Search form

Login - Register | FOLLOW US ON

Logo of Phnom Penh Post newspaper Phnom Penh Post - ទុនវិនិយោគ​ក្នុង​វិស័យ​សំណង់​ធ្លាក់ចុះ​ ២២ ​ភាគរយ

Content image - Phnom Penh Post
លោក គីម ហ៊ាង ប្រធាន CVEA។ មឿន ញាណ

ទុនវិនិយោគ​ក្នុង​វិស័យ​សំណង់​ធ្លាក់ចុះ​ ២២ ​ភាគរយ

ជា​ការ​ពិត​ទីបំផុត​ទុនវិនិយោគ​នៅក្នុង​វិស័យ​សំណង់​បាន​បង្ហាញ​ពី​ភាព​ថមថយ​ល្បឿន​របស់​ខ្លួន​ដោយ​គិត​ត្រឹម​ដំណាច់​ត្រីមាស​ទី​ ១ ​ឆ្នាំ​នេះ​ទុនវិនិយោគ​ក្នុង​វិស័យ​នេះ​បាន​ធ្លាក់​ចុះ​ ២២,១០ ​ភាគរយ​ធៀប​រយៈពេល​ដូច​គ្នា​កាលពី​ឆ្នាំ​មុន​។

យោង​តាម​របាយការណ៍​បូក​សរុប​លទ្ធផល​ការងារ​ត្រីមាស​ទី​ ១ ឆ្នាំ​ ២០១៧ និង​ទិសដៅ​ការងារ​បន្ត​របស់​ក្រសួង​រៀបចំ​ដែនដី​នគរូបនីយកម្ម និង​សំណង់​បាន​ឲ្យ​ដឹង​កាលពី​ពេល​ថ្មីៗ​នេះ​ថា​នៅ​ក្នុង​ត្រីមាស​ទី​ ១ ​ឆ្នាំ​នេះ​ក្រសួង​រៀបចំ​ដែនដី និង​មន្ទីរ​រៀបចំ​ដែនដី​ថ្នាក់​រាជធានី-ខេត្ត បាន​អនុម័ត​គម្រោង​សរុប​ចំនួន​ ៧៨៦ មាន​ផ្ទៃក្រឡា និង​តម្លៃ​ប៉ាន់ស្មាន​នៃ​ទុនវិនិយោគ​ចំនួន​ជាង ១២៨២ ​លាន​ដុល្លារ​អាមេរិក ធៀប​រយៈពេល​​ដូច​គ្នា​កាលពី​ឆ្នាំ​មុន​គឺ​មាន​គម្រោង​ចំនួន​ ៤៧៣ ​គម្រោង និង​មាន​តម្លៃ​ទុនវិនិយោគ​ប្រមាណ​ជាង ១៦៤៧ ​លាន​ដុល្លារ​អាមេរិក​ថយ​ចុះ ២២,១០ ​ភាគរយ​ធៀប​រយៈពេល​ដូច​គ្នា​កាលពី​ឆ្នាំ​មុន​។

របាយការណ៍​ដដែល​បាន​បង្ហាញ​ថា​វិស័យ​នេះ​បាន​ផ្តល់​ការងារ​ដល់​ប្រជាពលរដ្ឋ​ចំនួន ៤៨០០០ ​នាក់​ទៅ​ ៥០០០០ ​នាក់​ក្នុង​មួយ​ថ្ងៃ​ក្នុង​នោះ​រាជធានី​ភ្នំពេញ​មាន​ប្រមាណ ២២០០០ ​ទៅ​ ២៣០០០ ​នាក់​ក្នុង​មួយ​ថ្ងៃ​។

លោក សេង ឡូត អ្នក​នាំពាក្យ​ក្រសួង​រៀបចំ​ដែនដី នគរូបនីយកម្ម និង​សំណង់​មិន​បាន​លើក​​ទូរស័ព្ទ​ទេ ទោះ​ជា​មាន​ការ​ខល​ទៅ​ជាច្រើន​លើក​ក្តី​។

លោក ច្រឹក សុខនីម អគ្គនាយក​​ក្រុមហ៊ុន Century21 Mekong បាន​ថ្លែង​ថា​គម្រោង​នីមួយៗ​ដែល​បាន​ទទួល​ការ​អនុម័ត​កន្លង​មក​ពួកគេ​កំពុង​សាងសង់​​ហើយ​គម្រោង​នីមួយៗ​វា​ត្រូវ​ចំណាយ​ពេលវេលា​ច្រើន ដើម្បី​បញ្ចប់​ដូច្នេះ​ចំនួន​គម្រោង​អាច​តិច ឬ​ច្រើន អាស្រ័យ​លើ​ទីតាំង​នីមួយៗ​ហេតុនេះ​ការ​ធ្លាក់​ចុះ​នូវ​ទុនវិនិយោគ​ក្នុង​វិស័យ​នេះ​វា​ជា​និន្នាការ​ធម្មតា មិន​មាន​អ្វី​គួរ​ឲ្យ​ព្រួយបារម្ភ​នោះ​ទេ​។

លោក​បន្ត​ថា​ក្នុង​រយៈពេល​ដើម​ឆ្នាំ​នេះ​ជាទូទៅ​មិន​មាន​អ្វី​ប្រែប្រួល​នោះ​ទេ ប៉ុន្តែ​លទ្ធផល​ជាក់ស្តែង​នឹង​បង្ហាញ​នៅ​ចុង​ឆ្នាំ​នេះ​។

លោក​បន្ត​ថា​៖ «​ការ​ថយ​ចុះ​នូវ​ទុនវិនិយោគ​ក្នុង​វិស័យ​នេះ​អាច​​មួយ​ផ្នែក​ដោយសារ​ការ​បោះឆ្នោត​ជិត​ចូល​មក​ដល់ និង​ការ​​ចូល​មក​របស់​អ្នក​វិនិយោគ​មាន​​ចំនួន​តិច​ជាង​ឆ្នាំ​មុន​»​។

ប្រធាន​សមាគម​អ្នក​វាយតម្លៃ និង​ទីភ្នាក់ងារ​អចលនវត្ថុ​កម្ពុជា​លោក គីម ហ៊ាង បាន​ថ្លែង​ថា​ការ​ធ្លាក់​ចុះ​ទុនវិនិយោគ​ក្នុង​វិស័យ​នេះ​វា​ជា​និន្នាការ​ធម្មតា វា​ប្រៀប​​បី​ដូច​ការ​វិវត្ត​របស់​មនុស្ស​ដែល​មាន​វ័យ​ចន្លោះ​ ១​ ទៅ​ ៣ ​ឆ្នាំ​មាន​ការ​ប្រែប្រួល​ពី​ ៣ ​ដល់​ ៨ ​ឆ្នាំ​ក៏​មាន​ការ​ប្រែប្រួល ប៉ុន្តែ​ពី​ ១៥ ​ដល់​ឆ្នាំ​អាយុ​ ២០ និង​ពី​អាយុ​ ២០ ​ទៅ​ ៣០ ​ឆ្នាំ​មិន​សូវ​ឃើញ​មាន​អ្វី​ប្រែប្រួល​នោះ​ទេ​គឺ​ដូច​នឹង​ការ​វិវត្ត​របស់​វិស័យ​នេះ​នាពេល​បច្ចុប្បន្ន ស្ថានភាព​ឆ្នាំ​នេះ​គឺ​វា​ស្រដៀង​គ្នា​ទៅ​នឹង​ឆ្នាំ​ ២០១២ ដល់​ ២០១៥ ប៉ុន្តែ​តិច​ជាង​ឆ្នាំ​ ២០១៥ និង​ ២០១៦ ​។

លោក​បន្ត​ថា​៖ «​វា​ជា​ការ​វិវត្តន៍​ធម្មតា​មិន​មាន​អ្វី​អវិជ្ជមាន​នោះ​ទេ​ព្រោះ​ពេល​នេះ​បើ​អ្នក​វិនិយោគ​អាជីព​មាន​ទុន​គ្រប់គ្រាន់ ពួកគេ​នឹង​នៅ​តែ​ជោគជ័យ​ហើយ​ពួកគេ​នៅ​តែ​សាងសង់​បន្ត​»​។

លោក​បន្ត​ថា​៖ «​ទីផ្សារ​នេះ​ជិត​ឆ្អែត​ហើយ​សម្រាប់​អចលនវត្ថុ​ប្រណីត​សំដៅ​អ្នក​មាន​លុយ​ច្រើន និង​អ្នក​មាន​ជីវភាព​មធ្យម ប៉ុន្តែ​ទីផ្សារ​សម្រាប់​អ្នក​មាន​ចំណូល​ក្រោម​មធ្យម​នៅ​តែ​មាន​តម្រូវការ​ច្រើន​»​។

លោក គីម ហ៊ាង បាន​បន្ត​ថា​ប្រសិន​ជា​អ្នក​វិនិយោគ​បែប​ឆក់​កណ្តៀត​ដែល​រង់ចាំ​យក​លុយ​ពី​ការ​លក់​យក​មក​សាងសង់​គឺ​មិន​ទទួល​បាន​ជោគជ័យ​នោះ​ទេ​នាពេល​នេះ​ហើយ​ការ​ពន្យារពេល​គម្រោង​របស់​ពួកគេ​ជា​រឿង​ល្អ​ដើម្បី​កុំ​ឲ្យ​សំណង់​សាងសង់​មិន​ចប់​ទុក​ចោល​កណ្តាល​ទី​៕

0

Comments

Please, login or register to post a comment

ព័ត៌មានពាក់ព័ន្ធ