Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​សិក្សា​រកឃើញ​ថា​ គុណភាព​សេវាកម្ម​នៅ​តាម​សណ្ឋាគារ​នៅ​ កម្ពុជា​ មាន​ភាព​ប្រសើរ​ទ្បើង

គំរូ​នៃ​បន្ទប់​ស្នាក់នៅ​មួយ​របស់​សណ្ឋាគារ​សុខាល័យ​អង្គរ​នៅ​ខេត្ត​សៀមរាប។
គំរូ​នៃ​បន្ទប់​ស្នាក់នៅ​មួយ​របស់​សណ្ឋាគារ​សុខាល័យ​អង្គរ​នៅ​ខេត្ត​សៀមរាប។

ការ​សិក្សា​រកឃើញ​ថា​ គុណភាព​សេវាកម្ម​នៅ​តាម​សណ្ឋាគារ​នៅ​ កម្ពុជា​ មាន​ភាព​ប្រសើរ​ទ្បើង

ការ​សិក្សា​ថ្មី​មួយ​ដែល​ទើប​បញ្ចប់​កាលពី​ពេល​ថ្មីៗ​នេះ​បាន​រកឃើញ​ថា​សេវាកម្ម​សណ្ឋាគារ​នៅ​កម្ពុជា​កាន់តែ​មាន​ភាព​ប្រសើរ​ទ្បើង​ដោយសារ​ការ​ប្រកួតប្រជែង​ក្នុង​ឧស្សាហកម្ម​នេះ​ក៏​ដូចជា​ការ​ត្រៀម​ប្រកួត​ជាមួយ​បណ្តា​ប្រទេស​ក្នុង​តំបន់​នា​ពេល​ខាង​មុខ​។

យោង​តាម​ការ​សិក្សា​របស់​ក្រុមហ៊ុន​ប៊ុណ្ណារៀលធីគ្រុប​ដែល​ទើប​បញ្ចប់​កាលពី​ពេល​ថ្មីៗ​នេះ​បាន​រកឃើញ​ថា​គិត​ត្រឹម​ដំណាច់​ត្រីមាស​ទី​ ៣ ឆ្នាំ​ ២០១៥ ​នេះ​ចំនួន​សណ្ឋាគារ​នៅ​រាជធានី​ភ្នំពេញ​មាន​ចំនួន​ ៣១៧ ស្មើ​នឹង​បន្ទប់​សរុប​ប្រមាណ​ ១៥០០០ ​បន្ទប់​នៅ​ខេត្ត​សៀមរាប​មាន​សណ្ឋាគារ​ចំនួន​ ៤១៧ និង​មាន​បន្ទប់​សរុប​ចំនួន ១៧ ០០០ ​បន្ទប់​នៅ​ខេត្ត​ព្រះសីហនុ​មាន​សណ្ឋាគារ​ចំនួន ១៣៣ និង​មាន​បន្ទប់​ចំនួន ៤០០០ ​បន្ទប់ និង​នៅ​ខេត្ត​បាត់ដំបង​មាន​សណ្ឋាគារ​សរុប​ចំនួន​ ៤៥ និង​មាន​បន្ទប់​សរុប​ចំនួន​ ១៦០០ ​ទៅ​ ១៧០០ ​បន្ទប់​។

ការ​សិក្សា​ដដែល​បាន​រកឃើញ​ថា៖ «​រាជធានី និង​ខេត្ត​មាន​សក្តានុពល​សេដ្ឋកិច្ច​ចំនួន​បី​ទៀត​មាន​សណ្ឋាគារ​សរុប​ចំនួន​ ៨៩២ ​កន្លែង​ដែល​បាន​និង​កំពុង​ផ្តល់​សេវាកម្ម​បដិសណ្ឋារកិច្ច និង​សេវាកម្ម​កាន់​តែ​មាន​គុណភាព​ប្រសើរ​ទ្បើង​។ ការ​សិក្សា​នេះ​បាន​ធ្វើការ​ផ្តោត​តែ​លើ​សណ្ឋាគារ​ដែល​មាន​លំដាប់​ផ្កាយ​ពីរ​ទ្បើង​តែ​ប៉ុណ្ណោះ​»​។

ចំណែក​អត្រា​ប្រើប្រាស់​បន្ទប់​សណ្ឋាគារ​នៅ​រាជធានី​ភ្នំពេញ​ចាប់ពី​ខែ​មករា​ដល់​ខែ​វិច្ឆិកា​មាន​ក្នុង​​រង្វង់ ៦៨ ​ភាគរយ​, សៀមរាប​មាន ៦៦ ​ភាគរយ​, ក្រុង​ព្រះសីហនុ​មាន​អត្រា ៧៤ ​ភាគរយ និង​ខេត្ត​បាត់ដំបង​មាន ៧៥ ​ភាគរយ​។

ការ​សិក្សា​នេះ​ក៏​បាន​រកឃើញ​ផង​ដែរ​ថា​សណ្ឋាគារ​ដែល​មាន​លំដាប់​ផ្កាយ​ពីរ​មាន​តម្លៃ​បន្ទប់​ចន្លោះ​ពី ២១ ​ដល់​ ៦០ ​ដុល្លារ​សណ្ឋាគារ​ផ្កាយ​បី​មាន​តម្លៃ​ចាប់ពី ៤៤ ​ដល់​ ៨០ ​ដុល្លារ​សណ្ឋាគារ​ផ្កាយ​បួន​មាន​តម្លៃ​បន្ទប់​ចន្លោះ​ពី ៩០ ​ដល់​ ២០០ ​ដុល្លារ និង​សណ្ឋាគារ​លំដាប់​ផ្កាយ​ប្រាំ​មាន​តម្លៃ​បន្ទប់​ចាប់ពី​ ១៥០ ដល់​ ២០០០ ​ដុល្លារ​ក្នុង​មួយ​យប់​អាស្រ័យ​លើ​ប្រភេទ​បន្ទប់​ទំហំ​បន្ទប់ និង​ការ​បំពាក់​សម្ភារ​នានា​។

លោក ហ៊ិន សុជាតិ នាយក​ផ្នែក​​ស្រាវជ្រាវ​អចលនទ្រព្យ​នៃ​ក្រុមហ៊ុន​ប៊ុណ្ណា​រៀលធីគ្រុប​បាន​ថ្លែង​ថា​ការ​កក់​បន្ទប់​តាម​អនទ្បាញ និង​តាម​លក្ខណៈ​ឯកជន​ជាទូទៅ​មាន​តម្លៃ​ថ្លៃ​ជាង​ការ​កក់​បន្ទប់​តាមរយៈ​ក្រុមហ៊ុន​ភ្នាក់ងារ​ទេសចរណ៍​នានា​។ អត្រា​ប្រើប្រាស់​បន្ទប់​នៅ​តាម​សណ្ឋាគារ​ទាំង​នោះ​គិត​ជា​មធ្យម​មាន​ក្នុង​រង្វង់ ៧១ ​ភាគរយ​។

លោក​បន្ត​ថា៖ «​តាមរយៈ​ការ​ប្រឹងប្រែង​របស់​ក្រសួង​ទេសចរណ៍​បាន​ធ្វើឲ្យ​សេវា​បដិសណ្ឋារកិច្ច​នៅ​តាម​សណ្ឋាគារ និង​គុណភាព​សេវាកម្ម​កាន់តែ​មាន​ភាព​ប្រសើរ​ទ្បើង​ព្រោះ​ក្រសួង​នេះ​បាន​ធ្វើការ​បណ្តុះបណ្តាល​ជាច្រើន​ដល់​ម្ចាស់​សណ្ឋាគារ​នានា​»​។

លោក​បន្ត​ថា «​ចំនួន​អត្រា​ប្រើប្រាស់​បន្ទប់​សណ្ឋាគារ​នៅ​រាជធានី ខេត្ត​ទាំង​បួន​​នេះ​បាន​ប្រឈមមុខ​នឹង​ការ​ខ្វះ​ខាត​បន្ទប់​ផង​ដែរ​ដោយ​ចាប់​ពី​ខែ​ធ្នូ ដល់​ខែ​កុម្ភៈ​ជា​រៀងរាល់​ឆ្នាំ​អត្រា​កក់​បន្ទប់​សណ្ឋាគារ​បាន​កើន​​ទ្បើង​រហូត​ដល់​ ១០០ ​ភាគរយ​ដែល​ធ្វើ​ឲ្យ​ខ្វះ​បន្ទប់​សណ្ឋាគារ​នៅ​ខេត្ត​សៀមរាប​»​។

ទោះ​ជា​យ៉ាង​ណា​លោក ហូ វណ្ឌី អតីត​សហប្រធាន​ក្រុម​ការងារ​ទេសចរណ៍ និង​ជា​នាយក​ក្រុមហ៊ុន World Express & Travel បាន​ថ្លែង​ថា​ តួលេខ​នេះ​មិន​មាន​មូលដ្ឋាន​គួរ​ឲ្យ​ទុក​ចិត្ត​បាន​នោះ​ទេ​ប្រសិន​ជា​ការ​ស្រង់​តាម​ប្រព័ន្ធ​អនទ្បាញ​ព្រោះ​បច្ចុប្បន្ន​សណ្ឋាគារ​នានា​បាន​ធ្វើ​ការងារ​ផ្ទាល់​ជាមួយ​អតិថិជន និង​ដៃគូ​របស់​ពួកគេ​ផ្ទាល់​កាន់​តែ​ច្រើន​។

ដោយ​សំអាង​លើ​តួលេខ​ផ្លូវការ​ដក​ស្រង់​ចេញ​ពី​របាយការណ៍​ប្រចាំ​ឆ្នាំ​ ២០១៣-២០១៤ របស់​ក្រសួង​ទេសចរណ៍​។

លោក វណ្ឌី បាន​អះអាង​ថា៖ «​កាលពី​ឆ្នាំ​ ២០១៤ នៅ​រាជធានី​ភ្នំពេញ​មាន​សណ្ឋាគារ​ចំនួន​ ១៧០ និង​មាន​បន្ទប់​ស្នាក់​នៅ​ចំនួន ៧៨០៧ ​បន្ទប់​ចំណែកឯ​ផ្ទះ​សំណាក់​មាន​ចំនួន​ ៤៧៧ និង​មាន​បន្ទប់​ស្នាក់​នៅ​ចំនួន ៦៦១៤ ​បន្ទប់​។ ទន្ទឹម​នឹង​នោះ​​នៅ​ទីក្រុង​សៀមរាប​មាន​សណ្ឋាគារ​ចំនួន​ ១៧៥ ដែល​ផ្តល់​ជា​បន្ទប់​ស្នាក់​នៅ​ចំនួន ១១៦២០ ​បន្ទប់ និង​ផ្ទះសំណាក់​ចំនួន​ ២៥៤ ដោយ​មាន​បន្ទប់​ស្នាក់នៅ​ចំនួន ៣៩២៧ បន្ទប់​»​។

«​ចំណែកឯ​ក្រុង​ព្រះសីហនុ​មាន​ចំនួន ៥៤ ​សណ្ឋាគារ​ដែល​អាច​ផ្តល់​បន្ទប់​ស្នាក់​រហូត​ដល់​ចំនួន ២៦៩៧ ​បន្ទប់ និង​ផ្ទះ​សំណាក់​ចំនួន​ ១៨៧ ដែល​មាន​បន្ទប់​ចំនួន ២៧៣៤ ​បន្ទប់​។ រីឯ​ក្រុង​បាត់ដំបង​មាន​តែ ៣២ ​សណ្ឋាគារ និង​មាន​ចំនួន ១៦២០ ​បន្ទប់​ប៉ុណ្ណោះ​ »។ នេះ​បើ​តាម​ការ​អះអាង​របស់​លោក វណ្ឌី​។

លោក ហ៊ិន សុជាតិ បាន​ទទួល​ស្គាល់​ថា​តួលេខ​នៃ​ការ​ស្រាវជ្រាវ​ថ្មី​របស់​ក្រុមហ៊ុន​អចលនទ្រព្យ​នេះ​ក៏​អាច​មាន​ភាព​លម្អៀង​តិចតួច​ផង​ដែរ​៕

0

Comments

Please, login or register to post a comment

ព័ត៌មានពាក់ព័ន្ធ