Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​លក់​លំនៅឋាន​តាម​បុរី​នានា ​បាន​ធ្លាក់​ចុះ​ខ្លាំង

ការ​លក់​លំនៅឋាន​តាម​បុរី​នានា ​បាន​ធ្លាក់​ចុះ​ខ្លាំង

ទីផ្សារ​បុរី​នៅ​កម្ពុជា​ទំនង​ជា​មិន​មាន​សញ្ញា​ល្អ​ប្រសើរ​នៅ​ឡើយ​ទេ ខណៈ​ការ​លក់​លំនៅឋាន​នៅ​តាម​បុរី​នានា​កំពុង​ដាំ​ក្បាល​ចុះ ដោយសារ​ការ​ព្រួយបារម្ភ​របស់​ប្រជាពលរដ្ឋ​ទាក់ទង​នឹង​ការ​បោះឆ្នោត​នា​ពេល​ខាង​មុខ និង​​ការ​ប្រកួត​ប្រជែង​កើនឡើង​នៅក្នុង​ទីផ្សារ​។

អ្នកនាង សួ ស៊ូហ្វាង អ្នក​គ្រប់គ្រង​ទូទៅ​បុរីរិទ្ធ​ស្ថិត​នៅ​តាម​ផ្លូវ​លេខ​ ៥៩៨ ក្នុង​សង្កាត់​ប្ញស្សីកែវ ខណ្ឌ​ប្ញស្សីកែវ​បាន​ថ្លែង​ឲ្យ​ដឹង​តាម​ទូរស័ព្ទ​កាលពី​ថ្ងៃ​ចន្ទ​ថា​ការ​លក់​លំនៅឋាន​របស់​បុរីរិទ្ធ​បាន​ធ្លាក់​ចុះ​ក្នុង​រង្វង់ ៣០ ​ភាគរយ​ចាប់​តាំង​ពី​ឆ្នាំ​មុន​រហូត​ដល់​ដើម​ឆ្នាំ​នេះ​។ ការ​លក់​ធ្លាក់​ចុះ​ដោយសារ​​កត្តា​ពីរ​សំខាន់ៗ ដូចជា​ការ​ប្រកួតប្រជែង​ពី​បុរី​នៅ​ជុំវិញ​នោះ​ច្រើន និង​ដោយសារ​ការ​ព្រួយបារម្ភ​របស់​ប្រជាជន​ទាក់ទង​នឹង​ការ​បោះឆ្នោត​ដែល​នឹង​ចូល​មក​ដល់​​នៅ​ពេល​ខាង​មុខ​នេះ​។

អ្នកនាង​បាន​បន្ត​ថា​៖ «​ប្រជាជន​និយាយ​ប្រាប់​ខ្ញុំ​ផ្ទាល់​ពួកគេ​បារម្ភ​ពី​ការ​បោះឆ្នោត​ពួកគេ​បារម្ភ​ខ្លាច​មាន​បញ្ហា​អ្វី​មួយ​ធ្វើ​ឲ្យ​ការ​សាងសង់​ជាប់គាំង ដូច្នេះ​ពួកគេ​កំពុង​រង់ចាំ​មើល​ស្ថានភាព​ក្រោយ​​ការ​បោះឆ្នោត​»​។

ទោះ​ជា​ការ​លក់​លំនៅឋាន​នានា​​បាន​ធ្លាក់​ចុះ​ក្តី ប៉ុន្តែ​តម្លៃ​លំនៅឋាន​នៅ​តែ​កើន​ឡើង​ប្រចាំ​ឆ្នាំ​។

អ្នកនាង សួ ស៊ូហ្វាង បាន​បញ្ជាក់​ថា​៖ «​ការ​ឡើង​ថ្លៃ​លំនៅឋាន​ដោយសារ​តម្លៃ​សម្ភារ​សំណង់​ដូចជា​ស៊ីម៉ង់ត៍ ដែក ឥដ្ឋ បាន​ឡើង​ថ្លៃ​ផង​ដែរ ប៉ុន្តែ​ទោះ​ជា​យ៉ាង​ណា​លំនៅឋាន​ប្រភេទ​ខ្លះ​ក៏​យើង​​លក់​បញ្ចុះ​តម្លៃ​ផង​ដែរ​»​។ អ្នកនាង​បន្ត​ថា​៖ «​ដោយសារ​ស្ថានភាព​បែប​នេះ​​បុរី​របស់​ខ្ញុំ​មិន​ចាប់​ផ្តើម​គម្រោង​ថ្មី​ទេ​នៅ​ឆ្នាំ​នេះ ប៉ុន្តែ​យើង​នឹង​សាងសង់​បន្ត​បើ​ស្ថានភាព​ទីផ្សារ​មាន​ភាព​ល្អប្រសើរ​ឡើង​វិញ​»​។

លោក ង៉ែត ពិសិដ្ឋ ជំនួយការ​អគ្គនាយក​បុរីពិភពថ្មី​បាន​ថ្លែង​ថា​ការ​លក់​បុរី​នៅ​ឆ្នាំ​នេះ​នៅ​តែ​មាន​សភាព​យ៉ាប់យ៉ឺន​ដូច​កាលពី​ឆ្នាំ​មុន ប៉ុន្តែ​បច្ចុប្បន្ន​គ្រប់​គម្រោង​របស់​​បុរី​នេះ​គឺ​សុទ្ធតែ​ផ្តល់​ឲ្យ​អតិថិជន​ទិញ​ដោយ​មិន​ចាំបាច់​មាន​​ប្រាក់កក់​ដែល​ជួយ​ជំរុញ​ឲ្យ​ការ​លក់​របស់​យើង​បាន​ខ្លះៗ ប៉ុន្តែ​ស្ថានភាព​ជាក់ស្តែង​នៅ​តែ​មិន​ទាន់​​ល្អ​ប្រសើរ​ដូច​ប៉ុន្មាន​ឆ្នាំ​មុន​នៅ​ឡើយ​។

លោក​បន្ត​ថា ​ដោយសារ​ស្ថានភាព​ការ​លក់​មាន​ភាព​យឺតយ៉ាវ​ទើប​ធ្វើ​ឲ្យ​ក្រុមហ៊ុន​មិន​មាន​​គម្រោង​ពង្រីក​បុរី​ថ្មី​ឡើយ ប៉ុន្តែ​​នឹង​បន្ត​សាងសង់​សំណង់​ថ្មី​នៅ​ក្នុង​ទីតាំង​បុរី​ចាស់ៗ​ព្រោះ​នៅ​សល់​ផ្ទៃដី​ដែល​មាន​ស្រាប់​។

លោក​បន្ត​ថា​៖ «​ការ​សាងសង់​ផ្ទះ​នាពេល​នេះ​គឺ​ផ្តោត​លើ​ផ្ទះ​មាន​តម្លៃ​មធ្យម​ដែល​មាន​តម្លៃ​ចាប់​ពី ៤០,០០០ ​ដល់​ជាង​ ៦០,០០០ ​ដុល្លារ​អាមេរិក​ប៉ុណ្ណោះ»​។

លោក​បន្ត​ថា​៖ «​ក្រុមហ៊ុន​កំពុង​មាន​គម្រោង​សាងសង់​ផ្ទះ​តម្លៃ​ទាប​សម្រាប់​ប្រជាជន​មាន​ប្រាក់​ចំណូល​​ទាប និង​មធ្យម​នៅ​ពេល​ខាង​មុខ ប៉ុន្តែ​ការ​ចាប់ផ្តើម​គម្រោង​នេះ​នៅ​ពេល​ណា​គឺ​មិន​ទាន់​អាច​បញ្ជាក់​បាន​នៅ​ឡើយ​ទេ​»​។

លោក ង៉ែត ពិសិដ្ឋ បាន​បន្ត​ថា​តម្លៃ​លំនៅឋាន​មិន​បាន​កើនឡើង​ទេ​សម្រាប់​បុរី​របស់​លោក ប៉ុន្តែ​អ្វី​ជា​បញ្ហា​ប្រឈម​សព្វ​ថ្ងៃ​នេះ​គឺ​ដី​ឡើង​ថ្លៃ​ខ្ពស់​ពេក​ដែល​ធ្វើ​ឲ្យ​មាន​ការ​លំបាក​ក្នុង​ការ​ស្វែងរក និង​ពិបាក​ក្នុង​ការ​វិនិយោគ​ព្រោះ​បើ​ដី​ថ្លៃ​យក​មក​សាងសង់​ផ្ទះ​មិន​អាច​រក​ប្រាក់​ចំណេញ​បាន​ទេ​។ លោក​ធ្លាប់​បន្ទោស​ចលនា​ពុះ​ដីឡូត៍​លក់​ជា​មូលហេតុ​ចម្បង​ធ្វើឲ្យ​តម្លៃ​ដី​កើនឡើង​ខ្ពស់​ស្រប​ពេល​​តំបន់​ពុះ​ដីឡូត៍​លក់​ជា​តំបន់​មាន​ការ​អភិវឌ្ឍ​យឺត​។

អ្នកនាង ហ៊ង សុជាតិ បុគ្គលិក​​ជាន់​ខ្ពស់​ផ្នែក​ទីផ្សារ​នៃ​បុរី​ប៉េងហួត​ជា​បុរី​ធំ​ជាង​គេ​មួយ​នៅ​កម្ពុជា​បាន​ថ្លែង​ថា​រហូត​មក​ទល់​ពេល​នេះ​បុរី​ប៉េងហួត​មិន​បាន​ចាប់ផ្តើម​គម្រោង​លំនៅឋាន​ជា​ផ្ទះ​ល្វែង ឬ​វីឡា​ទេ «​ប៉ុន្តែ​យើង​នឹង​សាងសង់​ខុនដូ​នៅ​ក្នុង​បុរី​ប៉េងហួត​នៅ​តាម​បណ្តោយ​ផ្លូវ​ជាតិ​លេខ​ ១ ដែល​មាន​ផ្ទះ​ជាង​ ១០០០ ​​យូនីត និង​ផ្តោត​លើ​ប្រជាជន​មាន​ប្រាក់​ចំណូល​មធ្យម​ដោយសារ​ខុនដូ​របស់​យើង​មាន​តម្លៃ​ចាប់ពី ៣៥,៨០០ ​ដុល្លារ​ដល់​ជាង​ ៥០,០០០ ​ដុល្លារ​ប៉ុណ្ណោះ​សម្រាប់​បន្ទប់​គេង​មួយ និង​ផ្ទះ​បន្ទប់​គេង​ពីរ​»​។

អ្នកនាង​បន្ត​ថា​៖ «​គម្រោង​ខុនដូ​នេះ​នឹង​មិន​មាន​បញ្ហា​នោះ​ទេ​ដោយសារ​វា​មាន​តម្លៃ​សមរម្យ និង​មាន​ទីតាំង​ដែល​មាន​មនុស្ស​រស់នៅ​ច្រើន ដូច្នេះ​ពេល​ផ្លូវជាតិ​លេខ​ ១ សាងសង់​រួច​នៅ​តំបន់​នេះ​នឹង​មាន​ភាព​ទាក់ទាញ​ខ្លាំង​»​។

គម្រោង​ខុនដូរ​របស់​បុរីប៉េងហួត​មាន​ចំនួន​បី​អគារ និង​កម្ពស់ ២៦ ​ជាន់​ក្នុង​នោះ ២ ​ជាន់​ជា​ផ្សារ​ទំនើប និង​ ៤ ​ជាន់​ជា​ចំណត​យានយន្ត​។

ទាក់ទង​ការ​លក់​លំនៅឋាន​ក្នុង​បុរី​វិញ​អ្នកនាង​ សុជាតិ បាន​បដិសេធ​មិន​អត្ថាធិប្បាយ​។

យោង​តាម​ការ​សិក្សា​របស់​ក្រសួង​រៀបចំ​ដែនដី នគរូបនីយកម្ម និង​សំណង់​បាន​ឲ្យ​ដឹង​ថា​កម្ពុជា​ត្រូវការ​លំនៅឋាន ១០,០០០ ​ខ្នង​ជា​រៀងរាល់​ឆ្នាំ និង​កំណើន​ប្រជាពលរដ្ឋ​ចូល​មក​រស់នៅ​ទីក្រុង​ភ្នំពេញ កើនឡើង ១ ​ភាគរយ​ជា​រៀងរាល់​ឆ្នាំ​ផង​ដែរ​។

លោក​ឧកញ៉ា លី ហួរ ប្រធាន​សមាគម​អ្នក​អភិវឌ្ឍន៍​លំនៅឋាន​កម្ពុជា​ធ្លាប់​បាន​ថ្លែង​ថា​ការ​សាងសង់​បុរី​ណា​មួយ «​យើង​ត្រូវ​សិក្សា​ពី​តំបន់​ដែល​យើង​ចង់​វិនិយោគ តំបន់​ទីក្រុង​យើង​សង់​កម្រិត​ខ្ពស់ តំបន់​ជាយក្រុង​យើង​សាងសង់​លំនៅឋាន​សម្រាប់​ប្រជាជន​មាន​ប្រាក់​ចំណូល​ទាប និង​មធ្យម​។ ទីផ្សារ​បុរី​មិន​មាន​បញ្ហា​នោះ​ទេ​។ នៅ​តែ​ល្អ សំខាន់​យើង​ចាប់​អតិថិជន​គោលដៅ​ណា​មួយ​ហើយ​សំខាន់​គឺ​ទុន​វិនិយោគ​របស់​យើង​អាច​ទ្រទ្រង់​បាន​ឬ​ទេ​? នេះ​ជា​ការ​សំខាន់​ណាស់​ដោយសារ​ការ​វិនិយោគ​របស់​យើង​មិន​អាច​ប្រមូល​ប្រាក់​​ពី​អ្នក​ទិញ​ទេ​។ យើង​ត្រូវ​ពង្រឹង​​ទុន​ផ្ទាល់​ខ្លួន​នេះ​ជា​កត្តា​សំខាន់​»​។

លោក​ឧកញ៉ា​បន្ត​ថា​៖ «​ខ្ញុំ​យល់​ថា​នឹង​មាន​តម្រូវការ​លំនៅឋាន​នៅ​តែ​ច្រើន ពិសេស​សម្រាប់​លំនៅឋាន​ដែល​មាន​តម្លៃ​ទាប​»៕

0

Comments

Please, login or register to post a comment

ព័ត៌មានពាក់ព័ន្ធ