Search form

Login - Register | FOLLOW US ON

Logo of Phnom Penh Post newspaper Phnom Penh Post - ផ្លូវ​ដែក​ប៉ោយប៉ែត​-​ភ្នំពេញ នៅ​តែ​រាំង​ស្ទះ​ដោយ​សំណង់​អនាធិបតេយ្យ​ នៅ​ទីក្រុង​ច្រក​ព្រំដែន​នេះ

Content image - Phnom Penh Post
ផ្នែក​ខ្លះ​នៃ​កំណាត់​ផ្លូវ​ដែក​ស្ថិត​នៅ​ចន្លោះ​ពី​ក្រុង​សិរីសោភ័ណ ​ខេត្ត​បន្ទាយ​មានជ័យ ឆ្ពោះ​ទៅ​ទីក្រុង​ប៉ោយប៉ែត ដែល​បាន​ជួស​ជុល​រួច​ហើយ។ រូបថត សហការី

ផ្លូវ​ដែក​ប៉ោយប៉ែត​-​ភ្នំពេញ នៅ​តែ​រាំង​ស្ទះ​ដោយ​សំណង់​អនាធិបតេយ្យ​ នៅ​ទីក្រុង​ច្រក​ព្រំដែន​នេះ

លោក លី បូរិន អ្នក​នាំ​ពាក្យ​ក្រសួង​សាធារណការ និង​ដឹក​ជញ្ជូន បាន​ថ្លែងថា ៖ «​យើង​នឹង​ជ្រើស​យក​កាលបរិច្ឆេទ​ជាក់លាក់​មួយ ដើម្បី​បញ្ចប់​គម្រោង​ផ្លូវដែក​នេះ​បន្ទាប់ពី​យើង​ដោះស្រាយ​បញ្ហា​រួច​រាល់​ជាមួយ​ប្រជាជន​ដែល​រស់នៅ​អនាធិបតេយ្យ​លើផ្លូវ​រថភ្លើង​ក្នុង​ខេត្ត​បន្ទាយ​មានជ័យ​រួច​»​។

​លោក​បាន​ឲ្យ​ដឹង​ថា ៖ «​កំណាត់​ផ្លូវដែក​ពី​រាជធានី​ភ្នំពេញ​-​ប៉ោយប៉ែត​ត្រូវបានធ្វើ​ការជួសជុល​នៅ​ផ្នែក​ខ្លះ​ជា​រៀងរាល់​ថ្ងៃ ប៉ុន្តែ​ការអភិវឌ្ឍ​នេះ​នៅជាប់​គាំង​ដោយមាន​ផល​ប៉ះពាល់​ជាមួយ​ប្រជាជន​រស់នៅ​តាម​ផ្លូវ​នោះ ដោយ​ពួកគាត់​បាន​រំលោភ​លើ​ចំណី​ផ្លូវដែក ជា​ពិសេស​ត្រង់​កំណាត់​ផ្លូវ​ដែក​នៅក្នុង​ទីក្រុង​ប៉ោយប៉ែត​»​។

​លោក​បាន​មាន​ប្រសាសន៍​ថា សម្រាប់​គម្រោង​ផ្លូវដែក​ដែលមាន​ប្រវែង​៤៨​គីឡូម៉ែត្រ ពី​ក្រុង​សិរីសោភ័ណ ទៅ​ក្រុង​ប៉ោយប៉ែត ក្នុង​ខេត្ត​បន្ទាយ​មានជ័យ មានតែ​នៅលើ​កំណាត់​ផ្លូវ ​១ ៣០០​ ម៉ែត្រ ត្រង់ចំណុច​សង្កាត់​ផ្សារកណ្តាល ក្រុង​ប៉ោយប៉ែត​នោះទេ ដែលមាន​បញ្ហា​បង្ក​ផលប៉ះពាល់​ជាមួយ​ប្រជាជន​រស់នៅ​ទីនោះ​ប្រមាណ ៥០​គ្រួសារ​តែប៉ុណ្ណោះ​ដែល​ពួកគាត់​មិន​ព្រម​រើចេញ​បើទោះបី​ជាមាន​សំណង​រួចរាល់​ហើយ​ក្តី​។​

គម្រោង​ផ្លូវដែក​ពី​ក្រុង​សិរីសោភ័ណ​ទៅ​ព្រំដែន​ប៉ោយ​ប៉ែត​នេះ​បានចាប់ផ្តើម​គម្រោង​ជួសជុល​តាំងពី​ឆ្នាំ ​២០០៩ ប៉ុន្តែ​ត្រូវបាន​ផ្អាក​ទៅវិញ​រួច​ការ​ជួសជុល​ក៏​ងាក​មក​ធ្វើ​នៅឯ​ផ្លូវ​ដែក​ពី​ភ្នំពេញ​ទៅ​ក្រុងព្រះសីហនុ​ក្រោម​កម្ចី​ថវិកា​ពី​ធនាគារ​អភិវឌ្ឍន៍​អាស៊ី (ADB) បានដាក់​ឲ្យ​ដំណើរការ​នាពេល​សព្វថ្ងៃ​នេះ​។​

​ប៉ុន្តែ​នៅ​ក្នុង​រយៈពេល​៣​ឆ្នាំ​ចុង​ក្រោយនេះ គម្រោង​ផ្លូវដែក​ពី​ក្រុង​សិរីសោភ័ណ​ទៅ​ព្រំដែន​ប៉ោយប៉ែត ត្រូវបាន​ចាប់ផ្តើម​ឡើង​វិញ ដោយ​ប្រើប្រាស់​ថវិកា​របស់​រាជ​រដ្ឋាភិបាល​កម្ពុជា​។ កាលពី​ដំណាក់​កាល​ដំបូង ការ​ជួសជុល​ផ្លូវដែក​នេះ​បានទទួល​ជំនួយ​សម្ភារ​ពី​ប្រទេស​ម៉ាឡេស៊ី ប៉ុន្តែ​មិន​អាច​ប្រើប្រាស់​បាន​ដោយ​សារ​សម្ភារ​ទាំងនោះ​មាន​សភាព​ចាស់​ទ្រុឌទ្រោម​ពេក​។​

​លោក​បាន​បង្ហើប​ថា ៖ «​ក្រោយ ពេល​ដែល​ជំនួយ​ពី​ធនាគារអភិវឌ្ឍន៍អាស៊ី បា​នប​ញ្ទ​ប់​បន្ទាប់ពី​សាងសង់​បាន​ប្រមាណ​ចម្ងាយ​៤០​គីឡូម៉ែត្រ​។ [​ក្រោយមក​] យើង​ក៏​ទទួលបាន​ថវិកាជាតិ​ចំនួន ២០​លាន​ដុល្លារ​ក្នុង​មួយ​ឆ្នាំ ដើម្បី​[​ថែទាំ​]​សាងសង់ និង​ជួសជុល​ជាច្រើន​ដំណាក់កាល​[​និង​កំណាត់​ផ្លូវ​]​ក្នុង​រយៈ​ចម្ងាយ​ជាង ៤០០​គីឡូម៉ែត្រ​ពី​ភ្នំពេញ​មក​ព្រំដែន​ប៉ោយប៉ែត​»​។​

​លោក​បាន​បន្ថែមថា មិន​ថា​លោក ឬ​ប្រជាជន​ខ្មែរ​ទេ ដែល​ចង់ឃើញ​ផ្លូវដែក​នេះ​ដំណើរការ​ដើម្បី​ជួយ​សម្រួល​ចរាចរណ៍​ការដឹកជញ្ជូន​នៅតាម​ផ្លូវគោក​បាន​មួយ​ចំណែក​។ សព្វថ្ងៃនេះ​ការដាក់​ដំណើរការ​រថភ្លើង​ពី​ភ្នំពេញ​ទៅ​ក្រុង​ព្រះសីហនុ បាន​ជួយ​សម្រួល​ដល់​ប្រជាជន​ក្នុង​ការ​ដឹក​ឥវ៉ាន់​មួយ​ចំនួន និង​ការ​ដឹក​ជញ្ជូន​ទំនិញ​ធ្ងន់ៗ​។​

​ប៉ុន្តែ​លោក​បាន​បន្ថែម​ថា ៖ «​ខ្ញុំ​នៅតែ​មិនអាច​ជម្រាប​ច្បាស់​នូវ​ពេលវេលា​ដែល​ត្រូវ​បព្ចាប់​នោះទេ ប៉ុន្តែ​កាលណា​បញ្ហា​វិវាទ​[​ជាមួយ​]​ប្រជាជន​បាន​បញ្ចប់ ការសាងសង់​ក៏​មិនយូរ​ដែរ​»​។

Content image - Phnom Penh Post
ស្ពាន​ឆ្លង​កាត់​ស្ទឹង​សិរី​សោភ័ណ ស្ថិត​នៅ​តាម​ផ្លូវ​ដែក​នៃ​ខេត្ត​បន្ទាយ​មានជ័យ ដែល​បាន​ជួស​ជុល​រួច​ហើយ។ រូបថត សហការី

​លោក​បាន​ឲ្យ​ដឹងថា កង្វះខាត​ថវិកា និង​បញ្ហា​ប្រជាជន​រស់នៅ​អ​នា​ធិ​តេ​យ្យ គឺជា​ភាព​រាំងស្ទះ​ដល់​កា​រព​ន្លឿ​ន​សំណង់​ផ្លូវដែក​ក្នុង​ប្រទេស​កម្ពុជា ខណៈ​ពេល​ដែល​ប្រទេសជិតខាង​ដូចជា​ថៃ ម៉ាឡេស៊ី និង​សិង្ហ​បុរី បាន​និង​កំពុង​រង់ចាំ​គម្រោង​ផ្លូវដែក​អាស៊ាន​មួយ​កំណាត់​នេះ​។​

​លោក បូ​រិ​ន បាន​បញ្ជាក់ថា ការចំណាយ​ទៅលើ​ការជួសជុល​ផ្លូវដែក​ឡើងវិញ គឺ​ប្រមាណ​៤​លាន​ដុល្លារ ក្នុង​ចម្ងាយ​មួយ​គីឡូម៉ែត្រ ដោយសារ​ការចំណាយ​ទៅលើ​ការជំនួស​កំណល់ និង​ផ្លូវដែក​ចាស់​មកជា​កំណល់ និង​ផ្លូវដែក​ថ្មី ហើយ​រដ្ឋាភិបាល​បាន​ទិញ​សម្ភារ​ដែក និង​កំណ​ល់ពី​ប្រទេស​ជាច្រើន​ដូចជា ប្រទេស​អង់គ្លេស អាល្លឺម៉ង់ ចិន ថៃ និង​ប្រទេស​ផ្សេងៗ​ទៀត​។​

​ចំណែក​លោក ចាន់ សំឡេង ប្រធាន​នាយកដ្ឋាន​ផ្លូវដែក​នៃ​ក្រសួង​សាធារណការ និង​ដឹកជញ្ជូន បាន​មាន​ប្រសាសន៍​ថា ៖ «​កំណាត់​ផ្លូវដែក​គឺ​នឹង​ចេញពី​ក្រុង​ប៉ោយប៉ែត មក​ក្រុង​សិរីសោភ័ណ ខេត្ត​បន្ទាយមានជ័យ ទៅ​បាត់ដំបង និង​ពោធិ៍សាត់ កំពង់ឆ្នាំង ហើយ​ចុង​ក្រោយ​គឺ​រាជធានី​ភ្នំពេញ​»​។​

​លោក​បាន​ឲ្យ​ដឹងថា កំណល់​ដែក​ផ្លូវ​រថភ្លើង គឺ​៦០​ភាគរយ​ជា​កំណល់​ដែក​ថ្មី​។​ក្នុង​ផែនការ «​យើង​បានធ្វើការ​ជួសជុល​ពី​មង្គលបុរី ខេត្ត​បន្ទាយ​មានជ័យ មក​ខេត្តបាត់ដំបង ហើយ​សម្រាប់​ផែនការ​ឆ្នាំ​២០១៧ នឹងមាន​ការជួ​សជុល​ពី​ខេត្ត​បាត់ដំបង ទៅ​ខេត្តពោធិ៍សាត់ និង​ឆ្នាំ​ក្រោយ​ទៅ​រាជធានី​ភ្នំពេញ​។​

​លោក​មានប្រសាសន៍​ទាំង​មាន​ទំនុកចិត្ត​ថា បើ​ប្រជាជន​ដែល​បង្ករ​ជា​បញ្ហា​ចាកចេញ ការបញ្ចប់​គម្រោង​សាង់សង់​មិន​ចំណាយ​ពេល​យូរ​នោះទេ ពីព្រោះ​សម្ភារ​មាន​គ្រប់គ្រាន់​បាន​រក្សាទុក​នៅ​ក្រុង​ប៉ោយប៉ែត​សព្វថ្ងៃនេះ​។​

​លោក​បានដាក់​ការ​សង្ឃឹម​​ថា ៖ «​បើ​បាន​បព្ចាប់​បញ្ហា​លើ​កំណាត់​ផ្លូវដែក​ចម្ងាយ​១៣០០​ម៉ែត្រ ការ​សាងសង់​មិន​ចំណាយ​ពេល​យូរ​នោះទេ គឺ​ត្រឹមតែ​ពីរ​ទៅ​បី​ខែ​តែប៉ុណ្ណោះ​»​។​

​ភ្នំពេញ​ប៉ុស្តិ៍​អចលនទ្រព្យ បាន​និយាយ​ទៅ​កាន់​ប្រជា​ពលរដ្ឋ​មួយរូប​គឺ​លោក ឡាច គឹមហុង ដែល​រស់នៅ​ក្នុង​ខេត្ត​បន្ទាយ​មានជ័យ បាន​ឲ្យ​ដឹងថា ៖ «​ខ្ញុំ​សប្បាយចិត្ត​ប្រសិនបើ​គម្រោង​នេះ​អាចធ្វើ​ទៅបាន​កើត​មែន ហើយ​ខ្ញុំ​តែងតែ​រង់ចាំ​វា ដោយសារ​នេះ​ជា​គម្រោង​ផ្លូវ​រថភ្លើង​អាស៊ាន​យើង​ត្រៀមខ្លួន​ជាស្រេច​តាំងពី​ការចាប់ផ្តើម​ជួសជុល តាំងពី​ឆ្នាំ​២០០៩​មក​ម្ល៉េះ​»​។​

​ដូចដែល​លោក​សង្ឃឹម​ទុក​ថា ខ្សែ​រថភ្លើង​អាស៊ាន​អាច​នាំមក​នូវ​អត្ថប្រយោជន៍​ជាច្រើន​ដល់​ប្រជាជន ក្នុង​ស្រុក​ដូចជា​ការប្រកប​អាជីវកម្ម វិស័យ​ទេសចរណ៍ និង​សេដ្ឋកិច្ច​សង្គម​ទាំងមូល​។​

​ទាក់ទង​នឹង​គម្រោង​ជួសជុល​ផ្លូវ​រថភ្លើង​នេះ ធនាគារ​អភិវឌ្ឍន៍​អាស៊ី​បាន​ប្រាប់​ភ្នំពេញ​ប៉ុស្តិ៍​អចលនទ្រព្យ​តាមរយៈ​សារ​អ៊ីម៉ែល​ថា ធនាគារ​អភិវឌ្ឍន៍​អាស៊ី​មិនបាន​ជាប់​ពាក់ព័ន្ធ​ក្នុង​គម្រោង​ផ្លូវដែក​ទាំងនេះ​ទៀត​ទេ ដូច្នេះ ADB ប្រចាំ​ប្រទេស​កម្ពុជា​មិនអាច​ធ្វើការ​បកស្រាយ​ពាក់ព័ន្ធ​បញ្ហា​ទាំង​នេះ​បាន​ឡើយ​។​

​គួរ​បញ្ជាក់​ដែ​រថា កម្ពុជា និង​ថៃ បាន​ព្រម​ព្រៀង​ជំរុញ​ការតភ្ជាប់​ផ្លូវដែក​ពី​ភ្នំពេញ ទៅ​បាងកក តាម​រយៈ​ការចុះ​អនុស្សរណៈ​យោគយល់​គ្នា​ថ្មី​មួយ​។ នេះ​បើ​យោងតាម​ការ​ប្រកាស​ព័ត៌មាន​បន្ទាប់ពី​ដំណើរ​ទស្សនកិច្ច​ជា​ផ្លូវការ​របស់​លោក​នាយក​រដ្ឋមន្ដ្រី ហ៊ុន សែន ទៅកាន់​ទីក្រុង​បាងកក​ប្រទេស​ថៃ កាលពី​ឆ្នាំ​២០១៥ កន្លងមក​៕

0

Comments

Please, login or register to post a comment

ព័ត៌មានពាក់ព័ន្ធ