Search form

Login - Register | FOLLOW US ON

Logo of Phnom Penh Post newspaper Phnom Penh Post - ខុនដូ​ថ្នាក់​កណ្តាល​ទាក់ទាញ​ចំណាប់​អារម្មណ៍​ប្រជាជន​ដែល​មាន​ចំណូល​កម្រិត​មធ្យម

Content image - Phnom Penh Post
គំរូ​សំណង់​ខុនដូ​ថ្នាក់​កណ្តាល។ រូបថត សហការី

ខុនដូ​ថ្នាក់​កណ្តាល​ទាក់ទាញ​ចំណាប់​អារម្មណ៍​ប្រជាជន​ដែល​មាន​ចំណូល​កម្រិត​មធ្យម

នា​ពេល​បច្ចុប្បន្ន​នេះ វិស័យ​ខុនដូ​នៅ​ប្រទេស​កម្ពុជា​នៅ​តែ​បន្ត​លូតលាស់ ដោយ​ការ​ផ្តោត​គោលដៅ​ជាធម្មតា គឺ​ទៅលើ​គម្រោង​​វិនិយោគ​ចម្រុះ​ខ្នាត​ធំ ឬ​ខុន​ដូ​ប្រណីត ដែល​មាន​តម្លៃ​ជា​មធ្យម​ជិត៣២៥០​ដុល្លារ​ក្នុង​មួយ​ម៉ែត្រ​ការ៉េ​។ នេះបើ​​យោង​តាម​របាយ​ការណ៍ Phnom Penh Market Outlook ក្នុង​ត្រីមាស​ទី​១ ប្រចាំ​​ឆ្នាំ​២០១៦ របស់ CBRE ដែល​បាន​ចេញ​ផ្សាយ​កាលពី​ដើម​ខែនេះ​។ ចំណែកឯ​ខុនដូ​​ថ្នាក់​កណ្តាល គឺមាន​តម្លៃ​ត្រឹម​តែ​១៥០០​ដុល្លារ​ក្នុង​មួយ​ម៉ែត្រ​ការ៉េ​តែ​ប៉ុណ្ណោះ​។

បើ​ទោះ​ជា​បញ្ហា​ចំនួន​ខុន​ដូអាច​នឹង​កើន​ឡើង​ហួស​ពី​តម្រូវ​ការ​ទីផ្សារ​នៅ​ទីក្រុង​​ភ្នំពេញ​ត្រូវ​បាន​លើក​ឡើង និង​ជជែក​វែក​ញែក​ដោយ​អ្នក​ឯកទេស​ផ្នែក​អចលនទ្រព្យ​ចាប់តាំងពី​មាន​សន្ទុះ​កើន​ចំនួន​ឡើង​ខ្ពស់​នា​ដើម​ឆ្នាំ​២០១៥ ក៏​ដោយ​ ក៏​បញ្ហា​នោះ គឺ​ផ្តោត​ទៅ​លើ​ខុន​ដូ​ថ្នាក់​ខ្ពស់​ប៉ុណ្ណោះ ចំណែក​ឯ​ខុន​ដូ​ថ្នាក់​កណ្តាល​នៅ​ពុំទាន់​មាន​ការ​វិភាគ​នៅ​ឡើយ​ទេ​។

បើ​តាម​របាយការណ៍​ដ​ដែល​នេះ​បង្ហាញ​ថា​ ៖ «​ការ​ផ្គត់ផ្គង់​ចំនួន​ខុន​ដូ​នៃ​ទីក្រុង​ភ្នំពេញ នា​ពេល​អនាគត និង​ត្រូវ​បាន​កំណត់​ដោយ​វិនិយោគិន​បរទេស​ដោយ​យូនីត​នោះ នឹង​ត្រូវ​បាន​ផ្តល់​ឲ្យ​ដោយ​ក្រុមហ៊ុន​តៃវ៉ាន់ និង​ចិន​» ហើយ​បរិមាណ​៣៨​ភាគរយ​នៃ​គម្រោង​ខុនដូ​ដែល​បាន​គ្រោង​ទុក​នេះ គឺជា​ខុន​ដូ​ប្រណីត​។

ទោះ​ជា​យ៉ាង​ណាក៏​ដោយ ខុនដូ​ដូចជា Diamond Home 1 និង L Residences បាន​បង្ហាញ​ឲ្យ​ឃើញ​ថា ខុន​ដូ​ដែល​មាន​តម្លៃ​សមរម្យ​កម្រិត​កណ្តាល​ឬ​មធ្យម​របស់​ក្រុមហ៊ុន​ក្នុង​ស្រុក​ក៏​កំពុង​តែ​ទទួល​បាន​ជោគជ័យ​ដែរ បើ​ទោះ​ជា​ខុនដូ​កម្រិត​ខ្ពស់​ត្រូវ​បាន​គេ​ផ្តោត​អារម្មណ៍​ជាង​ក៏​ដោយ​។ ខុន​ដូ​កម្រិត​មធ្យម​ទាំង​នេះ​ផ្តោត​សំខាន់ និង​ដាក់​តម្លៃ​សម​ស្រប​ទៅ​តាម​ប្រាក់​ចំណូល​របស់​ប្រជាជន​មាន​វ័យ​ក្មេង​ដែល​មាន​ការងារ​ធ្វើ​។

ខុនដូ Diamond Home 1 ដែលជា​ខុន​ដូ​កម្រិត​មធ្យម​មាន​ទីតាំងនៅ​ទួល​ទំពូង ខណ្ឌ​ចំការ​មន ត្រូវ​បាន​លក់​អស់​ទៅ​ហើយ ដោយ​ពាក់​កណ្តាល​នៃ​យូនីត​ទាំង​៥០ គឺ​ត្រូវ​បាន​ទិញ​ដោយ​អ្នក​នៅ​ក្នុង​ស្រុក​។ ក្រុមហ៊ុន 5Bright Siblings Construction & Property នៅ​ទីក្រុង​ភ្នំពេញ ដែល​បាន​វិនិយោគ​លើ​គម្រោង​នេះ​កំពុង​តែ​បន្ត​ការ​ជោគជ័យ ​តាម​រយៈ​គម្រោង​ខុនដូ​ទី​ពីរ ដែល​មាន​ឈ្មោះ​ថា Diamond Home 2​។

លោក សំណប់ បុគ្គលិក​រដ្ឋបាល​នៅ Diamond Home 1 បាន​ប្រាប់​ឲ្យ​ដឹង​ថា ៖ «​អតិថិជន​របស់​យើង​ភាគ​ច្រើន​គឺ​ទិញ​យូនីត​ដើម្បី​ស្នាក់​នៅ មិន​មែន​ដើម្បី​ជួល​បន្ត​នោះ​ទេ​។ តម្លៃ​យូនីត​របស់​យើង គឺ​នៅ​ចន្លោះ​ពី៤​ម៉ឺន​ទៅ​៦​ម៉ឺន​ដុល្លារ ដោយ​តម្លៃ​នេះ​ប្រែ​ប្រួល​ទៅ​តាម​ពេល​វេលា​ដែល​អតិថិជន​ទិញ និង​ប្រភេទ​យូនីត​នីមួយៗ​»​។ គម្រោង Diamond Home 1 នេះ​នឹង​បញ្ចប់​ការ​សាង​សង់​នៅ​​ចុងឆ្នាំ​២០១៦​នេះ​។

លោក​បាន​បន្ត​ថា ការ​ជោគ​ជ័យ​នេះ​បាន​នាំ​ឲ្យ​អ្នក​វិនិយោគ​បន្ត​គម្រោង​សាង​សង់ Diamond Home 2 ដែល​នឹង​មាន​យូនីត​ចំនួន​២៥០ និង​មាន​ទីតាំង​នៅមុខ​រោង​ចក្រ​គង់​ហុង តាម​បណ្តា​យ​ផ្លូវ​ព្រះ​មុនី​វង្ស​។

បើ​ទោះ​ជា​តម្លៃ​សម្រាប់​គម្រោង​ទី​ពីរ​នេះ នៅ​មិន​ទាន់​បាន​កំណត់​ក៏​ដោយ គម្រោង​នេះ​ផ្តោត​សំខាន់​ទៅលើ​អតិថិជន​ក្នុង​ស្រុក និង​ក្រៅ​ស្រុក ដូចជា​គម្រោង​ទីមួយ​ដែរ​។ Diamond Home 2 ត្រូវ​បាន​រំពឹង​ទុក​ថា នឹង​បញ្ចប់​នៅ​ចុងឆ្នាំ​២០១៩​។

​ក្នុង​ប្រភេទ​ខុន​ដូ​ថ្នាក់​កណ្តាល​នេះ​ដែរ គម្រោង L Residence Cambodia ក៏​កំពុងតែ​សាងសង់​គម្រោង​ខុន​ដូ​ចំនួន​៥ ដោយ​គម្រោង​ទី​១ ទី​២ និង​ទី​៣ ដែល​មាន​​ឈ្មោះ​ថា L បឹង​ត្របែក L សុវណ្ណ និង L អូឡាំពិក ដោយ​ត្រូវបាន​លក់​អស់​ទៅហើយ​។ អតិថិជន​ពាក់​កណ្តាល​នៃ​គម្រោង​ទាំង​នេះ គឺជា​ប្រជាជន​ក្នុង​ស្រុក។ គម្រោង L បឹង​ត្របែក កំពុង​តែ​រង់​ចាំ​ការ​រើ​ចូល​មក​ស្នាក់នៅ​របស់​អតិថិជន ហើយ​គម្រោង​ទី​២ និង​ទី​៣ នឹង​បញ្ចប់​នៅ​ចុង​ឆ្នាំ​នេះ​។

​ចំណែក​ឯ​ខុន​ដូ L បឹង​កេងកង​៣ និង L បឹង​ត្របែក​២ ដែល​ជា​គម្រោង​ទី​៤ និង​ទី​៥ នឹង​បញ្ចប់​នៅ​ក្នុង​ឆ្នាំ​២០១៨ ដោយ ៧០​ភាគរយ នៃ​គម្រោង​ទី​៤ នេះ ក៏​ត្រូវ​បាន​លក់​ចេញ​ហើយ​ដែរ​។​ ​តម្លៃ​យូនីត​ខុន​ដូ L Residence គឺ​នៅ​ចន្លោះ​៤​ម៉ឺន​ទៅ​១០​ម៉ឺន​ដុល្លារ។

​អ្នក​នាង សៀក​លី ដែល​ជា​បុគ្គលិក​ផ្នែក​លក់​នៃ L Residence បាន​ប្រាប់​ថា ៖ «​អតិថិជន​របស់​យើង​គឺ​ពាក់​កណ្តាល​ជា​អ្នក​នៅក្នុង​ស្រុក និង​ពាក់​កណ្តាល​ទៀត គឺ​មកពី​បរទេស​។ ពួក​គាត់​ភាគ​ច្រើន គឺ​ទិញ​ដើម្បី​ជួល​បន្ត»។​

នាយក​គ្រប់គ្រង Maxem Property លោក អៀ សារ៉ាបុត្រ បាន​ថ្លែង​កាល​ពី​ដើម​ឆ្នាំ​នេះ​ថា វិនិយោគិន​កំពុងតែ​ចាប់​ផ្តើម​សម្លឹង​មើល​ឃើញថា ខុន​ដូ​ប្រណីត​​នឹង​មាន​ការ​ផ្គត់ផ្គង់​ហួស​កម្រិត រីឯ​ប្រជាជន​ក្នុងស្រុក​បែរជា​ទៅ​ស្វែងរក​លំនៅឋាន​ដែល​មាន​តម្លៃ​សមរម្យ​ទៅវិញ​។

លោក​បាន​ថ្លែងថា ៖ «ម្ចាស់​​ក្រុមហ៊ុន​ អចលន​ទ្រព្យ​មើល​ឃើញ​ថា ខុន​ដូ​ថ្នាក់​កណ្តាល និង​ខុន​ដូ​ដែល​មាន​តម្លៃ​សមរម្យ នៅ​មាន​ចំនួន​ពុំ​ទាន់​គ្រប់គ្រាន់​ទេ ហើយ​ក្រុមហ៊ុន​ទាំង​នោះ​កំពុង​តែ​ចាប់​ផ្តើម​​សាងសង់​លំនៅឋាន​បែប​នោះ​ហើយ។ ខ្ញុំ​សង្ឃឹម​ថា និន្នាការ​នេះនឹង​បន្ត​កើនឡើង​នៅក្នុង​ឆ្នាំ​នេះ​ច្រើន​ជាង​កាល​ពី​ឆ្នាំ​មុន​»៕

0

Comments

Please, login or register to post a comment

ព័ត៌មានពាក់ព័ន្ធ