Search form

Login - Register | FOLLOW US ON

Logo of Phnom Penh Post newspaper Phnom Penh Post - ភាព​មិន​ប្រាកដ​ប្រជា​នៃ​ទីផ្សារ​ បាន​ធ្វើ​ឲ្យ​គម្រោង​ខុនដូ​មួយ​ចំនួន​ពន្យារ​ពេល

Content image - Phnom Penh Post
គម្រោង​សំណង់​ដែល​ទំនង​ជា​អគារ​ខុនដូ និង​អាជីវកម្ម​ចម្រុះ។ ហេង ជីវ័ន

ភាព​មិន​ប្រាកដ​ប្រជា​នៃ​ទីផ្សារ​ បាន​ធ្វើ​ឲ្យ​គម្រោង​ខុនដូ​មួយ​ចំនួន​ពន្យារ​ពេល

ក្នុង​អំឡុង​សប្តាហ៍​ចុង​ក្រោយ​នៃ​ខែមិថុនា​កន្លង​មក ក្រសួង​សេដ្ឋកិច្ច និង​ហិរញ្ញវត្ថុ បាន​កោះ​ហៅ​ក្រុម​អ្នក​វិនិយោគ​អចលនវត្ថុ​នៅ​កម្ពុជា​ទាំង​អស់​ជួប​ជុំ​គ្នា ដើម្បី​សម្តែង​ការ​ព្រួយ​បារម្ភ​ពី​ស្ថាន​ភាព​ទីផ្សារ​អចលនទ្រព្យ​នៅ​ក្នុង​ប្រទេស​នេះ ខណៈ​ពេល​ការ​ផ្គត់ផ្គង់​ខុនដូ​ហក់​ឡើង​លើសពី​តម្រូវ​ការ​ទីផ្សារ និង​ចំនួន​នៃ​ការ​លក់​បាន​ធ្លាក់​ចុះ​ធៀប​នឹង​បណ្តា​ឆ្នាំ​មុនៗ​។

យោង​តាម​ការ​សិក្សា​របស់​ក្រុមហ៊ុន Century21 Cambodia បាន​រក​ឃើញ​ថា គិត​ត្រឹម​ឆមាស​ទី​១​ឆ្នាំនេះ ការ​ប្រកាស​លក់​ខុនដូ​មុន​គម្រោង​មាន​ចំនួន​រហូត​ដល់ ១៣ ៧៣០ ​យូនីត ឬ​ឯក​តា គឺ​កើន​ឡើង ៥២​ ភាគរយ ធៀប​ទៅ​នឹង​រយៈ​ពេល​ដូច​គ្នា​កាល​ពី​ឆ្នាំ​មុន​។ បរិមាណ​ការ​ផ្គត់ផ្គង់​ខុនដូ​ដ៏​សម្បើម​នេះ​នឹង​នាំ​ទៅ​ដល់​ការ​ផ្គត់ផ្គង់​សរុប​កើន​ឡើង​ដល់ ៣៧ ៥៧០​ ឯក​តា នៅ​ឆ្នាំ​ ២០២០ ខាង​មុខ ដោយ​អត្រា​កើន​ឡើង​រហូត​ដល់ ៥៦​ ភាគរយ ក្នុង​មួយ​ឆ្នាំ​គិត​ពី​ឆ្នាំ​ ២០១៣ រហូត​ដល់​ពេល​បច្ចុប្បន្ន​នេះ​។

លោក ម៉ី វ៉ាន់ អគ្គនាយក​ នៃ​អគ្គនាយក​ដ្ឋាន​ឧស្សាហកម្ម ហិរញ្ញវត្ថុ នៃ​ក្រសួង​សេដ្ឋកិច្ច និង​ហិរញ្ញវត្ថុ បាន​ថ្លែង​ឲ្យ​ដឹង​តាម​ទូរស័ព្ទ​កាលពី​ថ្ងៃ​សៅរ៍​សប្តាហ៍​មុន​ថា កិច្ច​ប្រជុំ​នោះ​ពិត​ជា​មាន​ការ​ពិភាក្សា​អំពី​អាជីវកម្ម និង​ពិនិត្យ​លើ​អភិក្រម​អភិវឌ្ឍន៍​អចលនទ្រព្យ ដែល​យើង​ត្រូវ​គ្រប់គ្រង​ឲ្យ​បាន​គ្រប់​ជ្រុងជ្រោយ​រវាង​ការ​ផ្គត់ផ្គង់ និង​តម្រូវការ និង​លំហូរ​ទុក​វិនិយោគ​ពី​បរទេស​។

លោក​បន្ត​ថា ក្រសួង​តែងតែ​រៀបចំ​កិច្ច​ប្រជុំ​បែប​នេះ​ជា​ប្រចាំ ប៉ុន្តែ​ពេល​នេះ​យើង​បាន​ធ្វើ​ញឹក​ញាប់​ជាង​មុន ព្រោះ​ទីផ្សារ​កាន់​តែ​រីក​ធំ​ជាង​មុន​ដែល​យើង​ត្រូវ​មាន​ការ​ប្រុង​ប្រយ័ត្ន​។

លោក​បន្ត​ថា​ ៖ «​នៅ​ពេល​មាន​ការ​ផ្គត់ផ្គង់​ច្រើន​ជាង​តម្រូវ​ការ គឺ​ទាមទារ​ឲ្យ​ក្រុម​អ្នក​អភិវឌ្ឍន៍​មាន​យុទ្ធសាស្ត្រ​ទីផ្សារ​ថ្មី ហើយ​យើង​ព្យាយាម​ធ្វើ​ជា​ដៃ​គូ​ជាមួយ​វិស័យ​ឯកជន ព្រោះ​វា​ជា​វិស័យ​សំខាន់​ក្នុង​សេដ្ឋកិច្ច​ជាតិ​»​។

Content image - Phnom Penh Post
គម្រោង​សំណង់​ដែល​ទំនង​ជា​អគារ​ខុនដូ។ ហេង ជីវ័ន

លោក​បន្ថែម​ថា​ ៖ «​យើង​ទាមទារ​ព័ត៌មាន​ច្បាស់​លាស់ ដើម្បី​ឲ្យ​យើង​ប្រុង​ប្រយ័ត្ន ប៉ុន្តែ​បើ​គិតពី​ចំនួន​យូនីត​ខុនដូ​នៅ​លើ​ទីផ្សារ​បាន​កើន​ឡើង​ខ្លាំង ហើយ​​ការ​ទិញ​មិន​ធ្លាក់​ចុះ​នោះ​ទេ​»​។

លោក Sam Yang អគ្គនាយក​ក្រុមហ៊ុន EASTLAND Development Co., Ltd. ដែល​បាន​ចូលរួម​ក្នុង​កិច្ច​ប្រជុំ​នោះ បាន​ថ្លែង​ថា ក្រសួង​បាន​លើក​ឡើង​ពី​ការ​ព្រួយ​បារម្ភ​ពី​ការ​ផ្គត់ផ្គង់​ខុនដូ​នៅ​កម្ពុជា ប៉ុន្តែ​លោក​បាន​ប្រាប់​ថា​ ៖ «​ក្រសួង​មិន​គួរ​ព្រួយ​បារម្ភ​ពី​ទីផ្សារ​ខុនដូ​នោះ​ទេ តែ​គួរ​ធ្វើ​យ៉ាង​ណា​ជួយ​ឲ្យ​គម្រោង​ដែល​បាន​សាងសង់​អាច​បញ្ចប់​គម្រោង​របស់​ពួក​គេ​តាម​ពេល​វេលា​កំណត់​»​។

ប៉ុន្តែ​ជាក់ស្តែង​គម្រោង​ខុន​ដូ​មួយ​ចំនួន ដែល​បាន​ប្រកាស​សាងសង់​កន្លង​មក​ពេល​នេះ​បាន​ពន្យារ​ពេល​បណ្តើរៗ​ហើយ ដូច​ជា គម្រោង The Bay បាន​ពន្យារ​ពេល​សាង​សង់​គឺ​បន្ទាប់​ពី​បាន​ប្រកាស​ថា​សាងសង់​កាល​ពី​ខែ​មេសា ​ឆ្នាំ​នេះ​ គម្រោង The Sky Villa ស្ថិត​នៅ​ភាគ​ខាង​ត្បូង​ស្តាត ​អូឡាំពិក​ គម្រោង Diamond2 នៅ​ភាគ​ខាង​ត្បូង​កោះ​ពេជ្រ និង​គម្រោង​មួយ​ចំនួន​ទៀត​ក៏​បាន​​ពន្យារ​ពេល​សាងសង់​ផង​ដែរ​។

លោក ច្រឹក សុខនីម អគ្គនាយក​ក្រុមហ៊ុន Century21 Mekong បាន​ថ្លែង​កាលពី​សប្តាហ៍​មុន​ថា មាន​គម្រោង​ខុន​ដូ​ចំនួន​ពីរ​បាន​ពន្យារ​ពេល​សាងសង់ ប៉ុន្តែ​លោក​មិន​បាន​បញ្ជាក់​ថា​ ជា​គម្រោង​អ្វី​នោះ​ទេ។

លោក Michael S. Nhim សមាជិក​ក្រុម​អ្នក​វិនិយោគ​នៃ​ក្រុមហ៊ុន SIDO Group ដែល​ធ្លាប់​បាន​គ្រប់​គ្រង​គម្រោង​The Bay តម្លៃ​ ៥០០ ​លាន​ដុល្លារ នៅ​តំបន់​ជ្រោយ​ចង្វារ បាន​ថ្លែង​ថា ប្រសិន​ជា​គិត​នៅ​​រយៈពេល​ ៣​ ទៅ ៥​ ឆ្នាំ​ខាង​មុខ​ទៀត ​ចំនួន​ខុនដូ​ផ្គត់ផ្គង់​ទៅ​ក្នុង​ទីផ្សារ​នា​ពេល​នេះ​មិន​គ្រប់​នៅ​ឡើយ​ទេ មាន​តែ​ខ្វះ ប៉ុន្តែ​អ្វី​ដែល​ប្រឈម​សម្រាប់​ឆ្នាំ​នេះ និង​ឆ្នាំ​ក្រោយ​គឺ​ដោយ​សារ​ការ​បោះឆ្នោត​ក្រុម​ប្រឹក្សា​ឃុំ​-​សង្កាត់ នៅ​ឆ្នាំ ​២០១៧ និង​ការ​បោះ​ឆ្នោត​ជាតិ​នៅ​ឆ្នាំ​ ២០១៨ ដែល​ធ្វើ​ឲ្យ​អ្នក​វិនិយោគ អ្នក​ទិញ​ក្នុង​ស្រុក និង​បរទេស​មួយ​ចំនួន​រង់​ចាំ​មើល​ពី​ស្ថានភាព​នយោបាយ ដែល​ធ្វើ​ឲ្យ​ការ​លក់​ប្រចាំ​ខែ​បាន​ធ្លាក់​ចុះ​ធៀប​នឹង​ឆ្នាំ​មុន​។

លោក​បន្ត​ថា​ ៖ «​អ្នក​ខ្លះ​ពិត​ជា​បាន​ពន្យារ​ពេល​សាងសង់​គម្រោង​របស់​ពួក​គេ​តែ​ពួក​គេ​នឹង​មិន​បោះបង់​ទេ ព្រោះ​ក្រោយ​ពេល​បោះឆ្នោត​ឆ្នាំ​២០១៨ ទីផ្សារ​នេះ​នឹង​កើន​ឡើង​ខ្លាំង​ជាង​ឆ្នាំ​២០១៥​ទៀត​»​។

លោក​បន្ត​ថា​ ៖ «​ប្រជា​ពលរដ្ឋ​ក្នុង​ស្រុក ពួក​គេ​នឹង​សម្រប​ខ្លួន​រស់នៅ​តាម​ខុន​ដូ ពេល​នោះ​ទីផ្សារ​នេះ​នឹង​ខ្លាំង​ជាង​មុន​»។

នៅ​ពេល​សួរថា តើ​អ្នក​វិនិយោគ​សាងសង់​ខុន​ដូ​គួរ​ពន្យារ​ពេល​សិន ឬ​បន្ត​សាង​សង់? លោក Michael បាន​ថ្លែងថា​ ៖ «ប្រសិន​បើ​ខ្ញុំ​ជា​អ្នក​វិនិយោគ ដែល​ត្រូវ​បោះទុន​ទំហំ​១០០​លាន​ដុល្លារ​ឡើង ខ្ញុំ​នឹង​ពន្យារ​ពេល​សាងសង់​រហូត​ក្រោយ​ពេល​បោះ​ឆ្នោត​ឆ្នាំ​២០១៨ ប៉ុន្តែ​ប្រសិន បើ​ទុន​វិនិយោគ​របស់​ខ្ញុំ​មាន​តម្លៃ​ក្រោម ១០០​លាន​ដុល្លារ និង​មាន​ទីផ្សារ​នៅ​បរទេស ខ្ញុំ​នឹង​បន្ត​សាងសង់​ជា​ធម្មតា»។

Content image - Phnom Penh Post
លោក Stephen Higgins។ រូបថត សហការី

ទោះ​ជា​យ៉ាង​ណា​លោក​ឧកញ៉ា សៀ រិទ្ធី អគ្គនាយក​ក្រុមហ៊ុន World Bridgeland Group ដែល​បាន​និង​កំពុង​វិនិយោគ​កសាង​គម្រោង The Bridge, និង​គម្រោង The PEAK បាន​ថ្លែង​ថា គម្រោង​ខុនដូ​របស់​លោក​មិន​មាន​បញ្ហា​នោះ​ទេ។ ប៉ុន្តែ​ការ​សាងសង់​ខុន​ដូ​មិន​មែន​ចេះ​តែ​ធ្វើ​តាម​ចិត្ត​នឹក​ឃើញ​នោះ​ទេ​។ អ្នក​សាងសង់​ខុនដូ គួរ​តែ​សាងសង់​លើ​គម្រោង​ស្ថិត​នៅ​ទីតាំង​ល្អ​ទើប​អាច​ទៅ​រួច​។

លោក​បន្ត ថា អ្នក​រស់​នៅ​តាម​ខុន​ដូ ពួក​គេ​ត្រូវការ​ភាព​ស៊ី​វិល័យ មាន​ភាព​ងាយ​ស្រួល​ក្នុង​ការ​រស់នៅ ដែល​អ្នក​វិនិយោគ​ត្រូវ​ផ្តល់​ជូន​ពួក​គេ​។

លោក​បន្ត​ដោយ​ព្រមាន​ថា​ ៖ «អ្នក​សាងសង់​ខុន​ដូ​ទាំង​អស់​ត្រូវ​មាន​​ការ​ប្រុង​ប្រយ័ត្ន​ថា តើ​ខុន​ដូ​របស់​ខ្លួន​អាច​លក់​បាន​ឬ​អត់​? តើ​គម្រោង​ខុន​ដូ​នោះ​មាន​សេវាកម្ម​គ្រប់​គ្រាន់ ដើម្បី​សម្រួល​ដល់​ការរស់នៅ​របស់​អ្នក​រស់នៅ​ក្នុង​គម្រោង​របស់​ខ្លួន​ឬ​អត់? តែ​បើ​ធ្វើ​តាម​គេ​ទុក​លុយ​ទៅ​»​។

លោក​បន្ត​ថា ​៖ «ចំណែក​អ្នក​មាន​ដី ហើយ​មាន​ដៃគូ​ពី​ក្រៅ​ប្រទេស​មក​សហការ​សាង​សង់ «​កុំអាល​អរ​» ព្រោះ​បើ​គម្រោង​លក់​មិន​​ដាច់​ពួក​គេ​នឹង​វេច​បង្វិច​រត់​ចោល​យើង​ហើយ ដូច្នេះ​សំណួរ គឺ​ថា​តើ​យើង​មាន​ប្រាក់​សាងសង់​ចប់​ដើម​ចប់​ចុង​ឬ​អត់​?»។

លោក​ឧកញ៉ា សៀ រិទ្ធី បាន​ទទួល​ស្គាល់​ថា​ ៖ «​គម្រោង​ដែល​មាន​ទីតាំង​នៅ​ឆ្ងាយ​ពី​តំបន់ prime location នឹង​ប៉ះ​ហើយ​នា​ពេល​នេះ​»​។ លោក​បន្ថែម​ថា​ ៖ «គម្រោង​ដែល​គ្មាន​ការ​ប្រុង​ប្រយ័ត្ន​អាច​មាន​​ភាព​ជាប់​គាំង​នា​ពេល​អនាគត ដូច្នេះ​វិនិយោគិន​គួរ​ប្រយ័ត្ន​»។

តើ​ការ​លក់​ខុនដូ បច្ចុប្បន្ន​ពិតជា​ធ្លាក់​ចុះ​ឬ​? លោក​ឧកញ៉ា រិ​ទ្ធី បាន​ឆ្លើយ​តប​ថា​ ៖ «​អត់​ទេ​» ដោយ​​លោក​លើក​ជា​ឧទាហរណ៍​ថា ស្ថានភាព​កាល​​ពីមុន​មាន​អ្នក​ទិញ​១០០​នាក់ តែ​មាន​ខុន​ដូ១០​គម្រោង តែ​ពេល​នេះ​ចំនួន​អ្នក​ទិញ​ស្ថិត​ក្នុង​ចំនួន​ដដែល ប៉ុន្តែ​ពេល​នេះ​គម្រោង​ខុន​ដូ​បាន​កើន​ដល់​៣០​គម្រោង​។

អ្នក​នាង អាន សុធីតា នាយិកា​រង​ជាន់​ខ្ពស់​ក្រុមហ៊ុន CBRE Cambodia ហាក់​សម្តែង​មន្ទិល​សង្ស័យ​អំពី​របាយការណ៍​របស់ Century21 រវាង​ខុន​ដូ​ដាក់​លក់​លើ​ទីផ្សារ និង​គម្រោង​ដែល​ទើប​ប្រកាស ប៉ុន្តែ​ទោះ​ជា​យ៉ាង​ណា​អ្នក​នាង​បាន​ថ្លែង​ថា ស្ថានភាព​ពេល​នេះ​មាន​ការ​ប្រែប្រួល ដូច្នេះ​គម្រោង​មួយ​ចំនួន​អាច​ពន្យារ​ពេល​សាងសង់ គម្រោង​មួយ​ចំនួន​អាច​ពន្យារ​ពេល​ក្នុង​ការ​បញ្ចប់​គម្រោង​របស់​ពួក​គេ ព្រោះ​អ្នក​ទិញ​ពីមុន ដែល​ជា​ជន​បរទេស ពួកគេ​បាន​ទិញ​ទុក​លក់​យក​ចំណេញ ប៉ុន្តែ​ពេលនេះ​ពួក​គេ​លក់​មិន​ចេញ​បើ​លក់​ចេញ​ទាល់​តែ​លក់​ក្នុង​តម្លៃ​ពិសេស ជា​តម្លៃ​ទាប​ជាង​ទីផ្សារ​។

Content image - Phnom Penh Post
​អ្នកនាង អាន សុធីតា។ ហេង ជីវ័ន

អ្នក​នាង​បន្ត​ថា​ ៖ «​ស្ថានភាព​ខុនដូ​នា​ពេល​នេះ​មិន​ជាប់​គាំង​នោះ​ទេ គ្រាន់​តែ​ពិបាក​លក់ ហើយ​បើ​ចង់​លក់​ចេញ ទាល់​តែ​លក់​ក្នុង​តម្លៃ​ពិសេស​»​។

អ្នក​នាង​បន្ត​ថា ៖ «​ស្ថានភាព​នេះ អ្នក​វិនិយោគ​គួរ​វិនិយោគ​មិន​មាន​អ្វី​គួរ​ឲ្យ​ខ្លាច​នោះ​ទេ ប្រសិន​បើ​គម្រោង​នោះ​មាន​តម្លៃ​ល្អ​»​។

តើ​រាជ​រដ្ឋាភិបាល​គួរ​ឆ្លើយ​តប​ចំពោះ​​បញ្ហា​នេះ​យ៉ាង​ដូច​ម្តេច​? អ្នក​នាង​ អាន សុធី​តា បាន​ពន្យល់​ថា អ្វីៗ​វា​ទាក់ទង​នឹង​ច្បាប់​នៅ​ក្នុង​ស្រុក​របស់​យើង​។ ស្រុក​យើង​លើក​ទឹក​ចិត្ត​ឲ្យ​មាន​លំហូរ​ទុនវិនិយោគ​មក​ពី​បរទេស​ទើប​គម្រោង​មួយ​ចំនួន​បាន​ប្រកាស​លក់​មុន​ពេល​សាងសង់ ហើយ​ពួក​គេ​យក​លុយ​ដែល​បាន​ពី​ការ​លក់​យក​មក​សាងសង់ ដែល​នឹង​ធ្វើ​ឲ្យ​គម្រោង​មួយ​ចំនួន​អាច​ប្រឈម​មុខ​នឹង​​ការ​ជាប់គាំង ប៉ុន្តែ​នៅ​ប្រទេស​អូស្ត្រាលី រដ្ឋាភិបាល​គេ​តម្រូវ​ឲ្យ​អ្នក​វិនិយោគ​សាងសង់​បាន​៧០​ភាគរយ​នៃ​គម្រោង​របស់​ពួក​ខ្លួន​ ទើប​ពួក​គេ​អាច​មាន​សិទ្ធិ​ប្រកាស​លក់​គម្រោង​របស់​ពួក​គេ​បាន​។

អ្នក​នាង​បន្ត​ថា​ ៖ «​ការ​លើក​ទឹក​ចិត្ត​ឲ្យ​មាន​លំហូរ​ទុន​ច្រើន​ពី​បរទេស ដោយ​អនុញ្ញាត​ឲ្យ​លក់​មុន​ពេល​សាងសង់ គឺជា​ហានិភ័យ​សម្រាប់​ប្រជាជន​»​។

អ្នក​នាង​បន្ត​ថា​ ៖ «​រដ្ឋាភិបាល​គួរ​រឹត​បន្តឹង​ច្បាប់​ទាក់ទង​នឹង​បញ្ហា​នេះ ដោយ​មិន​គួរ​ឲ្យ​មាន​ការ​ប្រកាស​លក់ មុន​ចាប់​ផ្តើម​សាង​សង់​នោះ​ទេ​»​។

លោក អ៊ិន ចាន់នី អគ្គនាយក​ប្រតិបត្តិ​ធនាគារ​អេស៊ីលីដា​ភីអិលស៊ី បាន​ថ្លែង​ថា ឥណទាន​ធនាគារ​មិន​ផ្តោត​លើ​ផ្នែក​នេះ​ទេ ហើយ​វា​មិន​មែន​ជា​ឯកទេស​របស់​អេស៊ីលីដា​នោះ​ទេ​។

លោក​បន្ត ថា​ ៖ ​«​ឥណទាន​របស់​អេស៊ីលីដា នឹង​ផ្តល់​ជូន​អ្នក​ទិញ​លំនៅឋាន​សម្រាប់​រស់នៅ ប៉ុន្តែ​បើ​ទិញ​វិនិយោគ​យើង​មិន​ផ្តល់​ជូន​ពួក​គេ​នោះ​ទេ»។

សេដ្ឋវិទូ​ហាក់​មាន​ការ​ប្រុង​ប្រយ័ត្ន ក្នុង​ការ​លើក​ឡើង​ពី​បញ្ហា​ហានិភ័យ​ក្នុង​វិស័យ​នេះ។

លោក​បណ្ឌិត ម៉ី កល្យាណ ទីប្រឹក្សា​ជាន់​ខ្ពស់​ឧត្តម​ក្រុម​ប្រឹក្សា​សេដ្ឋកិច្ច​ជាតិ បាន​ថ្លែងថា​ ៖ «ឥណទាន​ជា​ទូទៅ​នៅ​កម្ពុជា បាន​កើន​ឡើង​ក្នុង​រង្វង់ ៣០​ភាគរយ ធ្វើ​ឲ្យ​មាន​ការ​ព្រួយ​បារម្ភ​ពី​ហានិភ័យ ពិសេស​វិស័យ​អចលនទ្រព្យ ដែល​ធ្វើ​ឲ្យ​យើង​មាន​ការ​ប្រុងប្រយ័ត្ន និង​រឹត​បន្តឹង​ឥណទាន ដើម្បី​កុំ​ឲ្យ​វា​ធូរ​ពេក​»​។

លោក​បន្ត​ថា​ ៖ «​ឥណទាន​ប្រៀប ​ដូច​ជា​ខ្លាញ់​នៅ​ក្នុង​ខ្លួន​មនុស្ស យើង​ត្រូវ​ការ​ខ្លាញ់​ដើម្បី​ឲ្យ​រាង​កាយ​យើង​ដំណើរ​ការ តែ​ក៏​មិន​ត្រូវ​ឲ្យ​មាន​ខ្លាញ់​ច្រើន​ពេក​នៅ​ក្នុង​ខ្លួន​យើង​ដែរ​»៕

0

Comments

Please, login or register to post a comment

ព័ត៌មានពាក់ព័ន្ធ