Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​លក់ The Bridge កំពុង​ទទួល​បាន​ជោគ​ជ័យ​ខ្លាំង

លំនៅឋាន​មាន​កន្លែង​ធ្វើ​ការ​នៅ​ខាង​ក្នុង (SoHo) របស់​គម្រោង The Bridge។
លំនៅឋាន​មាន​កន្លែង​ធ្វើ​ការ​នៅ​ខាង​ក្នុង (SoHo) របស់​គម្រោង The Bridge។ ស្រេង ម៉េងស្រ៊ុន

ការ​លក់ The Bridge កំពុង​ទទួល​បាន​ជោគ​ជ័យ​ខ្លាំង

ការ​លក់​បន្ទប់​ស្នាក់​នៅ និង​ការិយាល័យ​ដែល​មាន​កន្លែង​ធ្វើ​ការ​នៅ​ខាង​ក្នុង (SoHo) របស់​គម្រោង​អភិវឌ្ឍន៍​អគារ​ភ្លោះ The Bridge កំពុង​ទទួល​បាន​ជោគជ័យ​យ៉ាង​ខ្លាំង ខណៈ​ការ​ប្រកួត​ប្រជែង​ក្នុង​ទីផ្សារ​ និង​ការ​បញ្ចេញ​គម្រោង​សាង​សង់​ខុនដូ​នៅ​រាជធានី​ភ្នំពេញ កំពុង​មាន​ការ​កើន​ឡើង​ជា​បន្ត​បន្ទាប់​នៅ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ។

The Bridge គឺ​ជា​ឈ្មោះ​គម្រោង​សាង​សង់​កន្លែង​ស្នាក់​នៅ និង​ការិយាល័យ​ដ៏​ធំ​មួយ​ដែល​ជា​ការ​សហការ​គ្នា​រវាង​ក្រុម​ហ៊ុន​ក្នុង​ស្រុក Worldbridge Land Co.,Ltd ជា​មួយ​ក្រុម​ហ៊ុន​លំដាប់​អន្តរជាតិ​មក​ពី ប្រទេស​សិង្ហបុរី Oxley Holdings Limited ក្រោម​ទឹក​ប្រាក់​វិនិយោគ ៣០០ លាន​ដុល្លារ​អាមេរិក។

លោក សៀ ឫទ្ធី អគ្គ​នាយក​ក្រុម​ហ៊ុន Worldbridge Land Co.,Ltd បាន​ថ្លែង​ថា ការ​លក់​បន្ទប់​ស្នាក់​នៅ​របស់​គម្រោង​អភិវឌ្ឍន៍​លំនៅឋាន The Bridge កំពុង​ទទួល​ជោគជ័យ​យ៉ាង​ខ្លាំង ដោយ​រហូត​មក​ដល់​ពេល​នេះ​បន្ទប់​ស្នាក់​នៅ​លក់​អស់ ១០០ ភាគ​រយ​ហើយ ចំណែក​លំនៅឋាន​បែប​ការិយាល័យ (SoHo) លក់​បាន​ប្រហែល ៤០ ភាគរយ បើ​គិត​ចាត់​តាំង​ពី​ការ​បើក​លក់​កាល​ពី ខែ​មិថុនា ឆ្នាំ​២០១៤ រហូត​ដល់​ពេល​បច្ចុប្បន្ន​នេះ។

លោក​បាន​ថ្លែង​ថា៖ «ឥឡូវ​នេះ​យើង​មិន​ទាន់​បាន​បើក​លក់ SoHo នៅ​ទីផ្សារ​ក្រៅ​ប្រទេស​នោះ​ទេ។ ការ​ដែល​ក្រុម​ហ៊ុន​ធ្វើ​ដូច​នេះ ដោយ​សារ​តែ​ខ្ញុំ​មាន​បំណង​ចង់​ទុក​ពេល​ឲ្យ​ប្រជាជន​នៅ​ក្នុង​ស្រុក​ទិញ​ឲ្យ​បាន​ច្រើន។ ខ្ញុំ​ចង់​ឲ្យ​ប្រជាជន​ខ្មែរ​មាន​កន្លែង​រស់​នៅ និង​ការិយាល័យ​ដ៏​ល្អ ស្អាត និង​មាន​បំពាក់​នូវ​សម្ភារ​ទំនើប​សម្រាប់​ប្រើ​ប្រាស់»។

«SoHo» ជា​អក្សរ​កាត់​មក​ពី​ភាសា​អង់គ្លេស Small Office Home office ដែល​មាន​ន័យ​ថា បន្ទប់​ស្នាក់​នៅ​មាន​ការិយាល័យ​ធ្វើ​ការ​នៅ​ខាង​ក្នុង។

ទិដ្ឋភាព​នៅ​ការដ្ឋាន​សាង​សង់ The Bridge។
ទិដ្ឋភាព​នៅ​ការដ្ឋាន​សាង​សង់ The Bridge។ ម៉ៃ វីរៈ

លោក ឫទ្ធី បាន​សម្តែង​សុទិដ្ឋ​និយម​យ៉ាង​ខ្លាំង​ចំពោះ​គម្រោង The Bridge ដោយ​លោក​បាន​អះអាង​ថា៖ «ខ្ញុំ​មាន​ការ​ជឿ​ជាក់​យ៉ាង​ខ្លាំង​ថា The Bridge ប្រាកដ​ជា​ទទួល​បាន​ជោគ​ជ័យ ព្រោះ​ខ្ញុំ​ដឹង​ថា អតិថិជន​ក្នុង​ស្រុក​មាន​ទំនុក​ចិត្ត​ចំពោះ​ក្រុមហ៊ុន​ខ្ញុំ ហើយ​អ្វី​ដែល​រឹត​តែ​សំខាន់​ជាង​នេះ​ទៅ​ទៀត គឺ​ក្នុង​ការ​វិនិយោគ​គម្រោង The Bridge ក្រុម​ហ៊ុន​របស់​ខ្ញុំ​បាន​ចាប់​ដៃ​គូ​ជា​មួយ​ក្រុមហ៊ុន Oxley Holdings Limited ដែល​ជា​ក្រុមហ៊ុន​បាន​ចុះ​បញ្ជី​នៅ​ក្នុង​ផ្សារ​ហ៊ុន​ប្រទេស​សិង្ហបុរី។ ក្រុម​ហ៊ុន Oxley Holdings Limited នឹង​មិន​ធ្វើ​ឲ្យ​គម្រោង The Bridge បរាជ័យ​ទេ ព្រោះ​បើ​ការ​វិនិយោគ​ខាង​លើ​បរាជ័យ នឹង​ធ្វើ​ឲ្យ​ផ្សារ​ហ៊ុន​របស់​ពួក​គេ​ធ្លាក់​ចុះ ដូច្នេះ​អ្នក​ដែល​ខាត​ធំ​គឺ​ក្រុម​ហ៊ុន​របស់​គាត់ មិន​មែន​ក្រុម​ហ៊ុន​របស់​ខ្ញុំ​ទេ»។

The Bridge សាង​សង់​ឡើង​លើ​ផ្ទៃ​ដី​ទំហំ ១០០៩០ ម៉ែត្រ​ការ៉េ ដោយ​មាន​អគារ​ភ្លោះ​កម្ពស់ ៤៥ ជាន់​ចំនួន ២ ស្ថិត​តាម​បណ្តោយ​វិថី​រដ្ឋសភា ក្នុង សង្កាត់​ទន្លេ​បាសាក់ ខណ្ឌ​ចំការមន។ គម្រោង​នេះ​បាន​បើក​ការដ្ឋាន​សាង​សង់​កាល​ពី​ថ្ងៃ ទី១២ ខែ​មិថុនា ឆ្នាំ​២០១៤ ដោយ​គ្រោង​នឹង​បញ្ចប់​ការ​សាង​សង់​នា​ពាក់​កណ្តាល ឆ្នាំ​២០១៨ ខាង​មុខ។

អគ្គ​នាយក​ប្រតិបត្តិ​ក្រុមហ៊ុន Oxley Holdings Limited ដែល​ជា​ក្រុមហ៊ុន​មាន​ជំនាញ​ខាង​ការ​អភិវឌ្ឍ​អចលន​ទ្រព្យ​មាន​មូលដ្ឋាន​នៅ ប្រទេស​សិង្ហបុរី លោក Ching Chiat Kwong ធ្លាប់​បាន​ប្រាប់​ប៉ុស្តិ៍​អចលន​ទ្រព្យ នា​ពេល​កន្លង​មក​ថា ក្រុម​ហ៊ុន Oxley Holdings Limited នឹង​នាំ​មក​នូវ​គំនិត​ថ្មីៗ​ក្នុង​ការ​សាង​សង់​អគារ​ការិយាល័យ​បែប​លំនៅឋាន​មក​កម្ពុជា ដើម្បី​បង្ក​ភាព​ងាយ​ស្រួល​សម្រាប់​អ្នក​វិនិយោគ​ណា​ដែល​មាន​បំណង​ចង់​ក្លាយ​ជា​ម្ចាស់​ការិយាល័យ​ដោយ​ខ្លួន​ឯង ជំនួស​ការ​ជួល​អគារ​ពី​ក្រុម​ហ៊ុន​ដទៃ​មក​បើក​ជា​ការិយាល័យ។

លោក Ching Chiat Kwong មាន​ប្រសាសន៍​ថា៖ «ការិយាល័យ​បែប​លំនៅឋាន SoHo កំពុង​មាន​ការ​ពេញ​និយម​យ៉ាង​ខ្លាំង​នៅ​តាម​បណ្តា​ប្រទេស​រីក​ចម្រើន​មួយ​ចំនួន​ដូចជា សិង្ហបុរី និង​សហរដ្ឋ​អាមេរិក។ បន្ទប់​ស្នាក់នៅ​ក្នុង​គម្រោង The Bridge នឹង​ត្រូវ​រចនា​ឡើង​យ៉ាង​ពិសេស​ដើម្បី​ទុក​ប្រើ​ប្រាស់​ជា​កន្លែង​ធ្វើ​ការ​ផង និង​ជា​កន្លែង​ស្នាក់នៅ​ផង បើ​ទោះ​បី​វា​មិន​មាន​ទំហំ​ធំ​ក៏​ដោយ។ អគ្គ​នាយក​ប្រតិបត្តិ​ក្រុមហ៊ុន​ខាង​លើ បាន​បញ្ជាក់​ថា៖ «Oxley មក​ទី​នេះ​ដើម្បី​ភាព​ជោគជ័យ ដោយ​ភាព​ជោគជ័យ​នោះ​គឺ​មិន​សម្រាប់​ក្រុម​ហ៊ុន Oxley Holdings Limited ប៉ុណ្ណោះ​ទេ តែ​គឺ​សម្រាប់​ប្រទេស​កម្ពុជា​ទាំង​មូល»។

លោក ស៊ា ឆៃលីន នាយក​ប្រតិបត្តិ​ក្រុម​ហ៊ុន​អចលន​ទ្រព្យ ស៊ីអិល រៀលធី បាន​និយាយ​ថា ការ​ទទួល​ជោគជ័យ​របស់​គម្រោង The Bridge គឺជា​សញ្ញា​ល្អ​សម្រាប់​វិស័យ​អចលន​ទ្រព្យ​ក្នុង​ប្រទេស​កម្ពុជា ហើយ​ការ​ទទួល​ជោគ​ជ័យ​នេះ ក៍​ដោយ​សារ​តែ The Bridge គឺ​ជា​គម្រោង​ល្អ ទំនើប មាន​តម្លៃ​សមរម្យ និង​មាន​ទី​តាំង​ល្អ​ចំ​កណ្តាល​ក្រុង​ផង​ដែរ។

លោក​បាន​អះអាង​ថា៖ «ការ​ទទួល​បាន​នូវ​ភាព​ជោគជ័យ​របស់ The Bridge ដោយ​សារ​លក់​អស់​មុន​បញ្ចប់​ការ​សាង​សង់ គឺ​អាច​បញ្ជាក់​អំពី​ការ​ទុក​ចិត្ត​លើ​គម្រោង​នេះ​ពី​សំណាក់​អតិថិជន​ទើប​គេ​ហ៊ាន​ទិញ​គម្រោង​នេះ»។

នៅ​ពេល​បញ្ចប់​ការ​សាង​សង់ The Bridge ត្រូវ​បាន​គេ​រំពឹង​ថា នឹង​ក្លាយ​ទៅ​ជា​មជ្ឈមណ្ឌល​ការិយាល័យ និង​កន្លែង​រស់​នៅ​ដ៏​ល្អ​បំផុត​នៅ​រាជធានី​ភ្នំពេញ ព្រោះ​ទីនោះ​នឹង​មាន​សេវាកម្ម​ចម្រុះ​ជាច្រើន​ដូចជា អាង​ហែល​ទឹក កន្លែង​ហាត់​ប្រាណ និង​ហាង​លក់​ទំនិញ។ នៅ​ក្នុង​គម្រោង The Bridge មាន​លំនៅឋាន​ចំនួន ៧៦២ យូនីត និង​មាន​ការិយាល័យ​បែប​លំនៅឋាន (SoHo) មាន​ចំនួន ៩៦៣ យូនីត៕

0

Comments

Please, login or register to post a comment