Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្វែងយល់​ពី​សិទ្ធិ​ការពារ​ខ្លួន​របស់​ជនសង្ស័យ​ ឬ​ជន​ជាប់ចោទ

Content image - Phnom Penh Post
លោក​មេធាវី សួន វីរៈបញ្ញា នៃ​ក្រុម​មេធាវី​ខ្មែរ​អប្សរា​។ រូបថត សហការី

ស្វែងយល់​ពី​សិទ្ធិ​ការពារ​ខ្លួន​របស់​ជនសង្ស័យ​ ឬ​ជន​ជាប់ចោទ

កាលពី​សប្តាហ៍​មុន​ភ្នំពេញ​ប៉ុស្តិ៍​បាន​ចុះ​ផ្សាយ​ភាគ​ទី​ ១ ទាក់ទង​នឹង​សិទ្ធិ​ដើម្បី​ការពារ​ខ្លួន​បើ​មាន​ការ​ចាប់​ខ្លួន​ជន​ណា​ម្នាក់​ដែល​ទាមទារ​ត្រូវ​ឲ្យ​មាន​មេធាវី​ក្នុង​ការ​ការពារ​ក្តី​។

ជុំវិញ​ករណី​នេះ​ភ្នំពេញ​ប៉ុស្តិ៍​បាន​សម្ភាស​ជាមួយ​លោក​មេធាវី សួន វីរៈបញ្ញា នៃ​ក្រុមហ៊ុន​មេធាវី​ខ្មែរ​អប្សរា​ដែល​មាន​អាសយដ្ឋាន​ផ្ទះ​លេខ​ ៥ ​អា ផ្លូវ​លេខ​ ២៨៥ សង្កាត់​បឹងកក់​ ១ ខណ្ឌ​ទួលគោក​ដែល​ជា​ភាគ​បន្ត​ដូច​តទៅ​... ទិដ្ឋភាព​ទាំង​នេះ​គឺ​មិន​គួរ​កើតឡើង​ទេ​ក្នុង​សង្គម​ខ្មែរ​ហើយ​វា​ច្បាស់​ណាស់​ផ្ទុយ​ពី​គោលការណ៍​ច្បាប់​ជាតិ និង ​អន្តរជាតិ​ និង​ជាពិសេស​គឺ​ផ្ទុយ​ពី​គោលការណ៍​សំខាន់​ក្នុង​បទល្មើស​ព្រហ្មទណ្ឌ​គឺ​គោលការណ៍​សន្មត​ជា​មុន​ថា​គ្មាន​ទោស​ដែល​ខ្ញុំ​បាន​ជម្រាប​ជូន​ខាង​លើ​នេះ​។

បើ​មាន​ឱកាស​ក្នុង​កិច្ចសម្ភាសន៍​លើក​ក្រោយ​ទៀត​ខ្ញុំ​បាទ​នឹង​លើក​ឡើង​ឲ្យ​បាន​ទូលំទូលាយ​ជាង​នេះ​ថា​មូលហេតុ​អ្វី​ទើប​មិន​ត្រូវ​ឲ្យ​មាន​ការ​វាយដំ​ធ្វើ​​ទារុណកម្ម​ទៅលើ​ជនសង្ស័យ​នៅ​ពេល​ដែល​ចាប់​ខ្លួន​បាន​។

បន្ទាប់ពី​ត្រូវ​នាំ​ខ្លួន​មក​សាកសួរ​នៅ​តុលាការ​តើ​ជនសង្ស័យ​ត្រូវ​ឆ្លងកាត់​ការ​ស៊ើបសួរ​ប៉ុន្មាន​ដំណាក់កាល​? តើ​ជន​នោះ​អាច​ពឹងពាក់​មេធាវី​បាន​ទេ​?

បាទ​ដោយសារ​សំណួរ​នេះ​គឺ​មាន​ភាព​ទូលំ​ទូលាយ​ណាស់​ដូចនេះ ខ្ញុំ​សូម​ឆ្លើយ​ដោយ​សាមញ្ញ​ដើម្បី​ឲ្យ​មាន​ភាព​ងាយស្រួល​យល់ និង​ចាប់​បាន​៖ ​នៅ​ពេល​ដែល​នគរបាល​យុត្តិធម៌​បាន​បញ្ជូន​ខ្លួន​ជនសង្ស័យ​មក​ដល់​តុលាការ​ជនសង្ស័យ​ត្រូវ​ឆ្លងកាត់​តាម​នីតិវិធី​របស់​តុលាការ​ដែល​នីតិវិធី​នេះ​ត្រូវ​អនុវត្ត​ស្រប​ទៅ​តាម​ក្រម​នីតិវិធី​ព្រហ្មទណ្ឌ​ឆ្នាំ​ ២០០៧​។

ដំបូង​ជនសង្ស័យ​ត្រូវ​ឆ្លង​កាត់​ដំណាក់កាល​ស៊ើបអង្កេត​របស់​ស្ថាប័ន​អយ្យការ​ដែល​ជនសង្ស័យ​នឹង​ត្រូវ​បាន​នាំ​ខ្លួន​ទៅ​ឆ្លើយ​នៅ​ចំពោះ​មុខ​ព្រះរាជអាជ្ញា​។

បន្ទាប់ពី​ ការ​សាកសួរ​ជនសង្ស័យ ជនរងគ្រោះ ឬ​បុគ្គល​ជា​សាក្សី​ដែល​ពាក់ព័ន្ធ​នឹង​ការ​ពិនិត្យ​ភ័ស្តុតាង​រួច​ហើយ​តំណាង​អយ្យការ​អាច​សម្រេច​ចោទប្រកាន់​ជនសង្ស័យ​ប្រសិន​បើ​គាត់​យល់​ឃើញ​ថា​ជនសង្ស័យ​នោះ​ពិត​ជា​បាន​ប្រព្រឹត្ត​បទល្មើស​នោះ​មែន​តែ​បើ​សិន​ជា​យោងតាម​ការ​សាកសួរ​ការ​ស៊ើបអង្កេត និង​ការ​សិក្សា​ភ័ស្តុតាង​កន្លង​មក​គាត់​យល់​ឃើញ​ថា​ជនសង្ស័យ​នោះ​មិន​បាន​ប្រព្រឹត្ត​បទល្មើស​ទេ​នោះ​គាត់​អាច​ធ្វើការ​តម្កល់​រឿង​ទុក​ឥត​ចាត់ការ​ (​មាត្រា​ ៤០ ​នៃ​ក្រម​នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​)​។

ចំពោះ​ការ​ចោទប្រកាន់​របស់​តំណាង​អយ្យការ​គឺ​អាច​ធ្វើ​ទៅ​តាម​ ៣ ​របៀប​គឺ​៖ ​ការ​បើក​ធ្វើការ​ស៊ើបសួរ​,​ការ​បញ្ជូន​ទៅ​ជំនុំជម្រះ​ផ្ទាល់​ ឬ​តាម​នីតិវិធី​បង្គាប់​ឲ្យ​ចូល​បង្ហាញ​ខ្លួន​ភ្លាម​(​មាត្រា​ ៤៣ ​នៃ​ក្រម​នីតិវិធី​ព្រហ្មទណ្ឌ​នៃ​ព្រះរាជាណាចក្រ​កម្ពុជា​)​។

ចំពោះ​បទលើ្មស​ឧក្រិដ្ឋ​ព្រះរាជអាជ្ញា​ត្រូវ​តែ​បើក​ការ​ស៊ើបសួរ​ខុស​ពី​បទល្មើស​មជ្ឈិម​ដែល​ក្នុង​បទលើ្មស​មជ្ឈិម​ព្រះរាជអាជ្ញា​អាច​បើក​ការ​ស៊ើបសួរ​ក៏​បាន​ឬ​មិន​បើក​ក៏​បាន​។ ឧទាហរណ៍​ថា​ជន​នោះ​ត្រូវ​បាន​តំណាង​អយ្យការ​ចោទ​ពី​បទ​ឃាតកម្ម​នោះ​គាត់​ត្រូវ​ឆ្លងកាត់​នីតិវិធី​របស់​តុលាការ​មួយ​ដំណាក់​ទៀត​គឺ​នីតិវិធី​នៃ​ការ​ស៊ើបសួរ​ដែល​នីតិវិធី​នេះ​គឺ​ស្ថិត​នៅ​ក្រោម​សមត្ថកិច្ច​របស់​ចៅក្រម​ស៊ើបសួរ​។

ក្នុង​ដំណាក់កាល​នៃ​ការ​ស៊ើបសួរ​នេះ​គឺ​មាន​គោលដៅ​៖ ​ស្វែង​រក​ធាតុ​ចាំបាច់​សម្រាប់​ធានា​ដល់​ការ​ចោទប្រកាន់​ស្វែងរក​ភ័ស្តុតាង និង​ពិរុទ្ធភាព​សម្រាប់​អង្គហេតុ​ចោទប្រកាន់ និង​ជា​ការ​ធានា​នូវ​និរន្តរភាព​សម្រាប់​ដំណើរការ​កាត់សេចក្តី​។ បន្ទាប់ពី​ការ​​ស៊ើបសួរ​ត្រូវ​បាន​ចប់​សព្វ​គ្រប់​បើ​ចៅក្រម​ស៊ើបសួរ​យល់​ឃើញ​ថា​ជន​ត្រូវ​ចោទ​បាន​ប្រព្រឹត្ត​អំពើ​ដែល​ជា​បទឧក្រិដ្ឋ​បទមជ្ឈិម​ ឬ​បទលហុ​នោះ​ចៅក្រម​ស៊ើបសួរ​សម្រេច​បញ្ជូន​ជន​ត្រូវ​ចោទ​ទៅ​មុខ​តុលាការ​ជំនុំជម្រះ​។

នៅ​ក្នុង​ការ​ជំនុំជម្រះ​បើ​សិន​ជា​បទល្មើស​នោះ​ជា​បទឧក្រិដ្ឋ​ការ​ជំនុំជម្រះ​ត្រូវ​ធ្វើ​ឡើង​ដោយ​ក្រុមប្រឹក្សា​ជំនុំជម្រះ​ដែល​មាន​ចៅក្រម​ចំនួន ៣ ​រូប​ដែល​មួយ​រូប​ជា​ប្រធាន​ក្រុម​ប្រឹក្សា​ជំនុំជម្រះ​ និង​ ២ ​រូប​ជា​ចៅក្រម​ប្រឹក្សា​។

ជនសង្ស័យ​ជន​ត្រូវ​ចោទ​ ឬ​ជន​ជាប់ចោទ​សុទ្ធ​តែ​ត្រូវ​បាន​ធានា​នូវ​សិទ្ធិ​ក្នុង​ការ​មាន​មេធាវី​ការពារ​ក្តី​ទោះ​ជា​គាត់​ស្ថិត​នៅ​ក្នុង​ដំណាក់​កាលណា​ក៏ដោយ​គឺ​មាន​ន័យ​ថា​ចាប់ពី​ពេល​ដែល​នគរបាល​ចាប់​ខ្លួន​គាត់​គឺ​គាត់​មាន​សិទ្ធិ​ក្នុង​ការ​មាន​មេធាវី​ការពារ​សិទ្ធិ​ឲ្យ​រូបគាត់​។

ពេល​ត្រូវ​បាន​តុលាការ​កោះ​ហៅ​មក​ជំនុំ​ជម្រះ​តើ​ជន​ជាប់ចោទ​មាន​សិទ្ធិ​អ្វី​ខ្លះ​ដែល​ច្បាប់​ផ្តល់​ឲ្យ​គាត់​ក្រៅពី​សិទ្ធិ​មាន​មេធាវី​ក្នុង​ពេល​ជំនុំជម្រះ​ក្តី​?

នៅ​ពេល​ដែល​តុលាការ​នាំ​ជន​ជាប់ចោទ​មក​ចំពោះ​មុខ​សវនាការ​ដើម្បី​ធ្វើការ​ជំនុំជម្រះ​នោះ​ជន​ជាប់ចោទ​មាន​សិទ្ធិ​សំខាន់ៗ​មួយ​ចំនួន​ដែល​ធានា​ដោយ​ច្បាប់​គឺ​សិទ្ធិ​ដឹង​អំពី​បទ​ចោទ​។ ជន​ជាប់ចោទ​ត្រូវ​តែ​បាន​ដឹង​អំពី​អំពើ​ល្មើស និង​បទល្មើស​ដែល​ចោទប្រកាន់​មកលើ​ខ្លួន​។

សិទ្ធិ​ក្នុង​ការ​ទទួល​បាន​ជំនួយ​ពី​មេធាវី​៖ ​ជន​ជាប់ចោទ​មាន​សិទ្ធិ​ពេញលេញ​ដើម្បី​មាន​មេធាវី​ការពារ​ក្តី​។ ​គាត់​មាន​សិទ្ធិ​ក្នុង​ការ​រក​មេធាវី​ដោយ​ខ្លួន​គាត់​តែ​បើ​ក្នុង​ករណី​ដែល​គាត់​ពុំ​មាន​ការ​ជ្រើសរើស​មេធាវី​ដោយ​ខ្លួនឯង​នោះ​មេធាវី​ត្រូវ​បាន​ចាត់​តាំង​តាម​គំនិត​ផ្តើម​របស់​ប្រធាន​តុលាការ​នៅក្នុង​លក្ខខណ្ឌ​ដែល​មាន​ចែង​នៅក្នុង​ច្បាប់​ស្តីពី​លក្ខន្តិកៈ​មេធាវី​។ សិទ្ធិ​ចំពោះ​មុខ​៖ ​ជន​ជាប់ចោទ​ត្រូវ​តែ​បង្ហាញ​ខ្លួន​ពេល​សវនាការ​របស់​តុលាការ​ដោយ​ផ្ទាល់​។ ​​

ជន​ជាប់ចោទ​ត្រូវ​តែ​បាន​ដឹង និង​មាន​សិទ្ធិ​ចូលរួម​ក្នុង​ការ​ការពារ​ខ្លួន​នៅ​ក្នុង​ដំណើរការ​នៃ​ការ​កាត់ក្តី​មក​លើ​ខ្លួន​ដោយ​ផ្ទាល់​។

សិទ្ធិ​ក្នុង​ការ​ទទួល​ជំនួយ​ពី​អ្នក​បកប្រែ​៖...(​សូម​រង់ចាំ​អាន​ភាគ​បញ្ចប់​នៅ​សប្តាហ៍​ក្រោយ​)

0

Comments

Please, login or register to post a comment