Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្វែងយល់​ពី​​ ការ​ចេញ​ដីកា​រក្សា​ការពារ

Content image - Phnom Penh Post
លោក​មេធាវី អ៊ាន សំអាត នៃ​ការិយាល័យ​ក្រុម​មេធាវី យុត្តិធម៌ អន្តរជាតិ​។ រូបថត សហការី

ស្វែងយល់​ពី​​ ការ​ចេញ​ដីកា​រក្សា​ការពារ

នៅ​ក្នុង​ការ​ប្តឹងប្តល់​ណា​មួយ​ទៅ​តុលាការ ពិសេស​រឿង​អចលនទ្រព្យ​ ឬ​សំណង​រដ្ឋប្បវេណី បើសិន​ជា​ភាគី​ណា​មួយ​គ្មាន​ទ្រព្យ​សង​ជា​សំណង​ទៅ​ភាគី​ម្ខាង​ទៀត ហើយ​នៅ​ពេល​ភាគី​នោះ​ចាញ់​ក្តី តុលាការ​តែងតែ​ចេញ​ដីកា​មួយ ដើម្បី​ហាមឃាត់​មិន​ឲ្យ​មាន​ការ​លក់​ ឬ​ធ្វើ​ជំនួញ​ណា​មួយ​លើ​អចលនទ្រព្យ​នោះ​។ ដីកា​ដែល​តុលាការ​ចេញ​បង្គាប់​នោះ​ហៅ​ថា​ដីកា​រក្សា​ការពារ​។

ដើម្បី​បាន​ជ្រាប​ច្បាស់​ថា តើ​ដីកា​រក្សា​ការពារ​នេះ​មាន​អត្ថន័យ​យ៉ាង​ណា​នោះ​ភ្នំពេញ​ប៉ុស្តិ៍​បាន​សម្ភាស​ជាមួយ​លោក​មេធាវី អ៊ាន សំអាត អត្តលេខ ៧៨១ នៃ​ការិយាល័យ​ក្រុម​មេធាវី​យុត្តិធម៌ អន្តរជាតិ ដែល​មាន​ខ្លឹមសារ​ដូច​ខាង​ក្រោម ៖

ដូចម្តេច​ដែល​ហៅ​ថា​ដីកា​រក្សា​ការពារ ?

ដីកា​រក្សា​ការពារ មកពី​ពាក្យ​ដីកា​+​រក្សា​ការពារ​។ ដីកា​ក្នុង​សំណួរ​នេះ​មាន​ន័យ​ថា​ជា​សេចក្ដី​សម្រេច​ ឬ​ជា​បញ្ជា​របស់​អាជ្ញាធរ​តុលាការ ដើម្បី​ឲ្យ​អាជ្ញាធរ​ ឬ​អ្នក​ពាក់ព័ន្ធ​អនុវត្ត​។ ពាក្យ​ដីកា​នេះ​ត្រូវ​បាន​ប្រើប្រាស់​សម្រាប់​សេចក្ដី​សម្រេច​របស់​រដ្ឋបាល​ថ្នាក់​ក្រោម​ជាតិ និង​គណៈសង្ឃ​ផង​ដែរ ប៉ុន្តែ​កំណត់​ន័យ​ផ្សេង​ពី​នេះ​។

ចំណែក​រក្សា​ការពារ​មាន​ន័យ​ថា​ជា​វិធានការ​ចាត់ចែង​បណ្ដោះអាសន្ន​មុន​ពេល​សេចក្ដី​សម្រេច​អង្គសេចក្ដី​ស្ថាពរ​។ ដូចនេះ​ដីកា​រក្សា​ការពារ​ជា​សេចក្ដី​សម្រេច​របស់​អាជ្ញាធរ​តុលាការ មុន​អង្គ​សេចក្ដី​ដើម្បី​រឹបអូស​ទ្រព្យសម្បត្តិ​កូន​បំណុល​មក​រក្សា​ទុក​ហាមឃាត់​កូន​បំណុល មិន​ឲ្យ​ចាត់ចែង​ទ្រព្យសម្បត្តិ ឬ​កំណត់​ឋានៈ​ឲ្យ​ភាគី​ណា​មួយ​គ្រប់គ្រង​ទ្រព្យសម្បត្តិ​ដែល​មាន​វិវាទ​ជា​បណ្ដោះអាសន្ន​។

តើ​តុលាការ​អាច​ចេញ​ដីកា​រក្សា​ការពារ​បាន​នៅ​ពេល​ណា ? ហើយ​មាន​មូលហេតុ​អ្វី​ខ្លះ​ទើប​តុលាការ​ចេញ​ដីការ​ក្សា​ការពារ​?

ដីការ​ក្សា​ការពារ​អាច​ចេញ​បាន​នៅ​ពេល​ដែល​ភាគី​វិវាទ​បាន​ដាក់​ពាក្យ​សុំ​ទៅ​តុលាការ​ឲ្យ​ចេញ​ដីកា​សម្រេច​រក្សា​ការពារ​ដោយ​មាន​មូលហេតុ​ស្រប​តាម​មាត្រា ៥៣០ នៃ​ក្រមនីតិវិធី​រដ្ឋប្បវេណី​ដូចជា​មាន​ការ​បារម្ភ​ថា​នៅ​ពេល​បាន​សាលក្រម​ ឬ​សាលដីកា​ស្ថាពរ​លំបាក​ក្នុង​ការ​អនុវត្ត ឬ​មិន​អាច​អនុវត្ត​បាន​ដោយសារ​មាន​ការ​ប្រែប្រួល​ស្ថានភាព​បច្ចុប្បន្ន​នៃ​ទ្រព្យសម្បត្តិ​របស់​កូនបំណុល ឬ​មាន​ការ​បារម្ភ​ថា​នឹង​មាន​ការ​ខូចខាត​ធ្ងន់ធ្ងរ​។

តើ​ដីកា​រក្សា​ការពារ​ច្បាប់​មាន​កំណត់​ពី​រយៈពេល​ច្បាស់លាស់​ទេ ឬ​គ្រាន់តែ​រយៈពេល​បណ្តោះ​អាសន្ន ?

ច្បាប់​មិន​អាច​កំណត់​រយៈពេល​ច្បាស់លាស់​បាន​ទេ ចំពោះ​ដីការ​ក្សា​ការពារ​គឺ​កំណត់​តែ​រយៈពេល​ជា​បណ្ដោះអាសន្ន ហេតុ​នេះ​ហើយ​បាន​ជា​ច្បាប់​កំណត់​ជាក់លាក់​តែ​អានុភាព​នៃ​ដីកា​រក្សា​ការពារ​ដូចជា​៖ ​នៅ​ពេល​តុលាការ​ចេញ​ដីកា​សម្រេច​រក្សា​ការពារ​ម្ចាស់​បំណុល​មាន​រយៈពេល​មិន​លើស​ពី ២ សប្ដាហ៍​គិត​ពី​ថ្ងៃ​ទទួល​ត្រូវ​ដាក់​ពាក្យ​សុំ​អនុវត្ត​ដីការ​ក្សា​ការពារ បើ​មិន​បាន​ដាក់ បើ​ហួស​រយៈពេល​ខាង​លើ ដីកា​រក្សា​ការពារ​នោះ​មិន​មាន​សុពលភាព​អនុវត្ត​ឡើយ​ (​មាត្រា​ ៥៦២​ ក្រម​នីតិវិធី​រដ្ឋប្បវេណី​)​។

ករណី​ដីកា​រក្សា​ការពារ​បាន​ចូល​ស្ថាពរ ដីកា​នេះ​មាន​អានុភាព​អនុវត្ត​រហូត​ដល់​មាន​សាលក្រម ឬ​សាលដីកា​អង្គសេចក្ដី​ស្ថាពរ​លើក​លែង​តែ​មាន​មូលហេតុ​លុបចោល​ដូច​មាន​ចែង​ក្នុង​មាត្រា​ ៥៥៧,៥៥៨, ​និង ៥៥៩ ក្រម​នីតិវិធី​រដ្ឋប្បវេណី​នោះ​តុលាការ​អាច​លុប​ចោល​ដីកា​រក្សា​ការពារ​វិញ​បាន​។

ឧទាហរណ៍​បើ​តុលាការ​ថ្នាក់​ក្រោម​ចេញ​ដីកា​រក្សា​ការពារ​តាម​ពាក្យ​សុំ​របស់​ភាគី ក ហើយ​ភាគី ខ មិន​សុខចិត្ត តើ​ភាគី ខ អាច​ប្ដឹង​មក​សាលា​ឧទ្ធរណ៍​បាន​ដែរ​ឬ​ទេ​?

ក្នុង​រឿង​ក្ដី​រដ្ឋប្បវេណី​ភាគី​ដែល​ដាក់​ពាក្យ​បណ្ដឹង​ហៅ​ថា​ដើម​ចោទ រីឯ​ភាគី​ម្ខាង​ទៀត​ហៅថា ចុង​ចម្លើយ ចំណែក​រឿង​រក្សា​ការពារ​វិញ ភាគី​ដែល​ដាក់​ពាក្យ​សុំ ហៅថា ម្ចាស់​បំណុល រីឯ​ភាគី​ម្ខាង​ទៀត​ហៅថា កូនបំណុល​។

ឧទាហរណ៍​ខាង​លើ​បាន​បញ្ជាក់​ថា​ប្រសិន​បើ​ភាគី​ក​ជា​ម្ចាស់​បំណុល​ដាក់​ពាក្យ​សុំ​ដីកា​រក្សា​ការពារ​ទៅ​សាលា​ដំបូង​ហើយ​សាលា​ដំបូង​ចេញ​ដីកា​រក្សា​ការពារ នោះ​ភាគី ខ ជា​កូន​បំណុល​មាន​រយៈពេល​មិន​លើស​ពី ២ ​សប្ដាណ៍​ដើម្បី​ដាក់​ពាក្យ​សុំ​តវ៉ា​ចំពោះ​ដីកា​រក្សា​ការពារ​នោះ​ទៅ​សាលា​ដំបូង​ដែល​ចេញ​ដីកា​រក្សា​ការពារ​សិន​ហើយ​បើ​តុលាការ​ដែល​បាន​ចេញ​ដីកា​រក្សា​ការពារ​នោះ​សម្រេច​បដិសេធ​ចំពោះ​ពាក្យ​សុំ​តវ៉ា​ទើប​ភាគី ខ អាច​ប្ដឹង​ជំទាស់​ទៅ​ឧទ្ធរណ៍​បាន​។

តើ​ដីកា​រក្សា​ការពារ​ប្រើប្រាស់​បាន​ទៅ​លើ​អ្វី​ខ្លះ​?

តាម​មាត្រា ៥៣០ និង ៥៣១ ក្រម​នីតិវិធី​រដ្ឋប្បវេណី​ដីកា​រក្សា​ការពារ​ប្រើប្រាស់​បាន​ទៅ​លើ​៖ ​ទ្រព្យ​សម្បត្តិ​កូន​បំណុល​រឹបអូស​ជា​បណ្ដោះអាសន្ន ឬ​ហាមឃាត់​នូវ​ទ្រព្យសម្បត្តិ​របស់​កូន​បំណុល​ដើម្បី​រក្សា​ការពារ​ទុក​ការ​អនុវត្ត​ដោយ​បង្ខំ​ចំពោះ​សិទ្ធិ​លើ​បំណុល​ដែល​មាន​គោលបំណង​ឲ្យ​សង​ជា​ប្រាក់​។

វត្ថុ​ដែល​ជា​កម្មវត្ថុ​វិវាទ​៖ ជា​ការ​រក្សា​ការពារ​មិន​ឲ្យ​ប្រែប្រួល​ស្ថានភាព​បច្ចុប្បន្ន​នៃ​វត្ថុ និង​ឋានៈ​ភាគី​ណា​មួយ​នៃ​វិវាទ​ទំនាក់​ទំនង​នឹង​សិទ្ធិ​៕

0

Comments

Please, login or register to post a comment