Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រុង​ព្រះសីហនុ​បាន​ក្លាយ​ជា​ប៉ូល​ទី​២ សម្រាប់​អ្នក​វិនិយោគ ​ផ្តោត​លើ​ការ​អភិវឌ្ឍ​ខុនដូ

Content image - Phnom Penh Post
ការ​ដ្ឋាន​សំណង់​របស់​គម្រោង Dseaview ដែល​បាន​ចាប់​ផ្តើម​ការ​សាង​សង់​របស់​ខ្លួន​កាល​ពី​ពេល​កន្លង។ រូបថត POST STAFF

ក្រុង​ព្រះសីហនុ​បាន​ក្លាយ​ជា​ប៉ូល​ទី​២ សម្រាប់​អ្នក​វិនិយោគ ​ផ្តោត​លើ​ការ​អភិវឌ្ឍ​ខុនដូ

ភាព​ទាក់ទាញ​របស់​ខេត្ត​ព្រះសីហនុ​ទំនង​មិន​ត្រឹមតែ​ទឹក​សមុទ្រ​​ខៀវ​ស្រងាត់​នោះ​ទេ ប៉ុន្តែ​ការ​ភ្ជាប់​ជើង​ហោះហើរ​ត្រង់​ទៅ​តំបន់​នេះ​កាន់​តែ​ច្រើន និង​ឆ្នេរ​ខ្សាច់​ពណ៌​ពង​មាន់​ដ៏​ស្រស់​ស្អាត​បាន​ក្លាយ​ជា​​ផ្នែក​សំខាន់​មួយ ក្នុង​ការ​ទាក់ទាញ​អ្នក​វិនិយោគ​កាន់​តែ​ច្រើន ឡើងៗ ដើម្បី​សាងសង់​ខុន​ដូ​នៅ​តំបន់​នេះ។​

​លោក លី សែន​លាភ អគ្គនាយក​ក្រុមហ៊ុន FURI Real Estate បាន​ថ្លែង​ឲ្យ​ដឹង​តាម​ទូរស័ព្ទ​នា​ព្រឹក​ថ្ងៃ​អង្គារ​​ថា ខេត្ត​ព្រះសីហនុ​ ពិត​ជា​មាន​សក្តានុពល ដោយ​សារ​មាន​ការ​ភ្ជាប់​ជើង​ហោះ​ហើរ​ពី​ប្រទេស​ចិន និង​ពី​ខេត្ត​សៀមរាប មក​កាន់​ទីនេះ​កាន់​តែ​ច្រើន ជាពិសេស​អ្វី​ដែល​លោក​ភ្ញាក់​ផ្អើល​នោះ គឺ​លោក​ឃើញ​វត្តមាន​ជន​ជាតិ​ចិន​កាន់​តែ​ច្រើន​មក​ទស្សនា និង​វិនិយោគ​នៅ​ខេត្ត​ជាប់​មាត់​សមុទ្រ​មួយ​នេះ។

លោក​បន្ត​ថា ខេត្ត​នេះ​នៅ​មាន​សក្តានុពល​ល្អ​សម្រាប់​អភិវឌ្ឍ​ច្រើន​ដោយ​សារ​មាន​ដី​ទំនេរ​ច្រើន​ដែល​ផ្តល់​ជម្រើស​​ដល់​អ្នក​អភិវឌ្ឍន៍​កាន់​តែ​មាន​ភាព​ងាយ​ស្រួល​។​

​លោក​បន្តថា​ ៖ «​និយាយ​ពី​ការ​សាងសង់​ខុន​ដូ​នៅ​ខេត្ត​ព្រះសីហនុ យើង​ត្រូវ​សួរ​ថា តើ​អ្នក​អភិវឌ្ឍន៍​ផ្តោត​លើ​អ្នក​ណា​ជា​គោលដៅ​? បើ​អ្នក​វិនិយោគ​ផ្តោត​លើ​ប្រជាជន​ក្នុង​ស្រុក ខ្ញុំ​មិន​សូវ​មាន​ជំនឿ​ចិត្ត​នោះ​ទេ​»​។

លោក​បន្ត​ថា​ ៖ «​ប្រជាពលរដ្ឋ​ខេត្ត​ព្រះ​សីហនុ​ទំនង​មិនសូវ​ចាប់​អារម្មណ៍​ខុន​ដូ​ច្រើន​ទេ ពួក​គេ​នៅ​តែចាប់​អារម្មណ៍​លំនៅឋាន​ផ្ទាល់​ដី ដោយ​សារ​ខេត្ត​នេះ​នៅ​សល់​ដី​ទំនេរ​ច្រើន និង​មាន​តម្លៃ​ធូរ​ថ្លៃ​នៅ​ឡើយ​»​។​

​ខេត្ត​ព្រះសីហនុ​បច្ចុប្បន្ន​បាន​ក្លាយ​ជា​ប៉ូល​ទី​២ ដែល​អ្នក​វិនិយោគ​បរទេស​បាន​និង​កំពុង​សាង​សង់​ខុន​ដូ​នៅ​តំបន់​នេះ​ច្រើន ដូច​ជា គម្រោង Dseaview, Sunshine Bay, Blue Bay និង​គម្រោង​ខុន​ដូ​ជា​ច្រើន​ទៀត ដែល​បាន​និង​កំពុង​សាងសង់​ជា​បន្ត​បន្ទាប់​។​

​លោក ច្រឹក សុខនីម អគ្គនាយក​ក្រុមហ៊ុន Century21 Mekong បាន​ថ្លែង​ថា ដោយ​សារ​ខេត្ត​ព្រះសីហនុ ជា​តំបន់​ទេសចរណ៍ ហើយ​រដ្ឋាភិបាល​កំពុង​រៀបចំ​តំបន់​នេះ​ទៅ​ជា​តំបន់​ពាណិជ្ជកម្ម​នា​ពេល​អនាគត អ្នក​វិនិយោគ​ដែល​មាន​គោល​ដៅ​ធ្វើ​ការ​វិនិយោគ​រយៈពេល​វែង​បាន​ងាក​ទៅ​កាន់​តំបន់​នេះ​ដោយ​សារ​វា​ជា​តំបន់​ដែល​មាន​សក្តានុពល​សម្រាប់​ពេល​អនាគត​។​

Content image - Phnom Penh Post
ថ្ងៃ​លិច​នៅ​ឆ្នេរ​ខេត្ត​ព្រះសីហនុ កន្លង​មក​រដ្ឋាភិបាល បាន​រៀប​ចំ​សណ្តាប់​ធ្នាប់​នៅ​តាម​តំបន់​ឆ្នេរ​ឡើង​វិញ​ដើម្បី​ទាក់​ទាញ​ភ្ញៀវ​ទេសចរ។ SCOTT ROTZOLL

​លោក សុខនីម បន្ត​ថា​ ៖ «រដ្ឋាភិបាល​បាន​និង​កំពុង​ផ្តោត​ការ​យក​ ​​ចិត្ត​ទុក​ដាក់​នៅ​តំបន់​នេះ​តាម​រយៈ​ការ​រៀបចំ​ឆ្នេរ​ឲ្យ​មាន​សោភ័ណ​ភាព និង​មាន​របៀប​រៀប​រយ​ជាង​មុន គម្រោង​សាងសង់​ផ្លូវ​ហាយវេ​ពី​រាជធានី​ភ្នំពេញ ទៅ​កាន់​ខេត្ត​នេះ​ការ​មាន​ព្រលាន​យន្ត​ហោះ​​លំដាប់​អន្តរជាតិ និង​កំណើន​ភ្ញៀវ​ទេសចរ សុទ្ធ​តែ​ជា​កត្តា​ហុច​សក្តានុពល​ដល់​អ្នក​វិនិយោគ​សាងសង់​ខុន​ដូ​នៅ​ខេត្ត​នេះ​»​។

លោក​បន្ត​ថា ៖ «[​នៅ​]​ពេល​បុណ្យ​ទាន​ម្តងៗ​ពិបាក​រក​ផ្ទះ​សំណាក់ និង​សណ្ឋាគារ​សម្រាប់​ស្នាក់​នៅ ដូច្នេះ​ការ​ទិញ​​ខុន​ដូ​សម្រាប់​លំហែ​នឹង​ជា​ជម្រើស​មួយ​ផង​ដែរ​»​។​

​ទាក់ទង​នឹង​តម្លៃ​ដីធ្លី​វិញ លោក ច្រឹក សុខនីម បាន​ឲ្យ​ដឹង​ថា តម្លៃ​ដីធ្លី​នៅ​តាម​បណ្តោយ​ផ្លូវ​ធំៗ មាន​តម្លៃ​ចន្លោះ​ ៦០០ ​ទៅ​ ១ ០០០ ​ដុល្លារ​អាមេរិក​ក្នុង​មួយ​ម៉ែត្រ​ការ៉េ និង​ដី​នៅ​តាម​ផ្លូវ​នៅ​ជាប់​សមុទ្រ​អូរ​ឈើ​ទាល​មាន​តម្លៃ​ចន្លោះ​ពី​ ១០០០ ​​ទៅ ​១ ៥០០ ​ដុល្លារ និង​ដី​នៅ​តាម​ផ្លូវ​តូចៗ​ក្នុង​ក្រុង​មាន​តម្លៃ​ចន្លោះ​ពី​ ២៥០ ​ដល់ ​៣០០ ​ដុល្លារ​ក្នុង​​ម៉ែត្រ​ការ៉េ​។

​អ្នក​វិនិយោគ​ខុន​ដូ​មួយ​រូប​ដែល​បាន​និង​កំពុង​វិនិយោគ​ខុន​ដូ​មួយ​ក្នុង​ចំណោម​ខុន​ដូ​ខាង​លើ​បាន​និយាយ​ក្នុង​លក្ខ​ខណ្ឌ​មិន​បញ្ចេញ​ឈ្មោះ​ថា​ ៖ «​ខេត្ត​ព្រះសីហនុ ជា​ខេត្ត​តំបន់​ឆ្នេរ​មួយ ដែល​មាន​ភាព​ស្រស់​ស្អាត និង​ជា​ប៉ូល​ទាក់ទាញ​ភ្ញៀវ​ទេសចរ​លំដាប់​ទី​២​បន្ទាប់​ពី​ខេត្ត​សៀមរាប។ ដូច្នេះ​ខ្ញុំ​គិត​ថា អ្វីៗ​វា​នឹង​ប្រសើរ​ឡើង​សម្រាប់​ខុនដូ​របស់​ខ្ញុំ ព្រោះ​ទីនោះ​មិន​សូវ​មាន​ខុន​ដូ និង​អូតែល​លំដាប់​ប្រណីត​នៅ​ឡើយ​»​។​

«​យើង​សាង​សង់​ខុន​ដូ​សម្រាប់​ទាក់ទាញ​ជន​បរទេស មក​ប្រទេស​របស់​យើង ហើយ​នៅ​ឆ្នាំ​២០១៨ ការ​ចម្រាញ់​យក​ប្រេង​កាត​ពី​សមុទ្រ របស់​យើង នឹង​ចាប់​ផ្តើម​ដែល​នេះ​ជា​ផ្នែក​មួយ​ដ៏​សំខាន់ ក្នុង​ការ​ទាក់​ទាញ​អ្នក​វិនិយោគ​បន្ថែម​មក​កាន់​ទីនេះ​»។ នេះ​បើ​តាម​ការ​អះ​អារ​របស់​អ្នក​វិនិយោគ​រូប​នោះ​។​

​លោក ហូ វណ្ឌី អគ្គលេខាធិការ​សម្ព័ន្ធ​ទេសចរណ៍​ជាតិ​កម្ពុជា បាន​ថ្លែង​ថា បច្ចុប្បន្ន​មាន​ក្រុមហ៊ុន​អាកាស​ចរណ៍​ក្នុង​ស្រុក​ចំនួន​ពីរ គឺ​ក្រុមហ៊ុន​កម្ពុជា​អង្គរ​អ៊ែរ និង​ក្រុមហ៊ុន​បាយ័ន​អ៊ែរ បាន​ធ្វើ​ការ​ហោះហើរ​រវាង​ខេត្ត​សៀម​រាប និង​រាជធានី​ភ្នំពេញ ទៅ​កាន់​ខេត្ត​ព្រះសីហនុ​ជា​រៀងរាល់​ថ្ងៃ និង​មាន​អាកាស​ចរណ៍​មកពី​បរទេស​ធ្វើ​ការ​ហោះហើរ​លក្ខណៈ​ជួល និង​យូរៗ​ម្តង​មក​កាន់​ខេត្ត​ព្រះសីហនុ​ផង​ដែរ​។​

​លោក​បន្ត​ថា​ ៖ «​ខេត្ត​នេះ​នឹង​កាន់​តែ​មាន​សក្តានុពល និង​មាន​​ការ​រីក​ចម្រើន​កាន់​តែ​ខ្លាំង ប្រសិន​ជា​អាជ្ញាធរ​រក្សា​បាន​នូវ​ហេដ្ឋា​រចនា​សម្ព័ន្ធ និង​បរិស្ថាន ព្រម​ទាំង​សម្បត្តិ​ធម្មជាតិ​ទាំង​លើ​គោក និង​ក្នុង​ទឹក​បាន​ល្អ​»​។

លោក​បន្ត​ថា​ ៖ «​ជោគជ័យ​ឬ​មិន​ជោគជ័យ​លើ​ការ​សាងសង់​ខុន​ដូ និង​អចលនវត្ថុ​នៅ​ទីនេះ វា​អាស្រ័យ​លើ​កា​រអភិរក្ស​ធនធាន​ធម្មជាតិ និង​ការ​រៀបចំ​តំបន់​នេះ​ឲ្យ​កាន់​តែ​មាន​ភាព​ទាក់ទាញ​»​។​

​លោក យន្ត មីន អភិបាល​ខេត្ត​ព្រះសីហនុ បាន​ថ្លែង​ថា បច្ចុប្បន្ន​មាន​ខុន​ដូ​ចំនួន​បី បាន​និង​កំពុង​សាងសង់​នៅ​តាម​តំបន់​ឆ្នេរ​ក្នុង​ខេត្ត ដែល​ជា​ការ​វិនិយោគ​របស់​ក្រុមហ៊ុន​ក្នុង​ស្រុក និង​បរទេស​។

លោក​បន្ត​ថា ខេត្ត​ព្រះសីហនុ​ចេះ​តែ​បន្ត​អភិវឌ្ឍ​ទៅ​មុខ​កាន់​តែ​លឿន ដោយ​សារ​រដ្ឋាភិបាល​បាន​រៀបចំ​ខេត្ត​នេះ​ឲ្យ​ក្លាយ​ជា​តំបន់​ពាណិជ្ជកម្ម​ពហុ​វិស័យ ព្រោះ​ខេត្ត​នេះ​មាន​ឆ្នេរ​ស្អាត មាន​កំពង់​ផែ​ទឹក​ជ្រៅ​តែ​មួយ​គត់​នៅ​កម្ពុជា និង​មាន​ជើង​ហោះ​ហើរ​ត្រង់​កាន់​តែ​ច្រើន​ឆ្ពោះ​មក​កាន់​ខេត្ត​នេះ​។​ ​

លោក​បន្ត​ថា៖ «​ដោយ​សារ​សន្តិ​ភាព ទើប​មាន​​អ្វីៗ​ទាំង​អស់​នេះ​»​។ លោក​បន្ត​ថា​ ៖ «​ប្រជាជន​[​អ្នក​មាន​ជីវភាព​ធូរធារ​រស់នៅ​]​ក្នុង​ខេត្ត​ព្រះសីហនុ មាន​ការ​ចាប់​អារម្មណ៍​លើ​ខុន​ដូ​ខុន​ដូ​ច្រើន»៕

0

Comments

Please, login or register to post a comment

ព័ត៌មានពាក់ព័ន្ធ