Search form

Login - Register | FOLLOW US ON

Logo of Phnom Penh Post newspaper Phnom Penh Post - ប្លង់​គោល​អភិវឌ្ឍ​រាជធានី ​ភ្នំពេញ ​អនុម័ត​ក្រោយ​គម្រោង​ធំៗ​អនុវត្ត​រួច​ហើយ

Content image - Phnom Penh Post

ប្លង់​គោល​អភិវឌ្ឍ​រាជធានី ​ភ្នំពេញ ​អនុម័ត​ក្រោយ​គម្រោង​ធំៗ​អនុវត្ត​រួច​ហើយ

ប្លង់​គោល​រាជធានី​ភ្នំពេញ​ដែល​ត្រូវ​បាន​គេ​ទន្ទឹង​រង់ចាំ​ជាយូរ​មក​ហើយ​នោះ​ត្រូវ​បាន​រាជរដ្ឋាភិបាល​កម្ពុជា​អនុម័ត​កាលពី​ចុង​ឆ្នាំ​ ២០១៥ ​កន្លង​នេះ​ដោយ​ទទួល​បាន​ការ​ស្វាគមន៍​ពី​អ្នក​ជំនាញ​ផ្នែក​អចលនទ្រព្យ​បើ​ទោះបី​ជា​វា​ហាក់​ដូចជា​យឺតយ៉ាវ​ក៏ដោយ​។

ប្លង់​គោល​ប្រើប្រាស់​ដី​រាជធានី​ភ្នំពេញ​ត្រូវ​បាន​សាលា​រាជធានី​ភ្នំពេញ​រៀបចំ​ឡើង​តាំងពី​ឆ្នាំ​ ២០០២ ប៉ុន្តែ​ការ​អនុម័ត​ត្រូវ​បាន​ពន្យារពេល​រហូត​ដល់​ចុង​ឆ្នាំ​ ២០១៥ ​​កន្លង​មក​នេះ​។

ប្លង់​គោល​ប្រើប្រាស់​ដី​រាជធានី​ភ្នំពេញ​ឆ្នាំ​ ២០៣៥ ដែល​មាន​កម្រាស់ ៣៥ ​ទំព័រ និង​ដែល​ត្រូវ​បាន​​លោក​នាយករដ្ឋមន្ត្រី ហ៊ុន សែន ចុះ​ហត្ថលេខា​អនុម័ត​យល់​ព្រម​កាលពី​ថ្ងៃ​ទី​ ២៣ ខែធ្នូ ឆ្នាំ​ ២០១៥ នោះ​បាន​បង្ហាញ​គម្រោង​អភិវឌ្ឍន៍​ហេដ្ឋា​រចនាសម្ព័ន្ធ​ធំៗ​ចាំបាច់​ការ​រៀបចំ​តំបន់​បៃតង និង​ការ​ថែរក្សា​ប្រព័ន្ធ​អេកូឡូស៊ី​របស់​ទីក្រុង​។

មន្ត្រី​នាំ​ពាក្យ​សាលា​រាជធានី​ភ្នំពេញ​បាន​ឲ្យ​ដឹង​ថា​ឯកសារ​ចំនួន ៣៥ ​ទំព័រ​នោះ​គ្រាន់​តែ​ជា​ខ្លឹមសារ​សង្ខេប​ដែល​ត្រូវ​បាន​ដក​ស្រង់​ចេញ​ពី​ឯកសារ​ដើម​រាប់​ពាន់​ទំព័រ និង​ត្រូវ​បាន​លោក​អភិបាល​រាជធានី​ភ្នំពេញ ប៉ា សុជាតិវង្ស បង្ហាញ​ទៅ​លោក​នាយក​រដ្ឋមន្ត្រី ហ៊ុន សែន តែ​ប៉ុណ្ណោះ​។

លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​ភ្នំពេញ​និយាយ​ថា៖ «​ខ្ញុំ​បកស្រាយ​ជូន​មិន​អស់​ទេ​។ សៀវភៅ​ប្លង់​គោល​មួយ​មាន​កម្រាស់​ប៉ុន្មាន​ពាន់​សន្លឹក​ឯណោះ។ វា​គ្រាន់​តែ​ជា​សេចក្ដី​សង្ខេប​ដែល​លោក​អភិបាល​រាជធានី​ធ្វើ​បទអន្តរាគមន៍​ជូន​គណៈរដ្ឋមន្ត្រី​តែ​ប៉ុណ្ណោះ​»​។

លោក ឌីម៉ង់ បន្ថែម​ថា​៖ «​យើង​រីករាយ​នឹង​មាន​វា​។ វា​ជា​ឯកសារ​ផែនការ​ក្នុង​ការ​រៀបចំ​ទីក្រុង​ពីព្រោះ​រាជធានី​ភ្នំពេញ​កំពុង​តែ​ប្រឈម​នឹង​កំណើន​ប្រជាពលរដ្ឋ​ កំណើន​យានយន្ត និង​ការ​អភិវឌ្ឍ​កាន់តែ​ច្រើន​នា​ពេល​ខាង​មុខ​»​។

ទោះ​ជា​យ៉ាង​ណា​ការ​អនុម័ត​លើ​ប្លង់គោល​នេះ​មាន​ភាព​យឺតយ៉ាវ​ជាង​ការ​វិវត្ត​ដ៏​ឆាប់រហ័ស​នៃ​នគរូបនីយកម្ម​របស់​ទីក្រុង​មួយ​នេះ​ខណៈ​គម្រោង​សំណង់​ធំៗ​ដែល​​លើក​ឡើង​ក្នុង​ផែនការ​មេ​ត្រូវ​បាន​ផ្លាស់ប្ដូរ​ស្ទើរ​តែ​ទាំង​ស្រុង​រួច​ទៅ​ហើយ​។

ជា​ឧទាហរណ៍​ទំនប់​កប់ស្រូវ​ដែល​ជា​ផ្លូវ​ក្រវាត់​ក្រុង​ទប់ទល់​នឹង​ទឹកជំនន់​នោះ​ត្រូវ​បាន​សាលា​រាជធានី​ភ្នំពេញ​សាងសង់​ឡើង​រួចរាល់​តាំង​ពី​ឆ្នាំ​ ២០០១ ​។ កំពង់ផែ​ស្វយ័ត​ភ្នំពេញ​ដែល​ពី​មុន​ស្ថិត​នៅ​តាម​ដង​ទន្លេ​សាប​ក្នុង​ខណ្ឌ​ដូនពេញ​ត្រូវ​បាន​ផ្លាស់ប្ដូរ​ទៅ​កាន់​ទីតាំង​ថ្មី​ស្ថិត​ក្នុង​ស្រុក​កៀនស្វាយ​របស់​ខេត្ត​កណ្ដាល​កាលពី​ដើម​ឆ្នាំ​ ២០១៣​។

ស្ថានីយ​រថភ្លើង​ដែល​កាល​ពី​មុន​​ស្ថិត​នៅ​តំបន់​បឹងកក់​ត្រូវ​បាន​ផ្លាស់ប្ដូរ​ទៅ​កាន់​ស្ថានីយ​សំរោង​ស្ថិត​ក្នុង​ខណ្ឌ​ពោធិ៍សែនជ័យ​បន្ទាប់ពី​ការ​សាងសង់​ត្រូវ​បាន​បញ្ចប់​​កាលពី​ឆ្នាំ​ ២០១២ ហើយ​អាកាសយានដ្ឋាន​អន្តរជាតិ​ភ្នំពេញ​ដែល​ទទួល​បាន​អ្នក​ដំណើរ​​អន្តរជាតិ​ជាង ៣ ​លាន​នាក់​នៅ​ឆ្នាំ​ ២០១៥ ​កន្លង​មក​នេះ​ត្រូវ​បាន​ពង្រីក និង​កែលម្អ​បន្ថែម​ទាំង​ចម្រូង​ចម្រាស​ជាមួយ​ពលរដ្ឋ​រស់នៅ​ជុំវិញ​ទី​នោះ​នៅក្នុង​អំឡុង​ពេល​ប៉ុន្មាន​ឆ្នាំ​ចុង​ក្រោយ​មក​នេះ​។

សហគមន៍​ក្រីក្រ​បុរី​កីឡា​ដែល​គ្រប​ដណ្ដប់​លើ​ដី​ប្រហែល ៤,៦ ​ហិចតា​ត្រូវ​បាន​រាជរដ្ឋាភិបាល​ប្រគល់​សិទ្ធិ​អភិវឌ្ឍន៍​ទៅ​ក្រុមហ៊ុន​ផានអ៊ីមិច​របស់​អ្នកស្រី ស៊ុយ សុផាន អ្នក​ជំនួញ​​កម្ពុជា​ដ៏​មាន​ឥទ្ធិពល​ម្នាក់​កាលពី​ឆ្នាំ​ ២០០៣ ជា​ថ្នូរ​ទៅ​នឹង​ការ​អភិវឌ្ឍ​លំនៅឋាន​យ៉ាង​ចម្រូង​ចម្រាស​សម្រាប់​ពលរដ្ឋ​ក្រីក្រ​រស់នៅ​ទី​នោះ​។

តំបន់​បឹងកក់​ដែល​ជា​បឹង​ធម្មជាតិ​ធំ​ជាង​គេ​នៅ​កណ្តាល​រាជធានី​ភ្នំពេញ​មាន​ទំហំ​ដល់​ទៅ​ ១៣៣ ​ហិចតា​ និង​មាន​ពលរដ្ឋ​ក្រីក្រ​រស់នៅ​ប្រហែល ៤០០០ ​គ្រួសារ​នោះ​ត្រូវ​បាន​ចាក់​ខ្សាច់​បំពេញ​រួច​រាល់​ហើយ​បន្ទាប់ពី​តំបន់​នេះ​ត្រូវ​បាន​​រាជរដ្ឋាភិបាល​ប្រគល់​ទៅ​ឲ្យ​ក្រុមហ៊ុន Sukaku Inc.​របស់​លោក ឡៅ ម៉េងឃិន សមាជិក​ព្រឹទ្ធសភា​គណបក្ស​កាន់​អំណាច​កាលពី​ដើម​ឆ្នាំ​ ២០០៧ សម្រាប់​អភិវឌ្ឍ​លំនៅឋាន និង​ផ្សារ​ទំនើប​។

លោក គឹម ហ៊ាង ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនទ្រព្យ​នៅ​កម្ពុជា​បាន​ឲ្យ​ដឹង​ថា​ប្លង់គោល​រាជធានី​ភ្នំពេញ​ត្រូវ​បាន​អនុម័ត​ដោយ​យឺតយ៉ាវ​បន្តិច​​ទៅ​ហើយ​ប៉ុន្តែ​លោក​ទទួល​ស្គាល់​ពី​សារៈសំខាន់​នៃ​វត្តមាន​ប្លង់​គោល​នេះ​ចំពោះ​វិស័យ​អចលនទ្រព្យ​។

លោក គឹម ហ៊ាង និយាយ​ថា​៖ «​យើង​សង្កេត​ឃើញ​ជាទូទៅ​នៅ​ប្រទេស​កម្ពុជា​យើង​ច្បាប់​តែងតែ​កើត​ចេញ​នៅ​ពេល​សកម្មភាព​ត្រូវ​បាន​គេ​ធ្វើ​រួច​ទៅ​ហើយ​។ សម្រាប់​ខ្ញុំ​មិនមែ​នជា​រឿង​ចម្លែក​ និង​ថ្មី​នោះ​ឡើយ​ដែល​សកម្មភាព​មួយ​ចំនួន​​ត្រូវ​បាន​អនុវត្ត​ហើយ​ទើប​មាន​​នៅក្នុង​ប្លង់គោល​ជា​ក្រោយ»។

លោក គឹម ហ៊ាង បន្ថែម​ថា​៖ «ពី​ដើម​មក​យើង​រកស៊ី​បិទ​ភ្នែក​ហើយ​យក​ដៃ​រាវ​អ៊ីចឹង​ពីព្រោះ​វិនិយោគិន​ខ្លះ​ដែល​មាន​លុយ​មិន​ដឹង​ថា​តើ​គាត់​អាច​វិនិយោគ​នៅ​កន្លែង​ណា​មួយ​ដែល​អាច​ផ្ដល់​ផល​ចំណេញ​នោះ​ឡើយ​។ ក្រោយ​ពេល​​យើង​ដឹង​យើង​អាច​វិនិយោគ​ចំ​គោលដៅ​ដែល​យើង​ចង់​វិនិយោគ​។ និយាយ​រួម​ទៅ​មាន​ប្លង់គោល​ស្រួល​ជាង​អត់​មាន​ប្លង់​គោល​។ ខ្ញុំ​គិត​ថា​អ្នក​សប្បាយ​ចិត្ត​ជាង​គេ​គឺ​វិនិយោគិន​»​។

ឆ្លើយតប​នឹង​ភាព​យឺតយ៉ាវ​នេះ​លោក ឡុង ឌីម៉ង់ បាន​បញ្ជាក់​ថា៖ «​យើង​សុខចិត្ត​យឺត​ប្រសើរ​ជាង​យើង​អត់​មាន​ពីព្រោះ​វា​ជា​ឯកសារ​តម្កល់​ការ​អភិវឌ្ឍ​រាជធានី​ភ្នំពេញ​ប្រកប​ដោយ​ចីរភាព​។ វា​យឺតយ៉ាវ​បន្តិច​មែន​ដោយសារ​ស្ថានភាព​មិន​អំណោយផល​។ ដូច្នេះ​ដើម្បី​កុំ​ឲ្យ​ខ្វះខាត​តទៅ​ទៀត​យើង​ត្រូវ​តែ​អនុម័ត​»​។

ផ្ទុយ​ទៅ​វិញ​អង្គការ​សង្គម​ស៊ីវិល​ដែល​ធ្វើការ​គាំពារ​សហគមន៍​ក្រីក្រ​នៅ​ក្នុង​រាជធានី​ភ្នំពេញ​បាន​សម្ដែង​ក្ដីបារម្ភ​ថា​ប្រជាពលរដ្ឋ​ក្រីក្រ​ក្នុង​ទីក្រុង​នេះ​អាច​កាន់តែ​រង​ហានិភ័យ​បន្ទាប់ពី​ប្លង់​គោល​រាជធានី​ភ្នំពេញ​ត្រូវ​បាន​អនុម័ត។

លោក សៀ ភារម្យ នាយក​លេខាធិការដ្ឋាន​ក្រុម​ការងារ​ពិសេស​​សិទ្ធិ​លំនៅឋាន​អង្គការ​ដែល​តែងតែ​ជំទាស់​ទៅ​នឹង​ការ​បណ្ដេញ​ចេញ​ដោយ​បង្ខំ​នោះ​បាន​និយាយ​ថា​៖ «​យើង​មាន​ក្ដីបារម្ភ​បន្ថែម​ទៀត​ក្រោយ​ពេល​អនុក្រឹត្យ​នេះ​ចេញ​មក​ពីព្រោះ​ប្រជាពលរដ្ឋ​ក្នុង​សហគមន៍​ក្រីក្រ​បាន​រងគ្រោះ​រួច​មក​ហើយ​មុន​ពេល​ប្លង់​គោល​នេះ​ត្រូវ​បាន​អនុម័ត​»​។

លោក សៀ ភារម្យ បន្ថែម​ថា​៖ «​ប្រសិន​បើ​អាជ្ញាធរ​គិត​រឿង​សេដ្ឋកិច្ច​ខ្លាំង​ហើយ​ភ្លេច​បញ្ហា​សិទ្ធិ​មនុស្ស​សិទ្ធិ​លំនៅឋាន និង​ជីវិត​អ្នក​ក្រីក្រ​នោះ​ខ្ញុំ​ជឿ​ថា​វា​នឹង​អាច​ធ្វើ​ឲ្យ​មាន​ហានិភ័យ​។ ប្រសិន​បើ​រាជរដ្ឋាភិបាល​ខិតខំ​អនុវត្ត​គោលនយោបាយ​ជាតិ​ស្ដីពី​លំនៅឋាន​ឲ្យ​បាន​ខ្ជាប់ខ្ជួន​ខ្ញុំ​ជឿ​ថា​វា​អាច​ជួយ​ដោះស្រាយ​សហគមន៍​ក្រីក្រ​»​។

រហូត​មក​ដល់​ពេល​នេះ​ប្លង់​គោល​រាជធានី​ភ្នំពេញ​ពុំ​ទាន់​ត្រូវ​បាន​​សាលា​រាជធានី​ភ្នំពេញ​ផ្សព្វផ្សាយ​ឲ្យ​ប្រជាពលរដ្ឋ​បាន​ដឹង​នៅ​ឡើយ​ទេ​ខណៈ​ពលរដ្ឋ​រស់​នៅ​តំបន់​ខ្លះ​បាន​ក្លាយ​ជា​ជនរងគ្រោះ​ក្នុង​ផែនការ​អភិវឌ្ឍន៍​មិន​ច្បាស់លាស់​របស់​អាជ្ញាធរ​មូលដ្ឋាន​។

កញ្ញា កើត សុខារ៉ានី ពលរដ្ឋ​រងគ្រោះ​ម្នាក់​នៅ​តំបន់​អូរបាក់ទូក​បន្ទាប់ពី​ផ្ទះ​របស់​គាត់​ត្រូវ​បាន​អាជ្ញាធរ​ខណ្ឌ​ឫស្សីកែវ​ឈូស​កម្ទេច​កាល​ពី​ថ្ងៃ​ទី ១៨ ខែ​មករា​កន្លង​មក​នោះ​បាន​និយាយ​ថា​អាជ្ញាធរ​ពុំ​បាន​បង្ហាញ​ផែនការ​អភិវឌ្ឍន៍​អូរបាក់ទូក​នោះ​ឡើយ​បើ​ទោះបី​ជា​កញ្ញា​បាន​ទាមទារ​មើល​​ជា​ច្រើន​ដង​ក៏ដោយ​។

កញ្ញា សុខារ៉ានី និយាយ​ថា​៖ «យើង​ចង់​ដឹង​ឲ្យ​បាន​ច្បាស់​អំពី​ផែនការ​អភិវឌ្ឍន៍​អូរបាក់ទូក​ប៉ុន្តែ​អាជ្ញាធរ​បាន​បដិសេធ​ហើយ​ចោទ​ប្រកាន់​ថា​គ្រួសារ​ខ្ញុំ​បាន​សាងសង់​ផ្ទះ​រំលោភ​លើ​ប្រឡាយ​នោះ។ មិន​ត្រឹម​តែ​បដិសេធ​ផ្ដល់​ព័ត៌មាន​ជាក់លាក់​អំពី​ផែនការ​អភិវឌ្ឍន៍​អូរបាក់ទូក​នោះ​ទេ​អាជ្ញាធរ​ថែម​ទាំង​​មិន​ស្ដាប់​ការ​ពន្យល់​របស់​យើង​​ថែម​ទៀត​ផង​»​។

យោង​តាម​ការ​បញ្ជាក់​ពី​លោក ឡុង ឌីម៉ង់ សហគមន៍​ក្រីក្រ​មាន​ចំនួន​ប្រមាណ ៣០០ ​សហគមន៍​ហើយ​ចំនួន​នេះ​នឹង​ត្រូវ​បាន​កាត់​បន្ថយ​ដោយសារ​សហគមន៍​ខ្លះ​ត្រូវ​បាន​កែលម្អ​ឲ្យ​ប្រសើរ​ឡើង​។

លោក គឹម ហ៊ាង បាន​ចោទ​ជា​សំណួរ​ថា​៖ «​តើ​យើង​ត្រូវ​កាត់​ស្បែកជើង​តម្រូវ​ជើង ឬ​យើង​ត្រូវ​កាត់​ជើង​តម្រូវ​ស្បែកជើង​។ យើង​មិន​អាច​អូស​ឫស្សី​បញ្ច្រាស​ចុង​ទេ​អ៊ីចឹង​យើង​ត្រូវ​សម្រប​សម្រួល​តាម​​ហ្នឹង​»៕

0

Comments

Please, login or register to post a comment