Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​ផ្គត់ផ្គង់​ខុនដូ​កើន​ឡើង​ជិត ​៤ ​ម៉ឺន​យូនីត​ ខណៈ​ការ​លក់​ធ្លាក់​ចុះ​ធ្វើ​ឲ្យ​គម្រោង​មួយ​ចំនួន​ពន្យារ​ពេល​សាងសង់

Content image - Phnom Penh Post
គម្រោង​សំណង់​ខ្ពស់​ៗ​ជា​ច្រើន​នៅ​ក្រុង​ភ្នំពេញ​នា​ពេល​បច្ចុប្បន្ន​នេះ។ ហេង ជីវ័ន

ការ​ផ្គត់ផ្គង់​ខុនដូ​កើន​ឡើង​ជិត ​៤ ​ម៉ឺន​យូនីត​ ខណៈ​ការ​លក់​ធ្លាក់​ចុះ​ធ្វើ​ឲ្យ​គម្រោង​មួយ​ចំនួន​ពន្យារ​ពេល​សាងសង់

ការ​ផ្គត់ផ្គង់​ខុនដូ​បាន​ផ្ទុះ​ឡើង​នៅ​ទីក្រុង​ភ្នំពេញ​ដោយ​ចំនួន​ផ្គត់​ផ្គង់​បាន​កើន​ឡើង​ជិត​៤​ម៉ឺន​យូនីត​នៅ​ក្នុង​ទីផ្សារ​ដែល​តម្រូវការ​កំពុង​តែ​មាន​ការ​ថយ​ចុះ​ដែល​ធ្វើ​ឲ្យ​គម្រោង​មួយ​ចំនួន​បាន​ពន្យារ​ពេល​សាងសង់​នា​ពេល​នេះ។

យោង​តាម​ការ​សិក្សា​របស់​ក្រុមហ៊ុន Century21 Cambodia ដែល​បាន​បង្ហាញ​នៅ​ព្រឹក​ថ្ងៃ​ពុធ​ម្សិល​មិញ​បាន​ឲ្យ​ដឹង​ថា គិត​ត្រឹម​ឆមាស​ទី​១​ឆ្នាំ​នេះ​ការ​ប្រកាស​លក់​ខុនដូ​មុន​គម្រោង​មាន​ចំនួន​ចំនួន​រហូត​ដល់​ ១៣ ៧៣០ ​យូនីត ឬ​ឯកតា គឺ​កើន​ឡើង​ ៥២ ​ភាគរយ ធៀប​ទៅ​នឹង​រយៈ​ពេល​ដូច​គ្នា​កាល​ពី​ឆ្នាំ​មុន​។

បរិមាណ​ការ​ផ្គត់​ផ្គង់​ខុន​ដូ​ដ៏​សម្បើម​នេះ នឹង​នាំ​ទៅ​ដល់​ការ​ផ្គត់ផ្គង់​សរុប​កើនឡើង​ដល់ ៣៧ ៥៧០ ​ឯក​តា នៅ​ឆ្នាំ ​២០២០ ​ខាងមុខ ដោយ​កើន​រហូត​ដល់​ ៥៦ ​​ភាគរយ ក្នុង​មួយ​ឆ្នាំ​គិតពី​ឆ្នាំ ​​២០១៣ ​រហូត​ដល់​ពេល​បច្ចុប្បន្ន​នេះ​។

ការ​សិក្សា​ដដែល​បាន​ឲ្យ​ដឹង​ថា មក​ទល់​ពេល​នេះ​គម្រោង​ខុន​ដូ​ដែល​បានបញ្ចប់ និង​កំពុង​ដំណើរការ និង​ចាប់ផ្តើម​សាងសង់​មាន​សរុប​ទាំងអស់​ចំនួន​ ១១០​ គម្រោង ស្មើនឹង​ ១៤៨​ អគារ​។ ក្នុងនោះ​ខុន​ដូ​ចំនួន​២៤​បាន​ដាក់​ឲ្យ​ដំណើរការ ដែល​មាន​ចំនួន ៥ ០១៤ ឯក​តា ហើយ​នៅ​ចុង​ឆ្នាំនេះ​នឹង​មាន​​គម្រោង​មួយ​ចំនួន​ទៀត​នឹង​បញ្ចប់​ការ​សាងសង់​ដែល​មាន​ចំនួន​ប្រហែល ៣ ៦២០ ​យូ​នី​ត ដែល​មួយ​ភាគ​ធំ​បាន​មក​ពី​គម្រោង Olympia City​។​

​របាយការណ៍​នេះ​ក៏​បង្ហាញ​សុទិដ្ឋិនិយម​ផង​ដែរ​ថា រយៈពេល​៥​ឆ្នាំ​ខាង​មុខ ទីផ្សារ​នេះ​​នឹង​បង្ហាញ​ការ​កើន​ឡើង​យ៉ាង​ធំ​នៅក្នុង​ប្រតិបត្តិ​ការលក់​ខុន​ដូ ដែលជា​ធម្មតា​នៅ​កម្ពុជា​ចាប់ពី​ពេល​សម្ពោ​ធ​គម្រោង គឺ​ចំណាយ​ពេល​ចំនួន ​២៩​ ខែ​ទើប​លក់​អស់ ខណៈ​​ប្រទេស​ថៃ ឬ​វៀតណាម ការ​លក់​គម្រោង​បញ្ចប់​បាន​ចំណាយ​ពេល​រហូត​ដល់​៤០​ខែ​។

ទោះជា​យ៉ាង​ណា​គម្រោង​លក់​ខុន​ដូ នៅ​ទីក្រុង​ភ្នំពេញ រហូត​អស់​នឹង​ចំណាយ​ពេល​វេលា​កាន់​តែ​យូរ​ដោយ​សារ​ការលក់​បាន​ថយចុះ​ធៀប​នឹង​ឆ្នាំ​មុន​។​

​លោក គុយ វ៉ាត អគ្គនាយក​ក្រុមហ៊ុន Century21 Cambodia បាន​ថ្លែងថា​ ៖ «​អ្វី​ដែល​សំខាន់​នា​ពេល​នេះ គឺ​ធ្វើ​យ៉ាង​ណា​ឲ្យ​អ្នក​វិនិយោគ​មកពី​ប្រទេស​ផ្សេងៗ​មាន​ទំនុក​ចិត្ត​លើ​ភ្នាក់ងារ​អចលនទ្រព្យ​នៅ​កម្ពុជា ដើម្បី​ធ្វើ​ឲ្យ​មាន​ទំនុក​ចិត្ត​ក្នុង​ទីផ្សារ​នេះ​»​។

លោក​បន្ត​ថា​ ៖ «​ទំនុក​ចិត្ត​ទីផ្សារ និង​ល​ទ្ធ​ភាព​ពង្រីក​ទីផ្សារ​ខុន​ដូ​នៅ​កម្ពុជា នៅ​បណ្តា​ប្រទេស​ជា​ដៃគូ​កាន់តែ​ធ្វើ​ឲ្យ​អ្នក​វិនិយោគ​លើ​វិស័យ​អចលនវត្ថុ​មាន​ទំនុក​ចិត្ត និង​ចាប់​អារម្មណ៍​វិនិយោគ​នៅ​កម្ពុជា»។

លោក​បន្ត​ថា ដើម្បី​ធ្វើ​ឲ្យ​វិស័យ​នេះ​បន្ត​រីក​ចម្រើន ទាមទារ​ឲ្យ​អ្នក​នៅ​ក្នុង​វិស័យ​នេះ ទាំង​អ្នក​អភិវឌ្ឍន៍ អ្នក​សាងសង់ និង​ក្រុមហ៊ុន​ភ្នាក់ងារ​អចលនទ្រព្យ​ត្រូវ​ចូលរួម​ទាំង​អស់​គ្នា ដើម្បី​ទាក់ទាញ​លំហូរ​ទុនវិនិយោគ​កាន់​តែ​ធំ​ជាង​មុន មិន​ត្រឹម​តែ​ក្នុង​កម្រិត​ទីផ្សារ​អាស៊ាន​នោះទេ តែ​យើង​អាចធ្វើ​ការងារ​ជាមួយ​គ្រប់​ប្រទេស​នៅ​លើ​ពិភពលោក ដែល​យើង​អាច​ធ្វើ​ការ​ជាមួយ​គ្នា​បាន​។

​លោក វ៉ាត បន្តថា ដោយ​សារ​គម្រោង​ខុន​ដូ​មាន​ច្រើន ដូច្នេះ​អាចមាន​គម្រោង​មួយ​ចំនួន​នឹង​ពន្យា​រពេល​សាងសង់ ឬ​ជាប់​គាំង ប៉ុន្តែ​លោក​មិន​បញ្ជាក់​ថា គម្រោង​ណា​មួយ​នោះ​ទេ​។​

​អគ្គនាយក​ក្រុមហ៊ុន Century21 Mekong លោក​ ច្រឹក សុខនីម​ បាន​ថ្លែង​ទទួល​ស្គាល់ថា ​៖ «​ការ​លក់​យឺត​នៃ​ទីផ្សារ​ខុន​ដូ​នៅ​ទីក្រុង​ភ្នំពេញ បាន​ធ្វើ​ឲ្យ​គម្រោង​ចំនួន​ពីរ​បាន​ពន្យារ​ពេល​សាងសង់ ប៉ុន្តែ​លោក​មិន​បញ្ជាក់​ឲ្យ​ដឹង​ពី​ឈ្មោះ​ខុន​ដូ​នោះ​ទេ​»​។​

​ប៉ុន្តែ​តាម​ការ​សង្កេត​ជាក់​ស្តែង របស់​អ្នក​យក​ព័ត៌មាន​ប៉ុស្តិ៍​អចលនទ្រព្យ បាន​រក​ឃើញ​ថា គម្រោង​ខុនដូ Sky Villa ស្ថិត​នៅ​ភាគ​ខាង​ត្បូង​ស្តាត​អូឡាំពិក គម្រោង Time Centre និង​គម្រោង​មួយ​ចំនួន​ទៀត​នៅ​ភាគ​ខាង​ត្បូង​ទីក្រុង​កោះ​ពេជ្រ​ ជាដើម បាន​និង​កំពុង​ពន្យារ​ពេល​សាងសង់​រួច​ហើយ។

​លោក ច្រឹក សុខនីម បាន​បន្តថា ទីផ្សារ​ខុន​ដូ​នៅ​ទី​នេះ គឺ​៧០​ភាគរយ ត្រូវ​បាន​ទិញ​ដោយ​ជន​បរទេស និង​ ៣០ ​ភាគរយ ជា​ជនជាតិ​ខ្មែរ​។ ប្រជាពលរដ្ឋ​ខ្មែរ​ភាគ​ច្រើនទិញ​ទុក​សម្រាប់​វិនិយោគ​បន្ត​ដែល​នេះ​ជា​និន្នាការ​ទូទៅ​នៃ​ទីផ្សារ​ខុន​ដូដែល​ត្រូវ​ពឹង​ផ្អែកលើ​ប្រជាពលរដ្ឋ​ក្នុង​ស្រុក ព្រោះ​បច្ចុប្បន្ន​ប្រជា​ពលរដ្ឋ​ក្នុង​ស្រុក​កាន់​តែ​ច្រើន​ឡើង បាន​ចាប់​អារម្មណ៍​ទិញ​ខុន​ដូ​នៅ​ទីក្រុង​ភ្នំពេញ​។

លោក​បន្ត​ថា កាល​ពី​ឆ្នាំ​មុន​ការទិញ​ខុន​ដូ​មាន​កំណើន​ចន្លោះ ១៥​​ទៅ ​២០ ​ភាគរយ ប៉ុន្តែ​កំណើន​ឆ្នាំនេះ​មាន​សភាព​យឺត​ជាង​ឆ្នាំមុន តែ​យើង​មិន​គួរបារម្ភ​ពេក​នោះ​ទេ ព្រោះ​តម្រូវការ​ខុនដូ​របស់​ប្រជាពលរដ្ឋ​ក្នុង​ស្រុក​នឹង​កើន​ឡើង ជាក់ស្តែង​នៅ​ប្រទេស​ថៃ និង​វៀតណាម ត្រូវ​​ចំណាយ​ពេល​រហូត​ដល់​៣០​ឆ្នាំ ទើប​ប្រជាជន​នៅ​ប្រទេស​ទាំង​នោះ​មក​រស់​នៅ​ខុន​ដូ។ ចំណែក​ប្រទេស ​សិង្ហ​បុរី ចំណាយ​ពេល​ឆាប់​ជាង​នេះ គឺ​ត្រឹម​រយៈពេល​១៨​ទៅ ​២០​ ឆ្នាំ​ប៉ុណ្ណោះ​។

លោក ទូច សំណាង អគ្គនាយក​រង​ក្រុម​ហ៊ុន OCIC ដែល​បាន​និង​កំពុង​វិនិយោគ​គម្រោង Olympia City បាន​ថ្លែងថា ការ​លក់​ខុន​ដូ​ឆ្នាំនេះ​ពិតជា​មានការ​ធ្លាក់ចុះ បើធៀប​នឹង​ឆ្នាំ​មុន ដោយ​សារ​មានការ​ប្រកួត​ប្រជែង​កាន់​តែ​ច្រើន ប៉ុន្តែ​ដោយសារ​ទីតាំង​របស់ Olympia City ជាទី​តាំង​ល្អ បានធ្វើ​ឲ្យ​ការលក់​នៅតែ​ដំណើរការ​ជា​ធម្មតា​ដែល​មិន​មាន​សញ្ញា​អ្វី​គួរ​ឲ្យ​ព្រួយ​បារម្ភ​នោះទេ​។​

លោក​បន្តថា​ ៖ «​ខ្ញុំ​សង្កេត​ឃើញ​អ្នក​វិនិយោគ​សាងសង់​ខុន​ដូ​ភាគ​ច្រើន​ផ្តោត​លើ​ទីផ្សារ​បរទេស និង​ទីផ្សារ​សម្រាប់​អ្នក​មាន​​ចំណូល​ខ្ពស់ ប៉ុន្តែ​ពួក​គេ​គួរ​បង្វែរ​មក​ចាប់យក​ទីផ្សារ​ក្នុង​ស្រុក ដោយ​ចាប់យក​អតិថិជន​មាន​ប្រាក់​ចំណូល​មធ្យម​ប្រសើរ​ជាង​»​។

លោក​បន្តថា ​៖ «​ការ​ផ្គត់ផ្គង់​សម្រាប់​អ្នកមាន​ចំណូល​មធ្យម ដែលជា​អ្នក​ធ្វើការ​វ័យ​ក្មេង ដោយ​លក់​តម្លៃ​សមរម្យ តាម​រយៈ​ការ​កាត់​បន្ថយ​ប្រាក់​ចំណេញ​ខ្លះ​ជា​ការ​ល្អ​»​។

លោក គីម ហ៊ាង ប្រធាន​សមាគម​អ្នក​វាយ​តម្លៃ និង​ភ្នាក់ងារ​អចលនវត្ថុ​កម្ពុជា បាន​ថ្លែង​ថា​ ៖ «​ខ្ញុំ​មិន​ខ្វល់​ថា គម្រោង​ខុនដូ​នឹង​ផ្គត់ផ្គង់​កើន​ដល់៣ ​ទៅ​៤​ម៉ឺន​យូនីត​នោះ​ទេ តែ​អ្វីដែល​បារម្ភ គឺ​បើ​សាងសង់​ហើយ​គម្រោង​នោះ​ត្រូវ​លក់​ជូន​អ្នកណា​គេ?»​។

លោក​បន្តថា ​៖ «​អ្នក​អភិវឌ្ឍន៍​មួយ​ចំនួន​នាពេលនេះ ពួកគេ​គ្មាន​ទីផ្សារ​នៅ​បរទេស គ្មាន​បទ​ពិសោធ និង​ជំនាញ​លើ​​ការងារ​នេះ និង​មាន​ទុន​មិន​គ្រប់​គ្រាន់​សម្រាប់​សាង​សង់​»​។

លោក​បន្ត​ថា ប្រសិន​ជា​គិត​សម្រាប់​ទីផ្សារ​​ក្នុង​ស្រុក គឺ​ចំនួន ៣​ ទៅ​ ៤ ​ម៉ឺន​យូនីត ជា​ចំនួន​លើស​ពី​តម្រូវ​ការ តើ​អ្នក​ណា​មក​ទិញ​គម្រោង​ខុន​ដូ​ទាំង​នោះ​? ដូច្នេះ​រដ្ឋាភិបាល​ត្រូវ​ធ្វើ​យ៉ាង​ណា​ទាក់ទាញ​អ្នក​វិនិ​យោគ​មក​ឲ្យ​បាន​កាន់​តែ​ច្រើន តាម​រយៈ​គោល​នយោបាយ​លើក​ទឹក​ចិត្ត​មួយ​ចំនួន ហើយ​ពេលណា​អ្នក​វិនិយោគ​ចូលមក​ច្រើន​ពួក​គេ​នឹង​មាន​តម្រូវ​ការ​ខុន​ដូ​សម្រាប់​ស្នាក់​នៅ ផ្ទុយ​ទៅ​វិញ​ប្រសិនជា​គ្មាន​តម្រូវ​ការ​ពី​ជន​បរទេស ចំនួន​ខុន​ដូ​នៅ​លើ​ទីផ្សារ​នឹង​​លើស​តម្រូវ​ការ​។

នៅ​ពេល​សួរ​ថា តើ​ចំនួន​ខុន​ដូ​កាន់​តែ​ច្រើន នឹង​ពន្យារ​ពេល​សាងសង់​ឬ​ជាប់​គាំង​កណ្តាល​ទី​ដែរ​ឬ​ទេ​នៅ​ពេល​ខាង​មុខ​?

លោក​ ​គីម ហ៊ាង ​បាន​ថ្លែង​ថា ការ​ជាប់​គាំង​ឬ​ពន្យា​រពេល​សាងសង់​គម្រោង​ណា​មួយ មាន​ករណី​ពីរ ទី​១ ប្រសិនជា​អ្នក​អភិវឌ្ឍន៍​មាន​ប្រាក់​គ្រប់គ្រាន់ មាន​បទ​ពិសោធ ជំនាញ និង​មាន​ដៃគូ​លក់​នៅ​បរទេស ពួក​គេ​​នឹងមិន​ប្រឈម​បញ្ហា​នោះទេ​។ ទី​២ ប្រសិន​ជា​អ្នក​សាងសង់​ខុន​ដូ​គ្មាន​ជំនាញ ខ្វះ​បទពិសោធ និង​មិនមាន​ទីផ្សារ​លក់​នៅ​បរទេស គម្រោង​របស់​ពួកគេ​នឹង​អាច​សាង​សង់​មិន​ចប់​ចុង​ចប់​ដើម​ទេ៕

0

Comments

Please, login or register to post a comment

ព័ត៌មានពាក់ព័ន្ធ