Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្វែង​យល់​ពី ​គម្រោង​ធ្វើ​វិសោធនកម្ម​ច្បាប់​ការងារ ​(តចប់)

Content image - Phnom Penh Post
លោក ម៉ាន់ សេងហាក់ ​អនុប្រធាន​សហជីព​សេរីកម្មករ​។ រូបថត សហការី

ស្វែង​យល់​ពី ​គម្រោង​ធ្វើ​វិសោធនកម្ម​ច្បាប់​ការងារ ​(តចប់)

កាលពី​សប្តាហ៍​មុន​ភ្នំពេញ​ប៉ុស្តិ៍​បាន​ចុះ​ផ្សាយ​ភាគ​ទី​ ១ ​នូវ​បទសម្ភាស​របស់​​លោក​​ ម៉ាន់ សេងហាក់ ​អនុប្រធាន​សហជីព​សេរីកម្មករ​នៃ​ព្រះរាជាណាចក្រ​កម្ពុជា​ស្តីពី​ការ​ស្នើ​ធ្វើ​វិសោធនកម្ម​ច្បាប់​ការងារ​របស់​ក្រសួង​ការងារ​ដើម្បី​ឲ្យ​ថៅកែ​រោងចក្រ​បើក​ប្រាក់​ឈ្នួល​ដល់​កម្មករ-កម្មការិនី​​ ២ ​សប្តាហ៍​ម្តង​ក្នុង​ ១ ​ខែ។ ​

ពេល​នេះ​សូម​អាន​ភាគ​បញ្ចប់​ដូច​តទៅ​៖

លោក​បាន​ធ្វើ​ការងារ​ជាមួយ​កម្មករ​កាត់ដេរ​តើ​​លោក​មើល​​ឃើញ​ថា​ច្បាប់​ស្តីពី​ការងារ​បាន​ជួយ​ដល់​កម្មករ​យ៉ាង​ម៉េច​ដែរ​ហើយ​ត្រង់​ណា​ធ្វើ​ឲ្យកម្មករ​ខាត​ប្រយោជន៍​?

យើង​ឃើញ​ថា​ច្បាប់​ស្តីពី​ការងារ​បាន​ជួយ​ដល់​កម្មករ​យើង​ច្រើន​ដែរ​ហើយ​​ចំណុច​ខ្លះ​ដែល​មិន​ជួយ​ដល់​កម្មករ​នោះ​ដូច​ខ្ញុំ​បាន​បញ្ជាក់​ហើយ​ថា​ទាក់ទង​នឹង​កិច្ចសន្យា​កំណត់​ដែល​បច្ចុប្បន្ន​ក្រុមហ៊ុន​កំពុង​​អនុវត្ត​កិច្ច​សន្យា​កំណត់​ហ្នឹង​។ ​នេះ​​ហើយ​ដែល​ធ្វើ​ឲ្យ​បាត់បង់​ការងារ​​បាត់បង់​សិទ្ធិ​ក្នុង​ការ​បញ្ចេញ​មតិ​របស់​កម្មករ​។ ​

ដោយសារ​បច្ចុប្បន្ន​នេះ​ខាង​កម្មករ​ និង​ភាគី​​ក្រុមហ៊ុន​គេ​អនុវត្ត​នូវ​កិច្ចសន្យា​​ខ្លីៗ​មាន​ន័យ​ថា​កិច្ចសន្យា​​ ៣ ​ខែ​​​ ៦ ​ខែ​ដែល​​ធ្វើ​ឲ្យ​កម្មករ​បាត់​សិទ្ធិ​ក្នុង​ការ​បញ្ចេញ​មតិ​។​

ព្រោះ​កាល​ណា​យើង​​បញ្ចេញ​មតិ​មាន​ន័យ​ថា​បើ​​មាន​ការ​តវ៉ា​ត្រូវ​បាន​ក្រុមហ៊ុន​បញ្ឈប់​ដែល​មាន​នៅក្នុង​កិច្ចសន្យា​រយៈពេល​ខ្លី​នោះ​។​ កន្លែង​នេះ​ហើយ​ដែល​ធ្វើឲ្យ​កម្មករ​បាត់បង់​អត្ថប្រយោជន៍​។ ​

ចំពោះ​​មាត្រា​មួយ​ចំនួន​ដូចជា​មាត្រា​ ១០៣ ​គឺ​​ក្រុម​រដ្ឋាភិបាល​​មិន​ទាន់​បាន​អនុវត្ត​រួម​​ទាំង​និយោជក​ផង​ដែរ​ ពីព្រោះ​ប្រាក់​ឈ្នួល​ដែល​អាច​ទ្រទ្រង់​​ជីវភាព​កម្មករ​ឲ្យ​រស់​បាន​សមរម្យ​មិន​ត្រូវ​បាន​អនុវត្ត​ទេ​។

លោក​ថា​កិច្ចសន្យា​ខ្លីៗ​ដែល​មាន​រយៈពេល​ ៣ ​ខែ​ ៦ ​ខែ​​ហ្នឹង​ខាង​រោងចក្រ​​សរសេរ​ហើយ​តើ​គាត់​មាន​ឆ្លង​ក្រសួង​ដើម្បី​ពិនិត្យ​ដែរ​ទេ​ឬ​មួយ​​ខាង​​រោងចក្រ​សម្រេច​​​ខ្លួនឯង​?

ជាទូទៅ​ខាង​រោងចក្រ​គឺ​គាត់​សម្រេច​តែ​​ខ្លួន​គាត់​ទេ​ប៉ុន្តែ​ក៏​​មាន​ការ​បកស្រាយ​ពី​​ខាង​ក្រសួង​ការងារ​ដែរ​។ ​ដោយសារ​​កិច្ចសន្យា​រយៈពេល​ខ្លី​ហ្នឹង​ខាង​​ក្រសួង​ជា​​អ្នក​ផ្តល់​យោបល់​ពោល​គឺ​មាន​ន័យ​ថា​ខាង​ក្រុមហ៊ុន​មាន​សិទ្ធិ​ធ្វើ​កិច្ចសន្យា​រយៈពេល​​ខ្លី​ ឬ​​កិច្ចសន្យា​ការងារ​មិន​កំណត់​។ ​អ៊ីចឹង​ហើយ​ទើប​ធ្វើ​ឲ្យ​ក្រុមហ៊ុន​គាត់​អនុវត្ត​បែប​នេះ​។

​ប្រសិន​បើ​​ខាង​ក្រសួង​បញ្ជាក់​ថា​កិច្ចសន្យា​ការងារ​ហ្នឹង​គឺ​មិន​ឲ្យ​លើស​ពី​ ២ ​ឆ្នាំ​គឺ​មានន័យ​ថា​ជា​កិច្ចសន្យា​​រយៈពេល​វែង ​ប៉ុន្តែ​​ខាង​​ក្រុមហ៊ុន​គេ​មិន​ធ្វើ​កិច្ចសន្យា​​ហ្នឹង​ទេ​។ ​

បើ​ប្រើ​កិច្ចសន្យា​ហ្នឹង​ទៅ​វា​​ធ្វើឲ្យ​កម្មករ-កម្មការិនី​មាន​​សិទ្ធិ​​សេរីភាព​​ក្នុង​ការ​តវ៉ា​ទាមទារ​ផ្សេងៗ​ដែល​គេ​គិត​ថា​ធ្វើ​ឲ្យ​បាត់បង់​អត្ថប្រយោជន៍​​ក្រុមហ៊ុន​។ ​អីចឹង​ខាង​ក្រុមហ៊ុន​បែរ​ជា​មក​ប្រើ​កិច្ចសន្យា​​​រយៈពេល​ខ្លីៗ​តាម​តែ​ក្រុមហ៊ុន​នឹក​ឃើញ​​​។ ​

យើង​​ឃើញ​ថា​ មក​​ទល់​ពេល​នេះ​​ក្រសួង​ការងារ​មិន​ទាន់​ដាក់​ពិន័យ​ ឬ​អន្តរាគមន៍​ទាក់ទង​នឹង​រឿង​កិច្ចសន្យា​រយៈពេល​ខ្លី​​ទេ​។ ​​ឥឡូវ​នេះ​ឃើញ​ថា​ខាង​ក្រសួង​ការងារ​ចង់​ធ្វើ​វិសោធនកម្ម​ច្បាប់​​ទាក់ទង​នឹង​ការ​​បើក​ប្រាក់​ឈ្នួល​ ២ ​សប្ដាហ៍​ម្តង​យ៉ាង​ម៉េច​នោះ​​គឺជា​​រឿង​របស់​ក្រសួង​ការងារ​ទេ​។ ​

ច្បាប់​បាន​បញ្ជាក់​ច្បាស់​ណាស់​​ ប៉ុន្តែ​​ការ​បកស្រាយ​របស់​​ក្រសួង​វា​​មិន​ច្បាស់លាស់​ហើយ​មិន​មាន​វិធានការ​​តឹងរ៉ឹង​​ទើប​ក្រុមហ៊ុន​​បន្លែ​បន្លំ​ក្នុង​ការ​អនុវត្ត​ច្បាប់​ការងារ​នេះ​។

បច្ចុប្បន្ន​តើ​លោក​សង្កេត​ឃើញ​ថា​កម្មករ​កម្មករិនី​រោងចក្រ​កាត់ដេរ​មាន​សិទ្ធិ​គ្រប់គ្រាន់​ក្នុង​ការ​តស៊ូ​មតិ​​​ដែរ​ទេ​បាទ ​?

បច្ចុប្បន្ន​នេះ​ជាទូទៅ​យើង​ឃើញ​ថា​ឲ្យ​តែ​រោងចក្រ​ដែល​មាន​កិច្ចសន្យា​ខ្លី​គឺ​កម្មករ​កម្មការិនី​មិន​មាន​សិទ្ធិ​ក្នុង​ការ​តវ៉ា​ទេ​ពីព្រោះ​បើ​តវ៉ា​គេ​នឹង​បញ្ឈប់​គាត់​ពី​​ការងារ​ហើយ​នៅក្នុង​កិច្ចសន្យា​នោះ​ការ​បកស្រាយ​របស់​ក្រសួង​ការងារ​ក៏​បាន​បញ្ជាក់​ដែរ​ថា​នៅ​ពេល​​កម្មករ​​បញ្ឈប់​កិច្ចសន្យា​គឺ​ខាង​ក្រុមហ៊ុន​មិន​ទទួល​យក​កម្មករ​ទេ​។ ​អាហ្នឹង​ហើយ​ដែល​ធ្វើឲ្យ​កម្មករ​រោងចក្រ​គាត់​បាត់បង់​ការងារ​។

បើ​យ៉ាង​នេះ​តើ​ច្បាប់​ស្តីពី​ការងារ​ជួយ​ថៅកែ​រោងចក្រ​ច្រើន​ជាង​កម្មករ​ឬ​យ៉ាង​ណា​?

យើង​ឃើញ​ថា​ច្បាប់​ការងារ​នេះ​បើ​​មើល​ឲ្យ​គ្រប់​ជ្រុងជ្រោយ​ទៅ​គឺ​​​ជួយ​​ទាំង​និយោជក​ទាំង​កម្មករ​ព្រោះ​បើ​អ្នក​បកស្រាយ​ច្បាប់​ឲ្យ​ស៊ី​ចង្វាក់​គ្នា​គឺ​វា​ការពារ​​ប្រយោជន៍​​ទាំង​សង​ខាង​​។ ​ប៉ុន្តែ​​បើ​អ្នក​បកស្រាយ​ច្បាប់​ហ្នឹង​មិន​ត្រូវ​ចំ​ចំណុច​វា​ធ្វើឲ្យ​កម្មករ​និយោជិត​បាត់បង់​​ប្រយោជន៍​។ ​

ប៉ុន្តែ​បញ្ហា​នេះ​សំខាន់​លើ​​ក្រសួង​ការងារ​ជា​អ្នក​បកស្រាយ​ព្រោះ​ខាង​រោងចក្រ​​មាន​មេធាវី​​ប្រចាំ​ក្រុមហ៊ុន​គេ​បកស្រាយ​ផ្សេង​ឯ​ខាង​កម្មករ​បកស្រាយ​ផ្សឹង​។ ​នេះ​ហើយ​បាន​ធ្វើឲ្យ​បាត់បង់​អត្ថប្រយោជន៍​កម្មករ​ហើយ​ក៏​វា​អាច​មាន​ផលចំណេញ​ទៅ​លើ​និយោជក​ដែរ​ដែល​សំអាង​លើ​ច្បាប់​នេះ​បាទ​។

លោក​សង្កេត​ឃើញ​ថា​ទាំង​កម្មករ​ពិសេស​ម្ចាស់​រោងចក្រ​បាន​​អនុវត្ត​ច្បាប់​​ការងារ​​​ត្រឹម​ត្រូវ​ឬទេ​?

បច្ចុប្បន្ន​នេះ​សឹង​តែ​​ ៩០ ​ភាគរយ​​ហើយ​ដែល​ក្រុមហ៊ុន​​មិន​បាន​អនុវត្ត​ច្បាប់​ការងារ​ព្រោះ​ច្បាប់​នេះ​យើង​ឃើញ​ថា​មាន​កន្លែង​ខ្លះ​បាន​ផ្តល់​សិទ្ធិ​ដល់​កម្មករ-កម្មការិនី​ហើយ​កាល​​ណា​​ផ្តល់​សិទ្ធិ​ឲ្យ​កម្មករ​និយោជិត​គឺ​​ធ្វើឲ្យ​ក្រុមហ៊ុន​បាត់បង់​ប្រយោជន៍​។ ​អ៊ីចឹង​ហើយ​ខ្ញុំ​បញ្ជាក់​ថា​ច្បាប់​ស្តីពី​ការងារ​នេះ​ប្រសិន​បើ​​មាន​​ការ​អនុវត្ត​ទាំង​សង​ខាង​វា​នឹង​ផ្តល់​ផលប្រយោជន៍​​ទាំង​សង​ខាង​។ ​ប៉ុន្តែ​​បើ​អនុវត្ត​តែ​ម្ខាង​វា​បាត់បង់​អត្ថប្រយោជន៍​ម្ខាង។

ខ្ញុំ​បញ្ជាក់​ហើយ​ថា​ច្បាប់​​ស្តីពី​ការងារ​ខាង​ក្រុមហ៊ុន​ស្ទើរតែ​មិន​បាន​អនុវត្ត​គឺ​ភាគ​ច្រើន​តែ​ម្តង​។

ចុះ​បើ​ភាគី​រោងចក្រ​មិន​បាន​អនវត្ត​អ៊ីចឹង​ តើ​ខាង​ក្រសួង​ការងារ​បាន​ដឹង​ឬ​អត់​?

តាមពិត​​ក្រសួង​ការងារ​ដឹង​តែ​ដូច​ខ្ញុំ​បាន​បញ្ជាក់​អ៊ីចឹង​ថា​ក្រសួង​គាត់​ដឹង​ហើយ​តែ​គាត់​ធ្វើ​មិន​ដឹង​។ ​គាត់​ឆ្លើយ​ថា​រឿង​អ្វី​ក៏​ដោយ​សំខាន់​បំផុត​គឺ​ឲ្យ​តែ​មាន​ពាក្យ​បណ្តឹង​គឺ​គាត់​និយាយ​តែ​ប៉ុណ្ណឹង​។

តាមពិត​ក្រសួង​ត្រូវ​ត្រួត​ពិនិត្យ​ទោះ​ជា​មិន​មាន​ពាក្យ​បណ្តឹង​ក៏ដោយ​។ ​ឧទាហរណ៍​ថា​ក្រុមហ៊ុន​តម្រូវ​ឲ្យ​កម្មករ​ធ្វើការ​ថែម​ម៉ោង​តែ​ ២ ​ម៉ោង​ទេ​ ប៉ុន្តែ​ក្រុមហ៊ុន​ខ្លះ​ឲ្យ​គាត់​ធ្វើការ​ថែម​ដល់​ម៉ោង​ ៨ ​យប់​។ ​

ដូច្នេះ​ខាង​ក្រសួង​​គាត់​មិន​ខ្វល់​បើ​មាន​ពាក្យ​បណ្តឹង​ទើប​គាត់​ខ្វល់​។ ​ខ្ញុំ​សូម​បញ្ជាក់​ដែរ​ថា​ភាគច្រើន​​យើង​ឃើញ​ថា​ក្រសួង​បាន​បណ្តោយ​មិន​សូវ​យក​ចិត្ត​ទុក​ដាក់​អនុវត្ត​​ច្បាប់​ស្តីពី​ការងារ​ទេ។

ដោយសារ​គាត់​មិន​អនុវត្ត​នេះ​ហើយ​ទើប​​ពេល​ថ្មីៗ​នេះ​​ខាង​​ក្រសួង​មាន​​បំណង​ស្នើឲ្យ​ធ្វើ​វិសោធនកម្ម​ច្បាប់​ការងារ​។

កន្លង​មក​កម្មករ​កាត់ដេរ​បាន​ផ្ទុះ​​ការ​តវ៉ា​​ច្រើន​ ប៉ុន្តែ​ពេល​នេះ​ហាក់​ស្ងប់ស្ងាត់ តើ​នេះ​មក​​ពី​លក្ខខណ្ឌ​ការងារ​ល្អ​ ឬ​មួយ​យ៉ាង​ណា​?

ដោយសារ​ ១ ​ឆ្នាំ​ចុង​ក្រោយ​នេះ​ឃើញ​ថា​មាន​ច្បាប់​សហជីព​ដែល​ហាក់បី​ដូចជា​បិទ​សិទ្ធិ​សេរីភាព​ក្នុង​ការ​តវ៉ា​​ តែ​បែរ​ជា​បើក​សិទ្ធិ​ឲ្យ​រដ្ឋាភិបាល​ និង​ក្រុមហ៊ុន​ពេល​ដែល​មិន​អនុវត្ត​តាម​ច្បាប់​សហជីព​ដែល​ចេញ​មក​នេះ​ទៅ​វិញ​។​

ច្បាប់​​សហជីព​​តម្រូវ​ឲ្យ​កម្មករ​ដែល​គ្មាន​សមាជិក​គ្រប់​ចំនួន​​ហើយ​គ្មាន​សហជីព​ជា​តំណាង​មិន​ត្រូវ​បាន​ក្រសួង​​ឲ្យ​ចូលរួម​ដោះស្រាយ​ទេ​។ ​មួយ​រយៈ​នេះ​កម្មករ​បាត់​​សិទ្ធិ​បញ្ចេញ​មតិ​មក​ទល់​ថ្ងៃ​នេះ​ដោយសារ​តែ​​មាន​ច្បាប់​សហជីព​ហ្នឹង​ឯង​៕

0

Comments

Please, login or register to post a comment