេធ​មិន​ទទួល​យក​មេធាវី​ដែល​តុលាការ​បាន​ចាត់​តាំង​នោះ​បាន​ដែរ​ឬ​ទេ​ ឬ​ត្រូវ​តែ​ទទួល​យក​? ចុះ​បើ​គាត់​បដិសេធ​មិន​ទទួល​យក​មេធាវី​ចាត់​តាំង​ហើយ​គាត់​រក​មេធាវី​ខ្លួន​គាត់​តើ​គាត់​អាច​មាន​ពេល​ប៉ុន្មាន​ថ្ងៃ​សម្រាប់​ការ​រក​មេធាវី​ដោយ​ខ្លួនឯង​?

ចំពោះ​រយៈពេល​នៃ​ការ​ស្វែងរក​មេធាវី​សម្រាប់​ការពារ​ក្តី​គឺ​តុលាការ​ទុក​ពេល​មួយ​សមស្រប​សម្រាប់​ជន​ជាប់ចោទ​ស្វែងរក​ជ្រើសរើស​មេធាវី​ដោយ​ខ្លួនឯង​។

នៅ​ពេល​ជម្រះក្តី​ប្រសិន​បើ​ជន​ជាប់ចោទ​ពុំ​មាន​មេធាវី​ហើយ​គាត់​ត្រូវ​បាន​តុលាការ​ចាត់តាំង​មេធាវី​ឲ្យ​តែ​គាត់​មិន​ពេញ​ចិត្ត​មេធាវី​នោះ​គឺ​គាត់​មាន​សិទ្ធិ​ក្នុង​ការ​បដិសេធ​មិន​ទទួល​យក​មេធាវី​ដែល​ត្រូវ​បាន​ចាត់តាំង​ឲ្យ​រូប​គាត់​នោះ​។ ប៉ុន្តែ​ ក្នុង​ករណី​ដែល​បទលើ្មស​ជា​បទឧក្រិដ្ឋ និង​ក្នុង​ករណី​ដែល​ជន​ជាប់ចោទ​ជា​អនីតិជន​ជំនួយ​ពី​មេធាវី​ត្រូវ​តែ​មាន​ជា​ដាច់ខាត​ (​មាត្រា​ ៣០១ ​នៃ​ក្រមនីតិវិធី​ព្រហ្មទណ្ឌ​)៕

0

Comments

Please, login or register to post a comment