កិច្ចប្រជុំទីផ្សារ និងទស្សនវិស័យអចលនទ្រព្យ២០១៦ (REMOC2016) នឹងប្រព្រឹត្តទៅនៅថ្ងៃទី១ ខែមេសា ខាងមុខនេះនៅឯសណ្ឋាគារភ្នំពេញ ចាប់ពីម៉ោង ៨:៣០ ព្រឹកដល់ម៉ោង ៥:០០ ល្ងាច។
នៅក្នុងកិច្ចប្រជុំនេះ អ្នកដឹកនាំក្នុងប្រទេស និងក្នុងតំបន់ជាច្រើនរូប ត្រៀមនឹងផ្តោតការយកចិត្តទុកដាក់របស់ពួកគាត់ទៅលើស្ថានភាពទីផ្សារអចលនទ្រព្យរបស់ប្រទេសកម្ពុជា។
ប៉ុស្តិ៍អចលនទ្រព្យបានជួបជាមួយនឹងអ្នកពាក់ព័ន្ធរបស់ REMOC2016 ដើម្បីដឹងពីគំនិតរបស់ពួកគាត់ទាក់ទងទៅនឹងស្ថានភាពរបស់ទីផ្សារអចលនទ្រព្យនាពេលបច្ចុប្បន្ន និងនៅក្នុងពេលអនាគត។
|
ស៊ីម ហ៊ុយឈួង ប្រធានប្រតិបត្តិ VTrust Appraisal Co. Ltd.
យើងគួរចាត់ទុកការវាយតម្លៃអចលនទ្រព្យ ជាផ្នែកសំខាន់បំផុតនៃសកម្មភាពអចលនទ្រព្យទាំងអស់ ហើយកម្ពុជាគួរតែអភិវឌ្ឍសកម្មភាពនេះ បានន័យថា អ្នកគួកជេ(អ្នកជើងសា) និងភ្នាក់ងារលក់ទាំងអស់ដែលកំពុងផ្តល់សេវាកម្មដល់អតិថិជន គួរតែមានការយល់ដឹងជ្រៅជ្រះពីការវាយតម្លៃ ដូចជាគំនិត ការអនុវត្ត និងវិធីវាយតម្លៃ។
តម្លៃដំបូងដែលមិនសមហេតុផលរបស់អ្នកលក់ គឺជាឧបសគ្គមួយដែលភ្នាក់ងារមួយរូប គួរតែគេចវេះ ដើម្បីសន្សំពេលវេលា និងកម្លាំង។ ដោយសារធនាគារទទួលអចលនទ្រព្យជាវត្ថុទ្រព្យបញ្ចាំសម្រាប់ការខ្ចីប្រាក់ ចំណុចខ្សោយក្នុងដំណើរការវាយតម្លៃនៅពេលដែលវាកំពុងឡើងថ្លៃខ្លាំង វាអាចនឹងនាំឲ្យមានវិបត្តិធនាគារនៅពេលក្រោយ ដូចដែលយើងបានរៀនពីធនាគារកណ្តាលនៃប្រទេសអៀរឡង់ កាលពីឆ្នាំ២០១២ កន្លងមក។
|
|
ធីតា អាន នាយិការងជាន់ខ្ពស់ CBRE Cambodia
ឆ្នាំ២០១៥ ជាឆ្នាំមួយដែលទីផ្សារអចលនទ្រព្យកម្ពុជាមានសភាពសកម្មយ៉ាងខ្លាំង នៅគ្រប់វិស័យ។ ដើម្បីវិភាគពីនិន្នាការសំខាន់ៗខ្លះ CBRE បានតាម ដានឃើញថា តម្លៃដីនៅខណ្ឌកណ្តាលៗទីក្រុង បានកើនឡើងជាមធ្យម៨,៤០ភាគរយ។ ការអភិវឌ្ឍការិយាល័យកម្រិតកណ្តាល ដែលបានដាក់លក់នៅឆ្នាំ២០១៥ ត្រូវបានគេទិញយកច្រើន។ យូនីតសម្រាប់ជួលកម្រិត B និង C បានកើនឡើង៦,២០ភាគរយ គឺ ២,៣០ភាគរយរៀងគ្នាផងដែរ។ នៅឆ្នាំ២០១៥ មានយូនីតខុនដូជាសរុបចំនួន ៧០១៤យូនីត ត្រូវបានគេប្រកាសនៅក្នុងអគារចំនួន ២៦អគារ ដែលនឹងនាំឲ្យមានយូនីតសរុប ២១៤១៤យូនីត នៅឆ្នាំ២០១៨ នៅពេលដែលអគារទាំងអស់ត្រូវបានបញ្ចប់។ ខណ្ឌចំការមន ជាខណ្ឌមានការបើកសម្ពោធគម្រោងច្រើនជាងគេ ដែលមានចំនួនស្មើនឹង៣៧ភាគរយនៃគម្រោងសរុប។
|
|
ច្រឹក សុខនីម ប្រធានប្រតិបត្តិ Century21 Mekong
ខុនដូមិនមែនជាទីផ្សារទើបចាប់កំណើតទៀតទេ នៅក្នុងទីក្រុងភ្នំពេញ ដោយវាមានអាយុជាង ៨ឆ្នាំហើយ។ ទោះជាយ៉ាងនេះក្តី អ្នកអភិវឌ្ឍន៍ អតិថិជន និងអ្នកពាក់ព័ន្ធសំខាន់ៗ នៅតែត្រូវដឹងអំពីរឿងខ្លះ ដើម្បីទទួលបានការយល់ដឹងពីទីផ្សារដែលនាំឲ្យពួកគាត់អាចធ្វើដំណើរទៅលើផ្លូវត្រឹមត្រូវសម្រាប់អនុវិស័យអចលនទ្រព្យមួយនេះ។
ខ្ញុំជឿថា ខុនដូ គឺជាដំណោះស្រាយមួយនៃបញ្ហាស្ទះចរាចរណ៍ តម្លៃដីឡើងខ្ពស់ ការងាយស្រួល និងស្តង់ដាររស់នៅបែបទំនើបទាន់សម័យដែលមានសន្ទុះ លឿនរបស់អ្នកធ្វើការជំនាន់ក្រោយៗនេះ។ ក៏ប៉ុន្តែ ដោយសារមានការកើនឡើងច្រើនហួសនៃការសម្ពោធខុនដូ កាលពីឆ្នាំមុន ទីផ្សារនេះបានក្លាយទៅជាទីផ្សារដែលមានការប្រកួតប្រជែងខ្ពស់ ខណៈពេលដែលវាបានផ្តល់ជម្រើសជាច្រើនទៅកាន់អតិថិជន។
|
|
James Padden អ្នកគ្រប់គ្រងភ្នាក់ងារពាណិជ្ជកម្មនៅ CBRE Cambodia
ខ្ញុំគិតថា យើងគួរប្រុងប្រយ័ត្នជាមួយនឹងទីផ្សារគេហដ្ឋាន។ ពួកយើងនៅមិនទាន់ឃើញមានតម្រូវការម្ចាស់/អ្នករស់នៅក្នុងស្រុកខ្លាំង ដែលមានភាពចាំបាច់ក្នុងការជំរុញទីផ្សារខុនដូនៅឡើយ។ ការបណ្តាក់ទុននាពេលបច្ចុប្បន្នភាគច្រើនធ្វើឡើងដោយអ្នកបណ្តាក់ទុនពីបរទេសដែលរំពឹងថា នឹងបានចំណេញច្រើន។ ទីផ្សារនេះនឹងត្រូវបានជំរុញជារយៈពេលយូរដោយអ្នករស់នៅជាជនជាតិកម្ពុជា។ ទោះបីជាស្ថានភាពនេះកំពុងផ្លាស់ប្តូរបន្តិចម្តងៗក្តី ពួកគាត់នៅមិនទាន់ក្លាយទៅជាផ្នែកមួយនៃតម្រូវការច្បាស់លាស់នោះទេ។
យើងបានឃើញការប្រកាសពីទីកន្លែងការិយាល័យកម្មសិទ្ធិជាជាន់ៗ ជាលើកទី១នៅឆ្នាំ២០១៤។ គេស្វាគមន៍និន្នាការថ្មីនេះដោយសារទ្រព្យនេះមានភាពពេញនិយមនៅទីផ្សារផ្សេងទៀតដូចជា នៅទីក្រុងហុងកុង និងបាងកក។
|
|
គីម ហ៊ាង ប្រធាន CVEA និងនាយកប្រតិបត្តិ Khmer Real Estate
វិស័យសំណង់ និងអចលនទ្រព្យ ដើរតួនាទីយ៉ាងសំខាន់ ជាម៉ាស៊ីនជំរុញសេដ្ឋកិច្ចរបស់កម្ពុជា ដោយបង្កើនឥទ្ធិពលសេដ្ឋកិច្ចរបស់វាទៅលើសេដ្ឋកិច្ចជាតិ ជាពិសេសដោយផ្តល់ការងារសំណង់ទៅកាន់មនុស្សជាង១០,០០០នាក់ នៅពាសពេញប្រទេស។ វាក៏មានឥទ្ធិពលបន្ទាប់បន្សំទៅកាន់ផ្នែក ផ្សេងៗនៃវិស័យសេដ្ឋកិច្ចផងដែរ។
ពួកយើងសូមអរគុណដល់អ្នកដឹកនាំ ក៏ដូចជាអ្នកជាប់ពាក់ព័ន្ធសំខាន់ៗនៅក្នុងឧស្សាហកម្មនេះ ដោយសារពួកគាត់ បានខិតខំយកចិត្តទុកដាក់ក្នុងការដឹកនាំឲ្យវិស័យសំណង់ និងអចលនទ្រព្យមកដល់ចំណុចនេះ។ ទោះជាយ៉ាងនេះក្តី ប្រសិនបើគ្មានការផ្លាស់ប្តូរ ឯកភាពគ្នា និងការសហការគ្នាយ៉ាងរឹងមាំ នៅក្នុងចំណោមអ្នកចូលរួមទាំងអស់ ក្នុងការអភិវឌ្ឍ និងការអនុវត្តល្អសម្រាប់ឧស្សាហកម្មនេះ នោះយើងក៏ពុំអាច អភិវឌ្ឍវាឲ្យក្លាយជាផ្នែកសំខាន់នៃសេដ្ឋកិច្ចដែរ។
|
|
គុយ វ៉ាត នាយក CVEA និងនាយក និងជានាយកប្រតិបត្តិនៃ Century21 Cambodia
ដោយសារការរីកលូតលាស់នៃសេដ្ឋកិច្ចរបស់កម្ពុជា យើងឃើញថា ទីផ្សារអចលនទ្រព្យក៏កំពុងរីកលូតលាស់ខ្លាំងទៅៗ ដើម្បីបំពេញតម្រូវការច្រើន ឡើងទៅលើគេហដ្ឋាន ការិយាល័យ ទីកន្លែងពាណិជ្ជកម្ម ក៏ដូចជា សម្រាប់ទីកន្លែងសម្រាប់ដើរកម្សាន្ត បែបឧស្សាហកម្មជាដើម។
ជាមួយនឹងវឌ្ឍនភាពនៅក្នុងឧស្សាហកម្មនេះមកដល់ឆ្នាំ២០១៦នេះ វានឹងនាំមកនូវឱកាសជាច្រើន ទោះបីជាមានការលេចឡើងនូវកត្តាប្រឈមខ្លះៗ ដែលអាចបន្ថយកម្តៅរបស់ទីផ្សារនេះក៏ដោយ។ ឧទាហរណ៍ ទីផ្សារខុនដូ។ មកដល់ពេលនេះយើងបានឮពីបញ្ហាខ្លះៗអំពីទីផ្សារខុនដូ ដូចជាការមានខុនដូច្រើនពេក ដែលជាហេតុបណ្តាលឲ្យមានការប្រកួតប្រជែងខ្ពស់ជាងមុន សម្រាប់អ្នកអភិវឌ្ឍន៍ក្នុងការលក់គម្រោងរបស់ខ្លួន ប៉ុន្តែវាក៏បានផ្តល់ជាជម្រើសល្អសម្រាប់អតិថិជនដែរ។
|
|
ហ៊ឹម សីហា ប្រធានផ្នែកស្រាវជ្រាវនៃ VTrust Appraisal Co., Ltd.
អ្នកអភិវឌ្ឍន៍ អ្នកបង្កើតគោលនយោបាយ និងអ្នកជាប់ទាក់ទងផ្សេងៗទៀត ត្រូវការចំណេះដឹងច្បាស់លាស់ និងការវិភាគជ្រាលជ្រៅទៅកាន់ផ្នែកលម្អិតរបស់ទីផ្សារអចលនទ្រព្យ ដើម្បីឲ្យពួកគេអាចធ្វើការជាមួយគ្នាបានក្នុងការអភិវឌ្ឍ ហើយនឹងដោះស្រាយការប្រឈមដែលកើតមាននៅក្នុងវិស័យនេះ។
វិស័យសំណង់ និងអចលនទ្រព្យ បានបង្កើនភាពសំខាន់របស់ខ្លួនទៅលើសេដ្ឋកិច្ចជាតិ ដោយចូលរួមបង្កើតការងាររាប់ម៉ឺនការងារ ជំរុញឲ្យមានតម្រូវការសម្រាប់បំណុលទិញផ្ទះរហូតទៅដល់១៩ភាគរយ នៅក្នុងឆ្នាំ២០១៤ ហើយនឹងទាក់ទាញទឹកប្រាក់រាប់ពាន់លានដុល្លារហូរចូលមកកាន់ទីផ្សារអចលនទ្រព្យកម្ពុជា ដោយ FDI ដែលវាអាចជះ ឥទ្ធិពលទៅដល់វិស័យផ្សេងៗនៃសេដ្ឋកិច្ចជាតិ របស់កម្ពុជា។
|
|
សន ស៊ាប នាយកប្រតិបត្តិរបស់ Key Real Estate
តម្លៃដីនៅទីក្រុងភ្នំពេញបន្តកើនឡើងក្នុងអត្រា ១០ទៅ២០ភាគរយជារៀងរាល់ឆ្នាំ។ ទោះជាយ៉ាងនេះក្តី ទីក្រុងនេះមានតំបន់ជាច្រើនដែលមានការកើនឡើងនៃតម្លៃខុសៗគ្នា ដោយសារកត្តាជាច្រើន រួមមានដូចជា ផែនការប្រើប្រាស់ទីតាំង ហេដ្ឋារចនាសម្ព័ន្ធ ដែលត្រូវបានរៀបចំជាផែនការរួចស្រេច និងតាមលក្ខណពិសេសរបស់ទីតាំងនីមួយៗ។
នៅក្នុងអំឡុងពេល១០ឆ្នាំកន្លងមកនេះ ខ្ញុំបានឃើញភ្នំពេញ រីកលូតលាស់យ៉ាងឆាប់រហ័ស។ ប្រជាពលរដ្ឋមិនត្រឹមតែផ្តោតទៅលើទីតាំងពាណិជ្ជកម្មនៅទីប្រជុំជននោះទេ ហើយថែមទាំងបានរីករាលដាល់ទៅកាន់តំបន់គេហដ្ឋានថ្មីៗនៅជាយក្រុង ដែលនៅក្នុងនោះ ទីតាំងខ្លះមានអ្នករស់នៅដល់ទៅរាប់ម៉ឺននាក់។ មិនត្រឹមតែប៉ុណ្ណោះទេ ទីតាំងផ្សេងៗនឹង មានបទពិសោធដូចគ្នានេះនាប៉ុន្មានឆ្នាំខាងមុខនេះ៕
|
Contact PhnomPenh Post for full article
Post Media Co Ltd
The Elements Condominium, Level 7
Hun Sen Boulevard
Phum Tuol Roka III
Sangkat Chak Angre Krom, Khan Meanchey
12353
Phnom Penh
Cambodia
Telegram: 092 555 741
Email: webmasterpppost@gmail.com
.jpg)
